السبت، 5 يوليو 2014

أنا صايم ..

بلاش تستنى اكتب اسمك على الكان

انا صايم .. ومش فايق .. انا هلكان

ومش هرسم فى كراستى 

عشان ساحت الألوان

انا عفريت .. يهد الدنيا لو عايزة

لكنه يخاف من الكبريت .. من القرآن

أنا نسمة وسارحة .. فى عز الحر

تطيّب جبهة النعسان

أنا شعاعك فى ليل خيبان

أنا الضى اللى بعد الفجر

أنا ليلة قدر فى رمضان 

بلاش تنسينى على بابك

غبية غياهب النسيان

انا حبيبك .. يموت ف السكة لو سابك

ومش بشحت على جوامعك 

ولا بطلب أكيد إحسان

أنا مش قرد فى حديقتك تقلبى فيه

أنا يا بنت الكلب .. إنسان

الجمعة، 30 مايو 2014

بالصندوق ..

بالصندوق
كله يقرب .. كله يجرب
كله يدوق ..
والصندوق بقى زى الكيف
لما يجيبنى يبقى لذيذ
يبقى جميل .. يبقى لطيف
واما يسيبنى .. نهد الدور
نلعب غيره .. أصله مخيف ..
**
بالصندوق
كله يقرب .. كله يجرب
كله يفوق ..
الصندوق مش حاكم بينا
مرة بيحكم باسم الدين
مرة بيحكم لجل يطلّع "..."
الصندوق مش "واحد منّا"
واجبك تحفظ روح الناس
حفظ الروح مش منّة
**
بالصندوق
كله يقرب .. كله يجرب
أخد السلم فوق !
لما السلم مش ويّاك
تعمل صرح بجثثى إيّاك؟!
بعدين تطلع فوق ويّاه!
بس الذنب بتاع الناس
انت طلعت .. والجمهور حيّاك
**
بالصندوق
كله يقرب .. كله يجرب
الشوق .. الشوق
مش بالحب هنبنى بلدنا
ولا بالحب نعلّى المَدْنا
لمّا بَنُولّنا الهرم الأكبر ..
قالو لجل تشوف أحفادنا
بس الحب فى عصر الذرة
علشان تِرضى بيه أسيادنا
**
بالصندوق
كله يقرب .. كله يجرب
كله يسوق .
سوق الهبل الأصلى تعيش
اكتب يافطة ..
"الحاج وأولاده بيحيّو الجيش"
وانسى كلام الثورة الخايب
ولا حرية وعدل ومحروق العيش
وعشان المركب تمشى
ارفع رايتك ومتمشيش
**
بالصندوق
كله يقرب .. كله يجرب
كله يروق
قشطة يا ذووق ..
**

الجمعة، 18 أبريل 2014

الصبر جميل ..

من كتر الضرب بموت فيكى
وهسير ع الدرب ف لياليكى
وأسير الحرب يبيع نفسه لكنه شاريكى
مش هصرخ تانى وأقول مواويل
ولا هحكى للناس عن ظلمك
هتحمل .. وانا صابر والصبر جميل
وهكمل حلمك للآخر ما انا اخر حلمك
وهضحى .. علشان خاطر (رابع جيل)
وهوية ايه اللى بتظلمى فينا عشانها
ولعلمك كلها كتابين قرآن . إنجيل
مانتيش الهند ولا انتى الصين
فزاعة خايبين مش مستاهلة التدويل
وان كان عَندك غِية تِموّتى فينا
هنعيش
وان كنا بنشتم فيك دلوقتى
ف حروبك هنكون إحنا الجيش
وان كنتى هتلغى الدعم
هيموت الغلبان ..
لكنك بتحطى السم فى كاسك
هتموتى ..
فى طابور العيش
أنا أعرف إن الأم تموت لجل عيالها
لكن عمرى مشوفت
أم بتقتل فى عيالها
علشان هى تعيش ..

الأحد، 23 مارس 2014

عامل شريف

وليه تكتب كتابها!
وتدارى ليه الفضيحة!
متسيبها ما الكل سابها
واداها يومها الطريحة
واطعن براحتك شرفها
مهى نايمة زى الدبيحة
واعمل شريف
وقول كدابة
ملعون أبوه اللى جابها
وقول صدقونى
وحياة العشم تلقيحة
كتير هيصدقوك
ويذكرو محاسن أبوك
بس السؤال
إنت مصدق نفسك؟!
طب بص تانى ف التسريحة
طب كلم نفسك
واسألها بصدق ..
كدابة؟!
إهرب ..
بلاد ربك فسيحة
فوّت سنة
وإتصل بيها تانى
كدابة؟!
غيرو ليه الشريحة ..
مهى غلطتك
يفيد بإيه النواح
ما الكل بيطعن فيها
خلت هتافنا صياح
ملوش معنى
واللى يموت ف عيالها
نهاديه بسهرة مغنى
يمكن عيالها سفاح!!
خلاص سيبها أما ترسى
واللى جاى أكيد زى اللى راح
موّتو الناس بحسرتها
زودو الجرح بجراح ..

