الجمعة، 13 مارس، 2009

دستور يا اسيادنا


اولا كل سنة وانتو طيبين وبخير بمناسبة اى حاجة..

بالنسبة للبوست انا عايزكو تفتّحو مخكو معايا شوية لأن الموضوع ده محتاج تفتيح مخ شويتين.

- بصفتى محامى ومبعرفش حاجة فى المحاماة عايز اطعن فى دستورية مواد فى القانون..ايه الهبل ده؟؟ الواد ده اتهبل وللا ايه؟؟

خليكو معايا وبلاش تمتمه..

- انا عايز اطعن فى المواد القانونية اللى بتجرم المخدرات..الواد ده يا أهبل يا بتاع مزاج؟؟.مش بقول بلاش تمتمه..

المهم ايوا المواد اللى بتجرم المخدرات انا عايز اطعن عليها بعدم الدستورية.من غير شتيمة حد يقوللى ليه؟؟

ايوا كده قولتولى ليه..

اقول على طول : دالوقتى المخدرات دى متحرمتش ايام النبى صلى الله عليه وسلم لأن مكنش فيه حاجه اسمها مخدرات..

يعنى هيه حلال؟؟!! لأ يا عم اصبر على رزقك .. هيه حرام بس مفيش نص مباشر بالتحريم لا فى القرآن ولا فى السنّة وانما الفقهاء حرموها بالقياس على الخمر لأن الخمر يذهب العقل وكل ما اذهب العقل فهو حرام وهذه المخدرات تذهب العقل والوعى فقياساً عليه حُرمت المخدرات بكل انواعها زى الحشيش والبانجو والهيروين والسجاير الفرط وخلافه..

ايه المتاهة دى انت عايز تقول ايه يا عم انت بالظبط؟؟

انا عايز اقول طالما ان المخدرات اساساً متحرمه فى الدين قياسا على الخمر وبما ان الخمر فى بلدنا غير مجرم فى القانون لا شربه ولا الاتجار فيه ولا تصنيعه ولا نقله ولا خلافه فلابد ان تكون المخدرات غير محرمة وذلك من باب اولى..

فإذا كان الكبير مش متحرم يبقى الصغير هو اللى يتحرم؟؟؟!!!!..او بمعنى اصح متجرم؟؟

حد هيقول الواد ده عايز البانجو يتوزع فى التموين والحشيش يتقسم ع العيال فى المدارس وللا ايه؟؟

لأ انا مش عايز كده. بس لَيجرمو الخمور ويمنعوها ويعاقبو اللى بيشربها ويعاقبو اللى بيتاجر فيها أو اللى بينقلها أو اى حد بيتدخل فى عمليات تصنيعها يا إما يسيبولنا المخدرات وتاخد حكم الخمور .. مش كده وللا ايييييييييييه؟؟؟

معلش شوية كلام فى الهجايس كده يمكن يكونو صح..

هناك 50 تعليقًا:

MǿиY El-Shreef يقول...

هو حضرتك مش ف مصر ولا ايه :D

العيل ابو 6 سنين بيشرب كٌلة ع الرصيف عادي

الحشيش والبانجو وكل الحجات دي منتشره عادي اكتر من الخمره كمان

او ممكن قد بعض عشان مانظلمهمش :D

الفرق بس انه لما حد يتمسك بتهمه تهريب مخدرات .. ودي حاجه تاني اصل الي بيهرب بيكسب فلوس اد كده ع قفا الدوله وهي قفاها عريض وحده .. فبتحاكمهم يعني قال بتسد ف قربه مخرومه :D

يشرفني اتابع حضرتك وبعد اذنك انا اضفت مدونتك عندي ..

mohamed ghalia يقول...

لا ده صح الصح يامان
وربنا يهدى شبابنا
دمت بكل الود أخى
دمت فى سعادة وبعيد عن المخدرات

Lady E يقول...

ايه الدماغ العالية دي

سفروتة يقول...

هههههههههههههههههههههههههههههههههههه
يا مزاجك يا مسدس بيه

والله انت رايق

حقيقي ربنا يصلح حال البلد دي

وتتعدل وترجع مصر اللي بجد

اللي مش بنسمع عنها غير في الاغاني وكلام الشعارات

دمت بكل ود
:)

د/عرفه يقول...

معاك حق طبعا
احنا عندنا تهريج
فى القوانين
يعنى اشمعنى الخمر صحيح

تقبل تحياتى

mahasen saber يقول...

