الخميس، 14 مايو 2009

صالح للإستخدام الآدمى..


هو ايه اللى صالح للإستخدام الادمى؟؟؟

حرام عليكوو

وزارة الصحة بتقول ع القمح اللى جاى من روسيا انه صالح للاستخدام الادمى

بيقولو انهم 65 الف طن قمح جايين من روسيا وفاسدين..

وناس بتقول انهم 300 الف طن.

وزارة الصحة اخدت عينه حللتها وقالت انهم صالحين للاستخدام الادمى.

"الادمى المصرى طبعا".. لا احنا عايزينكو تحللو العينات طبقا لاى ادمى بس يكون غير مصرى .

حللوه طبق للآدمى الهندى مثلا. مش هقول الامريكى ليفكرو ان احنا بندعى عليهم ياكلو من القمح ده. لا لسمح الله

ازاى امريكى وياكل من القمح ده؟؟!!!

"هيئة الرقابة على الصادرات والواردات قالت أن نتايج الفحص أثبتت أن الشحنة مطابقة للمواصفات.. إممممممممممم

إلا أن الحجر الزراعي أفاد بوجود حشرات ميتة وارتفاع نسبة البذور السامة بمعدل 56 بذرة في الكيلوجرام.."

يعنى الحجر الزراعى ماله ومال الحشرات الميته وماله ومال البذور السامه؟؟؟

طبعا كلام الرقابة هوه اللى يمشى ان القمح ده سليم وعال وميه الميه..

لان اساس 56 بذرة مسمومة فى الكيلو جرام نسبة قليلة ومتضرش الآدم المصرى.. ولو كانت تضر كنا قلنا على طووووول..

انتو عارفين؟؟ لا طبعا متعرفوش.. انا من سنتين كده فاكر اننا كنا مصدرين شحنة بطاطس للسعودية . واول ما نزلت عينه من الشحنة فى الموانى السعودية وحللوها لقو فيها نسبة عفن بسيطة راحو مرجعين الشحنة كلها لمصر عن بقرة ابيها وامها كمان وجميع الحيوانات المتاحة..

انا عايز اعرف اما يقولو جملة " طبقا للمواصفات القياسية المصرية " يعنى ايه؟؟؟؟ يعنى يكون المنتج خالى من الفران والقطط والكلاب الميته؟؟ ممكن..

ربنا يستر

هناك 62 تعليقًا:

احساس طفلة محبة للرومانسية بس واقعية يقول...

طيب دى حاجة جاية متسدوردينها والحكومة مسؤله عنها
هنعمل اية يعنى سواء طلعت كدا او كدا مش هنعرف الحقيقة حتى لو مكنوش قالوا حاجة خالص وسكتوا احنا مكناش هنعرف
لان احنا اصلا مبنعرفش الحقيقة من الكذب فى بلدنا

بس فى مثال اقرب ولينا دخل فية ونعرف حقيقتة نهر النيل دا كلنا بنشرب منة
مش كام طن وهيخلصوا .. ورغم كدا احنا اللى بنرمى فية القمامة واحنا اللى بنلوثة بجانب المصانع اللى منعرفش عنها ولا عن اصحابها حاجة

يعنى اذا كانت الحكومة مسؤلة عن حاجة واحنا بنحاكمها نحاكم نفسنا احنا كمان دى حاجة عصبتنى وجت فى بالى لما قريت الخبر

غير كدا طبعا دى مهانة انهم يكذبوا ويعنى هم اللى هياكلوها ما اللى يموت يموت يعنى الانسان ملوش قيمة حتى لو اتكلمنا 100 سنة

انا كل شوية اسمع حاجة عن مصر واللى بيحصل فيها وافضل افكر وارجع بالمشكلة للاسباب والقيها هى هى
شعب + حكومة كل منهم فى مشاكل وكل منهم بيهين الاخر سواء بالكلام او بالافعال

شكرا ليك
تقبل مرورى

ريمان يقول...