**

الخميس، 21 نوفمبر 2013

مخابرش ..

دورت عليكى كتير
فى السيرش
وكتبت اسمك
وحاجات وياه ..
بس متسألنيش
إيه وياه
علشان ماخابرش
هو أنا كلت؟؟!!
منا قاعد أدام جوجل
م الصبح
كلت؟!!
مكلتش؟!!
كلت؟!!
مكلتش؟!!
ما فاكرش
وانا قلبى اللى بيطير
ف الجو
كان وِده يسافر
لكن علشان يفضل جنبك
مسافرش
واللقمة اللى عشانها بعافر
قلبى فضالك
وعشانك معافرش
وإن كان حبك دين
أهو حبك
وإن كان مش فى الدين
مكفرش
يا بلد لقمان وبلد فرعون
وبلد آسيا وبلد يوسف
والراجل اللى اتجرأ
قال مبلاش تقتلو موسى
لكن عن إيمانه !!
ما ساجرش
يا بلد نيل
نص الشعب بموت عطشان
وابنك نفسه ف شربة مية !
أهو مات ماشاربش
يبقى نتيجة القول
قعدتينى جوارك
ما خابرش ..
ما فاكرش ..
ما سافرش ..
ما كفرش ..
ما ساجرش ..
ما شاربش ..
***

الاثنين، 14 أكتوبر 2013

عيــــــــــــــد سعيــــــــــــد

عيــــــــــــد سعيـــــــــــــد

كل عام وانتم بخير

أعاد الله علينا وعليكم هذه الأيام 

بالخير واليمن والبركات

:)

الثلاثاء، 20 أغسطس 2013

قول الحق ..

ولسه الجرح بيعلم

وبعد سنين 


يقول ع المية امبو

خلاص اصبح بيتكلم

وناس قالت اكيد لأ

وناس هتطق

وناس ناسية تقول الحق

وناس رقصت على السلم

ويتصور ويتدور

وأصله كلب مش أكتر

وناس بتقوله يا معلم

ساعات الدم بيحرر

وطعم الظلم بيمرر

ولما تقوله ليه الدم

تلاقى الباطل بيتكلم

ويعمل عملته ويصرخ

ويجرى قبلى يتظلم

بلاش الخوف

ولو رددت اى كلام

هتبقى خروف

وفتح عشان هتشوف

بلاش شكلك كده مبلم

وخليك فاكر

كام سنة وهتسافر

فقول الحق للآخر

عشان يبقى تمامك

كده

يا فندم

**

ابو براء

الخميس، 15 أغسطس 2013

البرادعى ..


برغم ما قد قيل من أول يوم وطئت قدم البرادعى

 مصر عائدا قبيل الثورة وأنا أحترمه وأقدره

وأعتبره فخرا لمصر برغم إختلاف أصدقائى

عليه إلا أننى وبرغم إنتقادات وجهتها له كثيرة

بعد الثورة إلا أنى لم أصفه يوما بالعميل والجاسوس

 وما شابه لأنى أراه رجلا وطنيا يحب هذا البلد ولكن

بطريقة تستفز البعض ومازلت مصر أنه مصرى يحب

 هذا البلد إلى أن يثبت لى العكس ولكن بالدليل

 الجلى الذى لا يحتمل التأويل ونمر على 

الاحداث سريعا حتى جاء انقلاب 3 يوليو وإتضح

 أن السيسى قد إستغل حب الرجل لمصر وخدعه

بالمشاركة فى تأسيس عهد جديد خلفا للإخوان

ولكنى أرى أن البرادعى لم يتنبه إلى أنه هو القناع

 الثورى الذى يرتديه السيسى ليمر بجريمته التى

 لن يفهما كثير من المصريين الثوريين إلا متأخرا

وأعتقد أنه بدأ كثير من مؤيدى " ثورة 30 يونيو "

-كما يظنون- بدأوا ينتبهون إلى أنها مؤامرة عسكرية كبرى .