على البوست الحلو العالى ده تستحق
ايه يا ترى
تستحق تتحبس فى غرزه

mahasen saber يقول...

هو الخمر يحرم اه لانه اساسا محرم فى الدين
بس عشان مباح نبيح المخدرات كمان
ده اسمه استعباط بشرى وميل للاهواء والدنيا هتبقى بزرميط خالص خالص

والشوارع هتبقى كلها مساطيل

e_emy يقول...

اه صحيح

اشمعنى الخمر

حتى ف ده الكوسه شغاله D:

بجد كلنا معاك بس لتجريم الخمر

يلا ورينا شطارتك بقى ..

بس تفتكر حد هيسمعلك اصلا ):

حسام غانم يقول...

هو طبعا المبدأ غلط


بس حلو التفكير ده

صباح الدماغ

*البت المشمشية *حلوة بس شقية * يقول...

هههههههههههههههههههه
انا جيت نورت الغيط وع النبى صليت

*البت المشمشية *حلوة بس شقية * يقول...

ايه ياعم التفكير ده
انتا مش من مصر المخروسة ولا ايه
بص
طبعا هو تفكير وهجايس منطقيه مية مية
بس يبنى اساسا
الحاجات دى بقت عادى فى مصر
الحشيش بيبتاع فى السوبر ماركت
احان القانون بتاعنا ده عايز تظبيط
اشمعنا الخمر صحيح
هيا جت الخمرة بس
فيه ابن الوزير وابن الفقير اللى بيفرقو بينهم
وبلاوى تانية كتير
بقولك ايه
روح نام واتغطا كويس
وبطل هجايس

*البت المشمشية *حلوة بس شقية * يقول...

ولما تبقا تيجى
تنزل بوست ابقا قولى الاؤل
انا كدة منظرى وحش قدام المدونين وانا بعلق متاخر كدة
بلاش تهريج بقه

مسدس صغير يقول...

mony El-shreef
لا طبعا انا فى مصر.
وعارفين ان ظاهرة المخدرات دى بقت منتشرة جدا بس هيه مش فى مصر بس ابسوليوتلى. دى فى مصر والعتبه والمنشية والجيزة.
والله نفسنا الناس والبلد دى تبقى كويسة
ربنا يهدينا.

مسدس صغير يقول...

محمد غالية
اشكرك على المرور الكريم
وعلى التعليق الجميل
دمت فى سعادة دائمة

مسدس صغير يقول...

lady e
انا بردة اللى دماغى عالية؟؟
صبح.
كركر.
وش مش شايف أدامة
هههههه

مسدس صغير يقول...

سفروتة
مزاجى عالى وحبيت اصبح عليكو.
شد.
كركر.
هههههه
ربنا يصلح الاحوال
وربنا يهدينا

مسدس صغير يقول...

د/ عرفة
اشكرك على التعليق يا دكتور.
وفعلا اشمعنى الخمر يعنى؟
نورتنى

مسدس صغير يقول...

محاسن صابر
استحق اتاحبس فى غرزة؟؟
هههههههه
انتى كارثة.

مسدس صغير يقول...

محاسن صابر
فعلا يبقى استعباط جامد اوى لو طالبنا باباحة المخدرات بس الاستعباط الاكبر ان الخمر مباحة.
تحيتى ونورتينى

مسدس صغير يقول...

e-emy
انا عارف ان محدش هيسمعلى بس ده مجرد اعتراض للفت الانظار للحاجة الخطيرة دى
اشكرك على المرور الكريم
ونورتينى بجد

مسدس صغير يقول...

حسام غانم
صباح الدماغ
شد
فعلا انا شايف انه كلام فى محله
اشكرك على التعليق والمرور الكريم.

مسدس صغير يقول...

البت المشمشية
ايه انا جيت نورت الغيط دى؟؟
انتى بتزورى زريبة وللا ايه؟؟
هههههه

مسدس صغير يقول...

البت المشمشية
يعنى التفكير ده مش صحيح.
انا شايف انه منطقى جدا
ولازم وحدة تلحق التانية
ليحرمو الخمر
ليحللو المخدرات
وخللى الشعب يعيش.

مسدس صغير يقول...

البت المشمشية
انا متعمد مقولكيش عشان منظرك يبقى وحش أدام المدونين..
هههههههههه
احييكى

صمت المشاعر يقول...

والله هو تفكير كويس بس حاليا فعلا لطلبه في المدارس بقوا بيشربوا مخدرات بقي شيء عادي عندهم انا حاسه انها شويه وتتوزع او تتباع في محلات جمله

مسدس صغير يقول...

