الاثنين، 4 مايو 2009

اللى ملوش كبير يشتريله خنزير


الولايات المتحدة الامريكية كانت بتتفاخر - يعنى بتتباهى - انها من الدول اللى مدخلهاش فيروس انفلونزا الطيور.

وكانت تتباهى انها وضعت اسوار وقائية حصينة حول حدودها لحماية البلاد من دخول هذا الفيرس.

طبعا الكلام ده مش شطارة امريكا انما ده حكمة ربنا..

اتفاجئنا باللى ابشع من انفلونزا الطيور وهوه انفلونزا الخنازير اللى تعتبر امريكا والمكسيك هى الموطن الاصلى للفيروس ده .

الفيروس انتشر فى امريكا والمكسيك وفى اكتر من عشرين دولة فى العالم حتى الان برغم انه لم يتعدى اسبوعين على اكتشافه.

وانتشر فى ارجاء امريكا اسرع من الصوت بالمناسبة "اسرع من الصوت يعنى زى اسماعيل يس ما عرّفه . قال ان الطيارة اللى اسرع من الصوت لو رايحة اسوان مجرد انت متقول اصصصصصصص قبل متقول واااان كانت وصلت" ما علينا المهم امريكا مسجلة اكتر من 250 حالة اصابة لحد دالوقتى والمكسيك اكتر من 350 حالة تقريبا حاجة ترعب بجد .

يعنى انا عايز افهم هى الخنازير دى فرض على الناس اللى بياكلوها؟؟؟!! مش هقول الدين الاسلامى محرمها لكن هقول حتى الطب بيحذر منها جدا وبيقولو انها بتسبب امراض خطيرة..دا حتى الخنازير شكلها وحش جدا والله يمكن يكون الكلاب احسن منها.

خاصة ان الخبراء اللى ربنا يخليهم لينا بيقولو ان المرض ده هيدخل مصر فى غضون الشهر القادم " لا قدر الله ".. يعنى لازم السلطات المصرية تاخد حذر من نار للموضوع ده ولازم يعدمو كل الخنازير اللى فى البلد وما اكترها. واللى مش عاجبه يتعدم معاهم. ويبقو يعوضو اهله او حتى يعتبروه مات فى العبّارة وخلاص.واللى ييجى مصر من امريكا لازم يروح الحجر الصحى ان شالله اوباما نفسه ولازم يخدو بالهم جدا من نتنياهو اصله جاى مصر الشهر ده..

ومنظمة الصحة العالمية طالبت بتغيير اسم الفيروس من انفلونزا الخنازير الى h1 n1 والله مش فارقه لان لو واحد قال فيروس h1 n1 هنقوله مش تقصد انفلونزا الخنازير؟؟ اصل بعيد عنكو مستخفى.

الخوف بقى لينتشر الفيروس ده ويبقى وباء عالمى . انتو عارفين اخر وباء عالمى كان تقريبا فى التمانينات مات فيه 40 مليون فرد من شتى بلدان العالم " رقم مهوووول "

فلازم يحاصرو المرض ده بشتى السبل ويعدمو الخنازير اللى فى العالم كله لمنع انتشار الفيروس ده " ده مجرد اخد بالاسباب " قبل حتى ميطلع انفلونزا الكلاب وللا القطط وللا الفران .

يا إلا نسيب كوكب الارض ونروح مثلا نسكن على المريخ بس المشكلة لنلاقى هناك انفلونزا الكواكب.

يعنى بالعربى الفصيح مفيش حد كبير على الاوبئة والامراض لان ربنا يقول للشئ كن فيكون..

ربنا يستر على مصر والدول العربية والاسلامية..


هناك 79 تعليقًا:

Sweet Violet يقول...

ربنا يستر فعلا و يهدى البشر اللى مش موافقين على اعدامهم

حياة بلا روح يقول...

لوكان الحل الوحيد هو اعدام الخنازير في العالم فإستحالة يعدموهم لأنها رمز ديني وغربي ..