حذر البرادعى من فض الإعتصام بالقوة لأنه رجل

 أراه يحترم الدماء ومرت أحداث الحرس الجمهورى

والمنصة وهدد الرجل بالإستقالة ولكن العسكر لم

يعطوه بالا ولا إهتماما لأن البرادعى لم يعد يهمهم

 لأن خطتهم تسير كما يريدون ومهمة البرادعى

من وجهة نظرهم قد أنجزت بشكل كبير ولم يعد

 السيسى ورفاقه الإنقلابيين فى حاجة إلى البرادعى

 وبدأوا يشوهون فى البرادعى فى التليفزيون المصرى

 والذى لا يتحرك حركة إلا بإذن من العسكر ولا يتفوه

بكلمة إلا إذا كانت ترضى عنه العسكر 

- أقصد التليفزيون المصرى -.

وجاءت أحداث فض إعتصامى رابعة والنهضة بمثابة تأكيد

 للبرادعى أنه لا مجال للثورة فى وسط هؤلاء الإنقلابيين

 وأن مؤشر الثورة يعود إلى الخلف ووسط هذه الدماء التى

 أسيلت تحت أى بند وأى مسمى وأن ذلك يتنافى

 مع أخلاق الرجل ومع ما ينادى به منذ وصوله إلى

مصر فاستقال ولكن كثير من جماهيره ومؤيديه

قد إنقلبوا عليه لأنهم وبقدرة قادر قد تحولوا من تفكيرهم

 الثورى " بفعل كرههم للإخوان " إلى حب الإنتقام

 مهما كانت النتائج فصدقوا الجيش فى كل ما يقول

ونسوا أنهم هتفوا يوما " يسقط يسقط حكم العسكر "

وصدقوا وزير الداخلية فى سابقة هى الأولى فى

 تاريخ الثوريين ونسوا أو تناسوا أنهم يوما بل أيام

 بل سنين كانوا يهتفون " الداخلية بلطجية "

شاهد القول أننى أرى من وجهة نظرى أن البرادعى

لم يقدم إستقالته ضعفا منه كما هاجمه أنصاره قبل

 خصومه بل قدمها لأنه

 رجل لا يستطيع أن ينفصل عن مبادئه ...

وجهة نظرى#

الأربعاء، 10 يوليو 2013



كل عام وأنتم بخير

الجمعة، 1 فبراير 2013

لون الدم



لون الدم أصبح عادى
والموت ..
خبر ..
ماسورة مية وانفجرت فى غانا
والفجر ليه متردد
وام الشهيد بتعدد
والهم غطانا
والحلم زهقان
قام وصحانى
ازهق بقى يا راجل
بلاش احلامك الفقرانه
ولعو فى القوت
كلو بيضرب تييت
ابوكى بالشلوت
وانتى اللى غلبانة
والكل عايز يكسب
وانتى بتتفرجى
وانتى اللى خسرانه
بيغرقوكى ليه؟
وخدانا وياكى
واقفين على المركبة
وانتى اللى غرقانه
ويسقطو حبلك
وميعرفوش انك سفينة
لو انكتبلك تغرقى
هيغرقو قبلك ..

الأحد، 18 نوفمبر 2012

ملامح حسن ..

 
ملامح حسن
*********

ضاعت ملامح حسن
والدم طق شرار
والظلم يعبد وثن
واخرته فى النار
***
كان لسه سايب رسمته
"راجل ملوش ايد"
اول خطاوى سكته
الشمع يأبى يإيد
خارج معاه أمانيه
عايزيكمل فرحته
والشنطة والكراس
تعويذة من جدته
عشان عيون الناس..
***
ضاعت ملامح رسمته
واللمة والأصحاب
ومراجعة الكتّاب
والصوت يهز الباب
اتوبيس يعدى بلاد
ويفرح الاولاد
علشان حسن يتعلم
والشمس تشوى قفاه
واقرالنا يا شيخ حسن
كله يقول اللااااااااااااااه
والصوت علا والقهقهة
لما حسن لخبط القراءات
دخّل قالون على شعبة
وورش وبن كثير
ونفسه يبقى وزير؟!!
***
اعقل بقى يا حسن
بص الطريق قدامك
باصص حسن
يصرخ حسن
حاسس بريحة موت
شايف قماش الكفن
60 حسن تحت العجل ينداس
تعويذه من جدتك
علشان عيون الناس
والقطر مبيرحمش
والقبر مبيندمش
وصراخ
عويل
واهات
علشان حسن
واخوات حسن
واصحاب حسن
كله اندفن ...
***
**
أبو براء

الأحد، 12 فبراير 2012

وداعاً أيها الساحر الساخر ..






