الأربعاء، 1 أبريل 2009

يا بخت من وفق تاجين فى الحلال

تاج الجزيرة الستيتاوى والفتفوتاوى

بقى يا سعده يا هناه اللى يجيلو تاج .. ويا سلام كمان لما التاج ده يجيلو من الدكتورة ستيته هانم حسبو المصون وكمان علاوة على ذلك تاج جاى من فتافيت السكر هانم فتفوتة المدونين.. يعنى انا أمى دعيالى بالعربى الفصيح..

من غير مقدمات نخش فى الجد..



أسمك؟

صلاح


المشهور بيه وسط صاحبك؟

المتر بعد الشغل وقبل الشغل صاصا..

سنك؟

24 سنة

مجال دراستك؟

حقوووووووووووووووق

أسم مدونتك؟

مسدس صغير

صورتك الرمزية في المدونة بتعبر عن أيه؟

عنى

هل فكرت في أغلاق المدونة؟ والسبب؟

انا افكر اقفل المدونة؟؟؟ دى هيه الاكل والشرب وجهاز الاكسجين كمان.

أيه رد فعلك لو حد قل أدبه عليك في تعليق؟

لو قل ادبه بالفاظ خارجة هحذف التعليق ومش هرد عليه اما لو قل ادبه باسلوب عادى انا هضربه بالنار.

أسوء مدونة؟

مدونات موجهة ومدونات المثليين والشواذ ومدونات بتشتم فى مصر وكده يعنى واكيد كلكو عارفين.

هيحصل أيه للإيميل بعد ما تموت؟

انا موصى يدفنوه معايا.

أديت الباسوورد لحد قبل كده؟

لا . بس هيحطو الباسوورد فى شكارة ويدفنوه جانبى.. الله يرحمنى

السفر بالنسبة لك؟

بحب السفر ولكن الارهاق الناتج عنه بيكرهنى فى نفسى..

المود بتاعك ايه؟

انا مرح جدا ومحبش حاجه تضايقنى..

بتعمل أيه في وقت فراغك؟

اصل انا يإما فى الشغل يا فى المكتب يإما معاكو على النت .. اعتقد ان وقت فراغى بعد الكلية اصبح بيساوى صفر.

الأكلة المفضلة؟

المحشى وكباب الحلة عارفينه؟؟

الصفات التي أخذتها عن والدك؟

التسامح والاخلاص فى العمل وتنفيذ الواجب دون ان يطلب منى..

الصفات التي أخذتها من والدتك؟

الطيبة والعقل وبعض من الثقافة.. ازعم ذلك..

اكثر ست حاجات بتحبهم؟

ربنا

ثم الرسول صلى الله عليه وسلم

امى وابويا

العسل الابيض

الموز

الشعر بكسر الشين يا لذيذ

اكتر ست حاجات بتكرههم؟؟

الكذب

الضحكة الصفرا

العرق سوس

ليلة الامتحان

المراجعة بعد الامتحان

الحسد

شخصيتك نوعها أيه؟

مرح وبسامح بسرعة جدا لكن ما بنساش الاساءة ابدا على الرغم من انا ممكن اكون سامحت اللى اساء ليّه..

لماذا دخلت عالم التدوين من الأساس؟

انا بحب العمل الصحفى اوى وكان نفسى ابقى صحفى وكنت متابع مدونة اخف دم بتاعة اشرف توفيق لانه كان معانا فى الجامعة وكنت اعرفه .. بس كنت مفكر ان المدونة دى بتبقى بفلوس واما عرفت انها مجانية عن طريق اعز احبابى وابويا وعمى وخالى "جوجل" بحبه جدا-انت عارف لو قلتله ودينى الامؤاخذه الحمام هيشوفلك حل ويوديك- بعد ما عرفت بمجانيتها عملت مدونة وانا سعيد جدا بيها..

أحلى جملة قيلت في وصف مدونتك؟

والله المدونين كلهم خير وبركة بس فيه ناس تدخل تقولى انت مش مسدس صغير دا انت المفروض تبقى مدفع واللى يقول ار بى جى واللى يقول طيارة اباتشى وكلام من دهو..

أهمية التعليقات بالنسبة لك؟

طبعا التعليقات هيه روح المدونة وهيه اللى بتشجع المدون على التدوين وهيه اللى بتخليه يختار مواضيعه بدقه متناهيه..فهيه مهمه جدا جدا بالنسبه لى

احلى بوست كتبته؟ وضع اللينك ثم أذكر السبب؟

كلهم ولادى..... هههههههه

بس احلى بوست يمكن يكون بتاع ثورجى من يومى وبتاع قصيدة يا بنت الناس وقصيدة رئيس الوزرا.




بصراحة كتير جدا.. بس اى مدونة احطها عندى فى المفضلة تعرفو انها على الفرازة ولازم تاخد وسام الجمهورية..

