السبت، 21 فبراير 2009

ثورجى من يومى


انا طبعا ثورجى من يومى احب المظاهرات وامشى فيها واحب الثورات واحب افجر نفسى فى اماكن سياحية وكده يعنى يعنى مثلا انا عمرى ما مشيت فى مظاهرة الا مرة واحده وانا فى تانية ثانوى..عملت ثورة الطلاب الاحرار وانا فى الحضانة.مش بقول ثورجى من يومى... فجرت نفسى اربع مرات عند الترب ومات اكتر من 200 ميت يوميها...

لا بجد بجد انا عايز احكى عن شوية ذكريات ظريفة فى المظاهرة الوحيده اللى انا اشتركت فيها وانا فى ثانوى..هقطع الحوار واقول انا مبحبش المظاهرات بتاتا لأن بجد من وجهة نظرى هيه لا بتقدم ولا بتأخر.نكمل الحوار..جينا فى يوم ايام الانتفاضة الفلسطينية واتفقنا مجموعة طلبة طبعا عايزين نهزر وقلنا لازم نعمل مظاهرة اشمعنا احنا..واتفقنا على الميعاد وان احنا نزوغ من الفسحة فى اليوم الفلانى ونعرف زمايلنا وكله ما هيصدق مهو هيزوغ من المدرسة فى الفسحة بقى المهم قسمنا المهام على المجموعة المنظمة وكنت انا واحد منهم ..واحد قال انا عليّه الاعلام..وانا قلت انا عليه المنشورات..واللى قال انا عليه اعرف الطلبه وهكذا ..بس اتفقنا انه يبقى سر عشان المدرسين ميعرفوش لكن عرفو وحاولو جاهدين يقفو فى طريق الثورة لكن على مييييين؟؟المهم جينا فى ساعة الصفر كنت انا كاتب كلمتين كده فى ورقه لا يودو ولا يجيبو ورحت مصورها تقريبا 100 نسخة..الظريف ان انا لقيت العضو اللى عليه الاعلام جايب شوية اعلام كتير جدا وغريبه يعنى مثلا لقيته جايب علم المغرب وعلم لبنان وعلم السعودية وعلم تركيا وعلم اليونان وخلافه.قلتله ايه يابنى انت جايب الاعلام دى منين ؟؟ قاللى هقولك فى الوقت المناسب..هههههههه منظمة بقى..المهم المدرسة كلها عرفت وزوغنا كلنا من الفسحة ومشينا فى البلد طولها وعرضها واعلنا بيان المظاهرة فى الاذاعة المصرية على لسانى.ههههه ونقول يا فلسطين وحاجات كده.. المهم واحنا ماشيين فى المظاهرة تلاقى واحد يقول حكووووووووومااااااا تلاقى المظاهرة اتفركشت وكله فلسع من شارع..ونرجع نكتشف انه مفيش حكومه ولا يحزنون ونتلم تانى ونقول زى ما كنا بنقول . بعدين واحنا ماشيين من ورا المدرسة بتاعتنا كده كان فيه شركة سياحة كانت معلقه قدامها ييجى 30 علم ببص عليهم بالصدفه ملقيتهمش ..كنت هموت على نفسى من الضحك ورحت للسيد زعيم العصابة اشكره على الحركة العجيبة دى واقدمله التهانى بمناسبة ان محدش قفشه وهو بيسرق الاعلام من الشركة وعرفت سر اعلام اليونان ولبنان وتركيا والحاجات الغريبة اللى كنا شايلينها فى المظاهرة العالمية دى..

المهم واحد فى المظاهرة وهيه سخنه كده. قال حملاااااااااااااه... المرة دى كله جرى على بيتهم وقال كفايه كده انا عملت اللى عليّه.. عاوزه حاجه يا فلسطين؟؟سلاااااااااااااااامو عليكوووووووو...

روحت البيت ومعايا ورقة من المنشورات اللى كنت كاتبها ...وقلتلهم فى البيت دا كان فيه حتة مظاهرة فى المدرسة النهاردة ..ابويا قاللى اوعى تكون انت كنت ماشى فيها؟؟؟.. قلتيله عيييب يا بابا انت بتهرج انا امشى فى مظاهرة؟؟!!!