لله ما أعطى ولله ما أخذ
نسأل الله أن يرحمك ..
فلكم أبكيتنا فى وسط الضحك
وأضحكتنا فى وسط البكاء
وامتزج البكاء بالضحك
حتى يكاد لا يُعرف
الضحك من البكاء ..
***

الجمعة، 10 فبراير 2012

وداعاً دكتور إبراهيم ..








إن القلب ليحزن
وإن العين لتدمع
وإنا لفراقك
يا إبراهيم لمحزونون
ولا نقول
إلا ما يرضى ربنا
إنا لله وإنا إليه راجعون
**

الخميس، 20 أكتوبر 2011

رياح الربيع العربى تهب على ليبيا ..

2011  هو عام التحرر العربى ..


- كانت ضربة البداية فى منتصف شهر يناير
تحديدا 14 يناير فى مطلع هذا العام
تنحى فيه زين العابدين بن على
الرئيس التونسى وهروبه الى
المملكة العربية السعودية بعدما 
عاشت تونس سنينا من القمع والظلم 
وسرقة مقدراتها وقوتها .

ثم تلتها ثورة مصر
والتى بدأت فى 25 يناير 
وانتهت بتنحى الرئيس حسنى مبارك
فى 11 فبراير لتتحرر مصر
من أتعس 30 عاما فى تاريخها 
لتتحرر مصر من الاحتلال المباركى 
بعدما ذاقت نتائج السكوت والصمت والهوان 
حتى وإن كانت ثورتا تونس ومصر لم تكتملا بعد .. 
إلا أنه يكفى الدولتين فخرا 
أنهما أزاحا حكم بن على ومبارك ..
هذان الظالمان المجرمان اللذان 
استحلا مقدرات شعوبهما
وسرقا أرزاقهم واموالهم 
واستحلا دماء شعبيهما دون وجه حق
وكانا حقا يستحقان القتل والتمثيل بهما
فجرمهما لا يقل قدرا عن جرم القذافى .
ولكن كان القدر بهما رحيما
وكانت الشعوب أرحم .
فمازلنا فى مصر نتسائل 
هل يجوز قانونا المثول 
أمام المحكمة " بالسرير أم لا؟ "

فمازلنا نتشدق بتطبيق القانون
مع أن مصر كانت فى عهده ليست دولة قانونية .
ومازلنا ننادى بتطبيق القانون 
على مبارك الذى يرقد فى 
أرقى مستشفيات مصر..
وأنا أطالب من هذه الزنجة بنقل مبارك
إلى مستشفى - المنزلة العام -
ليرى ما أعده للمصريين
فى 30 عاما من الحكم ..
كانت تونس عزبة بن على
بل إن شئت فقل عزبة أبوه 
التى ورثها عنه ..
وكانت مصر هى عزبة 
أبو حسنى مبارك التى أوصاه
قبل مماته بأن يتركها مخضرة
لجمال أفندى ..
ولكن انتهى نظاميهما ..
بصرف النظر عن الشكل .

وجاء يوم 20 أكتوبر من نفس العام
ليتوج - الثورة الليبية الحقيقية -
التى قد بدأت منذ أكثر من ثمانية أشهر
يتوجها بأبهى وأنصع وأجمل تاج للحرية
هنيئا لكم أيها الليبيون
فلقد إنتهت ثورتكم على أجمل ما يكون 
بموت الطاغية القذافى وأبنائه 
ولم يعايركم الجيش الليبى 
بأنه هو من حمى الثورة 
فأنتم من حميتم ثورتكم 
بعزمكم وإرادتكم ضد القذافى 
الذى انتهى بأبشع نهاية 
لأى طاغية وهى القتل على أيدى الثوار 
وضد "الجيش القذافى "
ولا أقول الجيش الليبى 
لأن الجيش لا يقاتل إلا عدوا 
وهذه هى واجباته وأهم مهامه
بل وكل مهامه هو حماية الشعب 
وليس حمايه ديكتاتوريات 
أحق بأن تنتهى بمثل ما أنتهت
به الديكتاتورية الليبية ..
ونهاية لا يسعنى إلا أن أوجه عدة رسائل :-
أولا : أقول لثلاثتهم فى ستين داهية يا قاتلى الشعوب
إلى مزبلة التاريخ ..
ثانيا : إلى شهداء الحرية فى تونس ومصر وليبيا 
نحسبكم من أهل الجنة .
ثالثا : إلى شعوب اليمن وسوريا 
لا تيأسوا وأكملوا المسيرة 
فسوف ينتهى فى هذا العام صالح وبشار
ويبقى اليمن وسوريا .
**

الأحد، 17 يوليو 2011

إذا الشعب يريد ..


