الاثنين، 23 نوفمبر 2009

الحقيقة العارية ..


 

بصراحة الموضوع مش موضوع ماتش يا جماعة والله . احنا اساسا اتعودنا على الهزايم مش فى الكورة بس انما فى شتى المجالات بس الحكاية اكبر من كده بكتير .

أولا :- الغريب يا جماعة اننا لو تابعنا الاعلام الجزائرى سواء المسموع أو المقرؤ هنلاقى انهم اساسا مش معترفين بأى خطأ ونفس الكلام اللى احنا بنقوله هنا بيتقال هناك احنا بنقول اننا اتضربنا همه بيقولو كده بردة بنقول ان الدم سال من ولادنا همه كمان بيقولو كده يعنى الاعلام بصفة عامة هوه المتحكم والمسير للمسألة من أولها لآخرها . بس طبعا الناظر بنظرة حيادية هيشوف ان الجزائريين خاصة اللى كانو فى السودان تخطو كل الخطوط الحمراء والصفراء وتجاوزو كل الحدود بكل وقاحة وبكل سفالة ونسو كل ما يربط هذين الشعبين من روابط سواء الدين واللغة والجغرافيا والتاريخ ولكن للأسف نسو كل ده بمباركة القيادة السياسية الجزائرية تحت سمع وبصر الأخ " أبو تفليقة " تصرف غريب جدا والله شوية صيع وتشرد وخريجى كبرى السجون الجزائرية برغم النصر الا انهم بربر وهمج ولم يحكمو العقول التى لا يمتلكونها من الاساس وداسو على كل الأعراف والأخلاق التى يجب أن تراعى فى البشر وليس فى الاخوة أبناء الوطن الواحد والدين الواحد
والتاريخ المهبب الواحد. 





ثانيا :- قناة الجزيرة مثال حى للإعلام المأجور من وجهة نظرى يا جماعة القناة دى خلتنى شتمت مصر ساعة ما البعثة الجزائرية جت مصر وسمعت خبر تكسير ازاز الاتوبيس اللى كان بيقل اللعيبة الجزائريين .
قعدو اكتر من ساعة يبرزو فى همجية الشعب المصرى ووحشيته المنقطعة النظير لدرجة انى قلت اخص عليكى يا مصر أزاى اخواتنا الجزائريين نعمل فيهم كده ؟ ودول مهما كان بشر لازم نراعيهم حتى لو كانو يهود وبعد كده أفاجأ إن دى تمثيلية كبيرة جدا أتطبخت فى مطبخ السفير الجزائرى فى مصر تحت رعاية وزير الشباب الجزائرى والأخ هوهاوة أو كما يطلق عليه الاعلام الجزائرى " روراوة " والنيابة اثبتت فى تحقيقاتها أن الاتوبيس متكسر بأيدى الجزائريين الممثلين الكبار أوى اللى المفروض يخدو الاوسكار فى الفيلم العالمى اللى اتمثل على الاراضى المصرية قبيل المباراة الاولى فى القاهرة . 
كل ده قلت عادى يمكن كانو ميعرفوش
لكن اللى مش عادى بعد أحداث السودان والاعتداء على الجماهير المصرية بمنتهى السفالة والقذارة قناة الجزيرة كانت بتعرض أخر أخبار الساعة فى الصين والهند وبلاد الواق واق وفين وفين ولقينا مراسل الجزيرة الرياضية بيقول ايه اللى قناة النيل للرياضة بتعرضه ده؟؟ الكلام ده ملوش اى أساس من الصحة ومحصلش أى حاجة والجمهور الجزائرى قاعد يبوس فى الجمهور المصرى والنسوان بتزغرط ومزاجها أخر زأططه ومحمد فؤاد بيغنى للجزائريين الحب الحقيقى وسعد الصغير بيغنى للحمار وكله تمام  . وابراهيم حجازى المؤلف الكبير بيفترى على الجزائر والجزائرين . ولما إتسألت قناة الجزيرة عن أحداث السودان وفين التصوير بتاعهم اللى متابع كل همسة وكل لمسة قالو إنهم عندهم 2 مصورين فى السودان واحد سافر بعد الماتش مباشرة ظنا منه إن خلاص الموضوع خلص والتانى كان نايم .. طب والله كلام شبه الحقيقة . واحد مسافر وواحد نايم؟!!! جميل اوى . مش بقولكو مأجورين .

بس بجد يا جماعة قناة الجزيرة دى مش مسألة فكرها كده مثلا. لأ الموضوع أكبر من مسألة اعتناق فكر الموضوع وراه جهات أكبر من الجزيرة لتشويه صورة مصر مش فى الموضوع ده بس إنما فى مسائل كتيرة وكلنا أكيد عارفين .
مثال بسيط النهاردة لما أصوات من مصر هددت بسحب الاستثمارات المصرية من الجزائر طلعت أصوات مطمئنة للجزائريين من قطر بتقول اطمنو فلوسنا جاهزة للحلول مكان فلوس مصر اللى بيهددو بسحبها . طبعا اعتقد ان الصورة كده اصبحت واضحة .

ثالثا :- انا بشكر الزمالك على موقفه النبيل برفض التفاوض مع لاموشيه اللاعب الجزائرى تضامنا مع الجماهير المصرية .

رابعا :- السوادن يا جماعة برغم اننا بنحب الشعب السودانى عشان النيل جاى من عندهم . إلا إنه كان إختيار سيئ للغاية نظرا لضعف الجانب الأمنى هناك . وخلينا واضحين طالما الموضوع اسمه الحقيقة العارية مش الجزائر بس اللى بتكرهنا لأ ودول تانية كتير .
انا مقدرش انسى يوم ما الاهلى كان رايح يلاعب الهلال السودانى وطبعا حصل اللى حصل وتهديدات بالقتل وسكاكين وكل ده لدرجة انهم كانو كاتبين لافتات فى الشوارع " وقاتلوهم حيث ثقفتموهم " وعبارات كبيرة وكتيرة وطلع صحفى سودانى بيقول :- نيل ايه اللى يربطنا بالناس دى يقصد مصر ويكمل كلامه ويقول بلا نيل بلا نيلة .. آدى السودان


خامسا :- الفيفا دول انا مش عارفلهم ملة بصراحة الناس دى مش عارف ايه غيتها فى الكيل بمكيالين اجتمعو وقالو أنهم بصدد اصدار قرارات عقابية على الاتحاد المصرى لكرة القدم بسبب احداث القاهرة طب والسودان؟؟؟!!!! قالو لأ اصل مراقب المباراة بيقول انها كانت مباراة نضيفة أوى وحلوة كمان والجمهور الجزائرى كان مثالى فى السوادن !!
لو يلغو الكورة احسن والله.
لأن الكورة دى هيه اللى بتعرفنا على الاشكال الزبالة دى .

