الاثنين، 23 أغسطس 2010

مصر مش كبيرة ولا حاجة ..


فى ظل الحرب التى يتعرض لها جمال مبارك امين لجنة السياسات بالحزب الوطنى الديموقراطى حتى لا يكون - جمال مصر - هو الرئيس القادم لمصر من كل أحزاب المعارضة والقوى السياسية التى تطالب بالتغيير وشباب الفيسبوك وغيرهم .
وحملة مصر كبيرة عليك التى قد تبناها أيمن نور والذى يرى فى نفسه - أن مصر مش كبيرة عليه
أو ان شئت فقل " نور أكبر من مصر
يا أستاذ أيمن نور مصر كبيرة عليك انت كمان وكبيرة على البرادعى وعلى أى حد ممكن يفكر يبقى رئيس مصر القادم .
ولكن الغريب أن توزع التركة فى وجود المورِث
الرئيس مبارك مازال حيا يرزق والحزب الوطنى مستحيل أن يكون مرشحه أحد غير الرئيس مبارك طالما كان حيا يرزق .
والرئيس مبارك من رابع المستحيلات أن يدخل حرب خاسرة فى ظل وجود حوت الحزب الوطنى الابيض .
ولن يكون جمال مبارك رئيسا لمصر فى ظل وجود الرئيس مبارك فى جنبات هذا القصر المهيب .
ولكن على الرئيس القادم لمصر أن يحذر من غضب المصريين الذين فاض بهم الكيل .
** وأنا بشكل شخصى أسرد طلباتى للرئيس القادم بغض النظر عن إسمه لأنى بردة معرفوش :-
1- مجلس شعب زى الناس . يعنى اللى نختاره هو اللى يبقى عضو فى المجلس والعضو اللى يتورط فى أى فساد أو علاج على نفقة الدولة يترفع .. عنه الحصانة 
2- مستشفيات زى الناس لأن المستشفيات الحكومية بصراحة حاجة تكسف .
3- طرق زى الناس . طب تعرف يا ريس ناس كتير أوى بتموت كل يوم على طريق بحر البقر بورسعيد القاهرة بسبب ضيق الطريق والحفر اللى فى الطريق .
4- شوفلنا حل فى كوكتيل الضرايب اللى احنا عايشين فيه ده . كل يوم نسمع عن ضريبة جديدة . كان فيه ضريبة زمان اسمها ضريبة الرؤوس يعنى على كل واحد ضريبة لمجرد انه عايش وزير المالية بيفكر فيها دالوقتى .
5- كى جى ون بقت بفلوس يا ريس .  والمدارس شوية وهتشتغل بالدولار .
6- الجاز والغاز والبنزين يا ريس بيتصدروا لدول الجوار ببلاش وبتقطعوا فى الشعب الغلبان . بقى ده اسمه كلام
7- الكهربا ياريس والله بقت حاجة تقرف الوزير يقول مش بتقطع اكتر من ساعة فى اليوم والله محصل ياريس وهيه الساعة كل يوم قليلة دى مش بتحصل فى موزمبيق . دى الكهربا بتاعتنا فى الاردن واسرائيل وتركيا .
8- محدش لاقى وظيفة فى البلد طب ده مش مقياس للفشل؟
9- اللحمة ب 60 جنيه ياريس انا عارف ان 60 جنيه مش كتير عليك بس كتير اوى علينا والله دا احنا غلابة ياريس
10- مش عايزين قمح من روسيا عشان قمحها مسرطن وفيه سوس كمان . متزودوا سعر القمح شوية والفلاحين كلهم هيزرعوا وناكل من خير بلدنا .
11- ابويا ياريس موظف بقاله 30 سنة وعلى رتبة مدير عام بيقبض 800 جنيه طب ده اسمه كلام ياريس يعنى انت ترضى تديهم لابنك مصروف فى اليوم؟
12- المخدرات بقوا يتاجروا فيها فى الشارع والله والعيال البلطجية مصاحبين الحكومة صحوبية موت يا ريس.
13- الشباب كره البلد والله ياريس . الحق الشباب دول قبل ميعملو حاجة فى نفوسهم ويجيبولنا بلوة .
14- العامل المصرى فى دول الخليج بقى اقل راتب والشاب من دول يبقى معاه كلية وجايب تقدير كمان ويروح يشتغل هناك فى مطعم ب1200 ريال يصرفهم قبل مييجى .
15- هو انتو ليه بتستغربو من الهجرة غير الشرعية متسيبو الشباب يهج من البلد احسن حتى يجيب عملة صعبة للبلد .
16- كل يوم ياريس نسمع عن اكتشافات بترولية جديدة وغاز ودهب وايرادات قياسية لقناة السويس ومش بنشوف حاجة .
17- النيابات بقت كراسى محجوزة لاولاد المستشارين وكبار رجال الدولة .
18- مش عايزين تطبيع مع اسرائيل ولا نصدرلهم غاز ولا حديد يعنى همه يعيشو فى عز وسرور واحنا نعيش فى النار؟
19- مش عايزين الوزرا رجال الاعمال دول عشان منشكش فى شغلهم انه لمصلحتهم ده لو كان مش شغلهم لمصلحتهم اساسا .
20- الحج ياريس بقى ب 40 و50 الف (العادى) طب ده مش حرام انا عارف ان انت اكيد حجيت بس بردة الناس عايزة تحج زيك .
21- سيبوا اللى عايز يقول حاجة يقولها واللى عايز يكتب حاجة يكتبها بدل ميموت ونفسه يقول حاجة .