المهم شاف ورقة من المكتوبة اللى انا كنت كاتبها ..قاللى بحسن نيه كده : ياأخى اللى كاتب الورقة دى واد جرئ اوى.. مش خايف يعرفو خطه ويخدوه يصيف..وانتو عارفين بيصيف فيين؟ رديت بكل هدؤ واد بايع مستقبله مش دارى بأى حاجه ولا دارى بالتضحيات اللى ابوه وامه بيعملوهاله ويضيع كل ده فى ثانية..وبعدها حرمت امشى فى مظاهرة لأن انا كنت شايل علم المغرب وانا ماشى فى المظاهرة اللى يشوفنى يقول دا انا فى مظاهرة من اجل حل المشكلة المغربية العربية فى مواجهة العدوان الفرنسى... وتيييييييييييييييييييييت.. اااااااااااة لو كان ابويا عرف؟؟اوعى حد يقوله. دا سر بينى وبينكو...

هناك 52 تعليقًا:

Lady E يقول...

لا يا عم انتا بتفجر نفسك ومدونتك اسمها مسدس يعني حاجة تجيب الرعب

هقرا البوست وأجي بكرة ان شاء الله

اول تعليق لولولولولي :)

maha zein يقول...

قاللى هقولك فى الوقت المناسب..هههههههه منظمة بقى..
هههههههههههههههههههههههههههه
ينفع كده
لا بجد
انت فكرتني بشبابي
انا بردو والله وانا في الثانوي ساعة الانتفاضة نظمنا مظاهرة بردو
والنظرية يا اخي ان الواحد لما بيعمل حاجة بيحس انها حاجة كبيرة
يعني لو عليا ارسم علم اسرائيل علي قماشة بيضة واجيبه احس اني يا جدع انا اللى هحرر القدس
وان لولا العلم اللى بالالوان الفلومستر ده واللى هنولع فيه كانت الدنيا اتهدت

احنا بردو عملنا ذيكم مظاهرة
بس من خيبتنا كنا واخدين المظاهرة وطالعين بيها عغلي امن الدولة
اه والله
امن الدولة اللى عندنا
فأحنا بقه واخدين المظاهرة ورايحين ناحية امن الدولة
ليه معرفش
وطبعا كل ما حد يقول حكومة الاقي كل المظاهرة جاية تجري ناحيتي
اصلي انا كنت محرصة وماشية في الاخر
وفعلا منلاقيش حكومة
وهكذا وهكذا لحد ما وصلنا مقر امن الدولة وجنب كنيسة كده ولقينا الحكومة كلها بحق و حقيقي
وراح الظابط قافش بت من اول صف
رحنا كلنا جرينا
وانا بقه حبيت اعمل نفسي في فيلم احنا بتوع الاتوبيس

رحت قلت لصحبتي بكل عزم

لا تعالى هنا لو جرينا من الشارع ده هنتقفش الحكومة محاصرةالمكان دلوقت
لقيت واحدة صحبتي بتقولي بقولكم ايه تعالوا عندنا اخبيكم فوق السطوح شوية وبعدين تنزلوا لما الجو يهدا
وهو اصلا الجو كان هادي علي فكرة
انا قلتلها لا يا بنتي اكيد شارعكوا مليان عساكر ما انتوا جنب امن الدولة
لا انا جاتلي فكرة
تعالوا نقف عند بتاع عصير القصب ونشربلنا شوب يروء دمنا عشان نخدع الحكومة
وبالفعل
وقف اشرب كوباية عصير بربع جنية انا وصحبتي وقال عماله اكلم صحبتي واضحك قال يعني احنا مش بتوع الاتوبيس
واحنا مجرد طلبة عاديين واقفين بنطري علي قلبنا


فكرتني باللذي مضا
ده احنا كنا مستفزين يا جدع

dodda يقول...

دا الواحد يخاف يعلق عندك بقى
ثورجى قديم
وارهابى صميم
يا حلاوة المفرقعات

Sweet Violet يقول...

