أنا وجامع الزبالة وقعدة العرب

اولا كل سنه وانتو طيبين والسنه اللى جاية تبقو طيبين اكتر من السنه اللى فاتت...

ثانيا نتكلم فى موضوعنا .. فكرة البوست ده جاتنى من "جامع زبالة" زبّال يعنى.امبارح وانا ماشى فى الشارع لقيته بيقول ان وزراء خارجية العرب عاملين قعدة ( قعدة عرب يعنى )عجبتنى الفكرة وقلت اكتب عنها ... من قبل وزراء الخارجية ميعملو القعدة بتاعتهم والناس كلهم عارفين النتيجة بتاعة القعدة دى من قبل متتعمل والدليل " جامع الزبالة "فالحكاية وما فيها عمنا عمرو موسى مشكورا لم الرجالة وعملو القعده فى مصر كان هوه مفكر انهم اصحاب قرارات ولكن كل واحد من الوزراء المبجلين شجب وندب وندد وعدد ولطم وعمل اللازم وبعد المحادثات الثنائية والثلاثية والجماعية توصلو لصيغه رائعة الا وهى ان ابو مازن يروح مجلس الامن حتى يعرض القضيه عليهم فكرنا بمصطفى كامل ومحمد فريد اما كانو رايحين شبرا يعرضو القضية المصرية عليهم بس ده كان بسبب ان مكنش فيه تليفزيونات ولا رداوى ولا جرانين ولا حاجه يعنى اما دالوقتى فالقضية معروضة خلقه..يعنى احنا بنشكر السادة وزراء الخارجية وبنشكر جهودهم الجبارة فى تطليع الصيغة دى من رحم المعاناه " تمخض الفأر فولد فأراً " وكل سنه والسادة الوزراء فى نعيم...