الاثنين، 27 أبريل 2009

احترس نفسك


اولا سلامووو عليكووو عودة بعد غياب..

ثانيا بقى موضوع النهاردة يخص الناس كلها وخاصة المدونين واصحاب التعليقات فى المدونات المختلفة.

فى الفترة الاخيرة بنلاقى تعليقات خارجة جدا فى بعض المدونات على بعض المواضيع ممكن شتيمة وممكن اهانة بل وممكن سب الدين وده حصلى انا شخصيا وشفته عند ناس كتير والموضوع مش غريب عليكو طبعا.

يا جماعة انا عايز اقول ان الكلمة امانة وان التعليق اللى انت بتكتبه بيعبر عن شخصيتك وعن وجهة نظرك فى الموضوع المكتوب . بمعنى ان الواحد لو قرا موضوع وصاحب الموضوع له وجهة نظر غير وجهة نظرك انت كمعلق "مش مدحت شلبى يعنى" كمعلق فى الموضوع لازم تعلق بموضوعية وترد بموضوعية من خلال الموضوع .

يعنى مثلا فى الموضوع اللى انا كنت كاتبه عن شخصيات مختلفة منهم حسن نصر الله دخل مدون محترم جدا اسمه" فوبيا - سايكولاند" كان له وجهة نظر مخالفة تماما لوجهة نظرى الا انه اتكلم عليها بكل موضوعية وبكل احترام وانا كنت سعيد جدا جدا من اسلوب عرض وجهة النظر ده من خلال التعليقات ورديت عليه بردة بكل احترام .

اما الناس اللى تدخل تشتم والناس اللى تعمل حساب على جوجل مخصوص عشان يشتم فى مدون معين او فى مدونين او تلاقى شخص غير معرف داخل يشتم مثلا او يلقى اتهامات جزافا على احد المدونين .اسلوب غير محترم للحوار لذلك بلاقى معظم المدونين بل ان شئت فقل كل المدونين بيحذفو التعليق دون الرد على هذا اللا شئ ولكن قد يترك ذلك اثر فى نفوس بعض المدونين من هذه الاهانة مثلا.

الموضوع وما فيه ان انا عايز اقول ان الكلمة اللى بتكتبها دى ممكن تهوى بيك فى نار جهنم كما انها ممكن توصلك الى اعلى الدرجات فى جنان الخلد وده زى النبى ما اخبر فى حديث له. وقوله تعالى "ما يلفظ من قول إلا لديه رقيب عتيد".

وعندما سأل معاذ بن جبل النبى صلى الله عليه وسلم وقال له "أنؤاخذ بما نقول يا رسول الله فقال الرسول صلى الله عليه وسلم ثكلتك امك يا معاذ وهل يكب الناس على وجوههم فى النار وفى رواية على مناخيرهم فى النار الا حصائد ألسنتهم" أو كما قال..

يعنى التعليق اللى انت بتكتبه ده ممكن يوديك النار وممكن يوديك الجنة.. الامر مش سهل..

حتى لو الموضوع ما عجبكش متشتمش او متهينش المدون حتى لو كان المدون ده مخطئ.

مثلا لما ارسل الله موسى وهارون عليهما السلام الى فرعون فقال لهم "فقولا له قولا لينا" حتى ان احد السابقين قال لاحد الواعظين المتشددين : لقد ارسل الله من هو اعلم منك الى من هو افجر منى وقال له " فقولا له قولا لينا".

الخلاصة قوله تعالى "وجادلهم بالتى هى احسن" واعلم انك مسئول عن كلماتك وتعليقاتك على الموضوعات فى المدونات وفى غيرها..

بس خلاص..

هناك 50 تعليقًا:

أحلى حياة يقول...

السلام عليكم

بارك الله فيك
ربنا يكرمك ويجازيك خير
باتفق مع حضرتك تماما اكيد طبعا
ولو اني الحمد لله بفضل ربنا مش جربت موضوع التعليقات الخارجه دي عندي لسه
ويارب عمري ماا جربها ابدا
اللهم آمين :)

تحياتي لحضرتك :)

Empress appy يقول...

انت بتدن فى مالطه
عارف فيه بعض اشخاص تقولك انا حر هما فاهيمن الحريه غلط
ربنا يهدى

( آلاء)daughter of egypt يقول...

طبعا واكيد وشور واف كورس ودون رايت
وديفنتلي
ان كل واحد هيتحاسب على كلامة

بعدين مش المفروض تأثر ف حد من المدونين زي ما بتقول

لان اللي مش بيعلق باحترام حرام حتى ان الواحد يفكر ف كلامة

تقبل مروري

MǿиY El-Shreef يقول...