المنظمات الدولية بتعترض بشده على ذبح مصر للخنازير مش اعدامها مش مشكلة ان الوباء يصيب الناس بعكس انفلونزا الطيور الي تم فيها اعدام اعداد لا تحصى من الطيور من غير اي اعتراض ..

سبحان الله وباء مجهول الزمان والمكان ربنا يستر




تحياتي العطرة

د. ياسر عمر عبد الفتاح يقول...

{بنا يستر علينا من المرض ده
ده لو جه مصر .. هيجيب ضلفها

اللي خلا أنفلونزا الطيرو واللي متجيش حاجة جنب الخنازير مبهدلانا

ربنا يستر
مش عارف ليه أنا متوجس خيفة

mohamed ghalia يقول...

ربنا يستر عليناااااااااا

MaNoOoSh يقول...

مش فاهمة انا منظمات عالمية ايه اللى معترضة على دبح الخنازير؟؟؟
يعنى احنا هنستنى لما المرض ينتشر ويتوغل ويستمر ان شاء الله علشان يقولوا ان مصر قصرت فى اخذ الاجراءات اللازمة للوقاية من المرض.
ربنا يستر علينا احنا اصلا مش ناقصين امراض واوبئة.. دة الواحد لو نزل الشارع نص ساعة بيرجع البيت اصلا مش قادر يتنفس من التراب اللى بلعة

MǿиY El-Shreef يقول...

ياساتر ياصلاح ايه الصورة دي

بقى دي حاجه نتصبح بيها كده

عموما ع فكره عندك حق ف انهم لازم يعدموا الخنازير الناس جاهله وعمالين يتخانقوا مع الامن

وكله عشان فلوس ولا تسوى هتعملهم ايه دي بقى لما يموتوا بالمرض

ع فكره حاجه تخوف اوي لو اتحول لوباء فعلا

ربنا يستر علينا بجد

سلام

تامر علي يقول...

لو أخدنا احتياطاتنا الوقائية وعملنا اللي يفرضه علينا العقل ...يبقى سيبنا لمين ممارسة دور الغباء الإنساني في أعتى صوره واللي بنقوم بيه على مر العصور ؟؟؟؟؟ مش مبدأنا أبداً .... الحياة لازم يكون فيها أكشن :)

e_emy يقول...

اكيد ربنا قادر ع كل شىء

ربنا يستر علينا

بوست جميل (:

e_emy يقول...
أزال المؤلف هذا التعليق.
Empress appy يقول...

هو ارتفع لرقم 5 يعنى وباء يعتبر والناس برضه مش عاوزه تفهم

ساره يقول...

ياصلاح
والله العظيم ماتعرف كم مره احاول اعلق عندك وما اقدر

كل ما اتذكر صوره الخنزير يععععع
طيب كان حطيت كاركتير افضل :(

الله يستر علينا من الامراض اللي جايه
الله يحمينا ويحمي امه محمد اجمعين امين

وردة يقول...

طيب هو مفيش خنازير علي المريخ
ابقي احجز لينا معاك احنا وباقي المدونين ينوبك ثواب
حتي الناس اللي بتأكل الخنازير طلعوا في التليفزيون وقالوا مش عاوزينها
اتفرج بس امبارح في التليفزيون علي المظاهرات اللي بين قوات الامن واللي بيربوها"الزبالين" والله لو حيخدو حد من ولادهم مش حيعملو كده
ومش قادرين يفهمو ان الخنزير من دوول مليان بلاوي زرقه
ربنا يرحمنا
سلام

Enas Amen يقول...

كان والدي بيحذرنا مش ناكل أي حاجة من برة

فأنا جبت فراخ بانيه وباكل

وببص ع الراجل جمبي . . فاتح الجورنال وبيقرأ

والاقي مكتوب عن انفلونزا الخنازير او h1 n1 زي ما بتقول والواحد حاسس انه ...

بجد شكلها مقزز جدا

ده سبحان الله . . الإسلام واضح جدا وصريح

والطب بعده عمال يثبت آياته

ده الخنازير ديه لوحدها بلاوي

ده اسمها واحده اهئ اهئ يا ساتر

ربنا يرحمنا

القدر و انا يقول...