*** 

 

احنا محتاجين أولا رد قوى من القيادة السياسية على الاهانة دى . وطلب تغيير السفير الجزائرى فى مصر وسحب  الاستثمارات المصرية فى الجزائر وتغيير وزير الخارجية المصرى أحمد أبو الغيط اللى خلاص خلى سمعة مصر فى السما ( ماتت يعنى ) والتعامل بالمثل مع كافة دول العالم ومنها الدول العربية .
 ***
مش هقول قطع العلاقات نهائيا وطرد السفير والكلام الكبير ده .
لسه مش وقتها .




هناك 49 تعليقًا:

كلمات من نور يقول...

سلميت يمينك ...كلام صح و فعلا قناة الجزيرة دي اشتروها من زمان اليهود سواء هي أو غيرها ..تقدر تقول الإعلام كله بقى مصيبته مصيبه سواء تلفزيون أو جرائم وووو ...ربي يقوينا في هذا الزمان

تــركــي الــغــامــدي يقول...

مايحدث تجاوز للأعرف الإسلامية والأخلاق العربية وأصبح ككرة الثلج كلما تدحرجت ازدادت حجماً ، وأتمنى أن يتوقف الأمر عند هذا الحد لأنه لايخدم مصالح البلدين ، وقطعاً هناك جانب مستفيد من تأجيج الموضوع إعلامياً !

zikooooo يقول...

السلام عليكم
بجد تحليلك رائع ومقنع


بس اللي انا مش مصدقه خالص موقف قناه الجزيره اهي المعلومه دي جديده عليا خااالص
انا مكنتش اعرف انها ممكن تفبرك حقيقه

بس انا مش معاك في حاجه انه مينفعش مهما كان اننا نبدل السفير او خلافه وخلافه لان بكده العلاقات بتتنيل اكتر وان كنا عحنا لو عملنا كده هيكون عندنا حق
بس اعتقد اللي هيستفيد مش احنا ولا هما اللي هيستفيد العدو الحقيقي فاعنتقد انه مينفعش نكبرالموضوع اكتر ماهو كبير جدااااااااا
وبرده مش قصدي اننا نقول ورده لكل جزائري
سلااااااااااااااام

Lady E يقول...

بجد قال بلا نيل بلا نيله :)

ايه العسل ده فله شمعه منوره فعلا :)

قرأت عن الموضوع ده كتير بس أول مره اعرف حاجات كتير من موضوعك

ايوة كده سيبك م الاكتئاب

adel يقول...

لا علي فكرة انا معترض

السفير ده ميتغيرش ده لازم يتذل و يتطرد
النهاردة بيقول احنا مش هنعتذر مهما كان اللي حصل في السودان و تقولي متوصلش لكده !!!!؟؟؟

والاهلي هيستغني عن اللعيب الجزائري كمان و هيبيعيه او يسرحة

قناة الجزيرة دي اساسا لاتمت للاعلام بصلة ... من امتي قطر بتحب مصر ؟..؟؟
مش دول اللي هجمونا عشان عزة و ليهم استثمارات مع اسرائيل بمليارات ؟؟

السودان هما شعب اهبل و طيب بس برضه اللي ماسينكها ميفرقوةش شئ عن بوتفليقة و عصابيته ... قالوا مفيش شئ حصل للمصريين مع ان التليفزيون عندهم ذاع بعض الاحداث و الضرب

الفيفا دي انا بقي مش فاهملهم حاجة بجد شكلهم شاربيين كولة

الشعب لابد له من حكومه تشكمه يقول...

والله ياصلاح ان جيت للحق الغلط من الطرفين.(متبصليش كده)

انت رايح السودان وعارف انهم مش هيسكتوا واى واحد بيتابع كوره بيعرف ان فى طحن بيحصل بعد اى ماتش لينا مع الجزائر يقوموا يبعتوا شوية خنافس لو واحد قالهم بخ يموتوا وطالعين كل شويه يعيطوا علشان اتحدفوا بطوب رجالة ايه النيله دى؟,,,

كسر ازاز الاتوبيسات دى حاجه مشجعين الكوره العاديين متعودين عليها انت مشوفتش الاهلى والاسماعيلى؟؟
وبعدين مأمنوش الناس ليه لما هم عارفين اللى هيحصل دا كله؟؟؟؟؟؟؟؟؟؟؟

موقف مصر سياسيا صفررررررررر ومش هتعرف تعمل اى حاجه,لما هم اتحدف فيهم طوبه اثبتوا حاله ومضونا تعهد على نفسنا,احنا باه ولاااااا فى الدماغ ولا اى حاجه هتحصل,
اما تكون ادراتك بطئه وخايبه متلومش التانين علشان ادارتهم بتفهم.

الموضوع اصلا باه مقرف ويخنق,وكله كوم واللى بيعيطوا كوم تانى يا اخى بلا قرف,
تراهنى ياصلاح لو كان راح المشجعين العادين ولا كان هيحصل حاجه اه ازاز هيتكسر ولا هيكون فى دماغهم ,طوب هيتحدف ولا هيكون فى دماغهم لكن لما تلاقى الست الفرفوره المذيعه بتتصل تعيط وتصوت وتقولك بيحدفونا بالطوب ولا التانيه تقولك شتموا بالفاظ وحشه اوى ياى وودنى اتعورت من الشتيمه وحصلها واوا ولا الست فردوس عبد الحميد اللى بتعيط وهى منهاره وتقولك قلعوا البنطلون,

يااخى دى دى حاجه تحرق الدم والله عالم ملهاش فى الكوره راحين ليه بلا قرف.كوسه كمان فى التشجيع.