لالالالالالالا انا زعلانه منك

عشر ايام تغيب ياصلاح كده

بجد وحشتنا ياراجل

ابقى طمنا عليك

بالنسبه للبوست بقى

انا والله حاسه بكل كلمه بتكتبها خصوصا حكايه انها بتسيب اثر ف النفس

يعني لو اقولك اني بجد لحد دلوقتي مرعوبه من الاشكال الضاله دي

ربنا يجازيك خير وهنيالك ياصلاح

بجد انت من احسن الاشخاص الي قابلتهم هنا وبحب طريقه تفكيرك وتوجهيك لتفكيرنا جدا

اوعى تغيب تاني كده

وحشتناااا

ستيتة يقول...

اولا عودا حميدا ووحشتني بوستاتك .. كح كح كح
ثانيا صاحب البينة القاريء المفوه المثقف لا يمكن يكون شتام أو لعان .. كح كح كح
ثالثا اللي بيكتب قلة أدب عادة غير معرف لأن المريض نفسيا استحالة يكون شخص له اعتبار .. كح كح كح
رابعا كح كح كح

كفاية كده انا دخلت بس لأني بقالي كتير مسلمتش عليك
تحياتي

ساره يقول...

من طول الغيبات جاب
بوست كله حكم :)

والله انا بقولك شئ عني .. انا شخصيه الكلام يأثر فيني ويجرحني كثير .. يعني اذا احد سبني او قله ادبه ممكن احذف التعليق صحيح بس بيجيني اكتأب و بكاء ويطول معاي ..

القصد انه فعلا الكلام ممكن من يطلع منك دم بس يقطعك من جوا

عشان كذاالواحد لازم يحترم نفسه عشان الناس تحترمه

صلاح شكرا على بوستك الهادف :)

just dream يقول...

والله ياخى انتى كده اصبت الهدف
الطلقه كانت تمام جدا
للاسف فعلا الغالب مننا فاهم ان موضوع التدوين ده هزار وعادى ومش فاهمين ان كل لفظ بيخرج بتحاسب عليه
وفيه احاديث كتير جدا بتحذرنا من اهميه الكلام وان احنا نراعى ده
حقيقى موضوع جميل جدا وياريت الكل يشارك فيه
ونحاول بقدر المستطاع نمنع اى الفاظ مش كويسه
وربنا يكرم الجميع
جوزيت كل الخير

Sweet Violet يقول...

حمدلله على السلامة (:

اما بقى بخصوص البوست فطبعااا انت معاك حق فى كل كلمه

لكن موضوع ان الواحد بيتعصب فده لاننا للأسف لسه بردو مفتقدين ثقافه الحوار فتلاقى الواحد بيتكلم بعصبيه و بطريقه رخمه مووووت و مش ننكر ان فى بعض اصحاب المدونين بردو لا يقبلوا النقد حتى لو كان بناء (:

اما بقى التعليقات الخارجه قوووى و اللى فيها غلط فى المدونين دول دايما بيكون غير معرف و بيكون شخص غير سوى اصلا ربنا يهديهم

وردة يقول...

اخي الكريم
ربنا يكرمك علي الموضوع ده
مش حقول اني عنيت من حد علق عندي وضايقني
بس لحقت نفسي اول ما نزل تعليق مش جقول سخيف ولكن حد بيستظرف زيادة عن اللزوم عملت اشراف علي التعليقات
بنزل اي تعليق طبعا لو في نقد موضوعي او مناقشة جادة
حتي وان اختلفت مع صاحب التعليق
المهم انو يراعي ادب الحوار مهما اختلافنا
والحمد لله كل الناس اللي بتعلق عندي ناس محترمين جدا
وبشكرهم جميعا
وبشكر حضرتك علي طرحك للموضوع
ربنا يكرمك
سلام

شاب كــ طخين ـــــا يقول...

السلام عليكم
حمدلله على سلامتك

ومعاك حق فى كل كلمه
لو الانسان الابيعمل كده عارف ان الكلمه أمانه وربنا هيحسبه عليها مش هيعمل

mimi يقول...

من وجهة نظري إن كل واحد عامل لنفسه مدونة يتكلم براحته فيها عن حاجات جواه ... ومش من حق أي حد تاني يتدخل في شئونه ... بس فيه ناس غلسة وعاوزة تسيطر علي كل شيء حواليها من خلال نظرتها وحكمها علي الأمور ..
أسلم حل علشان المدونات تبقي نظيفة وخالية من اي ألفاظ خارجة .. يقوم صاحب المدونة بحذف أي كلام خارج ... وده حفاظا علي مشاعر الأخرين..
ربنا يجازيك خير ...

