الخميس، 12 فبراير، 2009

تجربة تستحق الدراسة

ستين سنة فى عمر أى دولة قليلين جدا يعنى مثلا مصر عمرها سبع تلاف سنه.."عجوزة!!". طب لو قلت ان دولة كل عمرها 60 سنة؟؟ غريبة شوية!! كمان مش كده بس . لأ دى سبقت الدول اللى من سبع تلاف سنه ومن الفين سنه ومن 400 ومن300 وهكذا.. من الاخر انا عايز اقول ان اسرائيل تجربة ديموقراطية تستحق الدراسة. البلد دى وصلت مرحلة متقدمة جدا جدا فى الديموقراطية . انا شايف انها وصلت مرحلة تعدت فيها امريكا وتفوقت عليها صاحبة الزعامة فى هذا المجال كما تدّعى.. والله الانتخابات بتاعة اسرائيل حاجة ولا فى الخيال ..
-منتهى الشفافية منتهى الديموقراطية منتهى حرية التعبير- الصناديق بتاعة الانتخابات بتتفرزع الهوا فى الفضائيات يا جماعة. شوية يقولك حزب كاديما متفوق بمقعد بعد كده يقولك حزب اسرائيل بيتهم تقدم مقعد والعمل وهكذا وكله على عينك يا تاجر واللى ما يشترى يتفرج..امريكا نفسها اذا كانت صناديق الاقتراع بيبقى فيها شفافية الا انها بردة بيبقى فيها نوع من الغموض فى بعض العمليات الانتخابية والولايات وفيها عنصرية وخلافه الكلام ده مش موجود فى اسرائيل.. محدش يقول ان انا بحب اسرائيل مثلا عشان بقول الكلام ده أو انا من اسرائيل لا سمح الله.انما ده يا جماعة الواقع.. ده اللى خللا 5 مليون نسمة (الاسرائيليين) يتحكمو فى 300 مليون نسمة (العرب) ..

.......

* عايز اتكلم فى موضوع مهم ملوش علاقه بالموضوع السابق بس مش عايز اعملله بوست لوحده.
الموضوع ده يا جماعة هو الجنيه والنص جنيه المعدن..بقى يا جماعة عمرى ما سمعت عن دولة فى الدنيا تنزل عملة محلية ومش قادرة تخلي الشعب يتعامل بيها .. كل ما تدى لحد الجنيه ده أو النص جنية . يقولك : مبيمشيش يا استاذ.. امال يعنى بيحبى؟!! هو انا يعنى اللى صانع الفلوس دى يا ناس وطبعا ده اكيد بيحصل معاكو أو بمعنى اصح مع معظمكو.صح؟؟ كلكو فى صوت واحد . صح.. فيه ناس تقول الغلطة غلطة الشعب مفيش ثقافة ومفيش تفاهم وكلام من الصعب ده.. بس بجد انا شايف ان الغلطة غلطة الحكومة اللى صكت الفلوس دى. طالما انهم صكو الفلوس المعدن دى لازم يوفرو ليها الحماية اللازمة وكذلك لمستخدمها الكلام ده مش هزار يا جماعة دى عملة بلد.. اسرائيل تقول علينا ايه ؟؟ مفيش عندنا انتخابات؟؟!!! يا إما مكنوش يعملوها من الاساس ..

-- ارجو ان انا مكونش تقلت عليكو وبالهنا والشفا..

هناك 33 تعليقًا:

EmY يقول...

عزيزي ايبك ديموقراطية ايه بس و شفافية ايه
اوعي تنسي الرياده المصريه
الحكومه بعون الله عارفه الي في نية الشعب و مش عايزه المواطن يتعب نفسه و يروح ينتخب لا هي عارفه كان هايدي صوته لمين و بتصوت بالنيابه عنو

و سمعني اغنية هشتكنا و بشتكنا يا ريس

بالنسبه للعملات المعدنيه بصراحه محصليش اي مشكله معاها

سلاااام

مسدس صغير يقول...