يا حلاوه يا ولاد

صالح للاستخدام الادمى؟

ده على اساس بقه اننا فران تجارب


حسبى الله ونعم الوكيل

انا بجد مش عارفه الفساد هيوصل لايه تانى ولا هيحصل ايه تانى اكتر من كده

يا رب اعفينا

طب والحكومه دورها ايه؟

نايمه اكيد؟


مش كده برضه؟

بنجاواتى يقول...

كنت معدى كده ودانى لقطت حد بيتكلم عننا

دخلت ولقيت كلام محترم جدا وجميل

طبعا يا سيادة القاضى المواصفات المصرية غير غير غير

ولان انت مش قاضى واكيد فاكر قلت السبب ايه يبقى نفس السبب هو اللى هيخلى الشحنة دى مطابقة

وربنا يخلى كل الوزارات واللى مش وزارات

ونومستا

mimi يقول...

معلش يا ابو صلاح
أصل هما عارفين ان المصري النيل رواه
والسوس جواه ... فمش فارقة أصلا بقي 56 في الكيلو .... ولا حتي الكيلو كله مسوس .. المهم يطلعوا بتصريحات وخلاص ... أسمهم يظهر ويتكتب وهما بيقولوا حاجة ...

لينا رب اسمه الكريم ...

هنعمل إيه بس .... وبعدين حبيبك يبلعلك الظلط والسوس كمان

ولا إيه؟؟

سلامو عليكو

بـسـمـــة صـــــلاح يقول...

السلام عليكم

انا مش هقول اني مستغربه ابدا
دي مصر ياجدعان
يعني ايزي خالص اللي بيحصل دا

ولما لتاقي وزارة الصحة اخدت عينه حللتها وقالت انهم صالحين للاستخدام الادمى
يبقى انت اكيد اكيد في مصر

ولو سمحت متقولش استخدام ادمي هههه ممكن تقول اي حاجه تاني لكن ادمي لأ
احنا في نظرهم مش بني آدمين بتاتا البته


حسبي الله ونعم الوكيل البلد عايزة مسح شامل واعادة تعمير وتربيه من اول وجديد
الا من رحم ربي نبقى ننقيهم بقى ونطلعهم قبل ما نعمل المسح الشامل

تقبل مروري واسفه على تأخري في الزيارة بس ظروف المذاكرة والهم

وحبيت اقول لحضرتك على ملاحظة صغننه كدا

مثلا اي كلمة فيها جمع زي(يفكروا)
بنكتب اخرها الف
الا اذ كنت حضرتك يعني عشان بتكتب بالعاميه
وبليز مش عايزاك تدايق مني

دمت كما تحب
تحيــ بسومةــاتي(:

ساره يقول...

الحال من بعضه
بعض التجار عندنا
يجيبوا سمك مثلج مسرطن ويبعونه على الناس ... الي ان تكتشفهم وزاره التجاره وتصادر المنتج .. طبعا يكون كم عيله اخذت منهم

المهم الربح
حسبي الله ونعم الوكيل

قلب ارهقته الاحلام يقول...

ايه بس المواضيع الجامدة دي وبقرة ابيها وامها ههههههههه

اول حاجة الموضوع ده مصيبه ف حد ذاته

ولما وزير الزراعة يقول ان مجرد وجود حشرات ميته وبدور خبيثة وسامه
ده مش سبب لاننا نرفض الشحنة دي كارثة تمشي علي قدمين

وكون ان سيادة الوزير شايفه انه لما يستوردلنا قمح مسرطن وبيستخدم كغذاء للمواشي

ف روسيا ويقول اننا هنعالجه كي يكون صالح للإستخدام الادمي

فمعني كده ان المصريين دول بأة يا إما هما مش بني آدمين مثلا؟؟
أو أننا ... زي ال بيأكلوهم القمح ف روسيا ده ف نظر سيادة الوزير والحكومه طبعا

أممممممم هو لسه الكلام مخلصش بس انا مصدعة خااااااالص

ووهعدي عليك ف المكتب مرة تانيه يامتر :)

تحياتي ,,,

مسدس صغير يقول...

احساس طفلة محبى للرومانسية
سواء القمح وللا مية النيل وللا اى حاجة كله فساد فى فساد
سواء الحكومة او الشعب كله غلطان بس احنا لازم نتكلم عن الحكومة .
امال هما يتكلمو عن الشعب واحنا منتكلمش عنهم؟؟
مش ممكن يعنى ههههه
ع العموم ربنا يستر
متشكر جدا ع الزيارة والتعليق
نورتى البلوج

مسدس صغير يقول...