Unknown يقول...

كلام جميل وكلام معقول
ما أقدرش اقول حاجة عنه..ترررن
لكن مش كل الناس اصحاء نفسياًلازم تلاقى النص نص والربع كم :)
ناس تعبانة نفسياً وخلقياً تعمل
او ترتاح ازاى يامسدس ؟دى بترتاح كده بعيد عنك بالكلام والحاجات الوحشة اللى بتقولها دى من ورا الشاشة بيعملوا (تفريغ للشحنة)
السالبة اللى جواهم .

e_emy يقول...

حمدالله ع السلامة (:

كلامك جميل جدااااااااا
ربنا يهدينا جميعا يارب

وحلو اوى عنوان البوست ..

صيدلانيه طالعه نازله يقول...

الموضوع ده حصل معايا مره لمجرد انى علقت فى مدونه كانت مضايقه شخص ما و دار على كل الناس اللى علقت هناك و هات يا شتيمه فيهم طبعا حزفت التعليق و و خلاص حاعمل ايه
المشكله انه ساعات حد يشتم تلاقى كل المدونين بدأوا يشتموا فيه و يردوا عليه و تبقى مشتمه و مسخره و للاسف
هوا ده اللى بيحصل دايما

mohamed ghalia يقول...

ربنا يهدى فعلا الناس دى
مش عارف هيستفيدوا ايه
الحوار المحترم أكيد هيفيد أكتر بكتير
ربنا يكرمك ويسعدك
وحمدا لله على سلامتك

صمت الحنين يقول...

جزاك الله خيرا على البوست

ياريت كل شخص بيدخل يهين فى حد يتعظ ويقرأ الاحاديث والايات وازاى هيكون عقابه من ربنا ويتقى الله فى كلامه

dodda يقول...

طبعا معاك حق

وربنا يكفينا شر ضعاف النفوس

المشكله ان اللى بيعمل كده واحد معندوش حاجه عدله يقولها
فبيلجأ للحاجه العوجه

ميرام يقول...

كلام مظبوط
(:
تعرف أوقات بحس ان الناس اللي بتدخل تهاجم دي
بيبقى ماعندهاش فكر ولامنطق
دول بعتبر تصرفهم طبيعي
لكن المشكلة لما يبقى في ناس ومعاها حق
وداخله ترد على مواضيع غلط اساسا
وتلاقيه داخل بدل مايرد باحترام ويعرض وجهة نظره اللي هي صح
تلاقيه داخل بيشتم بهمجية وبيتكلم باسلوب سخيف
ربنا يهدي الجميع
(:
تحية ليك

MaNoOoSh يقول...

الاول حمدلله على السلامة
والناس اللى بتعلق تعليقات خارجة دى بتبقى ناس مريضة فى عقلها فالواحد بيزعل شوية وخلاص
اما بقى الناس اللى بتحب تنقد نقد محبط بطريقة وحشة فدول بيحرقوا الدم الصراحة
بس التدوين زى الدنيا مليان الحلو والوحش وربنا يبعد عننا الوحش

مسدس صغير يقول...

احلى حياة
اشكرك على التعليق الجميل ده ويارب محد يجرب التعليقات الخارجة ابدا
اشكرك على التعليق
ونورتينى

مسدس صغير يقول...

appy
انا عارف ان انا بدن فى مالطة
بس على فكرة الاسلام دخل مالطة وعاد الادان بيجلجل فيها
ههههههههههه
اشكرك على التعليق وربنا يهدى

مسدس صغير يقول...

daughter of egypt
فعلا معاك حق
بس فيه ناس بتتحمل الكلام ده وناس بتتأثر
ع العموم ربنا يهدى
اشكرك على التعليق
تورتينى

مسدس صغير يقول...

مونى الشريف
ياااااااااااااااه
الكلام الحلو ده كله ليه؟؟
دا انا امى دعيالى بقى
هههههههههههههه
اشكرك على الكلام الحلو ده
والغياب مش بخاطرى بس ربنا يبارك فيكى
وان شاء الله منغيبش تانى
بالنسبة للتعليق اشكرك على التعليق الجميل على موضوع البوست وعلى فكرة انتى من اهم الاسباب اللى خلتنى اكتب البوست ده والله.
وانتى بجد مدونتك من المدونات القليلة اللى انطلقت بسرعة الصاروخ
اشكرك على التعليق والكلام الحلو
ونورتينى
على فكرة انا بكتب الرد ده وانا فى قمة الزعل لأن الدورى راح رسمى (2/2)

مسدس صغير يقول...