صاصا
عجبنى اوى تعليق تامر على
اذا اخذنا احتياطنا نسيب لمين الغباء
ونستمتع بالاكشن امتى
تحياتى لك

dodda يقول...

قال رسول الله صلى الله عليه وسلم


حسبي الله ونعم الوكيل امان كل خائف"

صدق رسول الله


ربنا يستر

مسدس صغير يقول...

sweet violet
ربنا يستر
حاجة تخوف
نورتى

مسدس صغير يقول...

حياة
مش رمز دينى ولا يحزنون!
يعدموها ويعدمو ابوها
طب ما الفراخ رمز دينى.
ههههه
حياة البشر اهم من حياة الخنازير
اذا كان يا حياة ايام انتشار وباء الكوليرا فى مصر كانو بياخدو المصابين يدفنوهم احياء. هتيجى على الخنازير يعنى؟؟!!!!!!!!
ربنا يستر
نورتينى

مسدس صغير يقول...

د/ياسر
كلنا متوجسين خيفه بصراحة
ربنا يستر
والله حاجة ترعب.
يلا ربنا يستر
نورتنى يا دكتور

مسدس صغير يقول...

محمد غالية
ربنا يستر
نورتنى يا باشا

مسدس صغير يقول...

manoooosh
ربنا يستر
دى كارثة بجد ولازم يعدمو الخنازير مهما كانت النتايج.
ايام الكوليرا كانو بيعدمو البشر المصاب بها
اما الخنازير؟؟؟
يلا ربنا يستر
نورتى

مسدس صغير يقول...

مونى الشريف
انتى عارفة انا متعمد احط الصورة القذرة دى عشان اورى الناس اد ايه الخنزير ده قذر.
فعلا المفروض يعدمو كل الخنازير مهما كانت النتايج
اشكرك على التعليق
نورتينى يا مونى هانم

مسدس صغير يقول...

تامر على
هههههههههه
فعلا احنا تقمصنا الدور ده وطالع علينا اوى
ومنقدرش نسيبه ربنا ميحرمو مننا
اشكرك على التعليق
نورتنى

مسدس صغير يقول...

e-emy
طبعا ربنا قادر على كل شئ
ربنا يستر
اشكرك على التعليق
ونورتى البلوج

مسدس صغير يقول...

Appy
هوه كان تقريبا 4.5 دا لو وصل 5 تبقى كارثة
ده اخر رقم..
يللا ربنا يستر
بجد سعيد بتعليقك
نورتينى

مسدس صغير يقول...

سارة
انا متعمد احط الصورة القذرة دى عشان الناس تعرف اد ايه الخنزير ده قذر
يلا ربنا يستر
ويحفظ بلادنا من الفيروس ومن جميع الامراض والاوبئة.
اشكرك على التعليق
نورتينى يا سارة

Unknown يقول...

اممممممممم اممممممم اممممممممم
ربنا يستر علينا وعلى الجميع
بس يعنى انا شايفة كده ان
عندك بداية (وباء الدكترة)
ولا انا متهيأللى يعنى :)
انت بتزاحم الدكاترة
ولا ايه يامسدس صغير؟
طب معاك ترخيص
مزاولةالمهنة؟

Unknown يقول...

رقم الترخيص وتاريخ التخرج من فضلك:)

مسدس صغير يقول...

وردة
لا معتقدش ان فيه خنازير على المريخ.
بس يمكن نلاقى حاجة اصعب
ههههههه
يلا ربنا يستر علينا فى كل حتة
فعلا الناس دى متخلفين ومش مدركين حجم الكارثة.
ربنا يستر.
اشكرك على التعليق
نورتينى

Unknown يقول...

تدوينة جميلة يامسدس
بصرف النظر ان الموضوع
حزيينى شوية :مرض ووباء
وكده يعنى.لكن تناولك له
فعلا سلس وحلوو كمان.