EMy
تصدقى فكرة انهم بيوفرو على المواطن عناء الطوابير وخاصة انه مش اخد عليها وبيحطوله الصوت بتاعة وهو فى بيته.هوم دليفرى صوت..
ربنا يكرمهم زى ما كرم رفعت المحجوب..ههههههههه
اما بالنسبة للعملات المعدنية يمكن فى القاهرة الوضع اسهل شوية اما عندنا مفيش ياما ارحمينى مبيخدوهاش ابدا..

سلسبيل يقول...

والله عندك حق
انا كل ماشوف الانتخابات ف اسرائيل اتكسسسسف من كل حاجه حواليا
دول ناس ربوهم في المدارس علي انهم يقولو رايهم
من اول انتخابات نزيهه ف المدارس او الكليات..لحد فرص الشغل اللي بتيجي للي يستحقها بس
لكن احنا عندنا الطالب ف المدرسه لو قال بم...انت عارف الي هيحصل
دا غير انتخابات اتحاد الطلاب وماادراك ايه بيحصل فيهااااا
فالتطور الطبيعي للحاجه الساقعه ان دا اللي يحصل لنا
ايييييه دنيا
بالنسبه للجنيه المعدن ده فانا ايام التدريب ف الصيدليه كنت بتعقد
مفيش ولا كائن حي عايز ياخده مني
اعتقد ان السبب ان مفيش ثقه بين المواطن والحكومة
او علي راي بوحه
الثقه بقت مبتذله مابينا ههههههههه

يلا معلش اكيد ربنا هيفرجها
تقبل مروري:)

مسدس صغير يقول...

سلسبيل
كلام جميل كلام معقول مقدرش اقول حاجة منه..
اشكرك على التعليق والمشاركة .
غير كده بالنسبة للانتخابات فى مصر فعلى رأى ايمى هما بيوفرو على المواطن التعب والمشقة وبيحطوله صوته من غير ما يروح واحنا اللى ظالمينهم . ويا سلام على انتخابات اتحاد الطلاب أسألينى انا منتهى الشفافية ومنتى حرية الرأى والتعبير.ز
ربنا يستر ..
بالنسبة للجنيه المعدن .
فهوه مش جنيه هوه جنيّة . اة مستغربة ليه انتى بتشوفى حد بيرضى يمسكه؟؟ من الخوف .. حتى العيانين اللى مش فى وعيهم اللى كانو بيجولك الصيدلية مكانوش بيردو ياخدوه يبقى زى ما قولتلك جنيّة.......

كيــــــــــــارا يقول...

بالفعل تستحق الدراسه

تعليق ايمي موتني من الضحك هو يحني الدوله هتقطع نفسها الحق عليها مريحانا

بالنسبة للعمله نفس المشكلللللللللله

اصبر بقي لما الخمسه جنيه تكون فضه

دا احنا هنشوف ايام فله

ضد التيار يقول...

انت عارف بقى موضوع اسرائيل ده فاكرنى بامريكا بردو لما نجح اوباما الاسود

علشان بردو نقول ان امريكا انتهى عصر العنصريه بتاعها و انها امورة و بنت حلال

الصراحه انا مش مقتنعه او مش مصدقه ليه بقى لان الانسان الديمقراطى بيبقى فى كل حاجه و كل التعاملات مش بس فى الانتخابات .. و لا ايه ؟؟

المهم لازم تكون واثق ان الاختلاف فى تفسير تصرف الدولة لا يفسد للدراسه اى امتحان على فكرة D:

اما بقى عن العملة المعدنية فانا بتعامل بيها عادى و محدش بيقول لأ عليها

ده حتى سواااق التاكسى بياخده عادى جداااا .. يعنى ولا ميكروباص و لا سوبر ماركت

طبعا بعد الكلام ده انا عارفة انى هنزل الاقى الكل بيقول لأ مابتعملش بيها

ماهى العين بردو ليها تأثير .. زى كده ما بطنى وجعتنى من الايس الكريم اللى اكلته من اسبوع بسبب ناس عينها كانت فيه (:

الا بالمناسبة تعرف الناس دول ؟؟؟

للأسف مش قادرة اهدى النفوس فى البوست ده )):

dr_samarmar يقول...