صمت المشاعر
اشكرك على التعليق والمرور الكريم
احييكى
نورتينى

ستيته حسب الله الحمش يقول...

في بلد الشيزوفرينيا المزمنة

لا ده ها يتحرم ولا دوكها ها يتجرم

اديني حته قانون فرنسي على حته كولالمبوري وانا احبك يا ننس

وعلى رأي اللمبي
ياتوفروا ليهم الكوله يا تبنولهم بيوت

ودمتم

ام ريان يقول...

كلام جميل فعلا بس اسفه مش منطقى ازاى نطعن بعدم دستوريه ماده لانها تجرم المخدرات ولاتجرم شرب الخمر اوك نطالب بتجريم شرب الخمر مش نقول بعدم دستورية الماده لانها لم تضع فى الاعتبار ماهو اشد تحريما وكان علينا بتجريمه
بس اعتقد تجريم الخمر صعبه شويه لانه بقى فى البلد زى البيبسى كده لكن يكفينا شرف المحاوله
لكن موضوع حلو فعلا
دائما فى تالق ان شاء الله

dodda يقول...

وماله مش عيب برضه...

لا هو انت مش شايف ان المخدرات موجوده فى كل حته وفى متناول يد الجميع؟؟؟

انت ميمعتش عن تذكرة الهيروين الشعبى
ب20 جنيه بس
يعنى تقدر تجيبها من مصروفك
فى منتهى البساطه


ال يحرموا المخدرات ال

ضربه ف ركبك

صمت الحنين يقول...

فعلا عندك حق الكبير مش متحرم يبقى الصغير هو اللى هيتحرم بس احنا نطالب بتجريم الخمر ومنطالبش بعدم تجريم المخدرات لانهم لو سبوها هتبقى هيصه اكتر ماهى
شكراا على الموضوع المهم ده

موناليزا يقول...

تصدق ان معاك حق
ليه مفيش قانون بيعاقب شرب الخمر وبيعها وتصنيعها زى مافيه قانون بيعاقب شرب المخدرات وبيعها
بصفتك محامى هنعتمد عليك فى النقطة دى:)

Sweet Violet يقول...

اقولك بقى ياسيدى و مالناش دعوة بالقانون

المخدرات عامه فى جميع الاديان الكل بيرفضها و بردو بعض الدول بتحاربها.. لكن لو نيجى على الخمر ماتنساش ان عندك فى البلد ديانات اخرى و سياحه بردو من دول اخرى يبقى ماينفعش تمنع الخمر لان ده عندهم عاااادى مش ممنوع ولا حرام

يبقى احنا كامسلمين المفروض نمشى على الحلال و الحرام اللى الدين قال عليه و نكون رقباء انفسنا مش محتاجين قانون هو اللى يبقى رقيب علينا ولا ايه ؟؟؟

عالم ماريونت يقول...

طيب
دي مفهومة اوي مع اني اعترف اني خدت شوية عشان اقدر افهمها
بس انت عندك حق والله يا ابني
يعني يا اما توفرورلهم مساكن يا توفروا الكولا هههههههههه
لا بجد
طيب ولو قال قائل ان المخدرات لو حد زود هيدمن
ما الخمور لو حد زود هيدمن؟؟؟؟؟؟؟

حلوة الفكرة اوي....

رنا

maha zein يقول...

كلام حكم والله
مش فهمالهم العالم دي

وعلي فكرة انا اطالب بتجريم الكولة والشربات والسوكولانس واي حاجة تعمل دماغ


بجد كلامك صح
ايه المبرر في ترك الخمر فعلا و منع الخمور
ايه النظرية يعني
مش قادرة افهم
انت يا راجل يا محامي انت
فسرلي وقولي

ادعي عليك
هه
مترد
انت يا راجل انت شكلك بتضرب اي حاجة كده وريد او عضل ولا حتي عروق ومش راضي تقر وتنهار وتعترف

هاتووووه

مسدس صغير يقول...

ستيته حسبو
فعلا بلد الشيزوفرانيا صحيح
وكمان ال زهايمر
اشكرك على التعليق والمرور اللى مشرفنى دايما
نورتى

مسدس صغير يقول...

ام ريان
اشكرك على التواجد
انا فاهم الكلام اللى انتى بتقوليه والله
بس انا اقصد العكس طبعا
هو يعنى حد شافنى بشرب فى ازازة كوله وللا حتى ميه؟
ههههههه
اشكرك ونورتى

مسدس صغير يقول...