جوه الميدان ..
الصبر طال
واهو مهما طال 
مفيش مجال للميت .
لمّا الحياة تتساوى مع العدم !
لما الفساد يطغى !
كان لسه حفنه
والنيل يتردم
وكسرنا خوفنا 
فّتحنا شوفنا
وسنين م الندم
وعشان سكوتنا
نسينا صوتنا
سّلمنا قوتنا
ومشينا فوتنا
*** 
نشّفو كل المنابع للأمل
والخير اتعصر
وجابولنا فرعون
من عصر الأسر
وعشان سرق 
وكمان حرق
ولم الكلاب حواليه
والشعب نازل ف الغرق
قام فكّر انه انتصر ..
شاف الميدان اتحسر !!
*** 
كل الكلاب اتجمعو
قال يا كلاب ايه العمل ؟
قال الكلاب 
حبة هوهوا 
وهيبقو هوا
فكرو إن الميدان 
زى اللى كان
وميعرفوش ..
 إن المكان يفرق ..
إن الزمان يفرق ..
وحاجز الصمت اتكسر
يا شعب لساك قايم تفتكر
60 سنة ذل وهوان
وشوية خَرَس
على حبة طَرَش
حتى اللى كان
غِناه كرامته
ماتت كرامته ..
وبموتها لازم يفتقر .
يا كل إيد اتمدت ع البلد
أكبر عقاب للكلب فيكم 
إنه يعد اللى سرق 
ساعتها هيموت من العدد ..
*** 
جوه الميدان ..
متحيرة كل الوشوش
لكن هدف ثابت
وساعتها بان 
كل اللى نافق 
واللى رافق
نزلو على فشوش
وقلنا خلاص 
حبال الظلم دابت
*** 
جوه الميدان ..
قالو اللى داخل عميل
واللى خارج مُدان
وان اللى مالين الميدان
ودان .. " أمن دولة "
*** 
جوه الميدان ..
وكان اللى كان
وأصبح أكيد
سقوط النظام
" إذا الشعب يريد "
وهيه الارادة 
مش خالد سعيد
ولا حتى الدويقة
ولا حتى السلام
ولا قطر الصعيد
ولا ذل العبيد
تدبير الإله
لبحر الفساد
بشكله الجديد
وربك حسمها
ورافض يزيد
وكل الحكاية
" إذا الشعب يريد " 
*** 

السبت، 21 مايو 2011

قانون الرحمة الجديد !!!

قال شيخ الازهرلصحيفة 
"فرانكفوروح مش عايزينك ألطبيخية 
لو انت جاز تسايتوحقنة بنج" الألمانية
( إن مبارك قام بالكثير لمصر ) 
طبعا قام بالكثير أوى ..
فلم يستطع مواطن كائنا من كان 
أن يسرق عُشر ما سرقه مبارك 
وأكمل (خلال فترة طوييييييييييلة)
(وأنه اليوم رجل مسن ومريض)
أضفت يا فضيلة الشيخ ..
وكأن مصر لم يكن فيها مسنين !!
ومرضى بكل الأوبئة التى أدخلها مبارك مصر
"سرطان وضغط وسكر
وفيروس سى وبى وإم وإن وإففف
وفشل كلوى وبواسير ..
(وأنه يجب مراعاة الرحمة قبل القانون )
وذلك دعا كل الحرامية والنشالين واللصوص
فى السجون المختلفة لتقديم التماسات
للمجلس الاعلى للقوات المسلحة
لإعادة محاكمتهم
"طبقا لرحمة القانون وقانون الرحمة الجديد"
ودعا كذلك المجلس الأعلى للقوات المسلحة
لإصدار مرسوم بقانون على الحيطة
لإلغاء كليات الحقوق والشريعة والقانون 
وتسريح الطلبة والمحامين والقضاة
على الجوامع والكنايس لدراسة قانون الرحمة
الجديد بعدما تم إلغاء العمل بالقانون الجنائى .
**

الخميس، 24 مارس 2011

فرحى يا جدعاااان ..