مممممممممممممم

موضوعين مهمين جدا جدا

أولا أهم بيرحونا أحسن مانروح بنفسنا و ننتخب
قاعدين فى بيوتنا و مرتاحين.. و حتى لو روحنا النتيجة واحدة

احنا كل الأوضاع عندنا غلط من أول الزراعة للصناعة للتعليم


يبقى بديهى الأوضاع السياسية الداخلية وا لخارجية للبلد تكون بايظة.. و ربنا يستر بقا

بالنسبة للأوضاع الاقتصادية بقا.. فى الأول كنت باخد العملةا لمعدن دى مع انها و الله غالبا بتضيع منى و بتقع فى المحفظة.. بس هى عملة.. بعدين لما لقيتها أصلا مش بتتقبل لا فى المواصلات و لا فى مكتبة الكلية و لا فى كافيتريا الكلية
دا حتى بتاع التكتك مش بيرضى ياخدها وا لله :D

فبطلت أنا كمان أخدها

مفروض حكومتنا تبقى أقوى من كدا و تقدر تجبرنا على استخدام عملة محلية زى دى

اشمعنا بيتشطرو ف حجات تانية يعنى

ربنا يستر علينا وا لله

دايما البوستس بتاعتك ضرب النار بتاعها عالى أوى كدا :)

تحياتى

smilyrose يقول...

اسرائيل ايه


وامريكا ايه بس

احنا فين ودول فين

وبعدين احنا دولة بنت ناس

مش بنحب الكلام دا

قال ديمقراطية قال

احنا بتوع الكلام ده

كمفاية سياسة حكومتنا

شعب ملوش شغل غير انه يدور

غير على رغيف العيش والانبوبة


يبقى بتقول ديمقراطية

فال الله ولا فالك

بلاش كلام فى المحظور

خلينا عايشين فى النور

ههههههههههههههههههه

قال عايشين قال

يلا كفاية كدا

smilyrose

روح الحب الصادق

موناليزا يقول...

احنا دايما خارج المنافسة:)

مسدس صغير يقول...

كيارا
دانتو هتشوفو ايام اسود من اوباما.
ربنا يستر عليكو .
اشكرك كيارا على التعليق والمرور والصحة والتموين..ههههههه

مسدس صغير يقول...

ضد التيار
بالنسبة للديموقراطية احنا منسويش حاجه فى العالم حاليا الهند مثلا دولة عالم تالت بس منتهى الديموقراطية وجنوب افريقيا وموزمبيق وشبرا واسماعيلية وخلافه..
اما بقى بالنسبة للجنية المعدن.
عندنا محدش بياخده خالص .
انتى بقى بتقولى انه ماشى معاك اسرع من الموتوسيكل الصينى. اكيد انتى تبع الحكومة يا ضد والناس عارفاكى عشان كده كله ماشى وماشى ..
وبالنسبة للعين فالعين فلقت الحجر انا عارفها .
وغير كده مين اللى بياكل ايس كريم فى البرد ده؟؟
دا حتى اللى ياكل لوحده يزور..
"شارك بكوب ايس كريم تنقذ مدونا"
هههههههههه

مسدس صغير يقول...

dr samarmar
اولا اشكرك على الكلام الجميل اللى قلتيه ده
ثانيا بالنسبة للانتخابات فهما فعلا بيريحونا من عناء الطوابير وعنا البرد والحر والطوب والزلط وخلافه...بنشكرهم جميعا.وانتى كمان لازم تشكريهم..
اما الجنيه فحدث ولا حرج 50 مليون عملة معدنية فى البلد مش قادرين يديلهم حماية كاملة للتداول والناس مش واثقة فى الفلوس دى..
يبقى يفضوها سيرة..

مسدس صغير يقول...

smily rose
اشكرك على التعليق الرائع دائما واشكر تواجدك يا روح الحب الصادق..
وفعلا احنا شعب المفروض ميتكلمش فى السياسة ويتكلم فى العيش والانابيب افيدله..ونعيش فى النور ونركب الحنطور وكده يعنى..ههههههههههه نورتينى

مسدس صغير يقول...

