الثلاثاء، 26 أكتوبر 2010

متَّاكل ..


ياللى الهواده هواك
وخلاص هوى أدك
لمّا الهوان يهواك 
مضروب ع القفا 
وقفايا هوه قفاك
معروف أكيد ردك
وكلاب وغاوية الهوا
وقلبتها هوهوا
وزمان بنينا السد .
دالوقتى هوى سدك
صلى وصام لجل الطلب
لما خلص !
فى النار هوى
ومين غوى شدك؟
لما رجع للدنيا ..
نوى ..
إن النمور جنس القطط
مرجوعها للنونوا
لكن نسى ..
وقال ياللى بياكل بلح
كفاياك معانا النوى
قلبى معاك اتلوى
والنار دى لجل الدفا
وأخينا منه اتشوى
والفحم لجل اللحم ..
لكنه منه اتكوى
والأرض لجل العرض
لكنه تحت الثرى
والهمة متكسرة
والحلو فيها اتحوى
***
يا كلاب وعاملة ديابة
أصل الحياة مش غابة
هوه الأسد صياد؟؟
وللا الغزال اتغابى؟!
وللا الأرانب علّمت
سكك الخطر بسحابة؟!!
لكن السؤال .. إيه أخرك؟ 
متقالة بطيابة .
ومفيش جواب
أصله اتخرس
والألسنة مربوطة يابا
***
أصل الارانب متعودة ..
ساعة مبتشوف ضل واحد
ع العدا ..
والجزرة اللى باينة فى المدى
سراب كبير ..
وكمان أكيد متعضعضة .
***
ساعة الحروب ..
كل الأرانب فى النفق
وميعرفوش معنى الفدا
حتى السكك جوه النفق
على بعضها متنفده
كل الأسود
 - قصدى اللى عاملين أسود -
حاسبينها ميت سنة
أما الأرانب 
سايبينها كده
*** 
فكر شوية يا غبى ..
لما الجزر يتاكل !
ساعتها ..
مين مع مين هيتشاكل؟!!
افهم بقى معنى التوكل
أصل اللى إنت فيه ده
متواكل 
ومتَّاكل ..
**
** 

هناك 10 تعليقات:

BNT ELISLAM يقول...

جلمات حلو اوى والمعنى الى قاصد توصلوا احلى
واجمل انى حاسه اكنى انا اللى بقوله وبتكلم بلسانى انا


دمت مبدع

قلم رصاص يقول...

الله عليك يا ابو الطلقه نووي

جميله جدا ياصلاح
ايوا كدا ياجدع
ارجع لأرضك وبهايمك
ههههههههههههههههه

استمر استمر استمر

sony2000 يقول...

افهم بقى معنى التوكل
أصل اللى إنت فيه ده
متواكل
ومتَّاكل ..
صح كدا
وبجد
ياريت تتفهم الكلام دا صح

sony2000 يقول...

افهم بقى معنى التوكل
أصل اللى إنت فيه ده
متواكل
ومتَّاكل ..
صح كدا
وبجد
ياريت تتفهم الكلام دا صح

حلم بيعافر يقول...

ابو صلااااااااح

اللى خلانى اخد بالى من الشعر اصلا

اللى موش عارف يتغير يقول...

سمعت ان فرحك فى مارس اه يا صلاح اه
عاللى جرى منك
عموما لو كده مبروك يا فنان
بلا ايهاب بلا كباب

عمرو يسرى يقول...

كلمات جميله
والمعنى رائع
تسلم الايادى

كلمات من نور يقول...

متواكل متآكل و اتاكل كمان يا مسدس صغير والله المستعان .تحياتي

ميرام يقول...

اييييييييييييييييييه ده بجددددددددددد
راااااااااااااااااائع

ازاي بتلعب بالكلام كده
(:
بجد جميلة من أجمل ماقرأتلك
(:
تحيتي ومستنية الجديد

كــركــبــة دمـــاغ ㋡ يقول...

كل سنه وانت طيب وبالف خير وصحه وسلامة

وربنا يعود عليك الايام وانت في احسن حال يارب

عيد سعيد عليك وعلى كل حبايبك

(f)