أفضل بوست قرأته؟

اى بوست اعلق موضوعيا عليه يبقى انا مبسوط منه جدا .. عرفتكو السر اهوه .. اللى متكلمش فى الموضوع يبقى البوست مش عاجبنى..هههههههه زى ستيته ومحاسن صابر وحروف ومشمشة وقلم رصاص ربنا يرجعه بالسلامة وماما امولة وفتافيت طبعا. وكل المدونين الجُمال

الشغل بالنسبة لك؟

هو كل حاجة..

الأنترنت بالنسبة لك؟

النت صاحبى اللى بفضفض ليه..

تمرر التاج ده لمين؟

امرر التاج

امرر التاج

امرر التاج

لقلم رصاص . اللى عايزكو تدعوله ربنا يهديه.

للبت المشمشية

حروووف

ايمى

سارة

محمد غالية..
مونى الشريف

هناك 37 تعليقًا:

ستيتة يقول...

ابو تريكة رايح الزمالك
عاااااااااااااااااا

وانا اول تعليق
نيهااااااااااااااا

ستيتة يقول...

وبعيط على ابو تريكة ان شا الله يطفحوه لو خدوه
وفرحانة بتاني تعليق

هع هع هع

حسام غانم يقول...

جميل يا صلاح

فعلا ياخي مراجعة بعد الامتحان دي حاجة قمة في الخنقة

احم ايه موضوع ابو تريكة ده ؟

MǿиY El-Shreef يقول...

بعد اذنك يامتر استنى بس هسأل ستسته سؤال

هو انتي بتفولي ع ابوتريكا ليه :@

هههههههههه

بالنسبه للتاج بقى

لولولولوولولولولولولىىىىى

اخيرا اتلموا التيجان ع بعض وهيجيبولنا صولنجات صغننين :D:D:D

بجد دمك خفيف يابو صلاح بس عجبتني اوي دي

ضحكت ضحك مركز هههههه

عن طريق اعز احبابى وابويا وعمى وخالى "جوجل" بحبه جدا-انت عارف لو قلتله ودينى الامؤاخذه الحمام هيشوفلك حل ويوديك-

هههههههههههههههههههههههه

وبالنسبه ل ليله الامتحان والمارجعه بعدها حاجه يع خالص :D

ميرسي يامتر عشان عرفتنا بنفسك اكتر

ان شاء الله نجيلك ف افرح تاني

:D

ستيتة يقول...

اجمل شيء في ملف التعريف الجميل
انك تسامح بس لا تنسى الساءة
دي ميزة ممتازة تخلي المؤمن لا يلدغ مرتين

بالنوسبة لخالو جوجل هو فعلا ابن حلال حتى لو طلبت منه اوردر من وصاية يجيبه
بس لما يستندل ويجيب وش الأبلكاش يابااااااااااااي على غتاته
يلغي بلوجات
تكتب تعليق بوست بحاله وياكله ابن اللزينة "لسه حصله لي حالا" كتبت لك تعليق تفصيلي وكله بلوج سبوت ابن جوجل منه للي كلت دراع جوزها

جميلة الاجابات عرفتني على المسدس باشا

ebn roshd 777 يقول...

ياه للدرجه دي كابوس الامتحانات
مسيطر عليك
فعلا التعليم عندنا مميز جدا
ربنا يكتر قضاياك ويفتح في وشك ابواب المحاكم

MǿиY El-Shreef يقول...

ع فكره الكلام طالع كبييييييييير اوي والله

مش عارفه ماله

mohamed ghalia يقول...

هههههههههههههههههههه
هو الكلام فى الأخر مشفر ولا ايه
الخط كبير قوى ومش شايف حاجة

صمت المشاعر يقول...

والله اجابات منيحه يا متر

mohamed ghalia يقول...

تؤتؤ مفيناش من تدبيس
أنا بجهز للمشروع التانى دلوقتى معلش سامحنى مش هقدر أجاوب

MǿиY El-Shreef يقول...

ع فكرة وربنا اسمي ماكنش موجوووووود

عااااااااااا

مسدس صغير يقول...

ستيتة حسبو
ابو تريكة رايح الزمالك؟؟
كدبة ابريل دى وللا ايه؟؟
...
ع العموم مبروك عليكى اول تعليق دخلتى التاريخ من اوسع شبابيكه

مسدس صغير يقول...

ستيته حسبو
طبعا ابو تريكة رايح الزمالك وعمرو زكى راجع المنصورة.
ايه رأيك؟؟
مبروك عليكى تانى تعليق
دخلتى الجغرافيا المرة دى

مسدس صغير يقول...

حسام غانم
فعلا مفيش بينى وبينها عمار
لا هيه بتحبنى ولا انا بطيقها..
اما ابو تريكة فهو فعلا رايح الزمالك..
النهاردة 1 ابريل

مسدس صغير يقول...

