الثلاثاء، 14 أبريل 2009

انفصام الشخصية


حاجة غريبة جدا انك تلاقى شخص بيقول حاجة وبيعمل عكسها تماما او انك تلاقى شخص بيحط نفسه فى مكان مش مكانه وبيتهيألى الامثلة كتير..

يعنى مثلا حسن نصر الله واحد عايز يبقى زعيم عربى وله كلمته فى المنطقه " ولكننى اراه دمية تحركها الاصابع الايرانية فى مسرحها العرائسى الفريد " يتكلم من خلف هذه الشاشة العملاقة عن الفداء والجهاد والقوة والبطش بشجاعة ومروءة وقوة متناهيه.. اذا كان الامر كذلك يا حسن افندى فلماذا تتخفى خلف هذا الستار العملاق حتى لا يعرف لك مكان؟؟ يعنى مثلا فى اثناء الحرب على غزة وساعة منضرب صاروخين مجهولين من جنوب لبنان على اسرائيل لقينا ان الجهات فى لبنان تتسابق لا لتعلن عن مسئوليتها عن الصاروخين ولكن لتعلن وتحلف بالختمة الشريفة وتحلف بعهد الثورة اللى بـ 52 يمين انهم ملهمش اى علاقه بالصاروخين دول وكان اولهم حسن افندى نصر الله . فعلا شرف ما بعده شرف.. وبعد كده يعيب على الانظمة العربية وعلى الدول.

يا حسن انت شخص عادى تتزعم جماعة كلامك ليس له اى ثقل سياسى ولا حساب سياسى اما الدول فهى تدور فى منظومة واحده لتكمل الواحده الاخرى وكل دولة مسئولة عن كل كلمة رسمية تخرج منها.. انا رأيى زى السادات ما قال اننا نحاسبك بتهمة الغباء السياسى.. "منتهى انفصام الشخصية "ما علينا . الموضوع اساسا مش منصب على حسن افندى وبس انما انا بتكلم بشكل عام..

مثلا " شيرين مشربتش من نيلها " قعدت تغنى مشربتش من نيلها طب جربت تغنيلها وتمشى فى شوارعها وتشحت قصدى وتشكيلها وال مولود ليها راحت امريكا تخلفه هناك عشان ياخد الجنسية الامريكية.. منتهى الوطنية.."منتهى انفصام الشخصية"

تامر حسنى ده بصراحة مش عارف البنات بيحبوه على ايه؟؟ يعنى انا مثلا احلى منه كتييييييييير .. عارفين مهند ميجيش حاجة فيّه..ما علينا سيبنا من موضوع ان انا احلى من تامر حسنى كتير وان مهند ميجيش حاجة فيّه. قعد يغنى لمصر ويقول " لو كنا بنحبها " نهرب من الجيش ونزوّر شهادات التخرج.. منتهى الوطنية "منتهى انفصام الشخصية"

حسن الترابى واللى ميعرفوش . حسن ده راجل زعيم معارض سودانى كل همه المعارضه فى السودان بشكل قد يؤدى لاحتلال السودان عن قريب جدا كان بيناشد الدول اللى يروح ليها عمر البشير اللى هوه الرئيس السودانى انهم يقبضو عليه لتقديمه للمحاكمه وطبعا لو اتقبض عليه مهيبقاش احسن حظا من صدام حسين.. كل ده بيأدى الى زعزعة الامن فى السودان وغير كده على الرغم من انه رجل دين وكان ابوه كده برده الا ان له فتاوى خطيرة جدا فى ان حجاب المرأة ليس فرضا ولم يفرضه القرآن وان المرأة المسلمة يجوز ان تتزوج من غير المسلم.. وغيره.. فعلا شخصية غريبة جدا كل همه الوصول للسلطة حتى ولو على حساب بلده..

.............

معلش طولت عليكو.. وفيه ناس مهيعجبهاش البوست . انا اسف يستحملونى..




هناك 81 تعليقًا:

*البت المشمشية *حلوة بس شقية * يقول...

اول تعليق

*البت المشمشية *حلوة بس شقية * يقول...

لسه مقرتش
هقرا واجى

*البت المشمشية *حلوة بس شقية * يقول...

تالت تعليق عشان محدش ياخد مكانى

*البت المشمشية *حلوة بس شقية * يقول...

اكيد انا معجبنيش البوست
هو انتا بتكتب حاجة عدلة ابدا

*البت المشمشية *حلوة بس شقية * يقول...

وميت مرة ميت مرة اقولك بلاش كلام فى السياسة مالو الانفصام فى الشخصية حلو وزى لفل
انا هكلم عن تيمو
حبيب قلب البنات الىل انتا احلا منو بمليون مرة وعلى يــــــــــــــــــدى
امر امر امر
والحاجة شرين
يبنى مبقاش فيه انتماء وحسن نصر الله
امال انتا عايزو يقف ويحارب
ويعمل عمليات بنفسو
الله يرحم عمر المختار
واسكت بلا نيلة


سلاحف بقه

شاب كــ طخين ـــــا يقول...

معاك حق
حسن نصر الله بقى مفضوح وبقيت اكرهه شكله من الأساس عاملزى عرايس الماريونت وده كان واضح من زمان بس كنا بنقول مقوم وهو كان كده برغم انه كلف لبنان كتير بفذلكته

ومعاك حق تقريبا كلنا عندنا انفصام الشخصيه ده منها لله الصين غرقت بيه البلد :D

دمت بكل خير
سلام

*البت المشمشية *حلوة بس شقية * يقول...

بقلك ايه
متخليش حد يعلق ع البوست ده
انا هاخدو ايجار لحسابى

احساس طفلة محبة للرومانسية بس واقعية يقول...