كلكو معزومين على فرحى
يا مدونين وقارئين
 يوم الاتنين الجاى 28/3/2011
الساعة 9 مساء 
إن شاء الله 
فى قاعة أفراح قصر الندى بالمنزلة دقهلية 
ياريت اشوفكو كلكو 
انا عارف ان انا مقصر
فى حق كل المدونين
بس اعذرونى
عشان كنت مشغول فى التجهيزات
وعقبالكم جميعا يا أجمل مدونين فى الدنيا

الثلاثاء، 8 مارس 2011

حاميها ..


مثال قديم يستشهد به البسطاء 
لجشع اللصوص والحرامية والنهابين
يقولون : ذهب رجل إلى السوق ليشترى
ما يحتاجه البيت لمدة اسبوع 
فجاء اللص وسرق كل المال الذى كان معه 
فلما بحث الرجل عن المال فلم يجده
عاد مهموماً إلى بيته وليس معه
إلا خيبة الأمل والهم
فلما ذهب فى الأسبوع التالى
يشترى إحتياجات بيته وأبنائه
جاء اللص وظن أنه صيد سهل 
ليسرق ما معه من مال
فأمسك الرجل بيد اللص
وقال له
" يا أخى اتكسف أنت اسبوع والعيال اسبوع "

لو كان الرئيس المخلوع حسنى مبارك
هو ورفاقه اللصوص يسرقون إسبوعاً
ويتركون إسبوع لما قامت ثورة يناير
ولكنهم كانوا يسرقون إسبوعاً
ثم فى الاسبوع الذى يليه يسرقون وهكذا

ألم يتذكر مبارك يوماً القسَم
الذى أقسم عليه بأن يحافظ على الدستور
والقانون وأن يحافظ على مقدرات هذا الوطن 
أم أنه كان يقسِم قسَم تجار البهايم ؟
الذين يقسِمون بأن لا يَصدقوا أبدا
" إلا من رحم "
ويبرون هذا القسم .

كلما سمعت عن خسائر مصر 
فى السياحة فى الشهر الماضى
وخسائرها فى الاقتصاد وخسائرها فى كذا وكذا
قلت " ما الفلوس ماليه الدنيا أهى "
فكيف كان هؤلاء اللصوص الشحاتون
يخدعوننا ويوهموننا بأن مصر بلد معدمة
وأنها لو عينت موظف واحد 
تحتاس تجيبله مرتبه منين!

عندما حاولت أن أحسب ثروة مبارك 
على الالة الحاسبة الخاصة بتليفونى المحمول
طبقا لمتوسط دخل الرئيس فى الساعة
فأجابت حاسبة الهاتف بجواب
" عملية حسابية غير معروفة "

عائلة مبارك اشترت 6 فيلات فى شرم الشيخ 
من حسين سالم رجل الاعمال
مساحة الفيلا الواحدة أكثر من 15 الف متر 
سعر الفيلا 500 الف جنيه
أى أن المتر ب 33 جنيه .
وذلك فى مقابل عدم إزالة فيلل
ومبانى لحسين سالم مبنية بالمخالفة.
ألا تعد هذه رشوة وفساد من رأس الأفعى نفسه؟؟

زين العابدين بن على قال الآن فهمتكم
عمر سليمان قال الآن حسنى مبارك فهمكم
القذافى مستحيل أن يقول ذلك
لأنه لا يمتلك هذه الحاسة.
**
*
وبالمناسبة باركولى كتبت كتابى
*

السبت، 26 فبراير 2011

رسالة مهمة إلى المجلس الأعلى للقوات المسلحة ..

نرجوكم أن تفتحوا ملف العمالة
لأمريكا وإسرائيل 
لا ترحموا أحدا مهما كان موقعه 
وكذلك ملف تصدير الغاز لإسرائيل
 

الاثنين، 14 فبراير 2011

كباريه مبارك القومى ..