وبعدين برضه انا مش مقتنعه ان دا كله بسبب الماتش,ياسلام طول عمر الناس بتضرب بعد اى ماتش مع الجزائر ولا انت ناسى؟ ايه الجديد يعنى اللى خلوهم قلبوا الدنيا كده والامور واجعاهم اوى؟فى حاجه انا مش فاهماها؟

الجزيره باه دى حارقه دمى اوى.

صبرني يارب يقول...

الحقيقه يا صلاح

انا نفسي اولع فى الاعلاميين كلهم نفر نفر

عشان سواء ان كانوا ماجورين
ولا بيعملوا شغل على حسنا
هما كده كده قرفانه منهم اخر قرف

وهما سبب كل الوليعه الى حاصله دي

بس ده ما يمنعش ان الجزائرين برضه شرسين ومتوحشين وما بيحبوناش

ومش هما بس
غالبية العرب كده

ودايما مستنيين لنا على سقطه عشان يدبحوا

حاجه تقرف الله يقرفهم

شلاطة يقول...

انت عارف
انا كنت متغاظ من الجزائريين برضه
بس قعدت قريت شوية اخبار واتفرجت على كام برنامج
وحسيت ان الغلط الاول والاخير على مصر
اعلاما وشعبا وحكومة
اولا الاعلام من قبل المتش وهو شادد حيله على الجزائريين
وطبعا دا ظهر من خلال الاخ الجزائري اللي كره المصريين
تاني حاجه في موضوع الاعلام
الاعلام الجزائري بالرغم من اخباره المغلوطة الا انه كسب المعركة الاعلامية قصادنا عالميا
كل القنوات شافت ان مصر غلطانه ليه لان الناس دي كانت جايبه كاميراتها ومزبطة نفسها على الاخرانها تضرب ضربتها وتجيبها على مصر
واحمد المسلماني لما قال فين البهوات اللي في ملحق في وزارة الاعلام مسؤوليته تحسين صورة مصر في الخارج هو صحيح الناس دي فين
النقطة التالته في الاعلام
شوية الشراشيح والجرابيع اللي جم في التليفزيونات امثال مصطفى عبده وطارق علام اللي قعدوا يردحوا في التليفزيونات ودا اللي وصلنا لمرحله الهياج والغيظ اللي بقينا فيها
وهنا مننساش نشكر الاعلامي المسئول المتعلم المتنور عمرو اديب
النقطة الرابعه اعلاميا
ايه القرف اللي عملوه الناس يوم المتش اللي قعد يعيط ايه دا فضحتووووووووووووووونا
دا غير المذيعين اللطاف اللي في مهرجان السينما اللي بيسالولي اشباه وحثاله الفنانين والفنانات
العرايا اللي فضحونا هما كمان وخلو صورة مصر بدل ماكانت نبع العلم والحضارة الحقيقية والفن اللي على حق فن ام كلثوم واسماعيل يس
خلو صورتنا قدامهم رقاصين وعريانين وطراطير نسواننا بيمشوا عريانين واحنا عادي
بيسالوهم عن ارائهم العصماء في اللي حصل

من ناحية الشعب بقى فهي نقطة واحده
احنا اللي بدينا بالاذيه وانا مكنتش مصدق الموضوع دا
بس انا شفت فيديو هو اه مش مُدين لنا من ناحيه القانون بس معلش احنا مصريين زي بعض وفاهمين القصص دي ماشية ازاي عندنا وبتتكوّس ازاي
وكنت بتفرج على منى الشاذلي وجابت مكرم محمد احمد وقال اننا ضربنا الباص بتاعهم

ومن ناحية الحكومة المصرية بقى
اولا الحكومة الجزائرية لو كان عندها شك 1 % انها لو عملت حاجه هيبقى نهار ابوها اسود والدنيا هتتقلب عليها عمرها ماكانت هتعمل حاجه
انما هي قالت علينا هفأ طبعا من تحت الراس الكبيرة ربنا يقصها ويقصفها بقى ياااااااااااااااااارب

ثانيا فين وزارة الخارجية بتاعنا ايه لازمة امها في الدنيا انا عاوز افهم
انا مقتنع تماما ان السفير المصري في السودان عرف ان في طيارات عسكريه هي اللي جابت الجمهور
ومتاكد تماما انه بلغ وزارة الخارجية في مصر بالموضوع دا لان دا اكيد من ضمن تقاريره اليوميه اللي بيرسلها للوزارة
فين بقى احنا عملتلنا ايه الحكومة بتاعنا
ولا حاجه عادي يعني الناس راحت وخلاص
ومحدش يقولي مكنوش عارفين بدليل انهم بعتوا جيمي وعلوة لألألألألألأ دي حركات تمويهية

فين الجيش بتاعنا اللي كل سنه بيقرفونا بالتجنيد التجنيد لما اتفقعنا منه
لو كنا ايام المرحوم جمال عبد الناصر او المرحوم انور السادات عمر ماكان حد اتجرأ وعملها معانا ولو كانت اتعملت كان نهار ابوه اسود
ليه جيشنا منزلش الجمهور بلبس مدني
امال هو الجيش ايه لزمته
ومحدش يقولي مجزرة لانها مكنتش هتبقى مجزرة
ديتها قنبلة مسيله للدموع هيخافوا
ولو بقت مجزرة مكنش دا هيبقى منظرنا على الاقل هيبقى شكلنا عدل شوية
واللي قلته مش معناه اني مشحون ضد الجزائريين
لا انا متغاظ من حكومتنا احنا
الجزائريين ناس جهزوا نفسهم لاي احتمال ممكن يحصل