لو افتكرت أى حاجة هقولك عليها عشان تبقى تحطها فى البرنامج الانتخابى بتاعك عشان ابقى اديلك صوتى واخلى كل اصحابى يدولك صوتهم بردة واعملك جروب ع الفيسبوك كمان ومدونة مجانية (فى تلات خطوات سهلة بردة والله).
ورمضان كريم وكل سنة وانت طيب .
أنا صحيح لسه معرفكش بس لو كان ده برنامجك وعندك نية للتنفيذ أنا واثق ان ربنا هيكرمك وتنجح . 

وعلى الأقل مش هترشح ضدك
**
N.S
*









هناك 11 تعليقًا:

شمس النهار يقول...

:))))
ازيك يارب تكون بخير

كل سنه وانت طيب

بجد انت مش عايز شخص يرشح نفسه

انت عايز عفريت مصباح علاء الدين نفسه يرشح نفسه

طب تصدق حتي هذا العفريت مايقدرش يعمل اللي انت طالبه ده كله

:)))

تحياتي

فتافيت يقول...

ديه طلقة كلاشنكوفية جامدة جدا
اولا كل سنة وانت طيب.. ورمضان كريم عليك
مصر كبيرة .. وكبيرة اوي
كبيرة لدرجة انها ما ينفعش نقول عليها كبيرة على مين ومقاس مين؟؟
مصر مش شوز..
والله لو حتى شوز بينور في ظل ازمة الكهربا ديه
هي برضو اكبر من كده :))

طلبات مشروعة جدا .. بسيطة جدا
وللاسف مستحيلة جدا.. في بلدنا ديه

عارفة لو الريس اللي هايمسك مصر هايعمل كده
انا هانتخبه لو حتى كان الريس متقال

وهانزل اعمل بطاقة انتخابية.. رغم اني عمري ما فكرت فيها.. وهانتخبه

البوست ده بجد
من اجمل ما قريت عندك

اه صحيح.. هو انت مخاصم فتافيت ليه؟؟
ليه ما بقتش بتزورني زي زمان؟

قلم رصاص يقول...

كل اللي ف نفسك هعملهولك
بس والنبي تديني صوتك
هههههههههههههه

كل سنه وانت طيب ياراجل ياللي طلعت مش طيب .....^_^

حتى الرساله مبعتهاش
انت بدأت تحويش للفرح من دلوقتي لدرجة انك بتحوش حتى رسايل الموبايل؟
ههههههههههههه

ع
م
ا
ر
ن
ا
و
ي

مطالبك مشروعه يافتى
هيجي يوم ان شاء الله وتتحقق ان مكانش في حياتك هيبقي في حياة احفادك ان شاء الله
ويجعله عامر وايهاب وعبده ابو الفضل كمان هههههههههههههه

ابقي قابلني
قصدي كلمني

مالك ومال الضرايب
انتوا لسه شوفتوا حاجة؟
هههههههه

سلام

ليس فقيرا من يحب يقول...

هههههههههههههههههههههههه كل عيش يا مواطن

وبعدين فيك يا ابوصلاح انت مش بتهمد ليه ياجدع اييييييه الجشع والطمع ده كل دى طلبات ياساااااااااااااااااااتر هو الريس خلفكم ونسيكم ياجدع عالم غريبه صحيح لتاااااااانى مرة كل عيش وملكش دعوة مش هاقعد انا اخرجك كل شويه من حفرة الله
كل سنه وانت طيب ومتحرمناش من طلقاتك

FAW يقول...

فعلا عندك حق يا أستاذ مسدس . .
أحسن واحد ممكن يرشح نفسه هو الكبير قوي . .
فكره جامده جدي . .

حلم بيعافر يقول...

صلااااااااااااااااااح بيه

كل سنة وانت طيب يا زعيم

واطمن زى ماقالك السيد بس صوووووووتك

أم الخــلـود يقول...

اصحى يا نايم ووحد الدايم

أرجوا من المدونين الموقرين أن يضعوا شعار الحملة واسمها فقط فوقها

(حملة الجسد الواحد)

في الشريط الجانبي لمدوناتهم كدلالة على وحدة صف أمة محمد

http://dndanh111.blogspot.com/2010/06/blog-post_14.html

ومن أجل قيام الولايات المتحدة الإسلامية

http://dndanh111.blogspot.com/2010/06/blog-post_17.html

جعله الله في ميزان حسناتكم .. آمين

فشكووول يقول...

السلام عليكم صلاح
يا صلاح الحكايه باختصار
احنا عايزين بلد زى الناس
عايزين دولة مؤسسات زى الناس
عايزين حكومه زى الناس
لو فيه اللى زى الناس ما كانش دا يبقى حالنا
ومصر مش كبيره على اى حد ولا اى حد كبير على مصر
انا عايزين رئيس لمصر وخلاص
مش عايزين زعيم
ولا عايزين معلم
ولا عايزين ملهم
ولا عايزين حكيم
ولا عايزين الكلام الاهبل بتاع العرب دا كله
عايزين رئيس وخلاص ان شاء الله يكون فشكوول
او صلاح عشان ما تزعلش وممكن فشكول ينفع وينجح وبرضه ممكن صلاح ينفع وينجح وباختصار لو دوله مؤسسات اى حد يقدر ينجح من غير كبيره عليه او كبير عليها ...
وخلاص

اقصوصه يقول...

رمضان كريم :)

فتاه من الصعيد يقول...

كل سنه وانت طيب وبخير .... ومعذره لعدم متابعتي لمدونتك في رمضان :)

عيد سعيد :)

كلمات من نور يقول...

يا سلام على الطلبات ...غالي والطلب رخيص .و أحلى ما فيها كلمة : زي الناس ..زي الناس ...هو احنا بقينا زي الناس؟

عيد سعيد