لا البوست حلو لية ميعجبناش

عندك حق فى انفصام فى الشخصية يمكن الناس بتدمج بين احلامها وواقعها فبيطلعوا بالشكل دا

بين الامانى و الاحلام
وبين الواقع اللى بيعيشوة
يطلع الكلام حاجة
والفعل حاجة تانية خالص

وممكن تكون ظروف المجتمع والبيئة المتناقضة اللى الناس بتتربى فيها

اتفق معاك فى كل البوست الا الاسائة للسيد حسن نصر الله
هو صحيح اساء لينا و انا مقبلش ان حد يمس مصر بكلمة حتى لو فيها العبر واكيد كل مصرى كدا

بس منكونش احنا زية ونرد الاسائة بأسائة خلينا نكون افضل

تقبل مرورى

وردة يقول...

هههههههههههه
انت لسه واخد بالك من حسن باشا نصر الله
كنت فين بس ايام حرب غزة لما كان بيقوم الناس علي النظام عندنا وعاوزة تبقي سلاطة
عاوز البلد تغرق في حرب اهليه يقلب الشعب علي النظام في عز الحرب علي حدونا
ده مش انفصام لا ده قمة التهريج وعدم الاحساس بالمسئولية
اما لو حتتكلم عن الفنانين
فحدث ولا حرج
ومع اني بحب شرين
بس طبعا عندك حق
انا عجبني الكلام جدااااااا
وعلشان كه علقت عندك
برافوووووووو
ربنا يكرمك
سلام

MǿиY El-Shreef يقول...

والله الراجل ده زهقني

ف كل مدونه ادخل الاقي الاخ حسن نصر الله

هو انسان مريض نوجه احنا دماغتنا ليه

الانسان الي زي ده احسن ليه التجااااهل

والله عندك حق

كله بيتكلم ويقول وبس

وبعدين هما بيغنوا ببلاش

احلى من تيمو ومهند :D

اساسا مهند ده يع اصلا

تيمو الي قمر قمر ياخواتي

اكيدانت احلى

هصدقك اصلي مابكدبش محاميين :D

قلم رصاص يقول...

موضوع رائع يامسدس

هكذا هي السياسة ، لعبة قذرة

فيها العملاق ، وفيها الأقزام

فيها الواضح الخفي ،والخفي الواضح

فيها المال والسلاح والفساد والنجاح

وفيها رز لبن كمان
هههههههههههههههههه

تقبل مروري المتواضع

كله في الكلتش يقول...

تامر حسنى ده بصراحة مش عارف البنات بيحبوه على ايه؟؟ يعنى انا مثلا احلى منه كتييييييييير .. عارفين مهند ميجيش حاجة فيّه..ما علينا سيبنا من موضوع ان انا احلى من تامر حسنى كتير وان مهند ميجيش حاجة فيّه. قعد يغنى لمصر ويقول " لو كنا بنحبها " نهرب من الجيش ونزوّر شهادات التخرج.. منتهى الوطنية "منتهى انفصام الشخصية"


كلها صور لعمله واحدة سواء فى السياسه
او فى اى وسط آخر
وحتى الناس العادية فى الشارع

جزاك الله خيرآ عننا

وارحب بزيارتك لى

وارجو ان تسمح لى بأضافة مدونتك فى
المدونات الصديقة ( هذا شرف لى)

MaNoOoSh يقول...

بغض النظر عن الامثلة السياسية اللى انت ذكرتها (ودة لانى مخاصمة السياسية الخارجية علشان ضغطى عالى والداخلية علشان المرارة)
بس فكرة انفصام الشخصية نتاج طبيعى جدا للمجتمع اللى احنا عايشين فيه بكل التناقضات الموجودة فيه..
اما بقى بالنسبة لتشامر اقرصنى ومهنهد وانه ميجيش حاجة فيك .. فدة على يدييييييييييييييي
مهنهد مين بس يا راجل.. طب دة حتى مش ناقصلة غير يطول شعرة شوية ويحلق شنبه ودقنة والعرسان يجولة بالهبل.. هع هع هع

عاشقه الرومانسيه يقول...

والله انت عندك حق
ولو فتحت المجال اكتر للامثال هتلاقى كتير
المجتمع كله بكل بقاته بيعيش حاله من انفصام الشخصيه

ستيتة يقول...

اما عن حسن "المخذول من الله بعونه" ده راجل مفقوس مفقوس يا ولدي

انت عارف هو عبارة عن ايه؟
عبارة عن فتنة
ربنا سبحانه وتعالى ذكر في أحدى آيات القرآن أن من يعبد الله على حرف "يعني يادوب مسلم بالبطاقة كده" لازم ربنا يجيب فتنة كي يمحص قلوب المؤمنين
اهو حسن ده هو محض فتنة

حط اسم حزب الله علشان الآية القرآنية
ثم رزقه الله نصر بسيط اهبل وعبيط والكفرة نفسهم ممكن يعملوا اضعاف اضعافه
فاللي بيعبد ربنا على حرف قال السيد الافندي كرامة نيافة الملا حسن
لأن اللي بيتكلم كاره للسنة واللي بيسمع ميعرفهاش اصلا

ومؤكد كلنا عارفين ان في آخر الزمان فيه فتنة اشد وانكى

مفيش حاجة اسمها شيعي بيحب السنة واهلها
اقرأوا عن الشيعة قبل فوات الآوان
وعلموا ابناءكم اصول التوحيد والعقيدة .. حتى لا يعبدوا الله على حرف

موضوع كان نفسي اعمل فيه بوست حدايا

بس مش خسارة في جمال موضوعك

تحياتي

Unknown يقول...

عزيزي
ايها المسدس ارجو الا تطلق الرصاص عليا يوما ما
موضوعاتك جديرة بالاحترام
والله انا متفق معاك في الكلام الوارد في البوست دا صدق من قال احنا في زمن الحكي والرغي والفعل مفيش
تحياتي والى الامام ومنتظر تشريفك ليا

TIMMY !! يقول...

ما شاء الله ,

كلام جمييييييييييل جدا ,

ده كلام مسدس كبير , مش صغير ,

تحيتي لك أخي الكريم :) ..

فتــافيت (رحاب الخضري) يقول...