ريمان
ياريت نبقى فران تجارب.
فران التجارب بيعاملوهم كويس وياكلوهم كويس عشان يقدرو يستفيدو منهم.
ربنا يستر
اشكرك على التعليق
نورتينى

مسدس صغير يقول...

بنجاواتى
ههههههه
الفاضى يعمل قاضى
ما علينا
نورتنى بجد وسعيد بتعليقك وزيارتك الكريمة
مستنيك دايما
سام
اقصد سلام

مسدس صغير يقول...

mimi
ظلط وسوس وقمح مسوس وفران وكلاب وكل حاجة بس اجيب حبيبى ده منين؟؟؟!!
شكرا على التعليق الجميل
نورتينى

مسدس صغير يقول...

بسمة صلاح
يبقى انت اكيد فى مصر
لما تلاقى كل اللى بيحصل ده يبقى انت اكيد فى مصر
ولا تأخير ولا حاجة تنورى فى اى وقت
وبالنسبة لموضوع الف الجمع بعد واو الجماعة. طبعا فاهمين بس انا بكتب بالعامية "والعامية اكتب زى مانت بتتكلم"
اشكرك على الملاحظة
نورتينى

مسدس صغير يقول...

سارة
فعلا الحال من بعضه
سمك لبن قمح هندى
ربنا يستر
اشكرك على التعليق
نورتينى يا سارة

مسدس صغير يقول...

قلب ارهقته الاحلام
حلوة بقرة ابيها دى؟؟
ههههههههه
اى خدمة
فعلا معاكى حق والله تصريحات وزير الزراعة دى اللى مضايقانى جدا
الناس دى بتتكلم ازاى؟؟
يعنى ممكن الوزير ياكل من القمح المسوس ده؟؟؟
لا طبعا مش معقول
الناس دى غير مسئولة
ربنا يستر علينا منهم
سعيد جدا بتعليقك
نورتينى

قلم رصاص يقول...

هههههههههههههههههههه

مجيبتش جديد من بلاوي الحكومة يامسدس افندي

لعلمك بقى ياباشا
الشعب المصري يتعب .. وبقولك اهه تاني .. يتعععععععععب جدا لو أكل وشرب نضيف..وسلمني نضيف أسلمك نضيف
ههههههههههههههههههه

ولعلمك كمان الشعب هينبسط جدا بالصفقة الجديدة دي

يعني باختصار زلط مع حشرات والشعب يعمل احلى دماغ


ربنا يستر على كلاب مصر ..بعد اللي بيحصل للبني أدمين ده معادش أمان للحكومة وممكن تستورد حاجات غير مطابقة للحيوان ههههههههه

بوست رائع ياصديقي
وخد بالك من بقرة أبيها
ههههههههههههههههه

في حفظ الله

Kiara يقول...

حارق دمك ليه

هما بيقولوا كل واحد بعمره واهو يخفوا من الزياده السكانيه

ايه المشكله

ال يعني المصري هاممهم اوي

القدر و انا يقول...

مسدس صغير
ياريت تكون مسدس وتفرغ طلقاتك فى اللجنة اللى سافرت ونقت وتعاقدت
وبعدين قنبلة فى قلب اللى سمح بدخول الشحنة
وبيقولو اصلنا ح ن غ ر ب ل ه ا
حسبى الله
زرنى افسحك شوية
يمكن تنسى

الشعب لابد له من حكومه تشكمه يقول...

لما تلاقى القمح بحشراته وبناكله يبأه انت اكيد اكيد فى مصر..

وبعدين انت مستغرب ليه كده اصلا..

فى السبعينات الشعب كله اكل لحوم كلاب وحمير لما قال يابس واهو شعب عفريت ولسه عايش..

ودخلنا على الفاكهه المسرطنه واهو شعب شقى وعايش ويتعايش..

ودخلنا على العيش ابو صراصير ومسامير وجميع مايخطر على بالك

وبرضه عادى شعب معمر متبت فى الدنيا..