مسدس صغير يقول...

enas amen
فعلا منظرهم مقزز جدا
مش عارف الناس دى بتاكلها ازاى.
طبعا الدين الاسلامى محرمها بس احنا مش هنقولهم كده
احنا هنقول الطب بيحذر منها يا جماعة
ربنا يستر علينا
اشكرك يا ايناس على التعليق الجميل
ونورتينى

مسدس صغير يقول...

القدر وانا
وانا والله معجب بالتعليق ده جدا
جميل اوى
هنسيب الغباء لمين؟؟
يلا ربنا يستر
اشكرك على التعليق
نورتينى

مسدس صغير يقول...

dodda
فعلا حسبنا الله ونعم الوكيل
ربنا يستر على مصر وسائر بلاد المسلمين
سعيد بتعليقك
نورتينى

مسدس صغير يقول...

norahaty
ممممممم
ربنا يستر فعلا علينا الموضوع يخوف
هو انا مقلتلكيييش؟؟؟
مش انا اما لقيت المحاماة مش جايبة همها فتحت عيادة.
ااااة
ومعايا ترخيص مزاولة المهنة.

مسدس صغير يقول...

norahaty
اة معايا ترخيص مزاولة المهنة
مش اللى بييجى من عم عبده الحلاق؟؟؟
ااااة معايا
بالامارة رقمه 3 مقصات مشطين فوطة..
ههههههههه

مسدس صغير يقول...

norahaty
اشكرك على التعليق الجميل
بجد سعيد بمرورك وبعربياتك كمان
نورتينى

ريمان يقول...

السلام عليكم


هههههههههههههههههه

انا بضحك ع العنوان

صله يفطس من الضحك بجد

دمك خفيف يا صلاح

بص بجد بقه انفلونزا الخنازير ده بلاء من ربنا عظيم

وسبحان الله بجد ان اصلا موطنه امريكا

والله تذكرت الايه اللى بتقول ويمكرون ويمكر الله والله خير الماكرين


سبحانك ربى

بس بجد ربنا يستر على مصر

وربنا يعافينا يا رب

لجين أبو الدهب يقول...

سبحان الله ..

يمهل ولا يهمل ..

Kiara يقول...

ربنا يسسسسسسسسسسسسترررررررررررررر

د/عرفه يقول...

مفيش حد كبير على المرض

ومن على فالله أعلى

هندسة وصفية يقول...

هنقول ايه بس لا الخنزير ده له دين و لا هو حيوان مقدس
بس نعمل ايه في الدماغات الي حمضت

صمت الحنين يقول...

ربنا يستر

رحلتنا في الحياة يقول...

ربنا يستر ويعفينا من اى كارثة ممكن تحصل

مسدس صغير يقول...

ريمان
لا لا اضحكى براحتك
ههههههه
فعلا ويمكرون ويمكر الله والله خير الماكرين
ربنا يستر على مصر والدول الاسلامية والعربية
اشكرك على التعليق يا ريمان
نورتينى.

مسدس صغير يقول...

لجين ابو الدهب
فعلا يمهل ولا يهمل
نسأل الله السلامة
اشكرك على التعليق
نورتى البلوج

مسدس صغير يقول...

كيارا
ربنا يستر
نسأل الله العافية
نورتى البلوج

مسدس صغير يقول...

د/عرفة
الله يعز من يشاء ويذل من يشاء
ربنا يستر
يرفع اقواما ويخفض اقواما
اشكرك على التعليق
نورتنى

فوبيا - سايكولاند يقول...

ولا عندنا انفلونزا خنازير ولا حصنه ولا طيور بعون الله واييييييييييييييييييييييييييييه

مسدس صغير يقول...

هندسة وصفية
فعلا لا هوه حيوان مقدس ولا وصفة سحرية ولا علاج.
بس اهو كده وخلاص
اشكرك على التعليق

مسدس صغير يقول...

صمت الحنين
ربنا يستر
اشكرك على التعليق

مسدس صغير يقول...

ايوشة
ربنا يستر على المسلمين والبلاد العربية
اشكرك على التعليق
نورتينى

مسدس صغير يقول...

فوبيا سايكولاند
هههههههه
نسأل الله ذلك
نسأل الله العفو والعافية
اشكرك على التعليق
نورتنى

mimi يقول...