ههههههههههههههههههههه

حلوة قوى المظاهرات دى .. انا الحمدلله ماعملتش مظاهرات وانا فى المدرسه نوهااائى

بس عملتها لما دخلت المرحله الجامعية D:

بس مظاهرات بحق و حقيقى بقى و حركات كفايه و الكلام ده و الامن محاصرك بقى من كل حته و عربيات كتيييير امن مركزى و الافلام الغريبه دى

اسكت بقى فكرتنى بالايام دى .. و الله كانت حلوة و تحس كده ان انت حد فعلا بيعرف يقول لأ بجد

على فكرة المظاهرات كويسه مش كلام فاضى ولا حاجه بس تكون سلميه ومعموله صح وبعقل مش همجية

بس بقى علشان هعيط بقى انا عايزة ارجع الشغل تانى عاااااااااااااااااااااا

حلو كده يعنى لازم تفكرنى )):

fashkool يقول...

ازيك يا مسدس صغير
الحمد لله ان المظاهره دى عدت عليك بخير وما رحتش عند حبايبنا الحلوين اللى بينفخوا اللى بيروح ناحيتهم
طب يا راجل اعملوا مظاهره على حسابكم مش على حساب الشركه السياحيه اللى سرقتم الاعلام منها .
تحياتى يا مسدس

مسدس صغير يقول...

lady E

حصلنا الرعب يا ليدى

وادينى مستنى لما تيجى بكرة .

الف مبروك ان انتى اول

تعليق..

لولولولولى

مسدس صغير يقول...

maha zain

طبعا تنظيم على اعلى مستوى

انتى شفتى سرية اكتر من كده؟؟

مستحيييل

وكويس ان احنا فكرناكو بماضيكو المؤلم

ايام المظاهرات والانتفاضة وعصير القصب

السياسى ده

يبقى انتى واقفة فى اخر المظاهرة

وعايزاهم يقبضو عليكى ؟؟

دا كلااااام؟

اشكرك على التعليق اللى اسعدنى جدا جدا وتحيتى ومودتى

ونورتينى

مسدس صغير يقول...

dodda

طبعا لازم الكل يخاف

انا بهدد جميع المدونين بالمسدس بتاعى

يإما تعلقو عندى يإما المسدس هوه

اللى هيتكلم

مسدس صغير يقول...

sweet violet
طبعا انا بشكرك على التعليق ومش عارفين نودى جمايلك فين؟
نوديها الحضانه؟؟

المهم انا بحترم وجهة النظر اللى بتقول ان المظاهرات ظاهرة صحيه وكويسه بس انا بجد وجهة نظرى عكس كده تماما..

وبلاش تعيطى أدامى عشان انا ممكن اعيط معاكى ونقلبها جنازة..هههههه

اشكرك ونورتينى

مسدس صغير يقول...

فشكول
الله يسلمك يا استاذى العزيز
طبعا انا عارف ان حبايبنا الحلوين دايما حلوين وبيحبو الناس الحلوين اللى زيى
ربنا يكفينا شر ايديهم الحلوين
..
هنعمل ايه يعنى مقدرناش نستحمل امام اغراءات شركة السياحة بوضع الاعلام ادامنا عينى عينك.
خالص مودتى
ونورت المحكمة يا فشكول

Lady E يقول...

انا جيت تاااني

لا بجد مغامرة حلوة وعلى فكرة انا هفتن عليك وهقول لباباك اول لما اشوفه :) (وش بيطلع لسااانه)

مسدس صغير يقول...

lady E

حمد الله ع السلامة

اخيرا خلصتى قراية البوست
..
هتقولى لبابايا؟؟؟

قولى

"وش مش سائل"

اقصوصه يقول...

loooooooooooool

طلعت راعي مظاهرات يعني

ياما تحت السواهي دواهي

*البت المشمشية *حلوة بس شقية * يقول...

ههههههههههه
الارهابى اهو اهو
االارهابى اهو اهو

*البت المشمشية *حلوة بس شقية * يقول...

هو انتا بقه جتلى يا معلك يبقا انتا اللى ورا اى مفرقعات وتفجيرات

وانتا اللى فجرت الحسين
وبعدين موت 200 ميت
بس ده انا لما كنت بفجر كنت بعدى ال30 هههههههههههه



انتا ده انتا عايز تتشنق فى ميدان عام

*البت المشمشية *حلوة بس شقية * يقول...