من الاخر يعنى هناكل القمح هناكله وهنقول كمااااااااااااااااااان

بالمناسبه المواصفات المصريه تختلف طبعا

لان المستوى الادمى المصرى ملوش مثيل فى دول العالم نحن شعب معدته تهضم الظلط

صمت الحنين يقول...

مش وزارة الصحه هى اللى بتقول كده ان القمح صالح للأستخدام الآدامى يبقى اكيد هى فاهمه انه المصرين مش بيأثر فيهم اى حاجه من دى او يمكن نظرهم كان ضعيف شويه مشفوش الحاجات دى اللى فى القمح

لا حول ولا قوة الا بالله العلى العظيم

ربنا يستر ياما لسه هنشوف

Unknown يقول...

يااااااااااااامسدس
ياااااااااااااااامسدس
ياااااااااااااااااامسدس
عايزه اقولك على حاجة او مثل :
فيه حاجةبردون فى فضلات الانسان الصلبة
اسمها اى كولاي(Ecoli)دى ما بتعيش الا فى الامعاء الغليظة للانسان وبالتالى
تواجدها فى اى منتج معناه ايه؟فاهم
طبعاً علشان انت كلك مفهومية :)
بالضبط معناه ان المنتج ده ملوث
بفضت بشرية.المهم مسموح رسمى وعينى عينك ب4 اى كولاى فى 100السنتى مكعب من مية الشرب بتاعنا واخد بالك 4مسموح بيهم اصبر على رزقك ياسيدى
احنا بقى عندنا كام وحسب تحاليل
وزارية غير متحيزة ولا متحزبة
عندنا 40-60 اى كولاى فى 100سم
ولا عزاءللدوسنتاريا المعوية
المتوطنة والمستوطنة فى
بلدنا الحبيبة:(:(:(

Unknown يقول...

رغيت كتير انا
معلش بس
خليك فاكر الجمايل
التعليق ال20 وال21
ههههههههههههههههههه

Unknown يقول...

اه صحيح وما تنساش
المعلومات الطبية
الهايلة اينعم
تزعل لكن
برضه
معلومات
مش كده ولا ايه؟

د. ياسر عمر عبد الفتاح يقول...

يا عم مسدس هيه جات علي القمح
خليها علي الله
إحنا ناكل الزلظ ولا بيفرق معانا
أكلنا الحمير الميتة
والكلاب
والقطط
والخنازير جاية في السكة

يعني القمح الملوث ممكن يخاف مننا أصلاً

تامر علي يقول...

فعلاً الانسان المصري له حسابات اخرى غير الآدمي .... لهذا رأيي دائماً أن حكومات الفساد يجب تغييرها ولا أمل في إصلاحها وإلا سيدفع كل فرد الثمن باهظاً

تحياتي للطرح المثمر

مسدس صغير يقول...

قلم رصاص
فعلا نحن شعب لا يهاب الزلط فى الدقيق
احييك على تعليقك صديقى العزيز
دمت بدون زلط.
سلامى

e_emy يقول...

:| :|

حسبي الله ونعم الوكيل

Soul.o0o.Whisper يقول...

السلام عليكم و رحمة الله و بركاته

حضرتك متضايق و عمال تضرب فى المليان ليه؟؟

مش لازم يكون فى تميز؟؟

يعنى هو المصرى زى اى واحد فى الدنيا؟؟


لالالااااااااا

زعلتنى منك


باقولك ايه

تعالى شارك معانا فى اليوم دا
" لا تفسد .. و جرب تعيش انسان"

http://han2esh.blogspot.com/2009/05/blog-post_09.html



دمت بود

مسدس صغير يقول...

كيارا
على رأيك
واهو كله خفيه ورحمة
نورتى

مسدس صغير يقول...

القدر وانا
طالما هيغربلوها خلاص
ناكل وميهمناش.
مش هنموت يعنى
ههههههه
ربنا يستر
اشكرك على التعليق
نورتينى

مسدس صغير يقول...