ستيتة هانم بذاتية نفسها عندى
ياستى مكنتيش تكلفى خاطرك وتيجى بنفسك انا كنت هجيب المدونة والعيال واجيلك عشان حتى نطمن عليكى
وايه حكاية كح كح كح دى
انت هتيجى تفيرسيلى المدونة وللا ايه؟؟!!
هههههههههههه
اشكرك على التعليق
نورتينى

مسدس صغير يقول...

سارة
وما يحلى البوست الا بتعليقك يا سارة هانم.
ايه الحلاوة دى
كلامك صح طبعا وده لو دل فانما يدل عن وحدة حساسة ورقيقة المشاعر
اشكرك على التعليق وعلى الكلام الحلو ده..
نورتينى

مسدس صغير يقول...

وكيلة نيابة وليس مع ايقاف التنفيذ
مبرووووووووووووووووووووووووك
انتى بدخولك مدونتى النهاردة بقيتى وكيلة نيابة بالفعل الف الف مبروك
لسه ليك طلب كمان
"اقعد واتفشخر اؤمر واتقنعر"
شبيك لبيك
هههههههههههه
اشكرك على التعليق الجميل
سعيد بتواجدك
نورتينى
ويارب النيابة ما تاخدكيش من التدوين

مسدس صغير يقول...

sweet violet
الله يسلمك
فعلا كلامك مظبوط جدا جدا
احنا افتقدنا ثقافة الحوار ولو رجعنا الثقافة دى حياتنا هتفرق كتير

سعيد جدا جدا بمرورك
نورتينى

مسدس صغير يقول...

وردة
فعلا فكرة كويسة حكاية الاشراف على التعليقات
بس على فكرة فيه ناس بتحب اما تكتب تعليق تشوفه مباشرة وانا منهم
اشكرك على التعليق الموضوعى الرائع
سعيد بيك
نورتينى

مسدس صغير يقول...

امبارح كان عمرى 20
اشكرك على التعليق الجميل
فعلا لو كل واحد عارف قيمة الكلمة اللى بيقولها هيراجع نفسه كتير قبل ما يقولها
شكرا على التعليق

مسدس صغير يقول...

mimi
وده اللى حاصل بالفعل
وجهة نظر محترمة طبعا
اشكرك على التعليق
سعيد بمرورك

مسدس صغير يقول...

nora haty
لا لا لا
يفرغو الشحنة دى عند موبينيل " اتكلم من القلب "
انما عندنا لاااااااااااااااااا
وايه ترررررن دى؟؟؟
ههههههههههه
مش بقول عند موبينيل!!
هههههههههه
اشكرك على التعليق
سعيد جدا بمرورك
نورتينى

مسدس صغير يقول...

e-emy
طبعا ميغلاش عليكى عنوان البوست اتفضلى
انا حلفت مهو راجع
ههههههههه
كلامك صح
سعيد جدا جدا بتعليقك
نورتينى

مسدس صغير يقول...

صيدلانية طالعة نازلة
طبعا سلوك خاطئ اما واحد يشتم يقوم المدونين يشتمو فيه
المفروض يتحذف لتعليق والسلام
اشكرك على التعليق
وربنا يحفظنا
اشكرك يا دكتورة على الزيارة الجميلة
نورتينى

مسدس صغير يقول...

محمد غالية
الله يسلمك
اشكرك على التعليق الموضوعى المختصر الجميل
بجد نورتنى

مسدس صغير يقول...

صمت الحنين
وجزاكم الله خيرا
اشكرك على التعليق
وربنا يهدينا
نورتينى

مسدس صغير يقول...

dodda
ربنا يهدينا
ويبعدنا عن الحاجة العوجة
اشكرك على التعليق
تورتينى

مسدس صغير يقول...

ميرام
فعلا الناس دى لو كان عندهم فكر وللا منطق كانو ردو بفكرهم ومنطقهم
بس مفيش
ربنا يهدى
اشكرك على التعليق الجمييييل
نورتينى

مسدس صغير يقول...

manooosh
فعلا عندك حق
كلامك صح
وع العموم ربنا يهدينا وميجيلناش تعليقات تضايقنا ولا تنرفزنا.
سعيد بتعليقك
نورتينى

د. ياسر عمر عبد الفتاح يقول...

كلامك صح
لكن هل الرسالة هتوصل
أسمعت لو ناديت حياً يا باشا
دي ناس مريضة
بجد فيه مرض كده .. بيخليهم يحبوا الشتيمة وقلة الأدب
ربنا يشفيهم ويعافينا

د.آيه يقول...