حسبي الله ونعم الوكيل في اللي كان السبب

http://www.nytimes.com/2009/11/21/world/africa/21egypt.html?_r=1&ref=sports

وخد الفضيحة دي كمان
http://www.saveegyptfront.org/news/?c=200&a=25526

واسف على بعض التجاوزات اللفظية

لا والموكوس الكبير بتاعنا بيحمل الجزاير المسؤوليه بحمايه المقيمين المصريين
ياشيخ هو انت بتحمينا جوه عشان تحمينا بره بلا وكسة
ولا في بلد هتحترم رعايا بلد تانيه اذا ماكانتش حكومتها قويه وعارفه ازاي تحيرم شعبها
والله والله والله وبقولها من كل قلبي
الله يرحم الرئيس جمال عبد الناصر
وسيادة الرئيس محمد انور السادات
دول اللي كانوا عاملين لنا كرامة فعلا ودول اللي لو كان حد عمل معانا حاجه زي دي كان قوم الدنيا على دماغه
ودول اللي كانوا عاملين علاقات مصرية عربية كويسه مع ومصريه عالمية خلت كل الشعوب تحترمنا
ودول اللي لو كانوا عايشين لغايه النهارده ورؤسائنا فعلا كان زماننا بقينا زي ماليزيا دلوقتي
لاننا كنا محترمين بيهم
اسف على الاطاله والخروج عن صميم الموضوع في بعض النقاط
بس من الحرقة

غير معرف يقول...

اديك قلت ايام المريخ هددوا

لكن محدش انضرب لان دايما الجمهور الكروي بيبقا مستعد يضرب وينضرب

انا موش عارفه بهوات الخيابه دول راحوا يعملوا ايه ؟

كان زمان الجزاير ومصر جمهوره ضرب بعض وخلصنا

تحياتي

Cute Kitty **sookra يقول...

بص بقى ووسع كدا منك له
خالتك وصلت ياصاصا
المهم انا وربنا اتخنقت من الكلام فى الموضوع دا وكمان موش قايله حاجه تانى
جبت سمك ولا لا؟

Remas يقول...

عندك حق يا صلاح في كل كلمة قلتها

بس للاسف ولا هايعملو حاجة

هانقعد نتكلم شويه في التى في

ونقول كرامتنا ومصر فوق اى حد والايام تعدى والموضوع يموت ومش في اى موقف جدي يحصل

همس الاحباب يقول...

استاذى العزيز
معك الحق فى كلامك
ولكن السؤال طالما نحن نعرف تلك الحقائق جميعها
ونعرف ان الاعلام ماجور والجزيرة كذلك
لماذا انزلقنا وراء المهاترات ونحن نعلم النية الخبيثة لليهود وما تكنه للعرب ولمصر
مع الاسف كلنا مذنبون اخى العزيز
تحياتى

العزة فى طاعة الله يقول...

***دعك من الاعلام .. فاشل و مأجور و عميل و خائن و فقاعة إختبار للحكومات و مؤشر جس نبض و بصمجى
سلاح فى ايد الحكومة تحسن استخدامه للسيطرة على شعوبها و الزج بهم إلى حافة الهاوية و كل الصفات القبيحةالتي يمكن ان يتصف بها اى شئ فاسد نتن الرائحة .. و على الجانبين .. المصرى و الجزائري
لا تصدقهم كلهم خونة كلهم عملاء
الاعلام مقروء مسموع او مرئي .. وسيلة من وسائل التنويم و السيطرة و نشر الافكار بالايحاء .. مسدس فى الشوربة سم فى الزبادي عقرب فى فراشك ... سـمِهِ كيفما تشاء
و أولهم قناة الجزيرة
متقدرش متقدرش تفتح بقها على اللى بيحصل فى قطر متقدرش و ربنا متقدر
تتكلم على اللى هى عاوزاه فى اى دوله من منطلق انها فى دولة ليها وضعها و ليها اسمها بين الدول .. لكن ناحيه شئون قطر الداخليه و ما يحدث بها ... هوب استوب مكانك و اعمل اهبل و لا كأنك شايف حاجه
و بعدين ايه اللى مخلى الجزيرة تهاجمنا كده .. ايه يعنى ؟؟
هو احنا ايه ملايكه ؟؟ مبنغلطش ؟؟
مش موضوعنا

***السودان بلد مسلم و شعبها شعب مسلم
و بيحب المصريين
و المشجعين الكرويين المتعصبين يا مصطفى يا حبيبى قله لا تذكر و لا تعبر عن توجه قومى او رأي شعبي

الرياضة بوجه عام فى صورة مسابقات ساعات بكون مقتنع جدا انها بتضرب عقيدة الولاء و البراء للمسلمين فى الصميم.
العقيدة لمن لا يعرفها:
الولاء والبراء ركن من أركان العقيدة ، وشرط من شروط الإيمان ، تغافل عنه كثير من الناس وأهمله البعض فاختلطت الأمور وكثر المفرطون .
ومعنى الولاء : هو حُب الله ورسوله والصحابة والمؤمنين الموحدين ونصرتهم .
والبراء : هو بُغض من خالف الله ورسوله والصحابة والمؤمنين الموحدين ، من الكافرين والمشركين والمنافقين والمبتدعين والفساق .

http://www.saaid.net/arabic/ar45.htm

يعنى اللى بيحب الغير مأسوف عليه جوزية و فلافيو و امثاله و يكره و يشتم جمال حمزة و حسام و ابراهيم
شوف ايه وضعه بقا

**** الفيفا .. زيها زى القلل المتحدة اللى بيسرى على القلل بيسرى على فرق المكسحين

**** اللى عجبنى بقا كلمه تغيير السفير ابو الغائط .. صح كدا صح اوى بقية الكلام مش عاجبنى و مكنتش متوقع منك كده
دا انا قلت انتا من العاقلين و حتبقا فاهم المؤامرة

العزة فى طاعة الله يقول...