DODDA
انا طبعا فاهم.وزى مبيقولو المحمول فى يد الجميع نقول برده المخدرات فى يد الجميع.
اشكرك على التذكرتين الحلوين دول.
نورتى

مسدس صغير يقول...

صمت الحنين
على رأى الشاعر
هيصة هيصة
.
هههههههه
ربنا يهدى
اشكرك على التعليق الجميل
نورتينى

مسدس صغير يقول...

موناليزا
يعنى عشان قولت ان انا محامى خلاص
تطلعو فيها
طب انا بقى معايا دبلون.
ايه رأيك؟
ههههههههه
نورتى

مسدس صغير يقول...

SWEET VIOLET
يا ستى انا عايز افهمك حاجه مهمه.
احنا اللى نفرض عليهم قوانينا مش همه اللى يفرضو علينا قوانينهم.
مثلا فى فرنسا لا يجوز التعدد فى الزوجات حتى ولو كان الشخص اللى هيعدد ده مسلم..
ايه رأيك بقى؟؟؟

مسدس صغير يقول...

عالم ماريو نت
اشكرك على التعليق الجميل
الكلام اعتقد انه بسيط.
وفعلا ياما يوفرو لهم الزبادى ياما يجيبولهم موتوسيكلات.
ههههههه
نورتى

مسدس صغير يقول...

مها زين
انا اللى استاهل اللى يجرى عليه انى قولتلك ان انا محامى.
عايزة ايه يا مها يعنى؟
انتى عارفه انا اقدر اعمل ايه؟؟؟


انا ممكن اشرب كولة واتبلى عليكى واقول ان انتى اللى شربتيهالى..
هههههههه
نورتينى كعادتك

Sweet Violet يقول...

ياااااااااااه يعنى انت مسكت فى كلمه السياح ياراجل دى حتى السياحه خير للبلد ((:

سيبك من السياحه طيب و الديانات الاخرى اللى فى البلد اللى هما مصريين ؟؟

دول يتعمل معاهم ايه ؟؟؟

مسدس صغير يقول...

SWEET VIOLET
طب واشمعنا فرنسا مبتعملش حساب المسلمين اللى فيها فى موضوع تعدد الزوجات؟؟
وغير كده بعد احترامى لوجهة نظرك .
فرنسا بتعمل كده عشان المسيحية هيه الدين الرسمى للبلاد.
واحنا عندنا الايلام هو الدين الرسمى للبلاد
مع الاحترام طبعا للدين المسيحى والمسيحيين..
نورتى

Bondoka يقول...

لا تفكير بجد صحيح
اشمعنا يعنى الخمر شغال والمخدرات لا
بس استنى عليهم يشوفولهم سكه وسبوبه في المخدرات وهما يشرعوها على طول

معتز شاهين - باحث تربوي يقول...

معاك حق احنا بنعيش ازمة اسمها التناقض
بس تفتكر التناقض ده مين السبب فيه ؟؟؟؟
احنا .... ولا هما ؟؟؟!!!

هما .. فهمت ياباشا

وأدعوك لزيارة مدونتي والتواصل

مسدس صغير يقول...

بلد سبابيب صحيح
ايه حكاية السبوبة دى ؟
هو انتى ليكى نسبة وللا ايه؟
تفكير سليم ميه الميه
اشكرك على التواجد والتعليق
نورتينى بجد

مسدس صغير يقول...

معتز شاهين
فعلا زمن التناقضات
ربنا يهدينا ويهديهم
طبعا العيب فيهم
اشكرك ونورتنى
طبعا لى الشرف انى ازور مدونة حضرتك

خديجة عبدالله يقول...

أهلا :)
حضرتك سمعت عن " مدنيين" اتحاكموا " عسكريا" صح يبقى عادى جدا فى نفس البلد يحصل ده خمر مترخص كان عندنا محل شكله تحفة بإزار اسود وطلع فى الاخر بتاع خمور وعلى الزجاجة مكتوب مصرح بهاوفضولى خلانى أوصل للزجاجة :)

التفكير نعمة بجد ماشاء الله عليك بس دوما ادعى ربنا يرشدك للصواب

مسدس صغير يقول...

خديجة عبد الله
اشكرك على الكلام الحلو ده
اشكرك على التواجد والتعليق
اتمنى لكى الخير
دمتى فى سعادة وخير