اللي ما يعجبهوش ما يردش ويمشي
وانا متأكدة ان لو حد اعترض هايعترض على حسن نصر ايران

اللي عايز يعمل نفسه زعيم الامة الاول .. ونسي انه حركة الامل بذرة حزب الله الاولى هي اللي سهلت لشارون مذبحة صابرا وشاتيلا .. وان هو نسي التاريخ مش هاينسى ابدا

وعلى رأي عم لوانس العرب في مدونته ميكروبص.. مسميه حسن توشيا عاااااااا

موضوع عسسسسسسسسسسل يا مدفع باشا

والمشكلة ان مريض الفصام ما بيبقاش واعي للتناقض لكن دول واعين جدا

ام بالنسبة لمهند اللي مايجيش حاجة فيك ده.. مش هاعلق عليه ربنا امر بالستر
نييهههههههههاااااااااي

فتــافيت (رحاب الخضري) يقول...

اه صحيح نسيت اقولك انك ظلمت الشيخة شيرين لانها كان قصدها نهر المسيسبي مش نهر النيل .. بس انت اللي مش واخد بالك

حب على ايد الحاجة يا ولد علشان تسامحك

عااااااااااااااااااااا

د. ياسر عمر عبد الفتاح يقول...

الكلام عن الممثلبن والمغنين مبقاش منه فايدة .. وياريتها كانت على إنفصام الشخصية وبس

لكن اللى بيدايقني إننا لما كنا بنقول على حسن أفندي الكلام ده أيام حرب تموز كانوا بيتهمونا بالعمالة والتخلف .. وأنا شفت إمام مسجد كان هينضرب قصاد عيني بعد خطبة الجمعة لما تجرأ وتكلم عن الشيعة.

أما الترابي فده شخصية ... مش عارف أقول عنه إيه؟
أي دين بتاعه ده بقى؟
سمعتله شوية كلام يحرق الدم
ده بيهرج والله العظيم
ربنا يهديه

أمل حمدي يقول...

ربنا يرحمنا من هولاء المرضى

لان الواحد الايام دي بيشوف حاجات تجنن

ربنا يستر علينا

سلام

صمت المشاعر يقول...

والله عندك حق في كلامك

بس انت لو جيت تبص للشعب بتاعنا هتلاقيه اصلا كله بيعاني من انفصام في الشخصيه

اما حسن نصرالله دا فربنا يهديه يا يا.......

شكرا ليك علي البوست

صيدلانيه طالعه نازله يقول...

انا متفقه معاك ان معظم الناس المدعيه انها اصحاب مواقف و مبادىء كلهم بيبقوا كلام و بس لكن ساعه التصرفات فعلا بتخرج منهم افعال عجيبه بتهد مواقفهم من اساسها
عادى متزعلش نفسك لو حندور حنلاقى ده هوا الصفه السائده دلوقتى

mohamed ghalia يقول...

لا ياعم البوست عجبنا ههههههههه
وكلامك كله تمام
ربنا يكرمك

غروب يقول...

هالووووووووووووو

ازيك

طبعا انا في غيوبه من بعد اللقاء ولسه صاحيه

فالمفروض اقولك صباح الخير

بص يا سيدي انا هقولك شئ

انا موافقاك ان في فعلا انفصام في الشخصيه كتيييييييييييييير وخصوصا في مصر والمصريين

لكن بصراحه

انا لالالالالالالالالالالالالالالالازلت احترم حسن نصر الله
ومش مصدقه اللى بيتقال

مش عارفه بقه هل ده لانى مش عاوزه اصدق ولا هو فعلا انسان كويس ؟؟؟؟؟؟؟؟؟؟؟؟

dr_samarmar يقول...

للأسف

كل واحد فينا فيه نسبة من الانفصام عايش بيها بس بتتراوح بقا من شخص للتانى

كنت عايزة أعلق بس ع البوست اللى فات

على شركة فرجللو :D

ماتظلموش الناس
هما غيرو الاسم بناءا على طلب الجماهير :D

و دا بسبب ان لفظ الجلالة موجود على عبوات كل المنتجات و دا بيسبب أزمة عند التخلص من العبوات دى
مش بيعرفو يحرقوها و لا يرموها فى القماتمة و لا ايه

بس هى كدا :)

مسدس صغير يقول...

البت المشمشية
برده مش هحسبلك اول تعليق..
انتى تانى تعليق بس

مسدس صغير يقول...

البت المشمشية
كمان مقريتيش؟؟
متورينيش وشك هنا تانى

مسدس صغير يقول...

البت المشمشية
انجرى يا بت

مسدس صغير يقول...

البت المشمشية
انا عارف ان الكلام ده من ورا قلبك.
انت بتحبى المدونة بتاعتى أد عنيكى انا عارف..
اه انا احلى من تيمو مليون مرة.
اما تشوفينى هتعرفى.
فعلا انفصام الشخصية ده منتشر جدا خاصة فى الشخصيات اصحاب المسئوليات.
اشكرك على الفرح اللى انتى عاملاه
وربنا ما يحرم المدونين من هبلك.
هههههههههه
نورتينى

مسدس صغير يقول...

امبارح كان عمرى عشرين
فعلا الراجل ده غريب جدا على الرغم ان مؤيديه كتير جدا فى مصر الا ان انا من المعارضين لسياسة الجعجعه الاعلامية
اشكرك على التعليق.

مسدس صغير يقول...

البت المشمشية
برده انتى تانى؟؟؟
انجرى يا بت من هنا
عايزة تخدى البلوج لحسابك وللا ايه؟؟
ههههههههههه
سلام

مسدس صغير يقول...

احساس طفلة محبة للرومانسية
انا لا اسيئ لحسن نصر الله كشخص. لان ده مش من مبادئ المدونة انما انا اسيئ لتصرفات سياسية مفضوحة للجميع.
معاكى حق طبعا انفصام الشخصية له اسباب كتيره من اهمها الاسباب اللى انتى ذكرتيها..

بين الامانى و الاحلام
وبين الواقع اللى بيعيشوة
يطلع الكلام حاجة
والفعل حاجة تانية خالص

احييكى على التعليق الجميل
بجد سعيد بزيارتك
نورتينى

مسدس صغير يقول...

