الاثنين، 2 مارس 2009

الرسوم البلطجية

هيه دى الترابيس والمجانص
هما دول القضاه الجدد

قانون زيادة الرسوم القضائية الجديد اللى هيتناقش فى مجلس الشعب فى خلال أيام.


وهيتم زيادة الرسوم القضائية ما بين 5 الى 10 اضعاف الرسوم القديمة"كتيييييييييير جدا"..


دا هيأدى ان القضاء هيبقى للاغنياء فقط..


وبكده الفقرا اللى هيبقى ليهم حق ومش قادرين يخدوه عن طريق القضاء هيخدو حقهم ده بايديهم.. وان ما عملوش كده هيروح حقهم ادراج الرياح"حلوة ادراج الرياح دى؟؟"..


ولكن انا عندى اقتراح للفقرا عشان يقدرو ياخدو حقهم خاصة اذا كانو فقرا والفقر ماسكهم علاوة على كده ضعفا وبالبلا ياخدهم..


* الفكرة هيه:


1-اذا كان الحق محل الخلاف يزيد على 10 الاف جنيه فالقضية دى تتحل بـ 200 جنيه.طبعا رقم زهيد بالمقارنة مع الرسوم القضائية اللى هتندفع.


2-اذا كان الحق محل الخلاف يزيد على 50 الف جنيه فالقضيه دى تتحل بـ 1000 جنيه. طبعا رقم زهيد بالمقارنة بالرسوم اللى هتندفع.


3- اذا كان الحق محل الخلاف يزيد على 100 الف جنيه فالقضيه دى تتحل بـ 2000 جنيه وهكذا.


* حد هيسألنى اشمعنا 200 ؛1000 ؛2000 وهكذا؟؟


لو اعرف حاجة اقول علطول..


جـ: 200 جنيه =2 ترابيس ومجانص +1 ترابيس


1000 جنيه = 10 ترابيس ومجانص + 3 ترباس + 2 مجانص


2000 جنيه = 20 ترباس ومجانص +6 ترباس بس + 4 مجانص بس.


*بمعدل (الترباسين بالمجانص 75 جنيه للواحد والترباس بس 50 جنيه والمجانص بس 50 جنيه)


ملحوظة: الجميع تابع لشركة الحاج ابراهيم اجسام -لأن كمال كان قافل ساعتها - منظمة البلطجة العالمية ..


.................


ايه رأيكو فى الرسوم البلطجية قصدى القضائية الجديده؟؟!!!!!!!!!!

هناك 35 تعليقًا:

Unknown يقول...

يعني اشمعني القضاء الي هايبقي للغني و الفقير
ما الفقير مالوش حق يعيا او يتعالج ولا يحلم بتعليم محترم اشمعني بقي يكون ليه حق في قضاء عادل
يا عم صلي ع النبي و كل واخد ياخد حقه بايده يعني هو الشعب عاجز

مسدس صغير يقول...

EMY

على رأيك يعنى اشمعنا دى يعنى اللى

ماسكين فيها اوى؟

عليه الصلاة والسلام

ههههههه

فعلا الشعب مش عاجز

اللى انت عارفه اعمله..

Sweet Violet يقول...

مش عارفه ليه انا ماستغربتش ممكن لانها حاجه عاديه على رأى EmY

بس ايه حكايه ابراهيم اجسام

يابنى انت مين بالظبط انا كده هصدق فعلا ان انت اللى انا قولت عليه عندى ((:

لا بس بجد عجبنى الحسبه بتاعتك .. ده لو الكل اخد بيها يبقى خلاص الواحد يقعد فى بيتهم من كتر ضرب النار اللى هيحصل مابين الشعب (:

حسام غانم يقول...

يا ترى ناقص ايه تاني من القوانين والقرارات

اللي بتؤدي للتحقيق الفعلي لرواية يوتوبيا

الهوة تتزايد باطراد

بوست قوي ..

تحياتي ..

nody يقول...

دى سياسه عليا
يعنى هما لما يرفعوا الرسوم
الناس كده هاتبلطج على بعضها
ها ها يتقتلوا ياها يخشوا السجن
كده العدد بتاع الناس هايقل
وبمرو الزمن ها نخلص
تقوم المشكلات تتحل لوحدها لا يكون فيه ازمه عيش ولا موصلات ولا صحه ولا اى ازمه
نقوم بقى نفضى للمشاكل الكبيره
يعملوا مفاعل نووى بقى
ومراكز بحوث عالميه
وكده يعنى

شفت انك ظلمت الحكومه واننا كلنا مش قادرين نوصل لمستوى تفكيرهم

*البت المشمشية *حلوة بس شقية * يقول...