بص
تعليقى عند نوارة اهو عشان انا زهقت من كلام الشعلله و التسخين

**مؤامرة على الشعبين لجرهم إلى خلافات و مناوشات جانبيه من أجل إلهائهم عن ما يحدث لهم فى بلادهم من فساد و نهب

ما طول عمرنا إحنا و الجزائريين بنتضرب فى بلادنا و نتسحل و نتعذب و يتعمل فينا اللى مبيتعملش و مبنتكلمش
و لا هو اسد عليا و برة ....
و لا احنا عاملين زى اللى انضرب برة منطقته و عامل هيصه و اللى يشوفه جوة منطقته .. مش حيعرف وشه من قفاه من الورم...
إحنا اتخدعنا و اتخدنا على خوانه إحنا المصريين و الجزائريين
واللى علموا علينا فعلا الاتنين الكبار و اراجوزاتهم و حاشيتهم
( عوكل و ذو الفلقتين )

و بعدين يعنى البعثتين من الجانبين بيهولوا وبيكذبوا و عاملين هيصه و متفقين مع المسئولين عشان تولع و فى ناس فيهم شوية صغيرين مكانوش عارفين باللى حيحصل عشان يبانوا فعلا مخضوضين
هما اللي انضربوا دول من الناس بتوعنا شبابنا المطحون اللى بيركب الترام و المترو و المكروباص؟؟
دول لو كانوا منهم كانوا اكلوهم اكل
هما دول المشجعين الفعليين ؟؟؟
دول شويه هتيفه و مطبلتيه الحزب الوطنى على كام مشخصاتى و مشخصاتيه على راقص و راقصة على شويه صفوة قاع المجتمع و مغنيين حبسجية و هربانين من التجنيد و حاجه تقرف .. و الله يستاهلوا ينضربوا
و بعدين فرضا فرضا إن اللى حصل كله فعلا حصل
( الاتوبيس الجزائرى اتحدف بالطوب و البعثه المصريه اتحدفت بالطوب برضه .. فكرة السكاكين دى مش داخله دماغى خالص خالص يعنى كلهم شايلين سكاكين و مفيش ولا واحد متعلم عليه أو قتيل)

فرضا حصل الكلام دا

عشان 8 او 80 او 800 فرد نظلم ونشتم و نكفر و نلعن 80 مليون ب عيالهم بنسوانهم بعواجيزهم
و عشان 4 او 40 او 400 فرد نقوم نشتم برضه و نسب و نلعن الاربعين مليون
ب عيالهم بنسوانهم بعواجيزهم برضه

العزة فى طاعة الله يقول...

مش معقول يعنى
نظلم شعبين و نشتمهم بأبشع الشتايم و نوصمهم و نصفهم بالخيانه و العماله و الفرنجة و البربرية و الهمجية

يا مسلمين يا من تسبون الشعوب بالجملة

استحملوا بقا يوم القيامة ييجى شعب بحالة يشيل من حسناتك قصاصا منك

يا مسلمين

و لا تزر وازرة وزر أخري

و لا هى الحسنة تخص و السيئة تعم ؟؟؟
و بالمناسبة .. اى شخص حيشتم الشعب السودانى

مش محترم مش محترم مش محترم

متفوقوا بقا و تعرفوا مين عدوكم و مين مصلحته يرجعنا 300 سنة للخلف بالفرقة و الشقاق

بلا وكسه

و حيلغوا الدعم من على العيش .. فين بقا الاشخاص اللى حدفو السفارة و طقم حمايتها بالطوب و المولوتوف
دا معملوش كده فى سفارة اليهود لما ضربوا الغزاويين و ضربوا عساكرنا على الحدود
و لا عشان طقم الحماية سايبينا نههلوا و نهيصوا نقوموا نفتروا
على العساكر و على محلات و عربيات الناس؟؟

و بعدين من امتا كان الامن المركزى بيسكت على المتظاهرين
من امتا سايبهم يعملوا الهيصه دى كلها

و الله العظيم احنا شعبين تركيبتنا
غريبة غريبه غريبة

لعبوها صح الحكومتين المرة دى
و ربنا يستر على العواقب
ربنا يستر يا مصطفى

آسف جدا على الإطالة
و برضه بحبك يا ابو درش

مسدس صغير يقول...

كلمات من نور
اشكرك على الاشادة
اشكرك على التعليق
نورتينى

مسدس صغير يقول...

تركى الغامدى
فعلا كل اللى حاصل ده بسبب ضعف الايمان فى نفوسنا
ربنا يرحمنا
ويرجعنا لصوابنا
اشكرك على التعليق
نورتنى

مسدس صغير يقول...

زيكو
وعليكم السلام
اشكرك اخى الكريم
الجزيرة بصراحة مثال حى للاعلام المأجور
يلا ربنا يرحمنا
اشكرك على التعليق
نورتنى

مسدس صغير يقول...

ليدى
فعلا والله قال كده ى صحيفة سودانية
اشكرك على الكلام ده
شكرا على التعليق
نورتينى

مسدس صغير يقول...

عادل
معاك حق طبعا
بس مش هينفع نذله
احنا نغيره وخلاص
والسودان شعب شقيق بس انا بتكلم عن نقط محتاجه مننا وقفة
اشكرك على التعليق
نورتنى

مسدس صغير يقول...

الشعب لابد له من حكومه
انا معاكى ان الغلط من الجانبين
بس بسبب الاعلام بردة
سيبك من حكاية اننا نروح بالشوم والسكاكين
يا جماعة هيه مش حرب
لصالح مين يعنى
بس الغلطان لازم نعرفه انه غلطان
وناخد موقف
وموقف قوى كمان
عشان نقدر نحافظ على كرامتنا
وكرامة مصر
وللأسف لحد النهاردة مفيش اى موقف سياسى واضح
اما نشوف اخرة البلد دى
وفعلا الموضوع مش موضوع ماتش
دى حاجة قديمة

اشكرك على التعليق
نورتينى

مسدس صغير يقول...

صبرنى يارب
انا معاكى والله ان الاعلام هوه السبب الرئيسى فى الفتنة دى
وده كله بيأدى لتفكك الامة
بس طبعا مش معنى كده ان محدش غلط غير الاعلام
لأ طبعا اللى حصل من الجزائريين دى شئ همجى غير مسئول
اشكرك على التعليق
نورتينى

مسدس صغير يقول...