بجد الموضوع كبير زي ما بتقول
ربنا يعافينا من كل الأمراض
ده مش مرض
ده وبااااء ومحدش حاسس بحاجة وبيقوللك إن جامعي القمامة عاملين مظاهرات علشان رزقهم هيتقطع ...

ومحدش فاهم حاجة ...
ربنا يستر

mimi يقول...

ايوة صحيح قريت خبر بيقوللك إن قرار مصر بذبح الخنازير له جذور دينية ...

فيه ناس تحب تولعها بس وأهو القرار ده جالهم علي الطبطاب

هنلاقيها منين ولا منين؟؟؟

مسدس صغير يقول...

mimi
طبعا الناس دى مش فاهمة حاجة
لازم يبقى فيه تعاون شوية
يلا ربنا يستر

مسدس صغير يقول...

mimi
والله يقولو اللى يقولوه
ندبحهم وخلاص
احنا معندناش حد فى مصر بيعبد الخنازير يعنى.
اشكرك على التعليق
نورتينى

Unknown يقول...

هو انا فاتنى حاجة؟
اصل ريمان بتقولك
دمك خفيف يا(صلاح)
هو انت اسمك صلاح؟
امال مين مسدس صغير ده؟
وكمااااااااااان محامى؟
ياساااااتر:(ياستّار:(
وسايب المحاماة بجلالة قدرها
مهنة الزعماء والرؤساء والكبراء
وجى لمهنة الغلابة المساكين المطحونين
الاطباء ياعينى عليهم :(

مسدس صغير يقول...

norahaty
ايوا دمى خفيف زى ريمان ما قالت بالظبط
هههههه
اة واسمى صلاح ومسدس صغير ده معرفوش
ههههههه
ومحامىىىىىىىىىىىىىىى مهنة الزعماء والخفراء والنجارين ايون طبعا.
ههههههههههههه

بس اما عرفت مرتبك والحوافز كمان قلت لازم اشتغل دكتور بقى
.

ستيتة يقول...

اخر الأخبار واللي انا كنت متأكده منها من قبل ما يعلنوها إن فيروس انفلونزا الخنازير اتسرب عن طريق "الخطأ" من معامل الجيش الأمريكي

يعني الإيدز وانفلونزا الطيور وأخيرا الخنازير ولاد التيت هم اللي بلوا بيها العالم من كتر تجارب تغيير طبيعة الفيروسات اللي بيجربوها علشان حروب جرثومية

جرثومة لما تهدهم وربنا ينجينا يا صاصا
تحياتي

قلم رصاص يقول...

ههههههههههههههه

بلاش قرف ياعم انت

دي صورة دي

دا شارون ارحم من الخلقة دي

ههههههههههههههه

أشكرك ياصديقي الجميل على البوست

واحيي ستيته هانم على المعلومة الهامة

في حفظ الله

تأثير الفراشة يقول...

معك حق جدا، ربنا يبارك لك

و فعلا ربنا يستر على الناس كلها، و الحقيقة بالنسبة لموضوع اعدام الخنازير فى مصر فهو فى محله تماما،و مع كل ده فالقلق حاليا من عدوى البشر

و بصراحة اللى قالقنى شخصيا هو هوس الناس حاليا بعقار التاميفلو
لأن الناس ممكن تبقى عايزة تاخده و خلاص حتى لو اللى عندها ده مجرد برد عادى، فلو الناس عملت كده( زى ما بيعملو فى المضادات الحيوية) فالفيرس ممكن يحصل له تحور و ساعتها لا هيحوق فيه تاميفلو و لا غيره،
و دى بجد نقطة مهمة جدا،نفسى توصل لكل الناس، إن الدوا ده بالذات و فى الظروف دى بالذات ما ينفعش فيه نظام (أنا هاشتريه من بره مستورد أو أنا عندى دكتور معرفه هيجيبه ليه و أهو آخده احتياطى)، لازم يكشف الأول و يفضَل فى خلال أول يومين من المرض و إذا ثبت عنده، ساعتها يبقى ياخد الدوا، لما يحصل كده فعلا،الموضوع هيكون أهون بكتير