وردة
انا طبعا حصلى الشرف بتعليقك وسعيد بيه
فعلا حسن ده عاز مصر تولع عايز يعمل حرب اهليه فى مصر
عايز الشعب يثور على الحكومة عشان تبقى بوظة.
احييكى على رأيك
اما شيرين مشربتش من نيلها
طالما بتحبيها يبقى البوست الجاى مدح فى شيرين يا جماعة.
ههههههههههه
اشكرك على التعليق الجميل
نورتينى
وسعيد بزيارتك

مسدس صغير يقول...

مونى الشريف
هههههههههههههههه
مبتكدبيش محامين؟؟؟
ههههههههههههه
انا فعلا احلى منه كتير حتى اسألو بنت الناس..
فعلا الراجل ده فارسنى
حاجة غريبة جدا وشخصية اغرب مما تتخيلى
ربنا يهدينا.
اما بالنسبة لمهند فهوه فعلا يع خالص
وتامر حسنى واغنيته الجديده "يا شعره ضايعة من صدرى"..
هههههههههههه
اشكرك على التعليق
سعيد بتواجدك
منورانى

مسدس صغير يقول...

قلم رصاص
صديقى العزيز
ايه الكلام الجامد ده؟؟
دا ينفع بوست لوحده..


هكذا هي السياسة ، لعبة قذرة

فيها العملاق ، وفيها الأقزام

فيها الواضح الخفي ،والخفي الواضح

فيها المال والسلاح والفساد والنجاح

احييك اخى العزيز
نورتنى كعادتك القديمة

مسدس صغير يقول...

رامى عيسى
طبعا بكل تأكيد انا ازداد شرف باضافة مدونتى فى قائمة مدوناتك.
بجد سعيد بزيارتك
سعيد برأيك
نورتنى

مسدس صغير يقول...

manooosh
مش مصدقانى؟؟
انا فعلا احلى منه واسألو البت المشمشية ..
ههههههههه
فعلا المجتمع ملئ بالمتناقضات
حاجة غريبة جدا
لا تنهى عن خلق وتأتى مثله..
اشكرك على التعليق
منورانى كعادتك
وربنا ميقطعلك نت ولا عادة حسنه..

مسدس صغير يقول...

عاشقة الرومانسية
فعلا المجتمع ملئ بالامثلة
حاجة غريبة
ربنا يعافينا
اشكرك على التعليق المختصر المفيد
نورتينى

مسدس صغير يقول...

ستيتة هانم

اما عن حسن "المخذول من الله بعونه" ده راجل مفقوس مفقوس يا ولدي

جملة جميلة جدا وفى محلها..

فعلا هما دول " الذين ضل سعيهم فى الحياة الدنيا وهم يحسبون انهم يحسنون صنعا"
الشيعة تاريخ اسود حقا.
الراجل ده عميل لا يفعل الا ما يملى عليه.
وفعلا بيستغل سذاجة البعض ليروج فكره عبر المنطقه العربية
واختار حزب الله شعارا له.
فعلا راجل غريب الاطوار.
زى مانا قلت رجل تحركه الاصابع الايرانية.

وبالنسبة للموضوع انتى كنتى عايزة تكتبيه عندك؟؟
يا خبر ؟؟
طب مش تقولى؟؟
انا مضطر احذف الموضوع بسرعة عشان تتكلمى فيه باستفاضه..
اكيد انتى هتتكلمى احسن.
هههههههه
اشكر تعليقك اللى اسعدنى جدا
منورانى زى كل بوست

مسدس صغير يقول...

medus
انا مش ممكن اطلق الرصاص عليك انت راجل محترم
بجد سعيد بتعليقاتك
واكيد لينا زيارة لمدونتك ان شاء الله.
وانا اتشرف بذلك

مسدس صغير يقول...

timmy
اشكرك على الكلام الحلو ده
بجد سعيد بتعليقك
نورتنى

مسدس صغير يقول...

فتافيت
فعلا الراجل ده عايز ينصب نفسه زعيم عربى ومش عارف
انسان غير مسئول طبعا

عجبنى اوى فى تعليقك الحته دى
"اللي عايز يعمل نفسه زعيم الامة الاول .. ونسي انه حركة الامل بذرة حزب الله الاولى هي اللي سهلت لشارون مذبحة صابرا وشاتيلا .. وان هو نسي التاريخ مش هاينسى ابدا"

فعلا عملاء

اما بالنسبة لمهند انا احلى منه كتيييييييييييير .. عندك اعتراض.؟؟
ربنا امر بالستر؟؟
طبعا..
ههههههههههه

مسدس صغير يقول...

فتافيت
مش اول ما عرفت انها كانت تقصد نهر المسيسيبى رحت جرى عليها وحبيت على ايديها.
وسامحتنى
بس انا قولتلها انتى اللى غلطانه
كنتى قولى مشربتش من مسيسيبها..
ههههههههههه
نورتينى

مسدس صغير يقول...

د/ياسر عمر عبد الفتاح
فعلا ايام الحرب الناس كانت متعاطفه معاه جدا الا انا والقله ..
راجل لا يحمل اى مبادئ.
راجل بيسب الصحابة الكرام فماذا ننتظر منه؟؟؟
اما الترابى
فحدث ولا حرج.
هوه مش هيسيب السودان الا اما تخرب.
اشكرك على التعليق
بجد سعيد بمرورك
نورتنى

مسدس صغير يقول...

ماما امولة
فعلا ربنا يرحمنا
نتمنى من الله السلامة
قمة التناقض مع الذات
بجد سعيد جدا جدا بزيارتك وتعليقك
نورتينى

مسدس صغير يقول...

صمت المشاعر
فعلا ناس كتير بتعانى من نفس المرض
بس الناس دى مش اصحاب كلمة ولا اصحاب قرار ..
انما واحد زى حسن ده يمكن صاحب كلمه شوية فى لبنان
فميجيش يطلع جنانه علينا.
اشكرك على التعليق
نورتينى

مسدس صغير يقول...