فتاة من الصعيد
بردة انا مش معاكى
احنا مش فى حرب
بس مش معنى كده اننا هنتنازل عن حقنابس بطرق شرعية بردة
اشكرك على التعليق
نورتينى

مسدس صغير يقول...

سكرة
اهلا اهلا
يا خالتو
ازيك
نورتى
فعلا الواحد اتخنق من الموضوع ده
يلا ربنا يستر
سمك؟؟
ههههههه
جبته واكلته
اشكرك على التعليق
نورتينى

مسدس صغير يقول...

ريم
احنا لازم نستعيد كرامتنا
عن طريق القيادات السياسية بس يكون بحكمة
بالطرق الشرعية
لأن فى الاول والاخر احنا مسلمين
اشكرك على التعليق
نورتينى

مسدس صغير يقول...

همس الاحباب
يا حبيبى مش كل الناس تفكيرها واحد
يعنى الاعلام ميفضلش يشحن فى الناس من جنب ومن جنب تانى نقولهم خليكو عاقلين
بس خلاص
سبق السيف العزل
اشكرك على التعليق خالد
نورتنى

مسدس صغير يقول...

العزة فى طاعة الله
الاعلام الحكومى اخى انتهى
ولم يعد موجود فى ظل هذا الانفتاح على العالم
ولكن الاعلام قد يكون موجه لطرف دون الاخر
وانا معاك ان الجزيرة مستحيل تتكلم عن اى حاجة داخل قطر ولا تجرؤ بس ده مش عشان هيه تبع قطر لأ لأن فيه قنوات مصرية وبتتناول مصر عادى جدا
انما المسألة انه اعلام مأجور بكل ما تحمله الكلمة من معنى
السودان بلد مسلم واخواننا وانا لم اعيب عليه انما انا بكلمك عن واقع ولازم تفرق بين كلامى
انا مش بقول عنهم حاجة وحشة او حاجة مش فيهم
انا بقول ضعف امنى
بقول ان فيهم ناس بردة عملو حاجات تشبه اللى حصل من الجزائريين
ابسط حاجة انهم النهاردة بيقولو مشفناش حاجة الجزائريين ملايكة
اذا اين الشهادة لله؟؟
وطبعا لازم يغيرو ابو الغيط وابو الغيط وزير الخارجية
وايه اللى مكنتش متوقعه منى
هو انا بفترى على حد وللا ايه؟؟
قلت كلام غلط أو مغلوط لا سمح الله؟؟
ثم مش موضوعنا اننا بنتهان فى بلدنا او هما بيتهانو فى بلدهم
دى مش نقطة البحث
ومش معنى كده اننا نسيب حقنا اللى لازم ناخده بطرق شرعية
وايه حكاية ان فكرة السكاكين مش داخلة دماغك؟؟
ازاى يعنى
هوه احنا بنفترى على الناس
انتى مش متابع وللا ايه؟؟
انت كنت مسافر؟؟
ثم ان الناس بتشتم نظامهم بسبب انهم لم يقدمو اى مبادرة للتصالح
احنا بدأنا بالمبادرة من قبل الماتش اساسا
مينفعش نخلط الامور
ده طريق وده طريق
انا طبعا عارف حبك لينا كوطن
بس بردة مينفعش اتهان ويداس على كرامتى واقف عاجز واقول العروبة والقومية
بصراحة انا شايفك متحامل علينا اوى
مش فاهم هو انت مش متابع وللا ايه؟؟
اولا انا مش مع الناس اللى بتشتم اطلاقا
وانا اما اقول ان اللى حصل ده افعال همجية او بربرية دى مش شتيمة
ده اقل ما يمكن ان نقوله عليها
بس ده ترجمة للى حصل
ثم ايه اللى هيشتم الشعب السودانى؟؟
ومش محترم
ومين شتم الشعب السودانى
بلاش خلط الاوراق
ثم انا بتكلم عن قضية معينة اما اتكلم عن ازمة العيش نبقى نتكلم عن رفع الدعم عنه
حكومتين مين يا عم اللى لعبوها صح؟
ايه المصالح اللى هتعود على الحكومتين يعنى اما يوقعو شعبين فى بعض
يلا ربنا يرحمنا
انا مقدر ليك حبك للجزائر وانا كمان بحبهم والله
وانا لم اكفر حد
ومشتمتش حد
بس فيه حاجة غلط حصلت لازم نعالجها
بالطرق الشرعية الصحيحة
وانت لو تلاحظ اان انا فى طلباتى لمعالجة الموضوع من القيادة السياسية المصرية مقلتش قطع علاقات مثلا ولا الكلام الفارغ ده ولا قلت طرد السفير ولا حاجة
انا بقول تغيير السفير
وسحب الاستثمارات حفاظا على اموال المصريين فى المستقبل حتى لا تتكرر الواقعة فى اى مناسبة اخرى
بس كده
اشكرك على التعليق
سعيد بحوارك المثمر
نورتنى

daloo3a يقول...

هههههههههههه

والله الشعوب العربية صارت تكرهه بعضها البعض و شو السبب ؟؟ الكورة .. كورة تنشات بالرجل و الكل يموت على هالشي
و الناس يا حبها حق الحقد و الكره يعني يكفي انه الدول العربيه و الاسلااميه متفرقه ما ادري ليش بعد يتفرقون بسبت كوره ؟؟!!! شي يحير والله

و شفت تعليق أحد الاخوه كاتب فيه " من متى قطر تحب مصر "

محد يعرف هالشي

و بعدين قناة الجزيره طلعت واايد اشياء و اشياء مب عن مصر وبس

و اللي يبا يعور راسه يطالع قناة الجزيره ولا العربيه استغرب من الناس يطالعون قناة الجزيره و يعورون راسهم ع الفاضي

عيبني الموضوع الرابع

ضحكت من الخاطر على العبط هذا

ليش كاتبين العباره " وقاتلوهم حيث ثقفتموهم "

ليش هم يهود ؟؟ ولا مشركين ولا عبدت الشمس ولا شو و شو

والله الناس مب فاهمه شي

عبط في عبط

العزة فى طاعة الله يقول...