أنا عارفةإن الضجة الإعلامية و التركيز كله على عملية الذبح - و هى مهمة فعلا- إنما بحكم انى صيدلانية فبأكد لك إن عدوى البشر أخطر، و سوء استخدام العقار ..أخطر و أخطر و أخطر،
يعنى الموضوع إلى الآن فى مصر يعتبر كويس جدا و ممكن يفضل كده لما نتفادى الأخطار اللى ذكرتها لك

جزاك الله كل خير على هذه التدوينة الممتازة، و أعتذر للإطاله، بس الموضوع حقيقى خطير و أرجو ان حضرتك توعى كل اللى تعرفهم من فكرة سوء استخدام العقار

تحياتى لك، و تقبل مرورى و ربنا يحمينا جميعا

صيدلانيه طالعه نازله يقول...

طول عمر امريكا الكبيره و المتفوقه دايما فكان لازم لها مرض من مقامها و امكانياتها لان لكل مقام مقال و ربك يمهل و لا يهمل اهو المره دى الخطر اللى جالهم لا منى و لا منك ده من فووووووووووووق قوى و ربنا يستر على الشعوب الغلبانه اللى زينا لان الامراض دى اما بتيجى عندنا بتحبنا مووووووووت و بتتوطن عندنا و تستقر
دعواتنا جميعا للكل بالصحه و العافيه

حماده زيدان يقول...

جروب جريدة الصباح العربي بيت المدونين العرب
http://www.facebook.com/groups.php?friends#/group.php?gid=78080770039

مسدس صغير يقول...

ستيتة حسبو
طبعا كلام منطقى جدا جدا
ولاد الكلب مش التيييييييييت " عدت ع الرقابة"
ههههههههه
هما بقى اللى بيجربو ويحورو فى اشكال الفيروسات لانتاج فيروس جهنمى استعدادا لاى حرب جرثومية
ان شاء الله ربنا يجرثمهم كلهم وينجينا وسائر بلاد المسلمين..
اشكرك على التعليق يا دكتورة
نورتينى دائما

مسدس صغير يقول...

قلم رصاص
فعلا صورة تقرف
بس انا متعمد احطها عشان الناس يعرفو اد ايه الحيوان ده شكله مقرف الله يقرفه.
فعلا ستيتة كلامها منطقى جدا
اشكرك على التعليق صديقى العزير
وسلملى ع السوق العربية المشتركة
وصور التعاون الاقتصادى العربة فى النصف الثانى من القرن المنصرم.
ههههههههه
نورتنى

مسدس صغير يقول...

تأثير الفراشة
يا دكتورة فراشة انا معاكى طبعا ومع اى حد ينادى باعدام الخنازير المنتشرة فى عديد من محافظات مصر لان صحة البشر اهم واولى من صحة اى خنزير ابن خنزير.
دى نقطة
اما النقطة التانية : وهى عقار او مصل التاميفلو فكون ان حد ياخد العقار ده من غير داعى او لمجرد انه جاله انفلونزا عادية ده ان عبر فانما يعبر عن جهل واللى لازم يقوم بدور التوعية هنا هو الاعلام طبعا بكافة اشكاله.
وممكن نتبنى حملة نحن المدونين للتوعية عبر الانترنت والفيس بوك مثلا.
معاكى فى كل اللى انتى بتقوليه يا دكتورة.
ومتعتذريش لان التعليقات ده حقك انتى مش حقى تقولى اللى انتى عايزاه وغير كده المدونة بتاعتك .
مش بتاعتك بتاعتك .
بس عادى يعنى. هههههههههه
نورتينى وسعيد بتعليقك الجميل

مسدس صغير يقول...

صيدلانية طالعة نازلة
فعلا الناس دى طغت فى الارض وظنو ان محدش يقدر عليهم
ولكن هناك من يقدر عليهم ولكنه كما قلتى يمهل ولا يهمل لحكمة يعلمها
ربنا يستر علينا
نورتى يا دكتورة
سعيد بتعليقك

مسدس صغير يقول...

hamada
ماشى يا عم حمادة
ع العموم نورتنى

Lady E يقول...

