الثلاثاء، 17 مارس 2009

يا بنت الناس


يا بنت الناس

غريب حِسِك؟

ومن حِسِك

عرفت خلاص

عفريت الهوى مسّك

............

جنانك حبة يهديكى

ويشهد ان انا ليكى

وقلبى يقول : قلبك من مماليكى

ولا وصف البلَغا يكفيكى

ولا سكر مصر يحليكى

يا بنت الناس

..........

يا بنت الناس

الحب ميفرق ما بين

اهل الفالصو واهل الماس

ولا يفرق حبيب عشانه وحيد

ولا يفرق حبيب ونّاس

..........

يا بنت الناس

فقير الهوى يحكيلك

ولو ماتو مراسيلك

أنا آجيلك

ولو عيّبتى على سنى

حديث الهوى. احلفلك

واقول والله انا جيلك

ولو قلتى مشيتى خلاص

برده هناديلك

دانا شمعة

تنور فى ليل العشق قناديلك

........

يا بنت الناس

ولو كنتى غريبة

والسنين غربت قلبى عن قلبك

سيوف الهوى تتسن وتتسم

واسرع من الهوا احاربك

اسيب الحرب شغالة

واطير فى عيونك

واعيش اللحظة والحالة

وتجرى بعيد.

لكن على مين؟؟

دا انا ماشى على دربك

........

يا بنت الناس

قوية وقوتك ضعفك

طاقية الاخفى تخفيكى

لكن على مين؟؟

أنا شايفك.

وحابسة الدمعة ف عنيكى

مانا عارفك..

فى لحظة وثانية بتغيِرى

ولا عمرك

تطيرى ف هوى غير

هوى طيرى.

........

يا بنت الناس

بحبك كلمة مش عارف

اجيبها منين؟؟

ولو حبك قاموس فدادين؟

هفُك كلامه جوه الطين

وأزرع حبه تحييكى

وتكتب كلمة وياها

وحبر الكلمة دمع العين

بعلو الصوت

" حبيبك نفسه يفدييكى "

ولو كانت حياتى فراق

وميجمعنا غير الموت

فأهلا بيه

أنا قاعد ومستنيه..

" ومستنيكى "

يا بنت الناس

هناك 79 تعليقًا:

خديجة عبدالله يقول...

طب يعنى أعلق أقول ايه
حضرتك عامل عنوان بس
أنا فكرت أتأمل فيه
......................
تعرف والله لما حاولت أقول الكلمة لنفسى بكذا نبرة حدة وبقلق وبحنو لقيت المعنى اختلف كتيييير
___________________________
شكلنا كده مو فهمنا
نتمنى التوضيح ودمت بخير

MǿиY El-Shreef يقول...

:D:D:D:D

طيب وبعديييين

ههههههه

سمكه واحده يقول...

نعم? مالها بنت الناس يعني
مالها قولي بس وتتكسفش
ها
ها
عملت ايه بنت الناس
طب دي حتي بنت ناس!!!

ستيتة يقول...

يابنت الناس
تحبيني قراط احبك قراطين
تديني زنبة اديكي اتنين
تديني مهموز يترد لك يا نور العين

حلو كده يا معلم

ستيتة يقول...

الله
الله
الله
كده تديني العنوان بس احط انا لك كام بيت حلمنتيشي
ثم تفاجئني بكل الكلام الحلو ده

تحفة يا صاصا يا خويا

معدى جزء واحد لو سمحت لي

ولو كانت حياتى فراق
وميجمعنا غير الموت
فأهلا بيه


نو ابسلوتلي
لو كان الموت هو نصيب اللي يفرقهم القدر كنا قفلنا تنظيم الأسرة وعيشنا قصص حب تنتهي بأن الأتنين خلصوا على بعض

تحياتي وتسلم ايدك

حسام غانم يقول...

جااااااامدة جدا

أنا بحب النوع ده من الشعر

وحلو الوزن

mohamed ghalia يقول...

الله عليك يا ابن الناس
بجد هايل
دمت بكل الود

مسدس صغير يقول...