ولعلمك ابوك هيعرف الكلام ده وان االلى هوصلهولو
اختفى بقه اليومين دول

*البت المشمشية *حلوة بس شقية * يقول...

نسيت اقولك
عجبنى النيو لوك
انهى نقاش عملهولك
هاهاهاها

shaimaa samir يقول...

اتقارن فكر مظاهرات ثانوى بالان

انا طبعا ضحكت على طريقة الكتابة والكلمات
ولكنى ربما اختلف فى المحتوى ذاته

عموما

الاهم
ان كنت لا تؤمن بعمل ما
وترى عدم فائدة منه
فلا تجعل عينيك تراه سيئا وكل من يقوم به ايضا

ايها المسدس
تحياتى لك دوما

اسماء عوني يقول...

الو
عمو
ايوه يا عمو انا اسماء
اسماء مين؟
مش مهم انا فاعلة خير يا عمو
علي فكره انا عاوزه احكيلك علي حاجه
وانتي تحكيلي منين وانتي تعرفيني منين اصلا
اسمع بس يا عمو
ابنك . مسدس صغير
ماعندناش حد بالاسم ده يا بنتي
يا عمو ابنك اللي هو بيدون واسمه مسدس وصغير كده طلع في مظاهره زمان وكان شايل علم المغرب كمان
بس اللهم بلغت اللهم فاشهد
...............
اه صحيح عاجباني اوي الكلام اللي انت كتبته ده
من كلامى
عايز فرصة...
اجيلك مرة واحيّى
واقول الشعر بالعافية
بلا اوزان ولا قافية
ولو كل السموم شافية
سمومك انتى بتعيّى
اجيلك حد باب البيت
ومين حبك ف يوم زيّى
تشوفى السكه من نورك
ونورك فى الظلام ضيّى

جميله
تحياتي

مسدس صغير يقول...

اقصوصة

اشكرك على التعليق دا اولا

ثانيا انتى متعرفنيش انا ممكن افجر

نفسى فى المدونين ولا يهمنى

بس المشكلة ابويا يعرف

اشكرك ونورتينى

مسدس صغير يقول...

البت المشمشية
انا ارهابى؟؟
خلاص انا هجرب نفسى فيكى..
هههههههه

مسدس صغير يقول...

البت المشمشية
انا صاحب تفجيرات الحسين؟؟
بلاش اقول مين اللى كان فى الحسين يوميها ورايح الحسين مشى من العتبه عشان ميتعرفش..

مسدس صغير يقول...

البت المشمشية

اوعى تقولى لابويا احسن افجر نفسى

فيكى...

هييييييييييييي؟؟

........

النيولوك اللى عاملهولى الواد المهندس

ابن خالتى واد سوفت وير انما ايه؟؟

مسدس صغير يقول...

shaimaa sameer
اشكرك على التعليق
واحترم وجهة نظرك
لكنى لا اعيب على من يمشون فى المظاهرات لان هذه مجرد وجهة نظر..
اشكرك
ونورتينى

مسدس صغير يقول...

اسماء عونى
يا فتانة. يا فتانة. يا فتانة..

كده بابايا قطعنى بعد انتى ما قولتيله..

مش هسامحك ابدا.
اللى زيك مش لازم يعيش ليوم التلات ولا الاربعا..
انا اللى حرمت نفسى من العشا عشان تستعشى وحرمت نفسى من الغنا عشان تستغنى..

.....

بالنسبة للشعر اشكرك على الكلمات الجميلة
واتفضلى
ميغلاش عليكى

اصحى يا مصر : اسلام ديو يقول...

لا بس بجد ليك مستقبل
مش يمكن تحررنا من السجن اللى عايشين فيه؟
ومتقلقش كلنا معاك فى اى حاجة ومش هنقلب

هههههه بجد المدونة جميلة جداً وطلعتنى من جو البؤس اللى كنت عايش فيه من شوية
جزاك الله كل الخير

e_emy يقول...

هههههههههههههههه

اكيد كان شكلكم يفطس من الضحك

بوست جميل اووووووى (:

تحياتى

صمت المشاعر يقول...