صيدلانية طالعة نازلة
فعلا الكلام حاجة والفعل حاجة تانية
وده من صفات المنافقين
اشكرك على التعليق
نورتينى يا دكتورة
وربنا يرزقنا الاخلاص

مسدس صغير يقول...

محمد غالية
طالما البوست عجبك يا باشا يبقى اخد ختم الجوده.
اشكرك على التعليق
نورتنى

مسدس صغير يقول...

غروب
ههههههههههه
انتى لسه مهنجه من ساعة اللقاء
على ايه؟؟
ما علينا
بجد انا سعيد انا اتعرفت علي بعض الناس الكويسين.
بس انا عايزك تصدقى اللى بيتقال
نورتى البلوج
اشكرك على التعليق

مسدس صغير يقول...

د/ سمرمر
بصى يا دكتورة
فعلا كل واحد عنده نسبة انفصام ربنا يعافينا منها
اما بالنسبة لشركة فرجللو
انا عارف الحكاية دى بس ده عذر اقبح من ذنب.
يغير اسم الشركة خالص يسميه فتح الله..هههههههههه
اشكرك على التعليق
نورتينى

موناليزا يقول...

غريب فعلا امر الكثيرين واليهم اقول هذه الابيات(مش عارفه اسم الشاعر)
لا تنه عن خلق وتأتِ بمثله عار عليك إذا فعلت عظيم

غروب يقول...

زعلانه منك جدا

القدر و انا يقول...

صاصا
سامحنى اتاخرت فى الرد
ابنى امتحاناته قربت
بوست رائع
سلمت يداك
المهم انفصام الشخصية دا تخصصى لان دراستى علم النفس
ربنا يكون فى عون من يتعامل مع هؤلاء
البشر

وردشان smilyrose يقول...

والله يابنى الواحد مش عارف يقول ايه


كتير بنقابلهم بيعانو من انفصام

الشخصية وايه الحل نجيب دكاترة منين

عشان يعالجو كل دول

المهم سيبك انت من كل دا

وسيبك من تامر ومهند

الموضوع جامد


وخصوصا انك احلى من تامر ومهند

هههههههههههههه

طلقة بجد

اختك

smilyrose

وردشان

روح الحب الصادق

مسدس صغير يقول...

موناليزا
فعلا معاك حق فى كل اللى بتقوليه

لا تنه عن خلق وتأتِ بمثله عار عليك إذا فعلت عظيم

....

اشكرك على التعليق
نورتينى

مسدس صغير يقول...

غروب
ليه بس ربنا ميجيب زعل..
كلمينى بس على الميل
وانا اشرحلك الموضوع..

مسدس صغير يقول...

القدر وانا
ولا يهمك
ربنا يوفقه ويكرمه فى امتحاناته.
اشكرك على التعليق الجميل
بجد سعيد بلقاءك.
خلاص طالما علم النفس تخصصك يبقى متفقين وهنعتمد عليكى فى الموضوع الجاى.
نورتى الموضوع.

مسدس صغير يقول...

smily rose
فعلا الانفصام ده منتشر جدا فى مجتمعاتنا
ربنا يعافينا
احنا عايزين كونسلتو اطباء عشان يقدرو يعالجو الناس دى.
انا موضوعى جامد؟؟
انتى اللى تعليقك جامد.
ههههههه
طلقات ومسدسات ومدافع؟؟ حاجة تولع يعنى
اشكرك على التعليق الجميل اللى اسعدنى
نورتنى

فوبيا - سايكولاند يقول...

اوباااااااز

السلام عليكم

اول تعليق ليا يا معلم عند حضرتك

يمكن ده من سوء حظى انى اختلف معاك ولكن الاختلاف فى الرأى لا يفسد -للوز - قضية وما تزعلش منى لو انفعلت وارجو انها تكون بدايه صداقه فى الفضاء الالكترونى
-------------------------------
ادخل معاك فى البوست
السيد حسن نصرالله رمز المقاومه الاسلاميه ضد المحتل بشقيها السنى والشيعى ده راى ****يا نهار اسود اوعا يكون حد من امن الدوله بيجى عندك هنا اتمسك بتهمه مسانده المقاومه والانتماء لحزب الله ومن قبل اى اقلام ولا قفيان انا بعترف من الاول ولا اعرف حسن نصرالله ولا الحزب)*** المهم
الجماعه اللى علقوا وحضرتك قالوا هو مستخبى ليه فى حرب غزه اقولك انا الراجل لسه خارج من حرب فى 2006 حرب تموز وقبلها حرر لبنان والحزب بقالوا عشرين سنه بيقاتل ومنع احتلال لبنان اللى اسرائيل احتلتها قبل كده فى اقل من يوم وعدم الاشتراك فى حرب غزه ليه بعد سياسى اولا ان لا تعطى لاسرائيل شرعيه الحرب على غزه بدعوى الدفاع عن الامن الاسرائيلى وان اسرائيل محاطه بالاعداء والكل يهاجمها حتى الصاروخين اللى اضربوا من الجنوب بنسبه 90 فى الميه الصواريخ ده من اطلاق المخابرات الاسرائليه الموساد لاقناع العالم ان اسرائيل مهدده من جميع الجهات
ثانيا دول الحوض او الجوار بقالها 30 سنه لم تطلق رصاصه واحده والقت السلاح وتقتات الان على فتات السلام الذى يلقى لها ان كان هناك ما يسمى بالسلام
والطبيعى ان قائد اى دوله او تنظيم لا يظهر للعلن ليقول للاعداء اقتلونى انا هو ولكن القائد ليس مكانه المعركه وده معروف فى الحروب الحديثه
ويكفى انه قدم ابناءه واستشهدوا فى الحروب مع اسرائيل فماذا قدم غيره من القاده قدموا ابنائهم لكراسى الحكم
المصالح الايرانيه فى المنطقه ما هى هل تستطيع ان تذكرها لى هل الدوله الايرانيه تقول ان حدودها من النيل الى الفرات هل المصال الايرانيه ان يتم محاصرتها بهذا الشكل لانها تساند المقاومه هل المصالح الايران بان يتشيع الناس
وهل الناس من السذاجه بان يتشيعوا بهذه السهوله -كانوا بقيوا مسيحين بقى*
طيب ماذا قدم السنه غير حماس والجهاد
لقد ادخل السنه الجيش الامريكى الى العراق وادخلوهم الى الكويت والسعوديه والقواعد العسكريه فى مصر والاردن ومن يحمى اسرائيل هم السنه
مع العلم ان دعاه الفتنه يفرقون بين السنى والشيعى
وانا كسنى اقول لك لا فرق الا يشهد الشيعه انه لا اله الا الله
لهم اخطائهم بسب الصحابه وام المؤمنين عائشه ولكن يحاسبهم ربهم ونحن كمسلمين لا نفرق بين سنى وشيعى
المقاومه حق وانا مع قاوم سواء سنى او شيعى

فوبيا - سايكولاند يقول...

