مصر مش كبيرة ولا حاجة ..

فى ظل الحرب التى يتعرض لها جمال مبارك امين لجنة السياسات بالحزب الوطنى الديموقراطى حتى لا يكون - جمال مصر - هو الرئيس القادم لمصر من كل أحزاب المعارضة والقوى السياسية التى تطالب بالتغيير وشباب الفيسبوك وغيرهم .

وحملة مصر كبيرة عليك التى قد تبناها أيمن نور والذى يرى فى نفسه - أن مصر مش كبيرة عليه - 

أو ان شئت فقل " نور أكبر من مصر " 

يا أستاذ أيمن نور مصر كبيرة عليك انت كمان وكبيرة على البرادعى وعلى أى حد ممكن يفكر يبقى رئيس مصر القادم .

ولكن الغريب أن توزع التركة فى وجود المورِث

الرئيس مبارك مازال حيا يرزق والحزب الوطنى مستحيل أن يكون مرشحه أحد غير الرئيس مبارك طالما كان حيا يرزق .

والرئيس مبارك من رابع المستحيلات أن يدخل حرب خاسرة فى ظل وجود حوت الحزب الوطنى الابيض .

ولن يكون جمال مبارك رئيسا لمصر فى ظل وجود الرئيس مبارك فى جنبات هذا القصر المهيب .

ولكن على الرئيس القادم لمصر أن يحذر من غضب المصريين الذين فاض بهم الكيل .

** وأنا بشكل شخصى أسرد طلباتى للرئيس القادم بغض النظر عن إسمه لأنى بردة معرفوش :-

1- مجلس شعب زى الناس . يعنى اللى نختاره هو اللى يبقى عضو فى المجلس والعضو اللى يتورط فى أى فساد أو علاج على نفقة الدولة يترفع .. عنه الحصانة 

2- مستشفيات زى الناس لأن المستشفيات الحكومية بصراحة حاجة تكسف .

3- طرق زى الناس . طب تعرف يا ريس ناس كتير أوى بتموت كل يوم على طريق بحر البقر بورسعيد القاهرة بسبب ضيق الطريق والحفر اللى فى الطريق .

4- شوفلنا حل فى كوكتيل الضرايب اللى احنا عايشين فيه ده . كل يوم نسمع عن ضريبة جديدة . كان فيه ضريبة زمان اسمها ضريبة الرؤوس يعنى على كل واحد ضريبة لمجرد انه عايش وزير المالية بيفكر فيها دالوقتى .

5- كى جى ون بقت بفلوس يا ريس .  والمدارس شوية وهتشتغل بالدولار .

6- الجاز والغاز والبنزين يا ريس بيتصدروا لدول الجوار ببلاش وبتقطعوا فى الشعب الغلبان . بقى ده اسمه كلام

7- الكهربا ياريس والله بقت حاجة تقرف الوزير يقول مش بتقطع اكتر من ساعة فى اليوم والله محصل ياريس وهيه الساعة كل يوم قليلة دى مش بتحصل فى موزمبيق . دى الكهربا بتاعتنا فى الاردن واسرائيل وتركيا .

8- محدش لاقى وظيفة فى البلد طب ده مش مقياس للفشل؟

9- اللحمة ب 60 جنيه ياريس انا عارف ان 60 جنيه مش كتير عليك بس كتير اوى علينا والله دا احنا غلابة ياريس

10- مش عايزين قمح من روسيا عشان قمحها مسرطن وفيه سوس كمان . متزودوا سعر القمح شوية والفلاحين كلهم هيزرعوا وناكل من خير بلدنا .

11- ابويا ياريس موظف بقاله 30 سنة وعلى رتبة مدير عام بيقبض 800 جنيه طب ده اسمه كلام ياريس يعنى انت ترضى تديهم لابنك مصروف فى اليوم؟

12- المخدرات بقوا يتاجروا فيها فى الشارع والله والعيال البلطجية مصاحبين الحكومة صحوبية موت يا ريس.

13- الشباب كره البلد والله ياريس . الحق الشباب دول قبل ميعملو حاجة فى نفوسهم ويجيبولنا بلوة .

14- العامل المصرى فى دول الخليج بقى اقل راتب والشاب من دول يبقى معاه كلية وجايب تقدير كمان ويروح يشتغل هناك فى مطعم ب1200 ريال يصرفهم قبل مييجى .

15- هو انتو ليه بتستغربو من الهجرة غير الشرعية متسيبو الشباب يهج من البلد احسن حتى يجيب عملة صعبة للبلد .

16- كل يوم ياريس نسمع عن اكتشافات بترولية جديدة وغاز ودهب وايرادات قياسية لقناة السويس ومش بنشوف حاجة .

17- النيابات بقت كراسى محجوزة لاولاد المستشارين وكبار رجال الدولة .

18- مش عايزين تطبيع مع اسرائيل ولا نصدرلهم غاز ولا حديد يعنى همه يعيشو فى عز وسرور واحنا نعيش فى النار؟

19- مش عايزين الوزرا رجال الاعمال دول عشان منشكش فى شغلهم انه لمصلحتهم ده لو كان مش شغلهم لمصلحتهم اساسا .

20- الحج ياريس بقى ب 40 و50 الف (العادى) طب ده مش حرام انا عارف ان انت اكيد حجيت بس بردة الناس عايزة تحج زيك .
21- سيبوا اللى عايز يقول حاجة يقولها واللى عايز يكتب حاجة يكتبها بدل ميموت ونفسه يقول حاجة .

لو افتكرت أى حاجة هقولك عليها عشان تبقى تحطها فى البرنامج الانتخابى بتاعك عشان ابقى اديلك صوتى واخلى كل اصحابى يدولك صوتهم بردة واعملك جروب ع الفيسبوك كمان ومدونة مجانية (فى تلات خطوات سهلة بردة والله).

ورمضان كريم وكل سنة وانت طيب .

أنا صحيح لسه معرفكش بس لو كان ده برنامجك وعندك نية للتنفيذ أنا واثق ان ربنا هيكرمك وتنجح . 

وعلى الأقل مش هترشح ضدك

**

*