جميل اوووي البوست اديتني امل ان القدس خلاص هتتحرر هههههههه طبعا بالتخطيط الفظيع العجيب دا

انا بقي ممشتشي في مظاهره قبل كدا ولا حتي شفتها اما تيجوا تعملوا مظاهره تاني وصيتي تبقي تبلغني

مسدس صغير يقول...

اصحى يا مصر:اسلام ديو
اشكرك على التعليق والزيارة اللى اسعدتنى جدا والله
والحمد لله ان الواحد بيعمل حاجه ممكن تفرح او تبسط اى حد بأى شكل
اشكرك ونورتنى

مسدس صغير يقول...

e-emy
طبعا شكلنا كان يفطس من الضحك
مش جماعة متظاهرة بتخطيط طلابى خطير
حاجة تخض يعنى.
هههههه
اشكرك على الكلام الحلو ده
تحيتى وخالص مودتى
ونورتينى

مسدس صغير يقول...

صمت المشاعر
اشكرك على الكلمات الحلوة دى واشكر تعليقك وتواجدك
وان شاء الله فى اقرب مظاهرة سنة 2040 انا عازمك عليها..

fashkool يقول...

يا عمنا المسدس
انا اللى فضحت نفسى على صفحات الانترنت وعرفت الدنيا كلها بمنوفيتى
حرمت اعمل كدا تانى وحغير اسم المدونه عشان اضحك علىالمدونين من اول وجديد واقول لهم انا من القاهره وخلاص .. مش عارف انا غاوى ليه وجع قلب
تحياتى

الوردة البيضا يقول...

عزيزي المسدس
أسلوبك شدني جدالأنه يمتاز بالتشويق وخفة الدم، وبالنسبة للمظاهرات فأنا أتفق معك انها - في عالمنا العربي - بالفعل لا تقدم ولا تؤخر

بوست جميل أهنئك عليه
تحياتي

مسدس صغير يقول...

فشكول
غلطة عمرك .
ليه كده؟
عقلك كان فين ساعة ما قررت تقول على نفسك كده؟
يللا بقى ربنا يتولاك
ههههههه
منور طبعا
ويكفى المنوفية ان فيها واحد محترم زيك.

مسدس صغير يقول...

الوردة البيضا
اشكرك على الكلمات الجميلة التى اسعدتنى.
واشكرك تواجدك
وفعلا المظاهرات انا شايف من وجهة نظرى البسيطة جدا انها لا بتقدم ولا بتأخر. يمكن تكون بتأخر بس..
اشكرك ونورتينى

سلسبيل يقول...

ههههههههههههههههه دانت مناضل من صغرك بقي
انا بس بتخيل حد ماشي ف ماظهره ف مصر وشايل علم المغرب
دانت لو مكان اتقبض عليك بتهمه التظاهر بدون تصريح كان هيتقبض عليك بتهمة الجاسوسيه هههههههههههه
طيب المهم تكون خبيت الورقه دي ف خزنه
شبه خزنة الافلام اللي بيحطو فيها المستندنات اللي تودي ف داهيه
مع اني دايما اقول انهم لازم يحرقوها بس كده الفيلم مالوش لازمة
خبيها بقي واحنا هنبتزك وكده وف الاخر تطلع مرشد وتودينا كلنا ف داهية
ايه رايك انفع مخرجه؟

مسدس صغير يقول...

سلسبيل
هههههههههه
دانتى طلعتينى مناضل قديم بقى..
يا سلام عليكى يا سلسبيل يا مخرجة الاجيال.
ايه الفيلم العربى اللذيذ ده .
يدخل توفيق الدقن يهدد احمد السقا بالقتل يضحك يوسف وهبى ويقول معتش الا انتى يا منى يا ذكى اللى تفجرى نفسك فى المظاهرة العبى غيرها..
ههههههههههه
حلوة؟؟
دخليها فى السيناريو..

احساس لسه حى يقول...

عزيزى
ثورنجى من يومك بجد

بس ليه مش بتحب المظاهرات

ده تعبير عن غضب او راى

واكيد بتعمل شئ على المدى البعيد حتى

المهم الاغلام صحبك روحهم ولا علقهم فى المدرسه

تحياتى

سلام

مسدس صغير يقول...