عم صولاح المناضل الثورى
صاحب التفجيرات الاخيرة
بتاع المظهارت
ايه ياعم
مالك ومال االلقضاء
مايغلوه
اشمعنا الغلبان هيبقا ليه حق فى ده كمان
الغلابلة دول عليهم حاجات يروحو يحلو مشاكلهم بعيد ع نالقضاء
هيا البلد ناقصة مشاكلهم وقرفهم
بلا غم بقه
انا جهزت نفسى واشترتلى سكنتين ومقص وقصافة
عشان هقوم بعمليه قريب
معايا يا معلم ولا ايه

*البت المشمشية *حلوة بس شقية * يقول...

سمعت عن اتنين بيسالو عليك فى المدونة اللى جمبى
انتا عملت مصيبة ولا ايه
شكلك هيتقبض عليك قريب
ماشى ياعم المجانس

مسدس صغير يقول...

sweet violet
ممكن تكون حاجة عادية لان اى حاجه فى زماننا ده بقت عادية الحاجة الوحيدة اللى مش عادية ان احنا لسه عايشين.
اما عن ابراهيم اجسام ده من اولاد الحاج اجسام طبعا من اشهر اولاد الحاج اجسام كمال وجمال وابراهيم وخلافه.
ايه رأيك فى الحسبة؟؟
حلوة صح؟
خلاص انتى عارفة تليفون المكتب ساعة ما تحتاجى اى خدمات اتصلى فورا تكسب الف دولار اسبوعيا..هههههههه

مسدس صغير يقول...

حسام غانم
الهوة تتزايد باطراد ورواية يوتيوب وكلام من الشتيمة ده بس انا هسامحك عشان انت فى مدونتى بس.
ههههههه
اشكرك على التعليق
نورتنى يا حسام بيه

مسدس صغير يقول...

nody_1987
طبعا انا موافق على الكلام ده لان السياسة لعبة 100 سنة مش يوم وللا اتنين فهما طبعا حرصا على الاجيال القادمة وتوفيرا لحياة كريمة لهذه الاجيال بيعملو كده للتخلص من العناصر الزائدة..
هههههههه
اشكرك
تحيتى وخالص مودتى

مسدس صغير يقول...

البت المشمشية
انا بردة اللى صاحب التفجيرات الاخيرة متخلينا ساكتين وحاطين اللسان
الطويل ده فى بقنا وخلاص.
وعلى فكرة كلامك صح.
يعنى الغلبان ده مش مكفيه ان احنا سيعينه فى البلد كمان بيطالب بحقوق وتجارة واداب دا يبقى عينه فارغه.
وايه حكاية المقصات دى امال انا بنبح فى صوتى من ساعتها عشان ايه؟
عشان كل واحد يقول انا معايا سكينتى؟؟
امال الترابيس والمجانص يروحو فين؟

مسدس صغير يقول...

البت المشمشية

اوعى تجيبى سيرتى فى اى حته .

دا انا اوديكى ورا الشمس

*البت المشمشية *حلوة بس شقية * يقول...

تودينى ورا الشمس
الله بجد كان منزمان نفسى اروحها
ده انا اللى هتاويك
اختفى دلوقتى

مسدس صغير يقول...

البت المشمشية
امشى يا شاطرة
امشى يا عثل

انجررررى يا بت

لو شفتك هنا تانى هوريك شغلك..
ههههههه

*البت المشمشية *حلوة بس شقية * يقول...

مسدس صغير
متقوليش يا شاطرة
متقوليش يا عثل
ايوة كدة

مسدس صغير يقول...

البت المشمشية
ايوا كده.
ههههههه
نورت المحكمة يا سرحان

د/عرفه يقول...

اهلا بيك مسدس
شكرا لزيارتك مدونتى المتواضعه
وان شاء الله هتكون مدونتك على القائمه
وهنتابع كتاباتك
بالنسبه لموضوع رفع القضايا
يا عم بلاها رفع قضايا
وقضيها بلطجه على الاقل ارخص
واظن انك ادرى منى
هههههههههههههههههه

مسدس صغير يقول...

د/ عرفة
انا اتشرف بوجودك فى مونتى
انا فعلا معاك البلطجة ارخص.
نورتنى بجد
دمت بخير

ستيتة يقول...

الحمد لله المحامين مضربين
الصيادلة مضربين
بتوع مصنع شيكابالا ومصنع حبورا ومصنع أدوية تتح كمان

عقبال أساتذة الجامعة واقعد في بيتنا انا كمان

ياعزيزي البلد بقى فيها استعباط جامد قوي ولا عيش فيها الا للأغنياء التقال

ليه الترابيس والمجانص .. طيب ما نأجر مسدس صغير؟
تحياتي

مسدس صغير يقول...