خديجة عبد الله
يا ستى انتو مديتونيش فرصة اعبر عن اللى جواية دا انا كنت لسه بفكر فيه.
لقيتكو بتعلقو.
ههههههههه
فعلا لو قلتيها بكذا نبرة تحسى بالفرق.
سلام
دمتى بخير

مسدس صغير يقول...

mony elshreef
بعديين ده هتعرفيه لما تيجى تانى.
ههههههههه
سلام مؤقت للجدعان

مسدس صغير يقول...

سمكة وحدة
لا انتى متعرفيش بنت الناس عملت ايه ؟؟
ربنا يهديها.
بس انا مكسوف.
ههههههههه

مسدس صغير يقول...

ستيتة حسبو


يابنت الناس
تحبيني قراط احبك 3 فدادين
تديني زنبة اديكي زنبتين
تديني مهموز يترد لك فرقة مهموزين..
هههههههههههههههههه
ايه رأيك حلوة؟؟

مسدس صغير يقول...

ستيتة حسبو
اشكرك على الكلام الحلو ده اللى مش عارف هسدده امتى؟؟
بجد انا سعيد جدا بتعليقك يا دكتور.
اشكرك


ولو كانت حياتى فراق
وميجمعنا غير الموت
فأهلا بيه

هههههههههه
لو كان الحب كده
كان فات نص الناس ودّعو

بس انا مش منهم..
هههههههههههه
اشكرك على التعليق والتواجد

مسدس صغير يقول...

حسام غانم
اتفضل يا باشا ميغلاش عليك بس ابقى هات حاجة خد فيها.
ههههههههههه
اشكرك على الكلام الحلو ده.
نورتى البلوج يا وزير

مسدس صغير يقول...

mohamed ghalia
يابن الناس
اشكرك على الزيارة والتعليق والمرور الكريم اللى اسعدنى جدا
دمت فى سعادة

عاشقه الرومانسيه يقول...

ولو حبك قاموس فدادين؟
هفك كلامه جوه الطين
وأزرع حبه تحييكى
وتكتب كلمة وياها
وحبر الكلمة دمع العين
بعلو الصوت
" حبيبك نفسه يفدييكى "

الله بجد تحفه

تسلم ايدك

مسدس صغير يقول...

عاشقة الرومانسية
اشكرك على الكلام الجميل ده
بعض من اسمكم.
اشكرك على التعليق والمرور الكريم
نورتى المحكمة

رحلتنا في الحياة يقول...

ياسيدى ياسيدى على الكلام الموزون
تسلم ايديك

MǿиY El-Shreef يقول...

الله ..

حلوة اوي اوي والله

بحب الشعر العامودي ده

واخر جزء كان تحفه

ومعلش اتسربعنا ع مشاعرك :D

تسلم ايدك ...

dr_samarmar يقول...

الله الله الله الله

خرااااافة
كلام جميييل و احساس أجمل

ايه الشغل الجامد دا :D

e_emy يقول...

تحفة تحفة تحفة تحفة تحفة .........

حاولت اقتبس احلى حاجه عجبتنى
لقتنى اقتبس القصيدة كلها

ماشاء الله

جميلة اووووووووووووووووووى

ربنا يوفقك

ساره يقول...

يا ابن الناس
فين الاحساس
يلله تحرك
ايش تستني
لازم تعرف
ان بنت الناس
قاعده في بيت ابوها
تستني

ايش رائيك يا مسدس :)

القدر و انا يقول...

مسدس صغير
تقبل مرورى
كلماتك جميلة ومشاعرك اجمل
يا بخت بنت الناس دى بيك
تحياتى

Sweet Violet يقول...

جميل قوووى بجد

و خصوصا انى كمان بحب اصلا الاسلوب ده فى الكتابه

ماشاء الله عليك يابنى

صمت المشاعر يقول...

كلمات جميله جدااا واسلوب مميز

*البت المشمشية *حلوة بس شقية * يقول...

ههههههههههههههههههه
ياااااااااااااااااه
كل الكلام ده عشانى
شكرا شكرا
ده انتا طلعت وانا ومش واخدة بالى
هههههههههههههههه
انا عسل اوى كدة

*البت المشمشية *حلوة بس شقية * يقول...