عندما سمعت الشباب يهتفون 
قبل تنحى الرئيس بساعات 
ويقولون " يا حكومة زوزو الرقّاصة "
لم أفهم المعنى
فمن هى زوزو؟
ولماذا ترقص زوزو؟
وما علاقة الحكومة المصرية بزوزو؟
وهل هى رقّاصة محترمة
من البيت للكباريه ومن الكباريه للبيت؟
ومع علمى بأن السيد المهندس الدكتور
الباشمهندس الحداد الدخيلة العزيز
ابن الأصول الذى ورث العز كابراً عن كابر
أن أحمد عزكان طبالاً
إلا أننى كنت أقول لنفسى
" يلا طبال واحد فى الحكومة مش مشكلة "
وها هو قد ترك فن التطبيل لينتقل إلى فن التهبيل
والتهبيش والتحويل .
وفجأة يقولون أن السيد الدكتور المهندس
العبقرى الإعلامى الأستاذ الدكتور
الفقى أنس الفقى كان راقصاً.
تسائلت هل هناك علاقة فعلا
بين الراقصة والطبال  ؟؟!!
وأيهما يحتاج الأخر أكثر؟
هل الرقّاصة تحتاج الى الطبال أكثر 
ولا يمكن أن تَظهر فنها بغير طبال ؟
واختفى فنها بالفعل منذ أن تولت الوزارة!
أم أن الطبال لو لم يجد رقّاصة
ستدفن مواهبه المدفونه اصلا
منذ أوائل التسعينيات
وانشغاله بإدارة دولة بحجم مصر؟
" مصر مش كباريه يا ريس "
قصدى ياللى كنت ريس
فمصر ليست كباريه 
حتى يحكمنا راقصة وطبّال 
ولا أخفيكم سراً أننى تسائلت
كيف يكون أحمد عز وأنس الفقى 
صديقين لجمال مبارك
قبل أن يديرا شئون الحزب الأوحد فى مصر
ووزارة الشباب ثم وزارة الإعلام 
أو السؤال بطريقة أخرى
أين تم التعارف بين جمال مبارك وأحمد عز ؟
وأين تم التعارف بين جمال مبارك وأنس الفقى ؟
**
*

الجمعة، 11 فبراير 2011

وتنحى الرئيس . ومرحبا بالحرية ..


ثلاثون عاما من الصمت القهرى
ثلاثون عاما من القهر
ثلاثون عاما من الذل
ثلاثون عاما من ضيق العيش
ثلاثون عاما من الفساد
ثلاثون عاما من الرشوة
ثلاثون عاما من حكم الفرد
ثلاثون عاما من البطالة
ثلاثون عاما من المحسوبيات
ثلاثون عاما من الأزمات
ثلاثون عاما من الخداع
ثلاثون عاما من استبداد الحزب الواحد
**
حزين للغاية أننى لم أستطع المشاركة 
مع هؤلاء الرجال
رجال الوطن
رجال حرروا وطنهم بدمائهم
ولكن عزائى أننى أؤيدهم من أول يوم
بكل ما يفعلونه من بطولات
مات من مات واستشهد من استشهد
**
فوائد الفيس بوك لا تعد ولا تحصى
**
لم يكن يعلم النظام يوماً
أن الله بيده مقاليد الأمور
وأن الله يعطى الملك
لمن يشاء من عباده
وأنه أيضا لا يرضى بالظلم والبغى 
وأن لكل ظالم نهاية 
وأن المفسدين لابد وأن يذيقهم الله
من نفس الكأس قبل موتهم
**
شكرا جيش مصر
شكرا قواتنا المسلحة 
التى لطالما علمنا عنها 
النزاهة والشرف
أتموا عهدكم إلى نهايته 
لتسلموا مصر بطريقة آمنة
إلى من يخاف الله فينا
إلى من يرعى حقوقنا
إلى من يصلح ولا يفسد
**
شكرا شباب مصر العظيم
شكرا شباب الفيس بوك
شكرا رجال مصر
سيكتب التاريخ يوماً
أنكم من أضأتم مستقبلنا
وسيُبقى التاريخ ذكركم
**

*

الأربعاء، 9 فبراير 2011

امشى ...