الشعب لابد له من حكومه تشكمه
والله الشعب ده طيب واخد ع البهدله
ربنا يكون فى عونه
مبيحوقش فيه حاجة
سعيد جدا بتعليقك
نورت

مسدس صغير يقول...

صمت الحنين
كله كده الوزارات كلها كده الا ما رحم ربى
نسأل الله العفو والعافية
نورتى

مسدس صغير يقول...

norahaty
والله فضلات بشرية حيوانية
وغيره
ومازل النيل يجرى
فعلا معلومات قيمة جدا
اشكرك عليها
بكون سعيد جدا بتعليقك

مسدس صغير يقول...

norahaty
لا خدى راحتك البلوج بلوجك
20 ولحد 30 ولا يهمك
ههههههه
نورتينى

مسدس صغير يقول...

norahaty
شوية معلومات متنقيه
ههههههههه
اشكرك عليها
انا اول مرة اعرفها بصراحة

جميل اوى
اشكرك
نورتينى

مسدس صغير يقول...

د/ياسر
احنا ولا يهمنا
لو جابولنا قنابل ذرية هناكلها بردة
هههه
نورتنى يا باشا

مسدس صغير يقول...

تامر على
لنا الله
ربنا يستر على الشعب الغلبان
نورت يا باشا

مسدس صغير يقول...

e emy
ربنا يستر
نورتينى

مسدس صغير يقول...

دكتورة سول
فعلا المصرى معروف بجبروته
هههههههه
ربنا يستر
نشارك معاكو طبعا
لينا الشرف
نورتى

أحمد سعيد بسيوني يقول...

حاجة مسخرة وقلة قيمة

منهم لله

مسدس صغير يقول...

احمد سعيد بسيونى
ربنا يسترنا
فى الدنيا والاخرة
اشكرك
نورتنى

تأثير الفراشة يقول...

الواضح إن المصرى محطوط فيه ثقة زيادة عن اللزوم فى إنه ياكل الزلط، فمش هتفرق شوية قمح فاسد
!!!!!!!!!
ربنا يرحمنا جميعا

لنا الله

تحياتى لحضرتك

MaNoOoSh يقول...

طب وايه يعنى شوية سوس؟؟
بلاش دلع الحكومة بتحاول تخلينا رجالة ووقفنا وقفة رجالة.. يقوم نتأمر على شوية سوس؟؟
لالالالالالالالالالالالا.. الحكومة دى معرفتش تربى الشعب قليل الأدب ده
وكفاية كدة لحسن المرارة بدأت تنقح عليا.

صمت المشاعر يقول...

وايه يعني يعني يعني شويه حشرات في القمح

وبعدين طالما قالوا الشحنه مطابقه للمواصفات تبقي مطابقه للمواصفات انت هتعرف اكتر من الحكومه يعني دي الحكومه الحكومه اللي معيشانا في خيرها من زمااان اووي تنكروا ده

لا طبعا متنكروش دي مغرقانا في خيرها

كفايه كدا لان الحكومه دي حبيبتي لو قعدت امدح فيها من هنا لبكره مش هخلص

saragebaly يقول...

هنقول ايه بس؟؟

غير حسبنا الله نعم الوكيل

الشعب المصري اكتر شعب مُهان

والشعب الوحيد الي مش بيتعمله حساب

!!!!

وبرضه الشعب الوحيد الي مش بيقدر يتكلم ولا يفتح بقه

وإلا يكون عارف مصيره ومصير كل الي يعرفهم

لكـِ الله يـــا مـــصـــر

هو ارحم عليكي من حكامك الي مش بيراعو ربنا فيكي ولا في اسمك ولا في شعبك

لا حول ولا قوة الا بالله

مسدس صغير يقول...

تأثير الفراشة
ثقة متناهية
متقلقيش
ههههههه
ربنا يستر
اشكرك على التعليق
نورتى

مسدس صغير يقول...

manooosh
طبعا لازم يدربونا على جو الحرب والجيش
سوس
ودود
ومفيش خالص
قادموووون
هههههه
ربنا يستر
اشكرك
نورتى

مسدس صغير يقول...

صمت المشاعر
على رأيك احنا يعنى هنعرف اكتر من الحكومة
سليمة يعنى سليمة
شكرا على التعليق
نورتينى

مسدس صغير يقول...