موناليزا
فعلا نحن نختلف عن الاخرون..
احنا خارج اى منافسة ..
تاريييخ بقى .
ربنا يستر..
تحيتى وشكرى وفوزى وحسنى.
نورتينى

fashkool يقول...

مسدس صغير .. تحياتى
شوف تجربة اسرائيل تجربه تستحق ان تدرس فى المدارس والجامعات .. تجربه تستحق فعلا الاحترام وخلينا احنا فى التهييس والاستعباط بتاعنا عشان كدا هما قادرين على العرب الجرب كلهم .. العرب بتوع الحزن الوطنى وحزن البعث والاحزان كلها
اما من ناحية العمله المعدنيه .. من الطبيعى ان يكون للنقود صفة القبول الاجباريه .. لكن المشكله ان العملات المعدنيه كترت خالص ولما الواحد يفك الـ5 ولا ال10 جنيه الناس تستعبط وتديك الباقى كله جنيهات معدنيه .. المفروض 3 او 2 مثلا والباقى ورق .. لكن الاستعباط المصرى سيد الموقف
تحياتى

مسدس صغير يقول...

فشكول
منورنى دايما يا استاذ..
كلامك مظبوط طبعا لازم يدرسو تجربة اسرائيل فى المدارس والجامعات ..
اما العملة فدى تجربة شخصية لان لو حد جه يفكلى عشرة جنية ما برضاش اخد معدن خالص..هههههههه
اشكرك على التعليق
ونورتنى

أحــوال الهـوي يقول...

تجربه و دراسه

صحيح عندك حق
بس مين يسمع و مين يفهم

تحياتي

dodda يقول...

انا حقولك على تجربه لطيفه
جربها بنفسك
اخويا لسه جاى من امروكا
وكان فى جيبه شويه عملات من هناك
وعشان بقاله كذا سنه اتفاجىء بالجنيه الجديد اللى شبه اليورو

بس خلانى اشك فى انه معدن !!!
ودى هى التجربه اللى بقولك تعملها
ارمى الجنيه واى عمله معدنبه تانيه على البلاط او السيراميك واسمع صوتهم وصوت الجنيه...
اعتقد اننا فعلا عملنا الجنيه الجبس....
وسلملى ع الشيكل

مسدس صغير يقول...

احوال الهوى
اشكرك على التعليق والمرور الذى اسعدنى ..
تحيتى..
منورين

مسدس صغير يقول...

dodda
والله الجنيه ده ماهو نافع لا صوت ولا صورة ولا بيتصرف منهم لله..
حتى صوت شعبولا احسن من صوتو..
وسلميلى ياما على اللى بالى بالك..
اشكرك على التعليق .
نورتينى..

mahasen saber يقول...

للاسف عندك حق فى الاولانيه

ومرارتنا مفقوعه من التانيه

nour shahen يقول...

بالنسبه للجزء الاول اكيد عندك حق
لأزم نتعلم من اللى سبقينا سواء يهود ولا امريكان علي الاقل ناخد الكويس بدل ما احنا دايما بناخد السىء وبس

اما بالنسبه للجزئيه التانيه فأنا جربت ان عمله متمشيش بس دا قديما
وقت ما رجعوا الخمس قروش وكانت عمله ورقيه مش معدن
كانت فعلا صعب انك تستخدمها والناس مش بقتنع انها رجعت فعلا بس كانت عمله صغيره يعنى سهل تستغنى عنها اصلا لو ممشيتش
لكنى مجربتش اقابل ازمه مع الجنيه او النص جنيه المعدن يمكن حصلت مع ناس كتير
عامة دايما كل شيء جديد عندنا بيمشى بالعافيه وكأننا متبرمجين علي خطه لا يمكن تغييرها

تحياتى

مسدس صغير يقول...

mahasen saber

اشكرك على التعليق .

وعلى المرور الكريم

ونورتينى.