مونى الشريف
يا ستى بالنوسبة لابو تريكة خلاص مضى للزمالك وبركات رايح بترول اسيوط..
النهاردة اول ابريل..

الحمد لله اللى التيجان اتلمت.
فعلا جوجل ده ادين بالفضل بعد ربنا ليه فى موضوع المدونة وفى كل حاجة بصراحة مش انا يا شيخة سألته على برنامج يرش ميه أدام البيت لقيته جايبلى برنامج..
ههههههههه
ليلة الامتحان دى انا كرهت الامتحانات عشانها .
لو يلغو ليلة الامتحان؟؟
يبقو ريحونا.
ههههههههههه
روحى بقى خدى البوست اجبارى..
ومليش دعوه من حكاية اصل اسمى مكنش موجود والكلام اللى لا يقدم ولا يأخر ده ..
اصل هوه اجبارى..

مسدس صغير يقول...

ستيتة حسبو
مش بقولك دخلتى الفيزيا من اوسع ابوابها " الباب الرابع "
اشكرك على التعليق الجميل ده .
فعلا انا كده اسامح بس ما بنساش الاساءة ابدا وكنت فاكر ان ده عيب.
بس انتى طلعتيهولى ميزة جميلة اهو.
اما جوجل بقى والله انا عامله قصيده مدح.
لو جت فرصة بعد كده ابقى اعرضها عليكو.
جوجل ده حبيبى حبيبى.

اشكرك على التاج الجميل وعلى التعليقات الاجمل

مسدس صغير يقول...

ابن رشد
هههههههههههه
حلوة ربنا يكتر قضاياك دى وكمان يفتح فى وشى ابواب المحاكم.
اشكرك على التعليق الجميل
بجد نورتنى يا باشا
ويارب متقطع المصروف عننا بعد كده.

مسدس صغير يقول...

مونى الشريف
الكومبيوتر بتاعك تلاقيه شارب حاجة وللا مهيس بس.
اقفليه شوية وافتحيه واسقيه اى حاجه دافيه وهو يبقى تمام

مسدس صغير يقول...

محمد غالية
بردة هقولك زى ما قولت لمونى
الكومبيوتر بتاعك شارب حاجة اكشف عليه.

مسدس صغير يقول...

صمت المشاعر
اشكرك على التعليق والمرور الكريم اللى اسعدنى
نورتينى

مسدس صغير يقول...

محمد غالية
براحتك يا باشا
ربنا يعينك

مسدس صغير يقول...

مونى الشريف
للمرة الالف بقولك مليش دعوة
هتجاوبى يعنى هتجاوبى
ولازم تعترفى بكل حاجة والا هنستخدم اسلوب التعذيب او جهاز كشف المدونين.

simply me يقول...

اجاباتك جميله يا متر

وكل تاج وانت طيب

Kiara يقول...

التاج دا اسئلته ممتعه جدااااااااا

مستمتعه اوي وانا بقرا اجاباته عند كل المدونين هو اتبعتلي بس لاممكن ابدا احله

وبعدين الريدر مليان معقول كل دول علي الفرازه

يااهل بلوجر

هجوووووووووووووووووووووووووووووم :)

e_emy يقول...

اجاباتك جميلة جدااااااااا

ربنا يوفقك (:

مسدس صغير يقول...

bondoka
اشكرك على الكلام ده
سعيد بمرورك.
نورتينى
وعقبالك

مسدس صغير يقول...

كيارا
ايوة على الفرازة.
عندك شك فى كده؟؟
هههههههه
طبعا انا سعيد جدا بزيارتك ورسالتك.
وسعيد بتعليقك واشكرك
نورتينى يا كيارا

مسدس صغير يقول...

e-emy
اشكرك على الكلام الحلو ده
احييكى
نورتينى بجد
سعيد بتعليقك

مسدس صغير يقول...

عاشقة الرومانسية
معلش وانا بحذف تعليق حقير غلط وحذفت تعليقك المحترم جدا.
اشكرك على التعليق الجميل وطبعا انتى اخدتى وسام الجمهورية بالفعل.
ههههههههه
وانا برده من مزنقى هذا بشكر ستوتة معاكى..
هههههه
نورتينى

نظرة يقول...

