الخميس، 29 يوليو، 2010

عربية ترحيل ..


عربية ترحيل
كلنا راكبين
وطريقها طويل
وملهش نهاية

*** 

والدم الواقف فى عروقى
والشمس المرسومة بحكمه
تصرخ وتقول وانا اعمل ايه؟
مغروبى مساوى لشروقى
وانا قلبى المعروف بملامحه
من خوفه ف وسط الناس 
مش لامحه
واللقمة اللى زمان كان بياكلها
ومش خايف
دالوقتى سنابل قمح 
وبيخاف على قمحه

*** 

مهو أصله بحب الرحمه 
لكن مبيرحمشى
وانا لازم اسكت
واسمع سبّى بِودنى 
وبسكت
وامشى
ويخبط فوق راسه ليلاتى 
مش علشان يصحى
لكن مينامشى
والنقط الزايدة فى حروفه
من كتر الهم
بيقول مبلاش الغاز
ونقضيها عيش شمشى
وبيكتب فى تاريخه
واهو قسم أيامه :-
قبل الضحكة ..
ساعة الضحكة ..
وبعد الضحكة..
- سنتين كان لسه مبضحكشى
- بعديهم ضحكة طفل برئ
- وف أول ضؤ
والدنيا تنور أدامه
راحت الضحكة
راحت فين؟! مسألشى
طب لو كانت ضحكة طفل
ولسه معاه ..
ينفع يحكم؟ 
لأ طبعا مبيحكمشى

*** 

هوه سؤال ..
اللى بيسكت أحسن 
وللا اللى يقول الحق؟؟
- اللى بيسكت بيشوف العتمة
لكن ف الاخر
مهما هتقعد جنبه مش راح تسمع
أما اللى يقول الحق
بيشوف العتمة فى أول
كلمة حق بتطلع
والكلمة المزروعة فى حلقه بتوجع

** 

طب ايه علاقة العتمة بكلمة حق؟
قولة لأ صعبة عليه
مش متعود أبدا يسمع قولة لأ
وف وسط الزحمة يسمع قولة لأ
وف ثانية يلف بوشه 
ويقول مين قال لأ؟؟
ولا واحد يتكلم ولا واحد ينطق
ولو ظبطوه يعمل نفسه كان بشرق

*** 

والعَلم اللى انا واقف أحييه ..
كنت أموت لجل افديه
كنت أكيد بفرح بيه
مهما يكون القلب حزين
دالوقتى..
ولا راح أحيى .. 
ولا أموت ..
ولا هفرح ..
ولا هزعل
لو نزلو راسه ف وسط الطين
ولا أفجر نفسى ولا هزعل تانى
دا انا عندى حبيبتى بألف فلسطين
لكن حبى لبلدى ..
حبى لوطنى ..
م اليوم ده ورايح
مش حرقه ..
مش خوف ..
مش شوق ..
مش حمية ..
لكن .. واجب دين

**
N.S
*





هناك 8 تعليقات:

خواطر شابة يقول...

بداية عود احمد
تانيا تدوينتك اليوم فيها مرارة وعتاب
ثالثا فاجأتني هذه الجملة ولا اعرف هل هي مقصودة حرفيا ام هناك معنى خفي علي:

ولا أموت ..
ولا هفرح ..ولا هزعل
لو نزلو راسه ف وسط الطين
ولا أفجر نفسى
ولا هزعل تانى
دا انا عندى حبيبتى بألف فلسطين

دمت بكل ود

BNT ELISLAM يقول...

اهلا بيك وحشتنا التدوينات والكلام بس انا
مع السؤال خواطر شابه لانى ايضا وقفت امام جمله
(دا انا عندى حبيبتى بألف فلسطين)



مستنينك دايما تقبل مرورى

اتمني الشهادة يقول...

اكيد ان الكلام افضل من السكوت مدام كده كده ضلمه لكن ضلمة السكوت بره وجوه انما الكلام اكيد جوانا نور
نور الحق والساكت عن الحق شيطان اخرس
تحيتي إليك
وهل تقصد حبيبتك ( مصر )؟

sun of free dom يقول...

واكيد الكلام يودى ورا الشمس
مش مجرج ترحيل
حسبنا الله ونعم الوكيل

ميرام يقول...

السلام عليكم
(:
جميلة وان كنت حاستها مش موزونه كويس
او يمكن انا قريتها على عجاله
بكتب التعليق وهرجع اقراها تاني
(:
انتظر الجديد
كل سنة وانت طيب
(:

قلم رصاص يقول...

رائعه يا ابوصلاح

كل سنه وانت طيب

P A S H A يقول...

كل سنة وحضرتك طيب وبألف خير وصحة وسلامة إن شاء الله
:)
رمضان كريم

قوس قزح يقول...

أقر الله عينك فى رمضان
بلذة الأسحار وصحبة الاخيار
ورحمة الغفار وجنة الأبرار


رمضان كريم