الجمعة، 22 مايو 2009

سجل يا تاريخ !!


فى سابقة هى الاولى من نوعها فى تاريخ مصر سواء الحديث او القديم رجل تتوافر فيه السلطة والمال والنفوذ ليس فى مصر فقط وإنما فى منظقة الشرق الاوسط هذه السابقة هى صدور الحكم بإعدام هشام طلعت مصطفى.....

فمن منا سمع قبل ذلك عن إعدام رجل كهذا؟!!!

يوسف عبد الرحمن : رجل ارتشى وادخل مبيدات مسرطنة مصر ورغم ذلك حكم عليه بالسجن عشر سنوات

ولم يتم اعدامه ورغم ذلك هرب الى خارج البلاد او تم تهربيه. وكلاهما سواء " المهم انه هربان "

رندا الشامى : مساعدة يوسف عبد الرحمن وشريكته فى الجريمة كذلك الامر حكم

عليها بالسجن وهربت هى الاخرى أو تم تهريبها.

هانى سرور (هايدلينا) : فضيحة اكياس الدم الفاسدة ولم يعدم مثلا وانما حصل على البراءة.

نواب القروض : جميعهم هرب خارج البلاد.

ممدوح اسماعيل وابنه : قتلوا 1400 مصرى ومع ذلك لم يتم اعدامهم وهم الان يتنعمون خارج البلاد.

وغيرهم وغيرهم.

انا لا اشكك فى عدالة القضاء المصرى

لأنى وبكل ثقة استطيع أن اقولها "أن القضاء المصرى من أنزه

ما يكون القضاء إلا القليل النادر وهذا وارد ليس فى القضاء فقط وانما فى كل المجالات"

فعلا حكم تاريخى بكل المقاييس والقضاء المصرى لا يحتاج الى شكر من أحد لأن هذا هو واجبه وألا يخشى فى قضائه الا من الله.

حتى وإن لم يعدم وتم نقض الحكم فقد ظهر للجميع أن القضاء المصرى بخير.

ثانيا : من وجهة نظرى "لقد كان لقرار النائب العام بمنع النشر فى القضية أثر عظيم فى أن تسير التحقيقات والمحاكمة على الشكل المرجو حتى وإن شكك البعض فى هذا القرار"

هناك 50 تعليقًا:

nody_1987 يقول...

انا قلتها من زمان الراجل ده اتباع وخلصنا
وبعدين تفتكر هو لو كان متهم فى قضيه تخص الشعب مثلا
يعنى لو كان بنى وحدات سكنيه ووقعت على دماغ الناس
او استورد اسمنت منتهى الصلاحيه وباعه للناس
او او يعنى
كان اخد اعدام
لا طبعا
لان فى قضيه زى دى مش هو لوحده الى ها يتحاكم
فا من الاحسن انها تتلم
انما فى قضيه سوزان تميم هو والى اسمه السكرى ده
فا قالوا خلاص سبوه يتحمل نتيجه نزواته
واهو يبقى كبش فدا
وتبقى بجميله ونحسن صوره القضاء

ستيته حسب الله الحمش يقول...

فيه قصة مخفية يعلمها الله وحده في الموضوع

راجل ملتي ملياردير يتعدم في رقاصة درجة عاشرة متجوزة رجالة منعرفش هم مين ولا ماتت على ذمة واحد ولا اتنين

والف وربعمائة مصري مطحون في السعودية بينهم اساتذة جامعة وزوجاتهم وعيالهم وعمال تعول اسر وليس اسرة واحدة دمهم يشربه البحر الاحمر
؟؟؟؟؟؟؟؟؟؟؟؟؟؟؟؟؟؟؟؟؟؟؟؟

بكره ومهما طال الزمن نعرف ايه اللي حصل بالضبط

اكاد اشك في نفسي لأني مش فاهمة شيء

متنساش ان عنوان مدونتي مش عااااااااااارفة حاجة

هذه حياتي يقول...

السلام عليكم ورحمة الله وبركاته


ربنا يستر

علينا

خالص مودتي وصادق دعائي

د. ياسر عمر عبد الفتاح يقول...