ويا ريت توضحلى بعد اذنك ما هى المصالح الايرانيه فى منطقتنا
من هو العدو ايران ام اسرائيل
وعايز حسن نصر الله يعمل ايه فى حرب غزة
وايه رايك فى موقف السيد الرئيس فى الحرب واغلاق معبر رفح
وقضيه التخابر مع حزب الله الاخيره رايك ايه فيها
اكون شاكر ليك لو جاوبتنى وهتلاقى نفسك بتعيد التفكير من تانى فى موضوع حزب الله
لان اى حد اسرائيل ما بتقدرش عليه بالحرب بتقدر عليه بالاعلام ويا ريت احنا ما نمشيش وراها ونحقق هدفها

ريمان يقول...

السلام عليكم

انا كنت بجد زعلانه اما شوفت تعليقك عند غروب

لكن


ربنا يعلم يا صلاح انى كان نفسى بجد ارضيكم كلكم وكنت بحاول انى ارضيكم والله

بس اللى دخلت قلبت اللقاء لاجتماع انا مش اعرفها وانا قولتلها كذا مره ان ده لقاء مش اجتماع وهى ولا هى هنا للاسف

على العموم بعتذر عن اى شىء زعلك او ضايقك

تحياتى ليك

S H A H يقول...

الطلقة قاتلة المرة دي يا صاحبي

انا مكنتش اعرف موضوع الجنسية الامريكية ده

بوست حكاية

بس يا ريت تحطلنا صورتك عشان نشوف ايه موضوع تامر حسني معاك

رئـيس التحـرير يقول...

السلام عليكم
زيارتي دي مش تصفح للمدونة أو قراءة لموضوع وتعليق عليه لا دي زيارة مختلفة جدا أنا يشرفني إني أدعو حضرتك للمشاركة والكتابة معانا في مجلة رؤية مصرية يمكن يحالفك الحظ وتكون أحد أعضاء فريق التحرير
العدد الجديد الرابع يعني هيصد بعد بكرة يعني فجر السبت لو هتقدر تشاركنا ابعت دلوقتي على بريد المجلة رسالة تأكيدية وجهز مشاركتك وابعتها بردو على بريد المجلة بس بسرعة عشان العدد بنبدأ شغل فيه يوم الجمعة بعد العشاء .. منتظر الرد والمشاركة
ودمت بود

رئيس التحرير
كاتب مصري

غروب يقول...

واضح ان ريمو فتحت الموضوع

انا فعلا زعلانه لنفس السبب وهو تعليقك عندى لانك حتى لو زعلان يا متر من اللقاء مش كان المفروض تقولها علنا لانى زعلت جامد خصوصا انك مش وضحت ايه مضايقك وكمان كلمه ما علينا

حسيت انها سخريه منى انا شخصيا

ولانى مش بعاتب اى حد فجيت اقولك انى زعلانه

عموما انا منتظراك على الميل في اى وقت

سي يو

فشكووول يقول...

اهلا اهلا حبيب قلبى المسدس الصغير... لأ دا كبر وبقى راجل وعايز يتجوز كمان
ولو انى مختلف مع حسن نصر الله ومختلف مع الترابى ومختلف مع البشير ... يعنى بالصلاة على النبى كدا مختلف على نفسى
الا انى اتحفظ فى بعض البوست وموافق على بعض البوست بخصوص شيرين والبتاع اللى اسمه تامر حسنى فانت اصبت فيهما..
تحياتى ودام قلمك مبدعا

ميرام يقول...

ياااااااااه
انا بيستفزني جدا الموضوع ده
(:
تلاقي حد عمال ينصح فيك ويعظ
وهو أسوأ منك كمان ..

بس يمكن دي طبيعه بشريه
ان الواحد يؤمر وينصح .. ويناقض نفسه ..
واخد بالك ان من واحنا صغيرين
يقولونا الكذب حرام .. وبعدين يقولونا لوحد سألكم قولو مش موجود
يقولولنا الغش حرام ..
بعدين تلاقيهم بيقولو حسبي الله في المدرس الي سحب ورقة اللي بيغش
ويقولو ويقولو
(:
دي طبيعه لا كارثه بشريه

هههههههههههه
بانتظار بوستك الجديد

ساره يقول...

صلاح تصدق وحده اجنبيه قالت لي ان انا عندي انفصام فى الشخصيه

لان احنا فى الشغل ناكل على الطاوله وفى البيت ناكل على الارض

ايش رائيك انت بس :)

عالم ماريونت يقول...

ليست هناك حقائق تاريخية ...هناك وجهات نظر في الحقائق التاريخية
خلينا ماشيين بوجهة النظر دي.. يبقى انا مش هعلق على جزئية حسن نصر الله

وكسرا للقاعده دي
احب اعلن اني من اشد المفقوعين مش من تامر ولا من البتاعة شريين
لا من الناس السذج الي بيسمعوهم والانيل انهم بيحبوهم
مش بس للكلام الي انت قلته في البوست
بس بص انت لتامر ده
ده منظر واحد يغني؟
دي اغاني دي اصلا؟
انا مش عارفة الناس جرالها اية؟

بوست مميز
تحياتي ليك
:)
رنا

وحي القلم يقول...