بجد الامانة العلمية تحتم عليا اقولك
دورت على اى مقطع احلا من التانى ملقتش
دورت على كلمة وحشة ومشلايقة عشان ابهدلك عليها
ملقتش بجد
مناحلا الحاجات اللى كتبتها
وخليك مستنى كدة
مش هتيجى
عشان انتا محجوز
احم احم
حد واخدبالو

Beram ElMasry يقول...

الاخ العزيز . مسدس صغير
السلام عليكم ورحمة الله وبركاته
شكرا للتعليق ولكن لا تنسى انه عليك واجب تجاه نفسك والوطن وذلك بنشر الوعى واليقظة اى لا ننخدع
لك تحياتى والسلام عليكم ، ولا سلام مع اليهود

اللى موش عارف يتغير يقول...

انت يا ابن النــــــاس
بتحكى عن الفالصو والماس
انت اوريجينال يعنى أصـلى
انت انترناشونال يعنى دولى
انت فنـان يعنى حمار وحشى

اللى موش عارف يتغير يقول...

انت فنان وفقط

بس عندى اقتراح لتنظيم العملية اقترح انشاء مدونة لشعرك وخواطرك
واخرى لافكارك اللى هدودينا فى دهيه

maha zein يقول...

ولو كانت حياتى فراق


وميجمعنا غير الموت


فأهلا بيه


أنا قاعد ومستنيه..

حلو اوي ومعانية جميلة
بايع الدنيا كده خالص يا مسدس
ماشي ماشي
تسلم ايدك

مسدس صغير يقول...

ايوشة
بجد نورتى
انا سعيد جدا بتعليقك
اشكرك عليه.
دمتى بخير

مسدس صغير يقول...

mony elshreef
كلام جميل جدا اللى انتى كاتباه عليه ده.
كتير اوى
اشكرك على الزيارة والتعليق
نورتينى يا مونى

مسدس صغير يقول...

dr samarmar
اشكرك على الكلام الحلو ده كعادتك
اشكر تواجدك وتعليقك
نورتي البلوج كله
سلام

مسدس صغير يقول...

e-emy
تحفة تحفة تحفة
ده انا؟؟
ايه التهزيئ ده؟؟
ههههههههه
بجد انا بشكرك على الكلام الجميل جدا ده انا مش عارف ارد اقول ايه؟
بجد نورتى

مسدس صغير يقول...

سارة
انا بردة اللى كلامى حلو؟
امال انتى ايه؟؟



يا ابن الناس
فين الاحساس
يلله تحرك
ايش تستني
لازم تعرف
ان بنت الناس
قاعده في بيت ابوها
تستني


مش بقول
نورتى البلوج طبعا

مسدس صغير يقول...

القدر وانا
طبعا انا اتقبل مرورك
هو انا اقدر متقبلوش ؟؟
هههههههه
اشكرك على الكلمات الحلوة
اشكر تعليقك
نورتينى

مسدس صغير يقول...

sweet violet
طالما بتحبيه
ربنا يهنيكو ببعض
ههههههه
ربنا يخليك
اشكرك على الكلام الحلو ده
اشكر التواجد المتألق كعادتك
نورتينى

مسدس صغير يقول...

صمت المشاعر

اشكرك على المرور الكريم
اشكر كلماتك
تقبلى تحيتى
دمتى بخير

مسدس صغير يقول...

البت المشمشية
ههههههههههههههه
ايه؟؟
خدوهم بالصوت ليغلبوكو؟
ايوا انتى عثل طبعا انتى عندك شك فى كده ؟؟
انتى وكل المدونين العثاثيل اللى انا بحبهم كلهم.

مسدس صغير يقول...

البت المشمشية
الامانة العلمية؟؟؟؟
علمية ايه دا انتى ادبى.
هههههههه
بتدورى على حاجة غلط تتكلمى فيها؟؟
ااااااه منك؟
ههههههه
انا طبعا محجوز ومحدش اخد باله اطمنى.
هههههههه
نورتى " وش بيقول محصلش "

مسدس صغير يقول...

بيرم المصرى
اشكرك على المرور والتعليق
لا تشكرنى على اعجابى بقصيدة او مقال ما فهذا واجبى اذا اعجبت بأى نص..
سلامى لك وليس لليهود

مسدس صغير يقول...

اللى موش عارف يتغير
للأسف انت اتغيرت.
ههههههههه
شرف التجربة يكفيك.
بحبك

مسدس صغير يقول...