بصفتي من مدمني نظرية المؤامرة بشكلها الواسع
فأنا بقولها بصوت عالي
الموضوع ده فيه إنه

فيه حاجة مش فاهمها
فيه حلقة مفقودة

تامر علي يقول...

كل ما تسمعه وتشاهده هو ما يراد لك أن تسمعه أو تشاهده .... مع احترامي الشديد للقضاء والقضاة فإن القضاء تم تركيعه ولا يوجد مؤسسة في مصر غير مخترقة وغارقة في الفساد والدليل كلامك انت في هروب الخائنين والمفسدين بعد الحكم عليهم بأحكام مخففة وبراءة ممدوح اسماعيل وبراءة يوسف والي ومحاكمات عسكرية لكل من يمت للدين بصلة

مع احترامي الشديد للكثير من القضاة والقضاء ولكن المؤسسات كلها منهارة تحت قبضة البطش

تحياتي وتقديري

Dr.m يقول...

السلام عليكم

اولا ان اللي لافت نظري ان معظم رجال اعمال مصر الكبار اما يتجوزوا فنانات او يتفضحوا مع راقصات

هو في ايه

هي مصر رايحه على فيييييين؟!!!!

ربنا يستر

تحياتي
سلام

قلم رصاص يقول...

لازم اولا نعرف ان احالة اوراق المتهمين الى فضيلة المفتي ليس معناه انه تم الحكم بالإعدام .. وانما احالة الاوراق مجرد وسيلة وضمانة من ضمانات امكانية تطبيق حكم الاعدام ....!

وبناء عليه يمكن ان لايتم الحكم بالإعدام اذا جاء رأي المفتي بعدم جواز تطبيق العقوبة من الناحية الشرعية .. وانا اتصور ان رأي المفتي ماهو الا رأي استشاري لمحكمة الجنايات صاحبة السلطان الاول في انزال حكم القانون على مادليها من وقائع .
يعني ممكن تلجأ المحكمة الى تفريد العقوبات نتيجة اعمال احد الظروف المخففة سواء كانت أعذار قانونية أو كانت ظروف قضائية..وتحكم بالسجن المشدد أو تنزل به حتى الى عقوبة السجن المؤبد مالم تحصل مفاجآت أخرى .........

هذا من ناحية

على الجانب الاخر ، أنا متوقع المفاجأة التالية ، وهو انه حتى لو اخد حكم اعدام وكان الحكم باتا مستنفذا كل طرق الطعن القضائية بما فيها النقض .. أنا اتصور انه ممكن نتيجة ضغوط معينة تمارس من هنا أو هناك يمكن أن يلجأ النظام ممثلا في رئيس الدولة في استعمال حقه الدستوري بالعفو عن المتهمين او أحدهما ......هذا والله اعلم


ده كان مجرد توقع او تحليل بسيط جدا للأمر من الناحية القانونية والسياسية

أما من حيث رأيي في العقوبة على هذا الشخص او ذاك ، أنا بصراحة لست متعاطف معاهم على الاطلاق .. فهءلاء وامثالهم خربوا البلد وقعدوا على تلها
وبدل مايوجههوا اموالهم لخدمة البلد وانتشالها من الفقر اللي عايشه فيها دايرين يتسرمحوا ويعربدوا ويعثوا في الأرض فساد .

معلهش يامسدس افندي ياحبيبي طولت عليك

نسألك الدعاء

في حفظ الله ياصاحبي

MǿиY El-Shreef يقول...

واشمعنى ده

اشمعنى ده الي القضاء بتاعنا يتنزه ويحكم باعدامه

في حاجه غلط

mimi يقول...

هيا دي مصر يا صاصا
حسبي الله ونعم الوكيل

الشعب لابد له من حكومه تشكمه يقول...

المسأله مش انه اتباع ولا قضاء مفيش زيه

المسأله ان الموضوع حصل فى الامارات ومعرفوش يلموه وانت بنفسك شفت شرطه الامارات عامله ازاى.....مظبطين كل الادله والامور...

بنجاواتى يقول...