سارة جبالى
فعلا الشعب ده مسكين من فرعون وجاى
مسلم امره.
ربنا يستر ع الجاى
اشكرك على التعليق الجميل
نورتينى يا سارة هانم

غروب يقول...

انا جايه اسلم واسجل حضور

علشان بس هربانه من المذاكره

شكلك كده بتتكلم في السياسه والقمح

انا ماااااالى خلينى بقه جمب الحيط اصل يشيلونى عربي تانى

هههههه

سلام

مسدس صغير يقول...

غروب
ع العموم نورتى
وربنا يوفقك
ويفوقك
سلامى

محمد يقول...

السلام عليكم ورحمة الله وبركاته


أهلا بالمسدس الخطير

موفق في عرضك للآراء ونسأل الله أن يأتي اليوم الذي نستفيق فيه

وتصبح مسمياتنا للأشياء علي مسمي

خالص مودتي وصادق دعائي

موناليزا يقول...

صالح للاستخدام الادمى
واضحة طبعا:)
يعنى الحشرات الموجودة فيه ميته مش صاحية ولا حاجة:)

ابو صهيب ( الجمعاوي الاصيل)سابقاً يقول...

السلام عليكم ورحمة الله وبركاته

اخي الكريم

انت بس مش فاهم

صالح للاستخادم الادمي المصري

فهمت كده

اصل البني ادم المصري غير كل البني ادمين

ممكن يقرقش الزلط

وبعدين خلاص جايين دلوقتي تقولوا قمح فاسد ومش عارف ايه فاسد

ماحنا بقلانا 25 سنة بناكل نفس القمح الفاسد

وبنتفس هواء فاسد

وبنشرب مياه فاسدة

وبناكل اكل فاسد

وكل حاجة في حياتنا بقت فاسدة

مش احنا اللي قبلنا بكده نستحمل بقى

زي بالظبط الحرامي اللي يدخل بيتك

ويسرق كباية وانت قاعد مبتتكلمش

يجي تاني يوم ياخد الغسالة وانت قاعد

يجي ياخد التلاجة وانت قاعد

في اخر يوم راح جاي ضربك على قفاك وكرشك وقعد هو في البيت وانت برضه مبتتكلمش عاوز ايه بقى تاني علشان تتكلم

مصر بتحتضر يتلحقوها يامتلحقوهاش

وصباحك مبارك شريف نظيف مفيد وكله جمال وكمال وعز

وسلملي على الحزب الوطني

مسدس صغير يقول...

هذه حياتى
اشكرك على تعليقك الجميل
ربنا يتقبل منك الدعاء
اشكرك على التعليق
نورت البلوج

مسدس صغير يقول...

موناليزا
اة طالما ميته خلاص
هههههه
اشكرك على التعليق
بجد سعيد بمرورك
نورتينى

مسدس صغير يقول...

ابو صهيب
هههههههههه
ياما اكلنا حاجات فاسدة ولا بيأثر
مش احنا يا بيه
اشكرك على الرد الجميل
وكل سنة وانت طيب
نورتنى يا باشا

رحلتنا في الحياة يقول...

احنا معدتنا تهضم الزلط بطلوا اشاعات مغرضة على الحكومة
هى تعرف اكتر مننا اذا كان صالح للاستخدام الادمى او صالح سليم :)

MǿиY El-Shreef يقول...

لا حول ولا قوه الا بالله

اقول ايه طيب

لك الله ياشعب مصر

والله ياخدك يالي ف بالي

محمد شوقي يقول...

لا حول ولا قوة الا بالله

مفيش كلام يتقال غير

حسبي الله ونعم الوكيل

تقبل مروري وتحياتي

مسدس صغير يقول...

ايوشة
هههههه
فعلا نهضم القطر مش الزلط

اشكرك على التعليق
نورتينى

مسدس صغير يقول...

مونى الشريف
حمد الله ع السلامة
معاكى حق
لنا الله
اشكرك على التعليق
نورتينى

مسدس صغير يقول...

محمد شوقى
فعلا حسبنا الله ونعم الوكيل
اشكرك على التعليق
نورت البلوج