الاثنين، 8 ديسمبر، 2008

الخوف هايف


الخوف فلسفه وفلسفه جامده كمان يعنى مثلا لازم الواحد يكون عارف

ازاى يخاف وامتى يخاف ومن مين يخاف وعلى ايه يخاف ..؟.

مش أى حاجه تخوفك ومش على اى حاجه تخاف ومش فى كل

الاوقات تخاف . وترجمة الخوف ترجمة فعليه على الجوارح

من اخطر ما يكون .. غير كده انا اعرف ناس متعرفش الخوف واعرف

ناس بتخاف من نفسها واعرف ناس الخوف بيجيلها ساعة متكون فرحانه .

واعرف الواد خلوده قريبى " عنده 3 سنين " طبعا الحروف وقعه منه خالص .

لقيته فى يوم بيقولى يا عمو انا هايف ..

وسألنى سؤال غريب قاللى وانت كمان هايف يا عمو؟؟!!

استغربت جدا قولتله انت هايف ليه يا خلوده؟؟ قاللى" انا هايف من الهصان"

وانت كمان هايف من الهصان يا عمو ؟؟ قلت آآآآآآآآآآآه خايف يعنى . طمنتنى.

هوه خايف من الحصان . بس لقيت فى كلامه فكرة يمكن تكون دى برده فلسفه للخوف..

ان اى حد يخاف يبقى هايف ممكن؟؟ ممكن ...

روحت قايله يا سلام عليك يا خلوده يا هايف..واعتبرتها فلسفة خالد الصغير

هناك 6 تعليقات:

قلم رصاص يقول...

هههههههههههههههههه

فكرة رائعه ياعمو والله

تصور والله فعلا ..ممكن الواحد اللي بيبقى خايف يبقى هايف .. !

بجد فكرة تمام اوي اوي

الا من حق مين خلوده ده بقى
هو عميري شان برضه ولا لع اللع ؟!

كل سنة ومعاليك بخير وعيد سعيد عليكم جميعا

تقبل مروري مع طبق الفته هذا المرصع بأصابع الكفته وشرائح اللحم المشوي

مسدس صغير يقول...

قلم رصاص
فلسفه وكل واحد ليه فلسفته الخاصه فى الحياه انا عن نفسى بحب الشخص اللى ليه موقف واللى عنده فلسفته الخاصه زى خلوده كده .ههههههه تقبل تحيتى لك منى اجمل الامنيات الطيبه

سلسبيل يقول...

بص هو الخوف لما بيزيد عن حد معين فعلا بيكون هيافه..تفاهه كمان
بس ساعات بيبقي الخوف مطلوب
لكن انا اقصد الخوف الصحي
اللي هو الخوف من ربنا..اللي بيبعدنا عن المعاصي
والخوف من الفشل اللي بيخلينا نجتهد عشان ننجح..
خوف الراجل من مراته مثلا هههههههه دا احساس سامي ونبيل جدا لعلمك وضرورة من ضروريات الحياة

بس فعلا فيه ناس بتخاف من كل حاجه لدرجه انها مش عارفه تعيش حياه طبيعيه دول بقي ربنا معاهم

ادعيلي عشان انا خايفه م الامتحان
ايه ده
هو انا قلت خايفه؟؟
:)

مسدس صغير يقول...

سلسبيل
انا معاكى ان الخوف ممكن يكون ظاهرة صحية زى الامثلة اللى انتى قلتيها بس ممكن الخوف ده يكون سبب فى دمار الانسان وانا بطرح ثقافة وفلسفة خلوده عن الخوف ليس اكثر وانا عارف ان الراجل لازم يخاف من مراته عشان هااااااااااا.. ههههههههه ممكن؟ وهدعيلك ربنا يوفقك فى امتحاناتك ومتخافيش لان اللى بيخاف بيبقى ....... وكده يعنى

صمت المشاعر يقول...

جميل اووي البوست دا
فعلا اللي بيخاف يبقي هايف المفروض منخافش من اي شيء غير من ربنا وبس
ولازم نعلم الاولادنا واجيالنا في المستقبل ان شاء الله انهم ينزعوا الخوف من قلوبهم ومايخافوش غير من ربنا ودايما الايه دي تبقي في قلوبهم علشان يبقوا دايما اقويا((قل لن يصيبنا الا ما كتب الله لنا ))

تقبل مروري

intelligence يقول...

Some of the content is very worthy of my drawing, I like your information!
costume jewelry