السلام عليكم

والله يا صاصا هو فعلا حكم تاريخى وهو الاول من نوعه

بس فى احتمال انه بعد النقض الموقف يتغير وكذلك الحكم

ولو ما اتغيرش الحكم يبقى لازم نحط فى الاعتبار احتمال ان يكون هذا الحكم له اسباب اخرى تخفى علينا-غالبا اسباب سياسية-

والاحتمال الاخير وهو الذى اتمناه هو ان يكون مجرد حكم عادل من قضاء نزيه ولا يقف وراء هذا الحكم اى اغراض اخرى

تحياتى

ساره يقول...

جايه اسجل حضور واسلم
واقولك بما انى مش مصير
فامش فاهمه شئ :)

ماما أمولة يقول...

ازيك يا مسدس

شاغل نفسك والله

دول ميستحقوش اي كلام

لاننا زي الطرش في الزفة لاعارفين الحقيقة ولا حاجة

واللي الحكومة عايزة توديه في داهية هاتوديه

ربنا على الظالم

سلام

مسدس صغير يقول...

نودى
الراجل متبعش يا جماعة
الراجل ارتكب جريمة واتحاكم عليها
هو عشان موقفوش معاه يبقى اتبع؟؟
انا مش شايف كده خالص
الراجل ارتكب جريمة واتحاكم عليها
بس يمكن لتعدد الاطراف هو ده اللى ادى الى محاكمة خالية من اى مؤثرات خارجية.(دبى ولندن وبيروت والقاهرة)
اشكرك على التعليق
نورتينى

مسدس صغير يقول...

ستيتة حسب الله الحمش
وجهة نظرى المتواضعة
مفيش اى قصص مخفية
الراجل ارتكب جريمة واتعاقب عليها.
بس يمكن اللى فيها بس ان محدش وقف معاه فى ضلاله بس.
اة يتعدم فى رقاصة درجة ربعمية
طالما نفس بشرية يتعدم.
اما بالنسبة للى قتل 1400 فالحكم هنا حتى وان كان غير عادل الا انه لا يمكن ان يعزى هذا لذاك.
يعنى ده ملوش دعوة بده
وعلى رأيك ممكن الزمن يعرفنا اللى حصل بالظبط
بس يا ترى هنبقى لسه عايشين والزمن بيتكلم عن حقيقة هذه القضية وغيرها؟؟؟؟
اشكرك على التعليق
نورتينى

مسدس صغير يقول...

هذه حياتى
ربنا يستر
لنا الله
اشكرك على التعليق
نورتنى

مسدس صغير يقول...

د/ياسر
ممكن يكون فيه ان بس الظاهر انه رجل قتل وتم معاقبته.
اشكرك على رأيك
نورتنى

مسدس صغير يقول...

تامر على
الفساد فى كل المجالات وليس فى القضاء او بمعنى اصح ليس مقصورا على جهة بعينها
ولكنى ارى ان فساد القضاء اقل من فساد اى جهة اخرى
ولكن الذى يظهره هو المركز الحساس للقضاء فى مصر والعالم
احييك على رأيك
نورتنى

مسدس صغير يقول...

dr m
فعلا مش عارفيين ليه الناس دى بيجرو ورا الرقاصات والفنانات .
مع انهم بفلوسهم يتجوزو اللى همه عايزينه
مصر رايحة دريم بارك.
ههههههه
احييك على التعليق
نورت

مسدس صغير يقول...

قلم رصاص
الحمد لله ان انت رديت على نفسك
سيدى الفاضل راى المفتى رأى بالعربى كده لا قيمة له فالمفتى لا يوجد عنده الا صك مكتوب عليه موافق ولا يوجد عنده اى صكوك رفض.
وهذا ثابت من تاريخ تطبيق حكم الاعدام فى مصر
فلم يثبت ولا حالة واحدة رفض فيها المفتى تنفيذ حكم الاعدام فى س من الناس.
اما بالنسبة للمفاجأة فهذا كلام استبعده وغير منطقى بالمرة.
ولكنى اقدر رأيك.
اما من حيث تقبلنا للحكم من عدمه
فطالما انهم مدانون فيستحقون العقوبة وبكل تأكيد.
احييك على رأيك
نورتنى

مسدس صغير يقول...