اللى موش عارف يتغير


ممكن الفكرة مطروحة.

اشكرك على التوجيه وعلى الزيارة الكريمة


يا زملكاوى

مسدس صغير يقول...

مها زين
اشكرك على التعليق الجميل كالعادة لان انتى بجد من الناس اللى انا بنتظر تعليقهم
اشكرك على التواجد والتعليق
وانا مش بايع الدنيا ولا حاجة . الا اذا كان البيع ده هو الحل.
اللهم احينا ما دامت الحياة خيرا لنا وامتنا ان كان الموت خيرا لنا.
آآآآآآآآآآآمين

غير معرف يقول...

من اول ما قرأت قصيدة كروان الي بنت الناس وانا متاكد ان ال بيكتب مش انسان عادي ولا كلام وخلاص ولا شاعر فالصو كلام شاعر اتعلم صح وكتب صح كلام اغلي من الماس عيد الراجحي

مسدس صغير يقول...

غير معرف
مين قال ان انت غير معرف انت عيد الراجحى حبيبى
اشكرك على الكلام الحلو ده واشكر تواجدك ومرورك
نورتنى

د. ياسر عمر عبد الفتاح يقول...

على فكرة أنا هقلك على سر
ساعات كثير جداً بلاقى ناس كاتبى هجص وكلام ملهوش لازمة بس مبرضاش أحرجهم وأقلهم إن اللى انتم بتعملوه ده تعدى سافر على الأدب العرب الفصيح أو حتى العامى

لكن بجد أنا هنا شفت كلمات تستحق القراءة
شفت كلام ماشى كده من غير مطبات ولا حفر ولا حتت عالية وحتت واطية
شفت معانى .. شفت أحاسيس

استمتعت بالقراءة .. واستمتعت بالرد

فتــافيت (رحاب الخضري) يقول...

يا بنت الناس


قوية وقوتك ضعفك


طاقية الاخفى تخفيكى


لكن على مين؟؟


أنا شايفك.


وحابسة الدمعة ف عنيكى


مانا عارفك..


فى لحظة وثانية بتغيِرى


ولا عمرك


تطيرى ف هوى غير


هوى طيرى.



تحفففففففففففففففففة.. تحفة تحفة تحفة

وقال مسدس صغير.. ده انت اربيجيه والنعمة

حلوة موت موت موت

يااااا بنت الناس ردي بقى عليه

صمت الحنين يقول...

وحابسة الدمعة ف عنيكى
مانا عارفك..
فى لحظة وثانية بتغيِرى
ولا عمرك
تطيرى ف هوى غير
هوى طيرى.
........
يا بنت الناس
بحبك كلمة مش عارف
اجيبها منين؟؟
ولو حبك قاموس فدادين؟
هفُك كلامه جوه الطين
وأزرع حبه تحييكى
وتكتب كلمة وياها
وحبر الكلمة دمع العين
بعلو الصوت
" حبيبك نفسه يفدييكى "

جمييييله هذه الابيات

مسدس صغير يقول...

د/ياسر عبد الفتاح
اشكرك على الكلام الحلو ده
اشكرك على التعليق والمرور الكريم
نورت البلوج طبعا
كل سنة وانت طيب

مسدس صغير يقول...

فتافيتو
انا اربيجيه؟
انا يدوب حتة مسدس صغير
ههههههههه
اشكرك على الكلمات الجميلة اللى قلتيها عنى دى
واشكر تواجدك وتعليقك
نورتينى يا فتفوتة

مسدس صغير يقول...

صمت الحنين
لو الابيات جميلة
خلاص اتفضلى متغلاش عليكى
هههههههه
اشكرك على التعليق والمرور.
نورتى

خديجة عبدالله يقول...

كده بدأنا نفهم :)
كلام جميل ربنا يسعدك ببنت الناس (الزوجة الصالحة)اللى تستاهلك وتقولها دواوين كمان :) إن شاء الله
حس مرهف ماشاء الله ربنا يكرمك

مسدس صغير يقول...

خديجة عبد الله
اشكرك على الدعاء الجميل ده
ادعيلى دايما بيه.
بجد كلامك حلو
اشكرك
نورتينى

Unknown يقول...