هو دا الواقع

مسدس صغير يقول...

فوبيا سايكولاند
اولا انا سعيد جدا جدا بمرورك وتعليقك فى مدونتى المتواضعة.
منورنى بصفتها اول زيارة ليك عندى.
الاختلاف فى الرأى لا يفسد للوز قضيه فعلا.
من قبل ما اتكلم فى رأيك . انا سعيد جدا بالمناقشه دى لان انا شخصيا اما قريت التعليق استفدت جدا.
نتكلم فى الموضوع :
حسن نصر الله ليس رمزا للمقاومة الاسلامية وانما رمزا للمقاومة الشيعية اللبنانية. هذه واحده.
ههههههههههه انا عايزك تتطمن . امن الدولة نيمين هنا..

يا سيدى نحن لا نقول لحسن نصر الله اذهب فأخرج اسرائيل من فلسطين وحرر المسجد الاقصى واقتل كل يهودى او اصنع لهم هولى كوست جديد.. انما نقول له يا حسن افندى كفانا تصريحات وعشق الظهور على الشاشات والرد اللازع والقاسى على التصريحات دون ادنى فعل او حركة تذكر. وليس من المرؤة فى شئ ان انصح الاخرين برفع شعار الجهاد من اجل تحرير فلسطين وانا اكتفى بالمشاهدة الصماء . وليس من المرؤة فى اى قائد سياسى ان يتلقى تعليمات من اى دولة او اى نظام المتمثلة فى ايران.
لانك اخى الكريم لو عرفت ما يقوله هذا الرجل من سب وشتم للصحابة رضوان الله عليهم زاقتفاء اثر سيده "الخمينى" وظهوره وهو يقبل يده علانيه . هذا الخمينى الذى كفره كل علماء اهل السنة والجماعة من تطاوله على الصحابة وتأليه على بن ابى طالب رضى الله عنه والقول بأن القرآن ما نجا من التحريف ويقسم على ذلك . كل هذا واكثر لا يجعلنا نفرح بنصره على اليهود وهو نصر بسيط بالمقاييس السياسية الحديثة لانه مجرد اعتداء عسكرى على ارضه ليس الغرض منه الاحتلال او الاستعمار وانما الغرض منه مجرد التهديد والترهيب ليس اكثر. ففرحنا بنصره يكون كما فرح المسلمون بانتصار الروم على الفرس ومنهم النبى صلى الله عليه وسلم وما كان هذا الفرح حبا فى الروم ولا رضاءا بما يفعلون وانما كرها فى الفرس.
اذا انا من مكانى هذا اعلن كرهى التام لحسن افندى نصر الله الذى لم يأخذ من اسمه اى نصيب يذكر.
واما عن قولك بأن الصاروخين انما هما من الموساد الاسرائيلى لجمع الدول الغربية حول اسرائيل فلا اعتقد هذا الكلام لان هذين الصاروخين قد انطلقا من الجنوب البنانى الذى يدعى حزب الله سيطرته الكاملة عليهما فكيف اذا يطلق صاروخين من جنوب لبنان تجاه اسرائيل بأياد اسرائيلية ولا يعلم حزب الله عنها شيئا. فإن الكارثة اشد واعظم.
انها سياسة الحناجر التى انتهجها زعماء كثيرون قبله برغم تحفظى على مقارنته بالزعماء لأن الزعيم هو من يزعم ويرؤس اما من يحرك كدمية فى مسرح العرائس فلا يمكن تسميته بزعيم لان امره غير مفوض اليه انما فى اصابع الاخرين او ان شئت فقل فى اصابع الايرانيين..

يا اخى العزيز الموضوع ليس بالسهولة التى قد يراها البعض. وانه ليس من الصائب ان نفتح نيراننا على اسرائيل فى كل وقت وحين . اما حرب معلنه واما ان تلتزم بمعاهدة السلام حتى وان كنا غير راضين عنها. والذى اود ان اقوله ان الدول تختلف عن الجماعات والعصابات والميليشيات. وحسن نصر الله لم يقدم نفسه للجهاد طواعية انما بأوامر من الشيعة امثاله من اجل الوصول لحكم لبنان وهذا لا يخفى على العوام امثالى فما بالنا بالمثقفين والسياسيين..
اما عن المصالح الايرانية فى المنطقه فهى مصالح فرض نفوذها على منطقة الشرق الاوسط ولا يخفى علينا الحرب الايرانية على العراق والحرب الدبلوماسية على مصر وعلى قيادتها سواء السادات ومن تلاه.
كل هذا من اجل مصالح ايران الاقتصادية والسياسية والدبلوماسية ولا تستغرب عمليات التشييع التى تذكرها بل هى واقع موجود وملموس على الوطن العربى بدليل هذه الخلية التى يريدون زرعها فى بلد كمصر لان مصر تعتبر من اقل الدول العربية من حيث وجود الشيعة بها. هم لا يريدون اى خير للمنطقه العربية صدقنى هذا الكلام ظاهر للجميع وغير خاف على احد ومؤكد انك اخى تعرف ذلك.ولقد نجحت ايران بفضل سياستها هذه بسحب البساط يوما بعد الاخر من تحت اقدام مصر لتكون هيه سيدة المنطقة وهذا جلى من حضور احمدى نجاد المؤتمر العربى اثناء حرب غزة المقام فى الدوحة. لان هذا المؤتمر كما ذكرت مؤتمر القمه العربى الطارئ فما دور ايران اذا هل هى من العرب ام هى الطارئ؟؟!!!!