عن نفسي مش خايفة

مبقتش تفرق سينا من سونيا

صمت المشاعر يقول...

ربنا يستر عليكي يامصر

ويجيب العواقب سليمه

شكراا علي الاخبار المبشره دي

مسدس صغير يقول...

lady E
هههه
فعلا مبقتش تفرق سينا من سونيا
اشكرك على التعليق
نورتى

مسدس صغير يقول...

صمت المشاعر
فعلا اخبار مبشرة
ههههههه
ربنا يستر
لنا الله
اشكرك على التعليق
نورتى

قلم رصاص يقول...

أعمل لك ايه انا بس

انت طلعت مش من الوطن العربي
انا ذنبي ايه؟!

مفروض لو كنت واخد بالي كنت عملت لك خطة بحث عن صور التعاون الأمريكي الاسرائيلي المشترك
ههههههههههههههههههههه

وكان العميد هيوافق برضه
ياعم دا راجل طيب

بيقبل الخطط ..وبعدين يجيب عاليها واطيها ههههههههههههه

ربنا يستر

ادعيلي بقى وخليك جدع
عاوزين ناخد الدبلوم ده ان شاء الله بأي شكل

ادعي بإخلاص عشان ربنا يسهل لك انت كمان وتعمل البحث بتاعك
ههههههههههههههههههه

قال خنازسر قال
ياعم روح روووووح روح وتعالى بسرعة

ههههههههههههههههه

في حفظ الله

dr_samarmar يقول...

عااااااااااااااا
عاااااااااااااااااااااااا
عاااااااااااااا
:(((((((((

يا خبر... دا احنا ع الهوا.. احم احم
عفوا يا جماعة
مش مهم انكو سمعتو الجعورة.. لو مش هتسمعو الجعورة ف دى هنشيلها لامتى
:)

بداية كدا انا مانمتش امبارح من الخوف م الموضوع دا
مش امبارح بس
امبارح و أول و أول.. مسيطر على تفكيرى تماما انى خايفة أستنى الموت لنفسى أو لحد من أهلى أو صحابى أو حبايبى.. بعد الشرررررررر طبعا و لا قدر الله و يارب احمينا

احنا أكتر شعوب العالم جهل يا صلاح
جهلةةةةةةةةةةةةةةة

لو لا قدر الله الباش مهندس h1n1 شرفنا و أنسنا على أساس حبة و راجع... هنمسك فيه مسكة سودا سووودا

لأن معندناش أى وعى
البنى أدمين بيعطسو ف وش بعض عندنا يا صلاح..
و لا الكح ... يا خبر أبيض.. تلاقى الواحدة من دول لما يجيلها برد تيجى ف وشك.. و كح كح كححححح عشان تقولها سلامتك بس...

دا بالنسبة لعامة الشعب

بالنسبة للحكومة بقا ...

فعقار التاميفلو اللى المفروض ان هو الحل لهذا المرض
فوزير الصحة بذات نفسه(الحكومة اللى المفروض تبالغ فى الدور اللى بتقدمه لينا )قال ان العقار دا اللى جه مصر كافى انه يغطى 3% فقط من الشعب الحبيب

و أشكر تأثير فراشة ع التمويه اللى موهته ع العقار دا.. دا مهم جدا.. و لازم كمدونين نحاول ننشرهه على قد ما نقدر

و أول مرة كمان أعرف ان الفيرس من اختبارات معرفش ايه دى اللى اول مرة أسمع عنها

يخربيتهم.. منهم لله... يارب انتقم منهم يارب و ارحمنا.. و ادى كل واحد على قد نيته يارب

احنا شعب غلباااااان... مش حمل أى أوبئة

عااااااااااااااااا

dr_samarmar يقول...