كان الهتاف ممنوع
والبكا ع الميت 
كمان ممنوع
واللى يموت م الجوع
ملوش مدفن ..
*
خلّو الرغيف هدف
وكل الطموح متوى
يدوب الأمل هينور!
يخلو عظيم اليأس 
جوه القلوب يقوى
هوه كده ..
لمّا الضمير بيموت
تموت معاه التقوى
*
واتحجرت كل الدموع
ف عنينا ..
كان الشفا م الجوع
أقصى أمانينا
ولحن الحياة .. ويّاه
أعظم أغانينا
حقوقنا كانت ليهم
وواجباتهم علينا
*
تصرخ بعلو الصوت
جواك يموت الصوت
يتموّته !!
يَتموت !!
كل المشايخ حرّمو 
خروجنا بالنبوت
طيب وليه ناسيين
حقيقة سفينة الوطن
يبلعها بطن الحوت؟!!
*
كنت فين ..
لمّا أراضينا بتتنهب؟؟
كنت فين ..
لمّا محفظتى 
ف جيبى بتتسلب؟؟
دا انا كنت شايف
بس خايف .
كنت فين ..
لما اترمينا ف اللهب؟؟
كنا أرانب ..
ولجل تكمل الغابة
عملت إنك أسد
حسستنى بإنى ف نعيم
ولازم أسكت لَتْحَسد
*
عَرّفتنا ..
إن السكوت ضريبة للأمان
وكلمة الحاكم يموت !!
اسطورة بتتحكى
ولغوها من زمان .
وإن اللى مضروب ع القفا 
دى كرامة للوطن
مش ذل وهوان ..
وإن اللى بيموت ضعيف ..
مع الشهدا فى نفس المكان
وإن الحرامى هوه الشريف
وإن الضعيف يبات جعان .
*
عرفتنا ..
ان اللى يتاخد
وميتعرفلوش مكان !!
أمن دولة ..
وفجأة يتعدم 
من غير متحكم
ولا حتى بتناقش كلامك
فى المداولة ..
وتحلف بإن عينك ع الوطن
مش يمكن عينك الحارسة 
حبة حوله ..
دا الفوضى أهون منكم
هو انتو يااهل الله
آخدين بلدنا مقاولة؟!
*
بتقسّمو ف القوت
واللى يفوت جنبكم
بيموت ..
وفلوسنا متوزعة
ما بين
بنوك
وقصور
ويخوت
*
يتكلمو ع الحرب
وكأن وحده عبر
طيار ف طيارة
ولا عايزة جدول ضرب
ولا معمل المختبر
*
ومصر مش حد ...
ولا انت بانى السد
ولا انت كامب ديفيد
ولا انت سبت وحد
ارحل بقى يا راجل
نهر الفساد اتسد ..
متسيب بلدنا وتمشى
على أى حته تشد
*
دا احنا خلاص ملّينا
دا احنا جبل .....
بمعاولك
30 سنة اتهدّينا ..
شكلك كده مش ماشى
وانت اللى هتمشينا ..
وبلدنا إنت وارثها 
وهتوّرثها ..
وانت اللى بانينا ...
**

*


الثلاثاء، 8 فبراير 2011

ارحل .......


يا عم امشى عشان نشوف مصالحنا ..
**
*

الجمعة، 4 فبراير 2011

جريمة الجزيرة أم جريمة التليفزيون المصرى ؟؟!


المعظم يتفق على أن الجزيرة قناة تهدف
الى إحداث بلبلة فى مصر..
كلنا يعرف أنها قناة عميلة ..
إنها قناة تهدف إلى نقل الزعامة الشرق أوسطية
 من مصر الى قطر..
وأطلقنا عليها قناة الحصيرة وقناة الحقيرة
 وقناة الحظيرة وقناة العميلة وغيرها..
وأنا معكم تماما ..
ولكن أليست جريمة التليفزيون المصرى
أبشع من جريمة قناة الجزيرة؟؟
فالتليفزيون المصرى أكبر مثال للإعلام الغبى
 الذى يتجاهل الحقائق من أجل الحفاظ
على كراسيهم فى حكومة الحزب الوطنى
 وفى دولة الحزب الوطنى
- برغم قرب زوالها - .. 
الدليل فى البداية صورة (القاهرة الآن) العجيبة الغريبة
التى أراها يوميا وفى كل وقت
 فى الأولى والتانية والمصرية والنيل وغيرها
- نفسى أعرف من أين يأتون بهذا الشارع الفاضى -.
بعد ذلك نرى التليفزيون المصرى
يعلن عن مظاهرة مليونية أمام مسجد مصطفى محمود
 وفى المحافظات المختلفة لتأييد الرئيس مبارك
 ولولا الحرج من معرفة الشعب المصرى بعدد سكان مصر
 لقالوا مظاهرة مليارية تؤيد الرئيس مبارك ...
وكذا مهاجمة التليفزيون المصرى للقنوات الأخبارية
 مثل الجزيرة والعربية فى افترائهم على الحزب الوطنى
 لأنهم يقولون أن خيول الحزب قد اقتحمت المتظاهرين فى التحرير وجِمال مبارك ( بكسر الجيم )
 قد دهست الشباب فى ميدان التحرير
وهذه إشاعة تروج لها قناة الجزيرة
- هذا طبقا لما أورده التليفزيون المصرى -
 برغم أننا رأينا خيول الحزب وجمال مبارك
 بأم أعيننا فى ميدان التحرير
 لكن عودنا الحزب الوطنى دائماً
أن نصدقه أكثر من أعيننا ..
من المفروض أن يكون أول مطلب لشباب التحرير
 بعد مطلب رحيل الرئيس مبارك
 إلغاء التليفزيون العميييييل المصرى ..
**
*