وكلامك بأن السنة هم من ادخلو الجيش الامريكى الى العراق والى الكويت بهذا المعنى المباشر فيه خطأ ولو لغوى لانه ان كانت امريكا قد دخلت الى العراق او الى الكويت فلا يمكن ان يكون بفعل السنة وانما بفعل بعض الحكام والرؤساء حتى وان كانو سنة فلا يمكن لنا القول بان السنة مدانون جميعا فى ذلك. ولكنى ارى ان ادانتهم ليست تواطؤا مع العدو وانما هى تخاذل منهم حتى وان كان ذلك حفاظا على الكراسى فلا يمكن لنما ان نصفهم مثلا بالعملاء.
اما بالنسبة لسبهم الصحابة وعائشة وقولك ان الله هو من يحاسبهم فأنا اقول لك كلام الفقهاء والعلماء ان من سب عائشة او اتهمها فى عرضها كفر وذلك باجماع الفقهاء لانه بذلك ينفى اية فى القرأن الكريم والذى يحجد اية فى القرآن كفر وهذا ليس قولى..
وانا اعى واعرف واتفق معك انا المقاومة حق ولو لأكفر كفار الارض ولكن كونك لا تقاوم وتأمر الناس بالمقاومة وتأمر الشعب المصرى بأن يخرج الى بوابة غزة وان يضرب الامن ويعبر الى غزة فهذا هراء وغباء سياسى فريد.
انه بذلك لا يريد امن الوطن ولا امن فلسطين انما يريد حربا اهليه فى مصر..
نسأل الله ان يحفظ مصر وسائر بلاد المسلمين من كل سؤ..
اقسم لك اننى غاية فى السعادة من نقاشك الايجابى هذا لانك بذلك تجعلنى اشعر ان التدوين رسالة عظيمة وتبادل افكار اعظم.
غفر الله لى ولك..

مسدس صغير يقول...

فوبيا سايكولاند

انا وضحت المصالح الايرانية فى المنطقة فى التعليق اللى فات.
حسن نصر الله يكفينا صمته افضل عندنا من لغة الحناجر التى تضر اكثر مما تنفع.
اغلاق معبر رفح كلنا ندينه ولكن ليس معنى ذلك انه كان مغلقا بصفة مستمرة فلقد عبرت 80% من المعونات الغذائية والصحية فى اثناء الحرب على غزة عن طريق معبر رفح وهذا ثابت من الجانب الفلسطينى نفسه من منظمة حماس.

اما عن قضية التخابر مع حزب الله فننتظر حتى تنتهى التحقيقات لنعرف ماذا اسفرت عنه..
الاعلام ليس ملكا لاسرائيل كما يزعم العرب المغلوبيين على امرهم ان كان الاعلام هناك قنوات تابعة للوبى الصهيونى فهناك قنوات تابعة لايران الشقيقة ولقطر الشقيقة ولفلسطين الشقيقة ولحزب الله الشقيقة.
فماذا يصنع هذا الاعلام؟؟؟!!!!
اشكرك على التعليق دمت فى حفظ وامان الله..
نورتنى

مسدس صغير يقول...

ريمان
لا والله انا مش زعلان لا منك ولا من غروب خالص متفهمونيش غلط.
انا اللى ضايقنى ان كنت مفكر ده لقاء مدونين هيبقى جميل وظريف ولقاء ثقافى وتعارف وكده يعنى .
اتفاجأت انه اجتماع..
قلت خلاص مفيش مشكلة وبردة ممشيتش مثلا وكملنا وظهرنا بصورة كويسة وسلمت على كل الناس اللى موجوده وكلهم اخواتى ومفيش مشكلة
انا زعلان منك انتى وغروب عشان انتو زعلانين منى.
ههههههههه
ع العموم متزعلوش وربنا ميجيب زعل
نورتينى وان شاء الله فى الاجازة نعمل لقاء مدونين بجد وابقى سعيد ان شاء الله لو شفتك تانى..

مسدس صغير يقول...

shah
هههههههههههه
اشكرك على الكلام الحلو ده
بعد كده لازم تعرف ازاى نشرب من نيلها كويس.
انت طبعا عارف النيل بتاع امريكا اللى فى شارع امريكا الرئيسى.
هههههههههه
اشكرك على التعليق ونورتنى.
وبلاش احط صورتى بس عشان شعور اخوالنا المدونين بس.
ههههههههههههه
نورتنى ياباشا

مسدس صغير يقول...

رئيس التحرير
ان شاء الله نتواصل معاك
دا شرف لينا طبعا فى المقام الاول.
هحاول قبل الجمعة بالليل ان شاء الله
ربنا يوفقكم جميعا.
احييك على المجلة الرائعة والفكرة الاروع

مسدس صغير يقول...

غروب
والله انا مانا زعلان منك خالص
ومش عايزك تزعلى منى ولو كنت زعلتك انا اسف
وبالنسبة لموضوع ما علينا والله ما اقصد اى سخرية منك خالص يمكن انتى اللى فمتينى غلط او انا اللى وصلت المعلومة غلط
ع العموم انا اسف
ما علينا.
ههههههههه

مسدس صغير يقول...

فشكول
اختلاف لا يفسد للوز قضية على رأى واحد صاحبى متعرفوش.
بصراحة نصر الله والترابى وشيرين وتشامر.
حاجة تفرح
سعيد جدا بوجودك وتعليقك
بجد نورتنى يا فشكول باشا.

مسدس صغير يقول...

ميرام
فعلا والله معاك حق
لقوله تعالى" أتأمرون الناس بالبر وتنسون أنفسكم وانتم تتلون الكتاب افلا تعقلون"
فعلا لا تنه عن خلق وتأتى مثله
سعيد بتعليقك
منورانى يا ميرام هانم.
اشكرك على التعليق والزيارة
نورتينى

مسدس صغير يقول...

سارة
شوفى بقى لمجرد حاجة بسيطة زى دى بتحس بانفصام فى الشخصية
امال احنا نعمل ايه؟؟؟
والله سعيد بتعليقك وزيارتك
كالعادة منورانى يا سارة

مسدس صغير يقول...

عالم ماريونت
فعلا والله معاكى حق
الواحد بيتخنق من الناس دى خاصة الواد اللى اسمه تشامر ده انسان غريب وصوته مش حلو على فكرة.
واغانية عادية
ربنا يهدى
اشكرك على التعليق
فرحان جدا جدا بوجودك.
سلام

مسدس صغير يقول...

مصعب صلاح
اشكرك على التعليق
فعلا هوه ده الواقع
ربنا يبارك فيك
نورتنى