نظرة
فى اللغة نظر إلى الشىء أى أبصره وتأمله بعينه ونظر فيه أى تدبر وفكر.
فهى مدونة جديدة بفكر جديد سنعرض من خلالها نظرة للمجتمع بوجه عام وإلى الشباب بوجه خاص.
ترى عندما تنظر إلى هذا المجتمع ماذا سترى؟!
هذه المدونة لن تنجح إلا بمشاركتكم والإستماع إلى الأراء كلها . فأنتم الشباب عماد الأمم وبكم تصنع الحضارات
وسأحاول أن تمثل الموضوعات أراء مجموعة من الشباب وليس رأى شخصى.
المدونين فى هذه المدونة :
http://batoot-haboob.blogspot.com/بطوط الحبوب
http://ghoneem.blogspot.com/ دكتور غنيم
modawen5ana.blogspot.comأسماء رمضان
محمد غالية

أسف لعدم ردى على الموضوع وخروجى عن اصل الموضوع

غير معرف يقول...

انا فتافيت يا عم اربيجيه
جوجل الماصون غضبان عليا ومش عارفة ادخل المدونة بقالي 3 ايام اهو وبرد غن الناس زي مانا برد عندك بالظبط كده.. تمويه بقى عاااااااااااا

كباب الحلة عارفينه طبعا بس ما بحبهوش

العرق سوس ده يعععععععع وعععععععععععع ععععععععععععععع .. وحش اوي

عجبتني اوي الله يرحمني ديه.. هههههههههه

سيبك انت احلى ما في البوست كله ان اسي متكرر فيه مرتين وكده انت كسبت معانا المعزة الذهبية ههههههههههههههههههه

ادعي بقى ربنا يرجعني لكم بالسلام لما جوجل يفك الحظر عليا

هئ هئ هئ هئ هئ هئ هئ هئ هئ

سلاااااموز

وردشان smilyrose يقول...

اخى محمد صلاح

ااقول ربع متر ولا نص

ههههههههههه


نخليه متر وامرنا لله

اجابات حلو بس مش تكتر من المحشى والاكل

المسبك وخصوصا كباب الحلة

وادعى معايا ابوتريكة مش يروح الزمالك

حسبى الله ونعم الوكيل


اجابات جميلة ومميزة لشخصية رائعة

اختك

smilyrose

وردشان

روح الحب الصادق

مسدس صغير يقول...

نظرة
ماشى يا عم نظرة احنا فى الخدمة
ولا يهمك
اكون سعيد بمتابعة مدونتكم المصون

مسدس صغير يقول...

هههههههههههههههههههه
غير معرف
بقى كده يا جوجل دا انا لسه بشكر فيك.
تكسفنا ادام السياح وتضرب السياحة فى البلد؟؟
فتافيت تخليها مش عارفه تدخل مدونتها بقالها 3 ايام؟؟
حرام عليك يا مفترى.
ههههههههههههه
.....
اما بالنسبة للمحشى وكباب الحلة حبايبى الحلوين.
والعرق سوس انا عارف ان انتى بتحبيه جدا.

اسمك اتقال مرتين فى البوست؟؟
ياااااااااه دا انتى دخلتى التاريخ من اوسع ابوابة.
مامتك دعيالك..
وانا هوصى عمى جوجل يتوصابك ويفك الحظر اللى عامله عليكى..
ههههههههههههه
نورتينى

مسدس صغير يقول...

smily rose
اولا محمد ده ابويا انا صلاح.
ههههههه
غير كده مفبش تكليف يعنى يا متر ليه ويا نص متر ليه احنا اخوات ممكن تقولى يا صلاح بيه وخلاص.
هههههههه
وصدقينى طلبك بالنسبة للمحشى وكباب الحلة تحت الدراسة..
واطمنى ابو تريكة مش رايح الزمالك ابو تريكة رايح المنصورة..
هههههههه
اشكرك على التعليق
نورتينى يا ورد

maha zein يقول...

ولا هيهمني بردو
حتي لو مجبتش سيرتي في التاج ولا قولت اهديه لمها زين مع ان اهل المدونات عارفين كويس ان مها زين تخصص تاجات وبتروح تتحايل علي الناس عشان يزئلولها اي تاج
ماشي ماشي

عموما عاتشي
الجدع صاحب مدونة تخاريف ابو العريف بعتهولي اصلا بردو
بس من يومها النت بتاعي فاصل والمدونة بايظة

انا علي فكرة قريت التاج بتاعك من اول ما اتنشر بس للاسف ساعتها نتي فصل ومعرفتش اعلق

انا قديمة شوية بس ميضرش بردو
وبردو عاتشي
انا عندي رجالتي في كل حتة والتاجات نازلة ترف

مسدس صغير يقول...

مها زين
ههههههههههههه
والله انتى من اعز المدونين اللى بيعلقو عندى ومن اهمهم.
بس والله الواحد ساعتها بيهبل اى حاجة كده وخلاص
والله لو عايزانى انزل بوست اعتذر فيه انزل
هههههههههههه
بجد انا اسف انى مقلتش عليكى اى حاجة كده بس ان شاء الله ابقى عرفينى عيد ميلادك وانا اعملك مهرجان.
هههههههههههههه
اشكرك على المتابعة