مسدس صغير:
ياأبن الناس
كلامك حلو وونّاس
ومتعكسش بنات الناس!
احسن اجيب لك (العسكرى:))

مسدس صغير يقول...

nora haty
انا بردة اللى بعاكس بنات الناس؟؟
طب همه يسيبونا فى حالنا.
ههههههههه
اشكرك على الكلام ده والتعليق والمرور والشرطة والعساكر واسمع السلام الوطنى عشانك..هههههه

سمكه واحده يقول...

ايه الناس دي ايه ايه
في ايه يا عم انت
صدعتني يابنت الناس يابنت الناس من تحت الشباك الجيران كلها سمعت وفتحوا الشباك في نص اليل عجبك كده ؟
نعم نعم انا رديت اهو مهو مش معقوله كده انت جي في متشقتي وعايز تسوء سمعتشي
نعم يا سيدي ها في ايه بقي الوش ده كله!

لا بجد بقي نتكلم جد
قويه وقوتك ضعفك
وحابسه الدمع في عنيكي
في لحظه وثانيه بتغيري
عرفت ان بنات الناس كلها بتعمل كده منين هه ايه اللي عرفك؟
بجد بجد جميله اوي

ميرام يقول...

ياابن الناس على عيني
بعيد عمـال.. تلاغـيني
عايزني بجد شــارينــي
تدق لابويا..والـمأذون
وتاخد اذنه ..وتجيــني ..

............
ياابن الناس يامتردد ..
في غيرك مية ماتـحدد ..
أخاف غيرك يفوز بيا ..
مانا مااقبلش ملاغية ..
وابويا ياسيدي متشدد ..

.............

ههههههههه
حلوة ..
وكان لازم أرد
تقبل مروري
تحيــــــــاتي

جارة القمر يقول...

بوست جميل اوي وكلام رائع
احلي حاجة في الدنيا هي الحب
تقبل مروري

مسدس صغير يقول...

سمكة واحدة
اولا ان رحت لمين عند شباكهم؟؟
انتى هتتبلى عليّه؟
وغير كده يا سموكة انتى اللى يجيلك يجيلك من الباب وهوه مطمن..
اشكرك على الرد الرائع واشكر تواجدك
وبجد نورتينى

مسدس صغير يقول...

ميرام
ايه الجمال ده وايه الروعة دى وايه العظمة دى.
بجد بجد انا طلعت جنبك شويعر صغير.



ياابن الناس على عيني
بعيد عمـال.. تلاغـيني
عايزني بجد شــارينــي
تدق لابويا..والـمأذون
وتاخد اذنه ..وتجيــني ..

............
ياابن الناس يامتردد ..
في غيرك مية ماتـحدد ..
أخاف غيرك يفوز بيا ..
مانا مااقبلش ملاغية ..
وابويا ياسيدي متشدد ..


جاى هوا هو ابن الناس هيلاقى احسن من كده فين؟
100 عريس حتة وحدة دا انتى على كده اشهر من برسيل.
..
وطالما ابوكى متشدد يبقى ابن الناس مش هيسكت...


بجد بجد تعليق اكثر من رائع من احسن التعليقات اللى اتكتبت على البوست ده.
نورتينى

مسدس صغير يقول...

جارة القمر
نورتى يا قمر وكلامك جميل .
اشكرك عليه
اتمنى لكى السعادة
نورتينى

غروب يقول...

حلووووووه اوووووووى

بس دى احلى جزء عجبنى

يا بنت الناس


قوية وقوتك ضعفك


طاقية الاخفى تخفيكى


لكن على مين؟؟


أنا شايفك.


وحابسة الدمعة ف عنيكى


مانا عارفك..


فى لحظة وثانية بتغيِرى


ولا عمرك


تطيرى ف هوى غير


هوى طيرى

حلو اوووووووووى اوى

تسلم ايدك

بس استنى هنا

انت يا راجل انت جاى تغيظنى في مدونتى وتقول اربعه ماما اموله

د انت ايامك مش فايته

اى تعدى على حقوقى السخصيه هيبقي فيها دم

اتفقنا

عارفه انك خفت

خلاص سماح بس مش تكررها

فااهم؟؟؟؟؟؟؟


غروب هااااااانم

ههه

مسدس صغير يقول...