مونى الشريف
مش القضاء ده اللى غلط لأن ده اللى حكم بما قال الله " ولكم فى القصاص حياة يا أولى الألباب "
اشكرك على تعليقك
نورتينى

مسدس صغير يقول...

ميمايا
لنا الله
حسبنا الله ونعم الوكيل
اشكرك على التعليق
نورتى

مسدس صغير يقول...

الشعب لابد له من حكومه

حتى وان كانت الجريمة فى الامارات كان يمكن بسهولة لأى راغب ان يخرجه منه كما الشعرة من العجين.
ولكن نرجع ونقول انه القضاء الذى لم يخف السلطة ولا الرأى العام ولا الاقتصاد الوطنى.
اشكرك على التعليق
نورتى

مسدس صغير يقول...

بنجاواتى
نسأل الله ذلك
بس حتى لو الحكم اتغير بعد النقض
كفانا فخرا قاضى مثل المحمدى قنصوة.
اشكرك على التعليق
نورت البلوج

مسدس صغير يقول...

سارة
نورتى طبعا
كفاية الزيارة السريعة
نورتى

مسدس صغير يقول...

ماما امولة
الخير فى وفى امتى الى يوم الدين او كما قال رسول الله صلى الله عليه وسلم
لنا الله
ولكنى كما انقد المسيئ لابد ان احيى المصيب.
اشكرك على التعليق يا مامتى وحمد الله ع السلامة
نورتينى

mimi يقول...

انا يا زعيم بلملم شمل الناس علشان أحشد قوات أهجم بيها علي الكونفرنس الجاي

تأثير الفراشة يقول...

هو التاريخ من ناحية هيسجل، فأكيد هيسجل
أنا باشفق على المؤرخين اللى بيحاولو أو هيحاولو يعملو تأريخ للفترة الحالية.....هيسجلو إيه و للا إيه

ربنا يرحمنا برحمته

تحياتى لحضرتك

MaNoOoSh يقول...

انا رايي ان الحكم كان كدة علشان فى أطراف تانية أقوى منه كان ليها مصلحة ان الحكم يبقى كدة.

اصل القضاء يعنى اشمعنى بقى نزيه فى القضية دى بالذات؟؟؟
مش قادرة انا استوعبها الحكاية دى ولا نازلالى من زور أبدا

ريمان يقول...

الحكومه مش فالحه بس يا صلاح الا فى القبض على الناس الملتزمه وكل من يدعو الى الله وفاتحين المعتقلات على ودنه

وتقبض على اى حد بيفكر يعمل اصلاح فى البلد دى


لكن المجرمين وقتالين القتله


!!!!!!!!!!!!!!!


يحكموا عليهم بشرع الله ازااااااااااى؟


لا عيييييييييب

حسبى الله ونعم الوكيل

هيروحوا من ربنا فين؟

مسدس صغير يقول...

mimi
احشدى القوات براحتك انا بقى هاجى بالاسلحة الثقيلة وارجع القوات من حيث أتت
هههههههه
اشكرك على التعليق
نورتينى

مسدس صغير يقول...

تأثير الفراشة
والله انا معاكى
اللى هيأرخو للفترة دى هيتعبو اوى
فترة مليانة احداث
ربنا يستر
احييكى على رأيك
نورتى البلوج

مسدس صغير يقول...

منوووش
فعلا عشان الموضوع فيه اطراف ضمن شويه من النزاهه
بس يعنى انتو مستكترين علينا نفرح مرة بنزاهة القضاء؟؟؟
هههههههه
وانا بردة عند رأيى ان دى انطلاقة القضاء من جديد.
اشكرك على التعليق
نورتينى

مسدس صغير يقول...

ريمان
لنا الله
والله احنا عايزين حكم ربنا يطبق
يعنى مثلا لو القاتل اتقتل والحرامى اتقطعت ايده والزانى اتجلد او اترجم على حسب.
وشارب الخمر اتجلد
احنا هنزعل ليه؟
ع العموم ربنا يهدى النفوس الى دين الله.
احييكى على رأيك
نورتى المدونة

غروب يقول...