مسدس صغير يقول...

nour shahen
اشكرك على التعليق الذى اسعدنى والزيارة..
فعلا معاكى حق العملة لو كانت خمس قروش او 10 قروش مش مشكلة بس الكلام ده بردة ميصحش لأن مهما كان دى عملة بلد لازم نحترمها حتى لو بقوة القانون يإما مكنوش ينزلوها من الاساس..
اشكرك ونورتينى

Beram ElMasry يقول...

خ العزيز . مسدس صغير
السلام عليكم ورحمة الله وبركاته
صديقى المهذب
(ده اللى خللا 5 مليون نسمة (الاسرائيليين) يتحكمو فى 300 مليون نسمة (العرب) ..)
يا نشجى وعيارك صايب
فتناكم وجابولنا الخــايب
اخرنا بغباوته العـــــايب
فى حوزتى 10 جنيه برايز ورق لها 3 سنين مش عارف اصرفها ، سالت ليه قالو النظام بيعودنا على الادخار الاجبارى الغير مفيد .......واحد الاصدقاء لا منى على نعت الغبى لشعبنا البليد
لك تحياتى والسلام عليكم ، ولا سلام مع اليهود

مسدس صغير يقول...

بيرم المصرى
اشكرك على التعليق الجميل والكلمات الاجمل ..
وبالنسبة للعشرة جنية البرايز دى ممكن تقدم طلب تسليمها للبنك المركزى ويغيروهالك بس بشرط تجيب على الطلب موافقة من تلت اعضاء مجلس الشعب..
لك تحيتى

mohamed ghalia يقول...

عندك حق والله إسرائيل وصلت لقمة الديمقراطية فى إنتخاباتها
ولقمة الإنسانية فى خوفها على حقوق شعبها
واحنا عمالين نجيب ورا
دمت بكل الود

مسدس صغير يقول...

mohamed ghalia
اشكرك على المرور والتعليق .
وفعلا معك حق هم شعب يخاف على وجوده حتى وان كان هذا الوجود يتسم بعدم المشروعية.
اما نحن فحدث ولا حرج.
دمت بخير واشكرك.

*البت المشمشية *حلوة بس شقية * يقول...

ملحوظة صغيرة المدونة بتاعتى طارت اللى انا دخلت بيه ده مدونة جديدة بس بنفس الاسم زيها بلظبط ياريت تضيفه لينك المدونة الجديدة عندك وياريت تعملى تنويه بكدة دى خدمة منك يعنىhttp://o0mshmsh0o.blogspot.com/

صفـــــــاء يقول...

.
هى سواء فى أسرائيل او فى أوروبا هو نظام انتخابى متشابه وبعدين مالك انت ومال الانتخابات او الصناديق
خليك فى الصناديق اللى بيخزنوها ويخرجوها كل سنه مرة
كمان بالنسبه للعمله مش من المفروض يكون فيه عمله كبيرة معدن ... المعدن أخرة ربع جنيه مخروم
.

مسدس صغير يقول...

البت المشمشية
حاضر يا ستى هنزلك بوست باللينك بتاع مدونة سيادتك الجديدة.
يكون يطمر..

مسدس صغير يقول...

صفاء
اشكرك على التعليق
وطبعا الصناديق صاحبة شعار زورونى كل سنه مرة بلاش تسيبونى بالمرة هى رمز البلد ..
ربنا يهديهم ويهدينا..
اما الفلوس فأمرنا لله اللى يقع فى ايده جنيه يرميه.
والسلام

فتافيت يقول...

ما تقتلش يا سيدي
احنا بلد ديمقراطي طبعا من حق تقول رايك بس من حقهم ما يسمعوش كلامك.. شفافية عالية اهي

اسرائيل كحكومة بجد وهمية .. وكمان كدولة لها هدف مصرة تنفذه .. برضو اسطورية .. بس ربنا ينعلهم دنيا واخره
ام بقى النص جنيه والجنيه انا مجمعه مجموعه حاسة اني بجمعى عمله صعبه .. او منقرضة محدش بياخدها هنا في الشرقية خالص

وعلى فكرة ده في الاقاليم بس القاهرة لا على حد علمي

تقبل مروري ويارب ما كنش تقلت عليك انا

سلاااااااموووووووووز