بسم الله الرحمن الرحيم
جزاك الله خيرا على الموضوع الجميل ده..
موضوع مهم فعلا ..
لازم كل واحد يعبر عن وجهة نظره من غير إهانه ..
و يحترم الشخص اللي قدامه

تحياتى

منــار فايد يقول...

والله العظيم ان موضوعك تمام جدا
وجه في وقته
لان لاقيت كدا عند ناس كتير اوي اوي
موضوع التعليقات المحذوفه
انا عن نفسي حاطه الاشراف
بوجه دعوه لكل الناس انها تحطه
ياجماعه ده مش هيقلل من حريه الراي ولا حاجه
بالعكس هيقلل من بهدله الكرامه


ومرسي اوي

قلم رصاص يقول...

حمدلله على السلامة يامسدس باشا

هو واحد يروح التاني يجي .. وهكذا يعني
هههههههههههه

موضوعك مهم جدا وان كان طرح مرارا قبل كده من بعض المدونين ولكن موضوعك المرة دي
مسابش حاجة..يعني نقدر نقول عليه :

جامع مانع

حتة من كتب القانون ههههههههههه

بس انت زعلان ليه ياعم..انت حد شتمك قبل كده يعني..ههههههههههه

انا عارف انه محصلش ، لأنه لو كان حصل كان فاتك اديته عيارين في دماغه بالمسدس بتاعك اللي مخوفنا بيه ده طول الوقت ..وكان هيقى عبرة لكل من تسول له خالته .. قصدي نفسه هههههههه

على فكرة ياجماعة مسدس كان ممنوع عنكم بسبب النت كان فاصل عنه..ممبيدفعش اشتراكاته .. ويضحك عليكوا ويقول مشغول
ههههههههههههههههههه

وللعلم كمان الكهرباء كانت مقطوعة عن بيتهم النهاردة..وانا أنفرد بنشر هذه الأخبار ههههههههههههههههه

لو عاوز تاخد تارك كلمني بقى او غامر بحياتك التدوينية وتعالالي البيت
ههههههههههههههه

حمدلله على السلامة ياصديقي العزيز

في حفظ الله

مسدس صغير يقول...

د/ ياسر عمر عبد الفتاح
اشكرك على التعليق الجميل
وربنا يهدينا ويهديهم
احييك

مسدس صغير يقول...

د/آيه
فعلا كل واحد لازم يعبر عن رأيه باحترام
ولكن كل بئر للأسف ينضح بما فيه
اشكرك
نورتينى

مسدس صغير يقول...

فعلا كلامك صح الصح
وموضوع الاشراف ده جميل
بس انا للأسف مبحبوش "وجهة نظر شخصية جدا"
اشكرك على التعليق
نورتينى

مسدس صغير يقول...

قلم رصاص
هههههههه
حمد الله ع السلامة
وغير كده هو انا كنت اشتكيتلك.
زعلان ليه؟؟
ههههه
اما بالنسبة للكهربا المقطوعة والنت المفصول
فبلاش اتكلم احسن انا لو اتكلمت هدوووووس
حلوة كده؟؟
هههههههه
سلاماتى

تأثير الفراشة يقول...

ربنا يبارك فيك،حضرتك معاك حق جداااا و،و بعدين الانسان اللى بيعلق فهو بيعبر عن نفسه أولا و كل إناء ينضح بما فيه،و أتمنى ان تتحسن و ترتقى لغة الحوار فى العالم الحقيقى و الافتراضى
جزاك الله خيرا
ربنا يوفقك،تقبل مرورى

http://a-butterflyeffect.blogspot.com/

مسدس صغير يقول...

تأثير الفراشة
معاكى حق طبعا
جزاكم الله خيرا
اشكرك على التعليق
نورتينى

حياة بلا روح يقول...

السلام عليكم

بارك الله فيك واثابك خير الجزاء
بوست ممييز
للأسف الناس الي بتهاجم بدون مايحاسبوا انفسهم وقبل مايكتببوا تعليق جارح فكروا انهم لو اي شخص وجه ليهم التعليق ايه حيكون شعورهم لكن كل تفكيرهم ازاي يجرحوا غيرهم وبس لإرضاء ذاتهم لانهم بيكونوا مرضى وغير اسواياء ..

الله يوفقك

أطيب تحية

مسدس صغير يقول...

حياة
جزاكم الله خيرا
اشكرك على التعليق
سعيد بمرورك
نورتينى