السبت، 17 أبريل 2010

محور الشر



أوم أنا ماشى فى ميدان عبد المنعم رياض
 فى التحرير إذ لقيت واد بيقولى تسجل معانا؟؟
ببص لقيت البت المذيعة بتقولى بكل سهوكة كده
تسجل معانا ؟؟
نسيت الواد خالص
ولقيت فى ايدها مايك بتاع برنامج 48 ساعة
 اللى بييجى على المحور
وقلتلها ماشى اسجل
قالت عارف عن ايه؟؟
قلت مش مهم
المهم قالتلى احنا بنتكلم عن العلاوة الاجتماعية
وانها بقت 10 فى المية ايه رأيك فيها؟
قلتلها دى حاجة كويسة خالص
بسسسسسسسسسسسسس
- أول مقلت بس راحت قايلة ايوة كده أنا عايزة حد فاهم
هو أنا بفهم؟؟ يمكن
(الظاهر اللى قبلى كانو بيشكرو اوى فى العلاوة 
 مهى بردة طيبة)-
وقلت يا ترى هيه بتتناسب مع
فروق الاسعار بين السنادى والسنة اللى فاتت؟!
لأ طبعاااا
وضربت مثل باللحمة
عارفينها؟؟
اه هيه الحمرا دى
قلتلها السنة اللى فاتت كانت بخمسين جنيه تقريبا
 السنادى ب80 و90 ده فى القاهرة
يعنى الفرق أكترمن50 فى المية
أما العلاوة كااام؟؟
10 فى المية
 يبقى حلوة وللا وحشة؟؟
حلوة طبعا
المهم مشيت أشوف حالى بقى
افتكرت حاجة وكنت عايز ارجعلها والله
بس اتكسفت بقى
افتكرت(اتصرف يا نظيييف!!)
ونظيف طبعا بيتصرف على قفانا
 ( جاز غاز بنزين ) وما شابه
وانا بقولها بعلو صوتى اهو
 لو العلاوة هتجيبلنا الضغط
اللى حصل السنة اللى فاتت
مش عايزينهااااا
المهم جيت من القاهرة لقيت الدنيا اتفضحت
 انى جيت فى التلافزيون
وكأنّى سيد على وللا هناء سمرى
ده حتى قلم رصاص وانا بقول هيبقى عاقل
 وآخد على الاضواء والشهرة
لقيته بردة بيقولى على الحكاية دى
( اللهم احمنا من شر الاضواء والشهرة )


هناك 13 تعليقًا:

فتــافيت (رحاب الخضري) يقول...

نحجز الاول.. التعليق الاول
وبعدين نقرا ونعلق كمان.. :))

فتــافيت (رحاب الخضري) يقول...
أزال المؤلف هذا التعليق.
فتــافيت (رحاب الخضري) يقول...

سوري يا استاذ كلاشنكوف :))
اصلك في وسط الكلام قولت قلم رصاص .. فعلى ما جيت اكتب التعليق.. لطش معايا غلط :)) سوررررررري جدا

التعليق كلاكيت تاني مرة
اكششششششششششششششن

هههههههههههههههههههههههه
حلوة يا مسدس باشا
فكترني بنفسي لما طلعت في الثقافية.. كنت مكسوفة جدا وماقولتش لاي حد خالص.. ولما رجعت البيت اتصدمت ان الناس كلها اتفرجت بسبب اخويا الصغير فضح الدنياااااااا :)) والحقوا فتافيت طالعة ع الهوا الساعة 5 على النيل..

نيجي للجد بقى
موضوع العلاوة ده.. بجد حاجة مستقزة جدا.. معرفش اصلا بيتعبوا نفسهم ويدوها للموظفين ليه؟؟؟.. يلا لنا الله
وبالمناسبة.. هي اللحمة لسه حمرا زي زمان :))))))

غير معرف يقول...

هههههههههه

طيب موش كنت تقول على الحلفه قبل ماتتعرض علشان نتفرج :))

عموما كل لقاء وانت طيب ... هتطلع في 90 دقيقه امتى بقا :)

تحياتي

ليس فقيرا من يحب يقول...

هههههههههههههههههههه

وطلعت فى التلافزيون

والله وزهزهتلك يا ابو صلاح والمجد فتحلك

ابوابه هههههههههههه

ابقى افتكرنا بقه وانت بتتكلم عن

رأيك فى نزاهه الانتخابات الرئاسيه

الفترة الجايه دى فترتك يا معلم ههههه

قلم رصاص يقول...