يا ابو درش
مش بقولك بحبك :)

بص يا ابو درش عاوز اوضحلك شوية حاجات
اولا فى موضوع السودان
لو تلاحظ لما بكلمك .. بكلمك بإسمك مش ممكن ابدا حقول عليك شخص عشان انت انسان محترم فعلا :)
الكلام مش موجه لك خالص

ثانيا .. لو تلاحظ فى تعليقي الاول كنت كل فقرة بسبقها بنجوم .. تباعا لموضوعك نفسه المفصل فى نقاط
و كل نقطة عندى بتعلق على نقطة عندك
يعنى كلامك اللى مش عاجبنى بس فى النقطة المنفصلة الأخيرة مش الموضوع كله
و هى سحب الاستثمارات مش دا الحل سحب استثمارات يعنى طابور البطالة حيزيد و مشاكلنا حتكتر اكتر مش دا الحل

لو تلاحظ كل الانتقادات اللى انتقدتها مش ليك خالص غير فى النقطة السابقة
بقية الكلام عام و مش موجه ليك عشان بقولك انتا انسان محترم
بفضفض معاك يا اخى .. بلاش ؟؟؟

المصالح العائدة على الحكومتين كتيييير اوى و قلتها فى أول تعليقى الثانى.
*هما مش حيضرهم حاجه ...منعزلين عن الشعبين
أكلهم و شربهم و لبسهم من برة البلدين
*ثرواتهم برة البلدين
*و من مصالحهم خراب و تدهور و تخلف الشعبين للسيطرة على مواردهم و مقدراتهم
*إلهاء الشعبين عن مطالبهم الشرعية فى أساسيات الحياة الكريمة
(يا مصطفى دا الهواء و الماء و الطعام ملوثين و يلوثوا من زماااااااان و محدش بيتكلم و محدش بيعترض )

*توجيههم إلي مواجهات فرعية و جانبية و طائفية و نعرات جاهلية
(القومية و العروبة التي لم نأخد منه اى نتيجة إيجابية )

*خلق عدو جديد (عربي)بدلا من العدو المتربص بنا (اليهود و من يؤازرهم)
اقول تانى و لا كفاية ؟؟؟

*سياسة فرق تَسُدْ يا مصطفى

يا بنى انتا و انا و بقية الشعبين .. فى خندق واحد لازم نحافظ على ترابطنا و تماسكنا لآخر نفس

العزة فى طاعة الله يقول...

انتا فاكر ان انا متحامل علينا
لا و الله زعلان و زعلان اوى على اللى حصل للناس هناك .. ميرضينيش و ميرضيش اى واحد اللى حصل
دا انا قعدت للساعه 6 الصبح بتابع على الفضائيات و كان عندى شغل الساعه 8 الصبح
و مش بدافع عن الجزائريين
اللى غلط فى الطرفين يتحمل نتيجة غلطه
وزعلان اكتر ان اللى راحوا مش احنا مش الناس اللى بتشجع بجد ؟؟
نسبه قليلة و هى دى اللى وقفت و جرت العيال الصيع بتوع الجزائر
و اللى مزعلنى اكتر ان احنا نوجه كل طاقاتنا و كل مشاعرنا السلبية المكبوته إلي الجزائر جملة و تفصيلا مينفعش .. مش معقول رد الفعل الرهيب دا عشان الناس اللى انضربت و اتشتمت

طب و اللى ماتوا فى العبارة
و انا كنت ممكن اكون واحد منهم
و الله انا كنت رايح عليها السعودية فى نفس السنة
و ليا اصحاب اعرفهم أكلوا معايا عيش و ملح راحوا فيها و هى راجعه 35 زميل من نفس الشركة .. لم ينجو منهم إلا 13 فرد الباقى مات غرقا او عطشا عشان فى ناس منهم ركبوا زوارق و ماتوا من البرد والعطش.
كنا فين
كنا فين لما عساكرنا بتموت على الحدود
كنا فين لما اكلنا و شربنا و هوانا اتلوثوا

مينعش توجيه العداء و المشاعر السلبيه تجاه شعب بأكملة ,, ومن اخطأ نسبه قليلة جدا جدا منه
اللى ضرب زى اللى مضربش ؟؟
اللى هناك مش زى اللى فى السودان ؟؟
يستاهلوا البلطجية كل اللى يتقال عليهم و يستاهلوا يتسحلوا
بس لو كان اللى راح فعلا المشجعين بتوعنا
اللى بيولعوا شماريخ و يرجوا الملعب من التشجيع..
يستاهلوا و لازم الجزائر تقدم اعتذار
بس مش عشان مقدموش اعتذار .. تحصل القطيعه ..
طب ما اليهود معتذروش
و امريكا معتذرتش عن البطوطي
و السعودية معتذرتش عن الناس اللى اتجلدت ظلم.
و المانيا معتذرتش
و الدنمارك و السويد و النرويج معتذروش
و كل دول و غيرهم جرمهم اكبر بكتير من اللى حصل فى السودان

فاهمنى يا مصطفى ؟؟
فاهم انا عاوز اقول ايه ؟؟؟

فى حاجه غلط
فى حلقة مش مفهومة مفقودة

تــركــي الــغــامــدي يقول...

المكرم مسدس صغير ... بمناسبة عيد الأضحى المبارك كل عام وأنت والأسرة الكريمة وأهلنا في مصر العزيزة والمسلمين بخير أعاده الله تعالى علينا وعليكم والمسلمين أجمعين باليمن والبركات ، إنه قريب مجيب .

♥نبع الغرام♥♪≈ يقول...

حمدالله على سلامتك
كويس انك خرجت من النكد

كل سنه وانت طيب يا صاصا وربنا يطمنى عليك يارب
اسفه متأخرة عليك كنت تعبانه والله ومش بدخل نت انا جيت اسلم واطمن عليك ياقمر

شاب فقرى يقول...