غروب هانم
اولا طالما المقطع اللى انتى كتبتيه ده عجبك اوى كده
انا حلفت مهو راجع
ثانيا
ماما امولة اقصد يعنى ماما امولة اللى هيه ماما امولة دى مامتنا كلنا.
بس طالما انتى معتبراها من حقوقك الشخصية خلاص يا ستى انا خفت من الدم ومعتش اقول لماما امولة يا ماما امولة تانى.
اتفقنا.

MaNoOoSh يقول...

صباح الفل
انا اول مرة ازورك
بس ايه الرومانسية دى كلها
يللا انا مش هرخم عليك اول مرة اجى كدة علطول
بس ان شاء الله اجى ازورك وارخم عليك علطول
هههههههههههههههه

سفروتة يقول...

:)
جميلة اوي يا مسدس بيه
يووووووووووه قصدي
يا ابن الناس
مش بقولك كلامك خفيف كده والواحد ميزهقش نه
تسلم بجد

دمت بكل ود
:)

د.آيه يقول...

جميلة أوى ..
علي فكرة معرفش ليه فكرتنى بأغانى منير..

بتهيألى ينفع تبقي أغنية ..
keep on

شاب كــ طخين ـــــا يقول...

ايه الجمال دة
:D:D:D:D

*** حور- نور*** يقول...

هى كده القصيده خلصت ولا ايه عايزة اعرف مالها بنت الناس العفريته دى
طيب بص بقى
يابنت الناس فى حبك انا دوبت خلاص
ادينى حنان ومحبة تاخديه دفا واخلاص
وانسى كلام الناس حواليكى
وتعالى بينا بعيد عن عيون الناس
ايه رايك حاجه كده عالماشى ارتجال يعنى
صحافيه حرة
حور نور

مسدس صغير يقول...

manooosh
مساء الفل
طبعا نورتينى وتنورينى دايما
مش مشكلة اما ترخمى عليه انا واخد على كده
ههههههههه
لا طبعا ازاى خدى راحتك
نورتينى
واتشرفت بزيارتك

مسدس صغير يقول...

سفروته
منورانى كعادتك.
يا بنت الناس
بحب خلاص
نقيتها.
وواقف تحت بيتها.
وبروح مدونتها.
حلوة؟؟
هههههههه
اشكرك على التعليق الجميل
نورتينى يا سوسو

مسدس صغير يقول...

د/آية
اشكرك على التعليق الجميل
واشكر تواجدك
طبعا منير حد جميل اى حد يفتخر انه كلامه يبقى شبه اغانى منير.
نورتينى

مسدس صغير يقول...

امبارح كان عمرى عشرين
اشكرك على التعليق البسيط الجميل ده.
اشكرك يا جميل.
نورتنى

مسدس صغير يقول...

حور نور
يا بنت الناس كلام حلو خالص
على كده انتى شاعرة كبيرة مالص
يارب يرزقك ابن الناس ومتكونيش عانس.
هههههههههه
حلوة؟؟
اشكرك على التعليق الجميل جدا
نورتينى يا نور

فوبيا - سايكولاند يقول...

جامده يا معلم جدا
تحياتى

Unknown يقول...

بجد كلمات جميلة وتستاهل

تسلم ايديك يا شاعر يا اصيل
بجد ولله كلمات جميلة

مسدس صغير يقول...

فوبيا سايكولاند
اشكرك على الزيارة والتعليق الجميل
نورتنى يا فوبيا بيه

مسدس صغير يقول...

اصحى يا مصر
اسلام ديو

اشكرك على التعليق الجميل
اشكر تواجدك
ومرورك.

قلب ارهقته الاحلام يقول...

احيانا توقفي كلمات ولا استطيع ابداء إعجابي بها
قد تكون كلمات كثيراً أحسستها بداخلي

فكلماتك هنا تصل إلي الاعماق " يا ابن الناس " :)

وددت لو أقتبس مميز عطرك بين السطور

فأبت علي حروفك أن تمنحني شرف الاقتباس

حقيقة كانت رائعة هي كلماتك

ولكن لن تأتي بنت الناس وأنت مرابط بالمكان
فهي مؤكد في مكان ما تنتظرك فارسا علي حصان ,,,

تحياتي .,,,