أيوا يابني انا واخد على الشهره عادي
دي طبيعتي هههههههههههه

انما انا لما قولت لك في الميسدج كان من باب انك اول مره تتشهر وتيجي في التي في اللي هو التلافزيون عندكم ..فانا استغربت انت ازاي هتعمل راسك براسي
ههههههههههههههه

حظك اني شوفتك لايف
قعدت اقول لنفسي : انا شوفته فين دا قبل كدا ؟ امممممم ..اه صحيح دا صلاح افندي علاوه بتاع احنا بتوع المسدس ^_^

بس كنت مستعجل ليه وحلقت لهم؟
أكيييييييييد انت وعدتهم بحلقه كامله في الاستوديو..صح ؟
ههههههههههههه

بس حقيقي كنت منور
منور لدرجة ان فاتورة الكهربا عليك المره دي ههههههههه

ابقي خليني أشوفك ياعم المهم

سلام

خواطر شابة يقول...

ههه مبروك الشهرة ياسيدي وعقبال متسجل مع منى الشاذلي في العاشرة مساء

كــركــبــة دمـــاغ ㋡ يقول...

هتتغر علينا بقى ولا محمد حماقي ونيجي نقولك ممكن تمضيلي لو سمحت ، او ممكن اخد صورة معاك يا كابتن ، بس انت قولت ايه عشان انا مالحقتكش ، اوعى تكون خبطت في الحلل ، ده حتى البت المسهوكه تزعل منك هههههههههههه

ماشي ياعم المشهور ابقى عبرنا بس بعد كده

وعقبال لقاءات تانيه كتير ،، وانت دايما بخير <<< سجع ده وانا مش واخده بالي ولا ايه هههههههههه

بوست لذيذ

و
تحياتي جداً

كلمات من نور يقول...

دي حاجه كويسه خالص

مسدس صغير على التي في

أنا كمان مرة في رمضان كنت في القاهرة برضه و كنت قاعده مع الأولاد في مطعم بياكلوا حاجه قبل موعد القطار لقيت مذيعه ملونة بتقولي ممكن أسجل معاكي حاسألك عن فزورة وأقولك الجايزة مائة دولار و تعملي نفسك مش عارفه وبعدين تقولي اه عرفت الحل يا ستو ...وبعدين تقوليلنا أنا اتبرع بالمائة دولار للجهة الفلانية....

داه إيه الحلاوة دي ....يعني داه يدل على إن ال100 دولار اليومي داه كان مجرد برنامج رمضاني خفيف ...ادي البرامج والا بلاش (:
تحياتي


أسرة منتدى زبد البحر يتمنى منكم التواجد معنا في منتدى عالم المدونيين والمدونات

http://mhg1962.ba7r.org/forum.htm

محمد فؤاد (صاحب عمود النور) يقول...

والله اعصابى تعبت
انا مش عارف هما بيعملوا فينا كدا ليه؟؟
مهو طول ماحنا ساكتين طول مانت بتضرب
10%؟؟؟
تصدق الحاجه هتغلى 50 %

حسبى الله ونعم الوكيل

حلم بيعافر يقول...

ههههههههههههههههه

ابقى افتكرنا بقى يابوصلااااااااح

اما اروح ادعبس بقى ع الحلقة اللى انت طلعت فيها عشان اوريها لاصحابى واتمنظر عليهم بانى اعرفك

أبو العريف يقول...

يا راجل ده لو انا كنت عملت بوسترات

وكتبت فتي البرامج الاول

بس هو السؤال هنا

يعني ايه علاوه اصلا

كويس انه مكنتش انا اللي قابلوني

كنت قلتلهم

بسم الله الرحمن الرحيم الاجابه تونس

واحسن لاعب ف ماتش برشلونه وريال مدريد هو ابو تريكه

غير معرف يقول...

عيد الراجحي
اشكرك علي اثارة الموضوع
فيه نقطه مهمه جدا تيجي ف دماغي كل ما افتكر موضوع العلاوه ده
مين مستفيد من العلاوه ؟
ومين متضرر من رفع الاسعار؟
فجوه كبيره جدا ف العدد لان المستفيد من العلاوه الموظفين بس وهل كل مصر موظفين؟
المتضرر من رفع الاسعار كل مصر"؟ كل ده بفرض ان العلاوه والاسعار زيادتهم بتكون متوازنه
انا وانت مش موظفين يا فرحتي لما الموظفين ياخدو العلاوه والاسعار تزيد انا وانت زنبنا ايه