احساس لسه حى
كرهى للمظاهرات دى مجرد وجهة نظر شخصية ليس اكثر . مش معنى كده ان انا ممكن اعاتب حد انه مشى فى مظاهرة او كده يعنى..
اشكرك على التعليق اللى اسعدنى
مودتى وخالص تحيتى

اللؤلؤة يقول...

السلام عليكم
أخى مسدس صغير
ياحكومة يا حكومة بتاع التفجيرات أه أقبضوا عليه وعلى مدونته الشقيه
تحياتى

مسدس صغير يقول...

اللؤلؤة

يا سلام ع الاصحاب

اول ميعرفو عنى سر يبلغو عنى؟؟

مكنش العشى

ولا الغدا..


اشكرك على التعليق والتواجد.

فتافيت يقول...

عجبتني حته منظمة بقى ديه نيههههههههههههاي جامدة
انا عمري ما اشتركت في اي مظاهرة.. لا بتقدم ولا بتأخر واخرتها اعتقااااااااااااااال

ليه وعلى ايه.. ماافضل بكرامتي اعمل حاجة مفيدة.. بدل ما اشيل علم المغرب وانا بهتف لفلسطين.. (وش بيطلع لسان وبيلعب حواجبه)

بس بجد ضحتك على كلامك

وهاتصل باابوك يشوفله حل فيك بقى .. مسدسات ومظاهرات

مستقبل يا ابني مش كده (نفس الوش اللي فوق)

فتافيت يقول...

maha zein

ههههههههههههههههههههه
ههههههههههههههههههههههههههه
ههههههههههههههههههههههههههههههههههه
هههههههههههههههههههههههههههههههه

حلوة اوي حركة العصير دية ههههههههههههههههههههههههههههههههه

mohamed ghalia يقول...

لا أوعى تقلق سرك فى بير
هو رقم والدك إيه؟ هههههههههههههههه

صيدلانيه طالعه نازله يقول...

و نعم التظاهر اعلام مسروقه و تزويغ من المدرسه فعلا حس وطنى صحيييييييييييح
بس بابا قرا الورقه و معرفش خطك و لا عرف و رمى الكلمتين من منطلق اللبيب بالاشاره يفهم

موناليزا يقول...

كان ايه بقى المكتوب فى المنشورات؟

مسدس صغير يقول...

فتافيت
بقى معقول اقولك سر بينى وبينك.
تفضحينى ع الفضائيات ومش كده وبس.
لأ كمان عايزة تقولى لبابايا..
وفيها ايه يعنى اما اشتال علم المغرب فى المظاهرة؟؟
مش المظاهرة دى بتتكلم بلسان العرب جميعا واكيد المغرب لسان منهم..؟

مسدس صغير يقول...

فتافيت لمها زين
كمان بتردى على مها عندى.
بجد المفروض ان انا كنت نزلت مظاهرة عصير القصب دى عندى بردة بتاعة مها.
يمكن الشعب العربى يستفيد من التجارب الجبارة دى..

مسدس صغير يقول...

mohamed ghalia
يبقى انا بقول سر الاقيك قايل لابويا من قبل ما انزل البوست؟؟؟
يا سلام ع الاصحاب؟؟
ههههههههه
نورتنى يا محمد باشا

مسدس صغير يقول...

صيدلانية طالعة نازلة
طبعا مظاهرة بكل ما تحمله الكلمة من معنى
ايه يعنى اعلام مسروقة ؟؟
مش اعلام والسلام
وايه يعنى مزوغين؟
دا حتى من الفسحة بس مش من اول اليوم..
وعلى فكرة انا بردة بيتهيألى ان بابا عرف خطى وطنش..
نورتينى يا دكتورة

مسدس صغير يقول...

موناليزا
اللى كان مكتوب فى المنشورات تييييييييييييييييييييييييييييييييييييييت
للأسف القابة حذفته..
ههههههههه
نورتينى يا مونا

ايوشة يقول...

ههههههههه فكرتنى بالمظاهرة الوحيدة الفريدة اللى شهادتها فى حياتى وكانت مقلب انما ايه تييييييييييت فعلا والبركة فى الاندال اللى سابونى اشرب المقلب لواحدى مرسيى للمرورك على المدونة