انا رأيى الشعب يضرب عن الطعام لمدة سنتين كده لما يموت.
اكيد هيبقى فيه حلول للأزمات.
وع العموم عقبال اساتذة الجامعة بندعيلهم اهوه يا ستى عشان خاطرك.
غير كدة احنا منقدرش نستغنى عن الترابيس والمجانص وان كان على مسدس صغير مهوه اللى هيجيبلكو الترابيس والمجانص...

مسدس صغير يقول...

على فكرة الرد الاخير ده بتاع ستيتة حسبو.
سلام

wesoooooooooo يقول...

والفقرا الوحشين دول زعلانين ليه؟
ماهى البلد أصلا بتاعت الأغبيا
يوه قصدى الأغنيا يعنى جات على دى ياخويا
أشمعنى دى يعنى
اهو نقضيها مجانص أحسن واوفر

مسدس صغير يقول...

wesoooooooooo
الفقرا دول مش هيشوفو طيب
نعملكو ايه بس
اكل وبتاكلو فى بعضكو لبس وبتلبسو....
نعمل ايه بس.
سيبونا بقى نسدد ديوننا
متبصليش بعين رضية بص للمدفوع فيه.
ههههههههه
ونقضيها ترابيس ومجانص

سفروتة يقول...

حقيقي
ربنا يستر علينا

ــــــــــــــــــــ
هو يعني ايه مجانص صحيح؟
ههههههههههههههههههههههههههههه
اسمها حلو

تحياتي
:)

مسدس صغير يقول...

سفروتة
ربنا يستر ان شاء الله
المجانص اللى جنب الترابيس.
عرفتيها؟؟
ههههههه
نورتينى

Empress appy يقول...

انت ايه عرفك ان مرعى كان بطل مصر تقريبا فى المصارعه ورفع الاثقال
بجد هو كان حاجه رياضيه كده شبه العيال دول

صفــــاء يقول...

.
دة عشان يصبح القضاء والعداله فقط

لمن يقدر ولا عزاء للفقراء
.

Unknown يقول...

عارف لو قدروا يعدوا علينا الانفاس -لأ بقولك ايه ماتفهمنيش غلط لو سمحت :الانفاس بمعنى النفس والتنفس مش حاجة تانية-بقولك لو قدروا يعملوا لنا عدد مرات نفس فى اليوم ولا الشهر حيعملوا واللى يتخطى العدد ده (يكتموا نفسه على طول )ولسه
ياااااااااااااااااااااما
فى الجراب ياحاااااااااااوى.

مسدس صغير يقول...

appy
مين مرعى؟؟
ما علينا. انا فرحان جدا بوجودك عندى فى المدونة اشكرك على التعليق والتواجد.
نورتينى يا ابى

مسدس صغير يقول...

صفاء
فعلا لا عزاء لاولاد الك.......... الفقراء...
ههههههههه
اشكرك على التعليق
نورتينى

مسدس صغير يقول...

nora haty
هههههههههه
انا فاهمك صح طبعا.
الانفاس بتاعة الشهيق والزفير وكده يعنى.
فعلا فى خطة لعمل عداد للانفاس والنفس بجنيه
انا عن نفسى هاخدلى 30 نفس فى الشهر بس
على أد فلوسى.

دمتم بخير الانفاس..

e_emy يقول...

لا فكره جامده جدااااا واوفر D:

بس مين احسن؟ الحاج كمال ولا ابراهيم
ههههههههههه


ابتسم احنا ف مصر
ربنا يستـــــــــر

مسدس صغير يقول...

e_emy
انا فرحان جدا ان الفكرة عجبتك وبكده ضمنت زبونة دائمة عندى فى المركز البلطجى المتقدم للشئون القضائية.
وعلى فكرة ابراهيم احسن من كمال كتير بس ابراهيم مخدش حقه فى الشهرة...

الحرامي يقول...

امممممممممممم
مجانص
طبعا الموضوع دا حاجه كويسه جداااا
للحراميه اللي زي
لاني لو هسرق مبالغ صغيره من ناس كتيره
اكيد الناس دي مش هترفع اي قضايا
مثلا اسرق 200
القضيه هتتكلف 250
بمعدل (3 ترابيس + امجانص)
يبقي نسرق براحتنا بقي
اشطه

مسدس صغير يقول...

الحرامى
ههههههههههه
دا انت هتدوب يا حرامى فى النظام القضائى الجديد..
كفاية عليك ترباس واحد وانت تتوب..
تحيتى ومودتى
نورتنى