معلش انا جيت تانى

أنا أقصد أشكر فراشة ع التنويه مش التمويه أبدا طبعا :D

ثانيا عايزة أشكرك بجد
علشان انا عندى امتحان كمان شوية

قوم أصطبح بالمنظر اللى فى الصورة دا
أدى دقنى لو حليت حاجة

أسفة ع الاطالة بس انا شايلة ف قلبى و ساكتة :S

dr_samarmar يقول...

معلش انا عارفة انى رخمة و رغيت كتير جدا

بس عايزة أوصى كل اللى يدخل هنا و يقرأ التعليقات المبشرة دى يلتزم بحاجتين

بسم الله الذى لا يضر مع اسمه شيىء فى الأرض و لا فى السماء و هو السميع العليم

و أعوذ بكلمات الله التامات من شر ما خلق

الدعائين دول كل واحد 3 مرات فى وقت المغرب و وقت الفجر.. و لو نسيت فأول ما تفتكر قولهم

بالله عليكو تقولوهم ماتنسووووش :)

تانى حاجة عايزة أسئل الكمامات الطبية الجيدة تتجاب منين بالظبط... عايزة أجبها من دلوقتى
محدش ضامن دى أكيد هيجيلها وقت و تشح فى السوق جدا و خصوصا انهم 100مليون كمامة بس فى السوق و احنا المصريين

أكيد اللى هيلحق هيجيبلو 10 و لا حاجة

فقبل ما ال 80 مليون يخلصو شرا
هيكون مالهاش وجود

أستر ياااااارب

و أخيرا أحب أقول دا غضب ربنا,,,,, عايزين نقرب من ربنا بقا :)

شكرا

مسدس صغير يقول...

قلم رصاص
طبعا انت عارف ان انا اساسا متربى فى امريكا. تقوم تعملى علاقات عربية ؟
وفين العلاقات العربية دى كلها فى طور الكلام.
ايه رأيك فى طور الكلام ده؟؟
ههههههههه
غير كده يا اخى هاتلى موضوع واحد انت جايبلى 3 موضوعات اعمل فيهم والله.
ههههههههه
يلا ربنا يستر
ربنا يوفقك ويوفقنى ويخرجنى من الورطة دى سالم غانم.
ههههههههه
مش سمير غانم.
يلا كفاية عليك كده احسن الخنازير تزعل.
ههههههههه
نورت يا صديقى العزيز

مسدس صغير يقول...

dr samarmar
هههههههههههه
عيطى براحتك انا مدون ديموقراطى اللى عايز يعيط يتفضل
هههههه
غير كده بالنسبة لموضوع العدس ده. ايوة العدس اشمعنا يعنى انتى تقولى تمويه ؟؟
هههههههههه
العطس ده حاجة غريبة ومتكرره يبقى وشه الجنب التانى فجأة يجيب وشه عندك وعاااااااااااااااااااطسسسسسى.
طبعا الكلام يغنى عن الصورة.
جهل

اما التاميفلو فعلا تأثير الفراشة موهت لحتة حلوة وهيه ان العقار ده يستخدم فى غير محله.
لازم يبقى فيه توعيه
كمان لازم الدولة تاخد احتياطها اللازم ويبقى عندها كميات بنسب معقوله تحسبا لاى ظروف.
يلا ربنا يستر

مسدس صغير يقول...

dr samarmar
هههههههههه
اشكرى تأثير الفراشة برحتك
اما انا اشكرينى برده براحتك
ده حتى منظر رومانسى ع الصبح.
هههههههههه
يلا ربنا يوفقك ويسدد خطاكى .
ويرجعك مجبورة الخاطر

مسدس صغير يقول...

dr samarmar
جزاكم الله خيرا يا ستى

بسم الله الذى لا يضر مع اسمه شيىء فى الأرض و لا فى السماء و هو السميع العليم

و أعوذ بكلمات الله التامات من شر ما خلق

اما موضوع الكمامات مش تقصدى اللى الخنازير بتاكلها؟؟
ههههههههه
اااااة ااااااااااة الكمامات اللى بتتحط ع الوش دى الموضوع سابق لاوانه.
ربنا يستر ع الشعب المصرى والبلاد الاسلامية
بجد سعيد جدا جدا بتعليقك
نورتينى