هو مفيش شك يا متر فى نزاهه القضاء المصري صحيح

لكن تفتكر الحكم هيتنفذ فعلا

مش عارفه ليه ينتابنى بعض الشكوك

وليه مش يتهرب زى اللى قبله اللى ذكرتهم

عموما ربنا مع الحق ولو الناس الغلابه مش اخدت حقوقها في الدنيا هتطالب بيها في الاخره

تحياتى

فتاه حالمه يقول...

انا طبعا سعيده ان في عداله علي الناس دي اخيرا
لولولولولولولولولولي
يلا زرغوطه حلوة اهي
بس انا ليا رائي في الموضوع ده والله اعلم يعني
بس مش عارفه ليه حاسه ان الموضوع متظبط علي الراجل ده بشكل مش طبيعي
الله اعلم بس الحمد لله

مسدس صغير يقول...

غروب
طبعا لو الحكم اصبح نهائى هينفذ
من غير كلام
اما لو هرب دى حاجة تانية
نسأل الله السلامة
اشكرك على التعليق
نورتينى

مسدس صغير يقول...

فتاه حالمة
انتى محدش قالك ان ممنوع الزغاريط فى المدونة خاصة وانتى طالعة على السلم؟؟
سلم ايه بس؟؟
مش قلنا مفيش سلم
ههههههههههه
اقولك زغرطى براحتك
طالما الراجل هيتعدم
بالنسبة بقى انها متظبطة عليه
هو كل شئ جايز فى البلد دى
بس انا بردة مازلت عند رأيى دى عدالة القضاء.
اشكرك على التعليق
نورتينى
خد بالك من السلمة
اصلها مش موجوده.

صيدلانيه طالعه نازله يقول...

ربنا يتم الموضوع كله بالعدل لا تتدخل يد خفيه و تقلب الترابيزه على الكل و تغير الاوضاع و ان كان رايى فعلا ان الموضوع فيه ضغوط خارجيه كتير حتحاول ان يبقى الوضع على ما هو عليه و فى الاخر لا يصح الا الصحيح

Soul.o0o.Whisper يقول...

أنا بردوا رأيى كدا

أو دا اللى شايفاه مؤقتا

إلى أن يتم إثبات أقوال أخرى





دمت بود

مسدس صغير يقول...

صيدلانية طالعة نازلة
هذا ما كنا نبغى
تطبيق العدل
ربنا يستر ع الجاى.
سعيد برأيك
نورتى المدونة

مسدس صغير يقول...

سول
ربنا يستر
شايفين كده ومحدش عارف الايام مخبية ايه
لنا الله
اشكرك على التعليق
نورتى البلوج

وردة يقول...

الكل اتفاجأ بالخبر
محدش توقع الحكم
كان الكل بيقول يا برأة او حتي حكم يتخفف بالنقض
لكن اعدام
؟؟؟؟؟؟؟
بجد في وقفة قوية عند القضية ديه
تحية للقاضي النزية احمدي قنصوة
ياريت منصة القضاء لا يعتريها غير الشرفاء امثاله
ربنا يكرمك علي الموضوع
سلام

مسدس صغير يقول...

وردة
والله انا اتفاجأت بالحكم ده جدا
محدش كان ممكن يتوقعه بصراحة
بجد دى قوة وثقة فى النفس من القاضى علاوة على النزاهة والشرف.
اشكرك على التعليق
نورتى البلوج

ميرام يقول...

(:
أنا لحد دلوقتي مش مصدقة
ومش مقتنعه
مش عارفه ليه
(:
يمكن مش هصدق الا لو اعدموه
!
تحية لك ..

مسدس صغير يقول...

ميرام
مش انتى بس
ناس كتير اوى مش مصدقة والله
لنا الله
اشكرك على التعليق
نورتينى

موناليزا يقول...

فعلا والله الكل مستغرب

ايوشة يقول...

على راى المثل نيجى فى الهايفة ونتصدر
هو ده حال البلد

مسدس صغير يقول...

موناليزا
اشكرك على التعليق
نورتى البلوج

مسدس صغير يقول...

ايوشة
ميرسى خالص على التعليق والزيارة
نورتينى