ابو صلاح

انا فاهم اللى قلته كويس

لكن قبل ما تفكر كدا

روح اقرا بوست صغير كدا فى مدونتى التانية

أول واحد

باسم صراع الكرامة والقومية العربية

شوف البوست وقولى رايك

وهتلاقى اننا لازم نفكر قبل ما ناخد موقف نخسر فيه شقيق مهم ان لم يكن اهم الاشقاء

شاب فقرى

مسدس صغير يقول...

دلوعة
فعلا والله حاجة غريبة الكره اللى موجود بين الدول العربية ده
بس على فكرة الموضوع مش ماتش
المسألة اكبر من كده
خاصة مع مصر
فعلا قناة الجزيرة دى تعور الراس او بالمصرى توجع الدماغ
ههههههه
ربنا يهدينا جميعا
بس اللى انا اعرفه كويس جدا ان مصر بتحب الامارات والامارات بتحب مصر دى حقيقة
شفتى بقى " وقاتلوهم حيث ثقفتموهم "
ههههههههه
والله حالنا يبكى
ربنا يهدينا
اشكرك على التعليق
نورتينى

مسدس صغير يقول...

العزة فى طاعة الله
يا باشا انا فاهمك والله
بس دى وقائع وحقائق احنا بنكشفها ليس اكثر
ثم انا اسمى صلاح
مش مصطفى
هههههههه
يلا يا باشا
احترم كلامك جدا
ومتفهمه
بس مينفعش اتكلم بحيادية فى الموضوع ده
لأن انا نفسى اتهنت لأن دى بلدى
يلا ربنا يجمعنا على كلمة سواء
اشكرك على التعليق والمتابعة
بجد سعيد بحوارك
نورتنى

مسدس صغير يقول...

تركى الغامدى
كل سنة وانت طيب اخى الكريم
وكل الاسرة الكريمة
وكل الامة الاسلامية
بجد متشكر جدا لمرورك
كل عام وانتم بخير
نورتنى

مسدس صغير يقول...

ايناس
الف الف سلامة عليكى
متشكر على المرور والسؤال
كل سنة وانتى طيبة وكل الاسرة الكريمة
اشكرك على التعليق
نورتينى

مسدس صغير يقول...

شاب فقرى
اولا انا مقلتش نقطع علاقات
ومقدرش اقول كده
واللى يقول كده يبقى مش عارف العواقب
احنا امة واحدة ومصير واحد
بس لازم يبقى فيه وقفة
ومعاقبة المخطئ
بأى شكل
بس بالطرق الشرعية طبعا
هشوف موضوعك ان شاء الله
اشكرك على التعليق
نورتنى

الزنارى يقول...

بصراحة ما حدث من قبل الجزائريين و اعلامهم شئ مقزز و غير محترم .
أتمنى ألا يكون كل الجزائريين مثلما رأينا و أن يكونو لا يتقبلون هذة الاعتداءات
مع خالص الاحترام و التقدير
أحمد الزنارى

مسدس صغير يقول...

الزنارى
اكيد طبعا مش كل الشعب كده
ربنا يهدينا ويهديهم
اشكرك على التعليق
كل سنة وانت بخير
عيد سعيد
نورتنى

د. ياسر عمر عبد الفتاح يقول...

ازيك يا أبو صلاح (يابن الناظر)

أنا طبعاً خلاص مبقاش ليا رأي في الموضوع ده خلاص
انا زهقت من كثر التحليلات
حتى قلة الأدب مش جايبة معاهم نتيجة
مش هنعرف نجاريهم في قلة الأدب


بقولك إيه
كل سنة وانت طيب يا معلم
ولما تنزل كايرو تاني تبقى كول مي

فل يا صاحبي؟

مسدس صغير يقول...

د ياسر
انا والله زهقت بردة
بس ربنا يهدينا ويهديهم
كل سنة وانت طيب وبخير
عيد سعيد
ان شاء الله نازل القاهرة بعد العيد مباشرة
وهكلمك قبلها ان شاء الله

م/ الحسيني لزومي يقول...

كل عام انتم بخير
تقبل الله منا ومنكم صالح الاعمال

حنين الذكريات يقول...

الحكاية فعلا مش حكاية ماتش هى أكبر من كده وفيه ناس عايزين يفرقوا وينشروا الفتن بين العرب حتى ينشغلوا عن قضايا آخرى
كل عام وانت والامه العربيه بخير

مسدس صغير يقول...

م الحسينى
كل سنة وانت طيب وبخير
عيد سعيد عليك وعلى الامة الاسلامية

مسدس صغير يقول...

م الحسينى
كل سنة وانت طيب وبخير
عيد سعيد عليك وعلى الامة الاسلامية

مسدس صغير يقول...

حنين الذكريات
فعلا القضية مش ماتش
دى حاجة قديمة لمصالح فئة معينة

كل سنة وانتى طيبة وبخير
نورتينى

غير معرف يقول...

اعتقد انه انحطاط فكري اعلامي ,,
الامر لا يستدعي كل هذه القذائف اللفظية بين الشعبين ,,
كل ما في الأمر كوره !

الحقيقة العارية أن العرب يتراجعون للخلف و لا يتقدمون ,,
و لن يتقدمون مع الأسف :)

أنا لا اخصص شعب عربي معين و انما الكل ,,
في كل مكان و في اي فرصه نخلق فوضى و نبداء حروب داخلية بيننا ,,
بينما نعلم يقيناً ان عدونا واااااااحد ,,

الجزيرة و غيرها من القنوات لا تجبرك على متابعتها ,,
بامكانك ان تحكم عقلك عند كل خبر ,,
فإن وافق دينك و ملتك خذه و ان عاداها اتركه لهم ليتخبطو فيه ,,

هدانا الله و اياكم ,,
ارجو ان يبقى الود بيننا ,,
و ما تطردوش السفير السعودي خخخ
^^

مسدس صغير يقول...

اسيرة اللوحة
وجهة نظر محترمة جدا
وحيادية جدا
احييكى عليها
ربنا يهدينا جميعا للحق
الود بيننا
ومش هنطرد السفير السعودى
لأننا نحب الشعب السعودى
نورتينى