الجمعة، 29 مايو 2009

لا تخالف وإن منحوك الذهب ..


بين يوم وليلة أصبحت أشهر نعجة فى تاريخ الغنم بل إن شهرتها فاقت شهرة الكثير من الحيوانات أقرانها بل والبشر فالكلبة لايكا برغم شهرتها وأنها اول حيوان يذهب فى رحلة إلى الفضاء إلا أن شهرة النعجة دوللى " بس مش شاهين" فاقت شهرة لايكا بسنوات ضوئية .. غنم .. كلاب .؟؟ ايه ده؟؟! ما علينا المهم . موضوع الاستنساخ موضوع مهم جدا عايزين نعرف عنه اكتر من ناحيتين الناحية الاولى الطبية والناحية التانية الدينية . ازاى؟؟ اقولكو ازاى . "الناحية الطبية" إن الاطباء يعرفونا بجد ايه الاستنساخ ده بالتفصيل وكمان يعرفونا مدى نفع الاستنساخ ده للبشر يعنى ميكونشى مجرد اكتشاف علمى وبس بيبهرو بيه الناس وبس وميكونشى مبدأ خالف تعرف يعنى لمجرد شهرة عالم او اتنين أو مجموعة هيه اللى أجرت تجارب لحد مظهر لعالم الواقع . انا طبعا مقدرش أتكلم عن الاستنساخ ده طبيا لأنى مش متخصص ولأنى بحب فكرة التخصص جدا . الحاجة الوحيدة اللى انا ممكن اتكلم فيها عن الاستنساخ إن لو واحد مستنسخ اتمسك تحرى اروح اطلعه أو اترافع عنه فى قضية سرقة النعجة دوللى . المهم اللى اقصده إن اى اكتشاف حتى يستمر فيه العلماء انه يكون فعلا هيفيد البشرية مش معنى كلامى ان الاستنساخ مش هيفيد البشرية . لا طبعا مقصدش كده انما مجرد شرح ده ووضع قول فصل فيه وميكونشى زى ما قلنا انه من مبدأ خالف تتعرف وتتشهر . اة مهو برج بيزا فى إيطاليا لولا أنه مائل ما عرفناه . فهو برج عادى جدا

- أما بقى "علماء الدين" . فيه تخبط جامد جدا حول ما اذا كان الاستنساخ حلال وللا حرام اللى يقول حلال واللى يقول حرام يا جماعة احنا عاوزين قول فصل فى الموضوع ده ويكون دالوقتى ميستنوش لحد منلاقى اول طفل مستنسخ وبعدين يصرخو ويقولو لأااااااااااااااااااااا الاستنساخ حرام يا جماعة ويهللو بقى .. طب هل لو علماء المسلمين قالو بالحجة إن الاستنساخ حرام خلاص كده البشرية هتسلم ويقولو خلاص مش هنستنسخ تانى طالما المسلمين قالو ..! لا الموضوع مش كده احنا لازم نقيم عليهم الحجة حتى لو سُئل المسلمين عن ذلك أمام الله أجابوا . وحتى لا ننفصل عن العالم ونكون أصحاب كلمة فى هذا العالم لأننا شعوب لا يستهان بها ولكن هونا على انفسنا . حتى مثلا لو قالو انه حرام على الاقل علماء الاطباء العرب والمسلمين يلتزمو انهم يبعدو عن الموضوع ده مثلا .

ده مجرد توضيح محتاجينه بس ومحتاجين نتواصل مع العالم شوية ولو كان موضوع الاستنساخ ده وغيره من الاكتشافات اللى هتفيد البشرية ليه منكونشى أصحاب سبق فيها؟!! المهم الخير للجميع وآسف على الاطالة

هناك 64 تعليقًا:

قلب ارهقته الاحلام يقول...

اوووووووووول تعليق

طاااااااااااخ طااااااااااخ

هيييييييييه ^^

قلب ارهقته الاحلام يقول...

تاااااااااني

وجااااااااايه تاني فرصتي بأأأة ياناس :)

قلب ارهقته الاحلام يقول...

فعلا موضوع مهم جدا مع ان من زمان عليه

كان الاول فيه ضجة وبعدين خلاص مفيش حد مهتم ولا حتي علماء الدين

لاتقولي بأة دولي شاهين ولا نعجة هيفا:D

بس هو سبحان الله اذا كانت صناعه عرايس اطفال كامله اوتماثيل

فيها مضاهاةلخلق الله و حرمانيتها واضحه جدا يبقي خلق حاجه فيها روح ايه ؟؟

طبيا طبعا ايه الغرض انا مش عارفه بس هحاول اقرا شوية تانين ف الموضوع ده

وهرجعلك تاني ياصاصا:)

بوست متميز كالعادة

تحياتي ليك يابو طلقة ^^

mimi يقول...

انا الاحتلال ده لعبتي

رابع تعليق

mimi يقول...

دودو ... دي المدرس الأول في الأحتلال

أبو صلاح سلّم نفسك .... المكان كلاته متحاصر

MǿиY El-Shreef يقول...

الاستنساخ ده بيحاولوا يخلقوا بيه الناس

ولا يمكن دي حاجه مستحيله اصلا

وللاسف مش فاكره الايه

وانا هقولك حاجه اذا كان المصورون هما اكتر ناس هيتعذبوا فما بالك بالي بيعملوا مخلوقات بقى بروح وحجات كده

بكل اقتناع انا بقول انه حرام

mimi يقول...

ومين قاللك ان التجارب الاستنساخية مش شغالة علي ودنه ...

انا قريت ان فيه معامل بتحاول تخليق اول جنين بشري .. بدون أب وأم

حتي لو المسلمين اجتمعوا ان كده حرام ... مين هيسمعلنا ؟؟ احنا اصلا شعوب متهمة بالتخلف وعرقلة التقدم ...

نقول إيه؟ ... بس فعلا المفروض نعمل اللي علينا

بوست ممتاز ... اهنيك عليه

ستيتة يقول...

حاضر اعمل بوست كامل عن الإستنساخ وأمري لله

مع اني مليش نفس للعلم ولا للهم ده خالص مالص

بس يالا اهو نناقشه علميا ودينيا وكل عام وانتم بخير

طلقتين تحية بقى في الهوا والفرح فرحنا واللي يحبنا يضرب دانة

ساره يقول...

والله حتى انا نفسي اعرف عن الاستنساخ ورائي اهل العلم والدين فيه

مع انى انا ضده بس حابه اعرف عنه اكثر

♥نبع الغرام♥♪≈ يقول...

السلام عليكم

عجبنى قووى الموضوع وانا معديه قلت ادخل اشوفه


ههههههههههههه


هتقول لمين ومين يسمع


احنا الوقتى فى زمن العجايب

ربنا يستر علينا يارب

ومش يعملو حد شكلى
اممممممممم

تبقا كارثه

انوسه

رحلتنا في الحياة يقول...

اول الاستنساخ لغاية دلوقتى مش شايفين منه اى فايدة كل المحاولات لمحاولة استنساخ بشرى فشلت ومش معنى كده نسكت لغاية ما يستنسخوا انت قولتلها



طب هل لو علماء المسلمين قالو بالحجة إن الاستنساخ حرام خلاص كده البشرية هتسلم ويقولو خلاص مش هنستنسخ تانى طالما المسلمين قالو ..! لا الموضوع مش كده احنا لازم نقيم عليهم الحجة حتى لو سُئل المسلمين عن ذلك أمام الله أجابوا . وحتى لا ننفصل عن العالم ونكون أصحاب كلمة فى هذا العالم لأننا شعوب لا يستهان بها ولكن هونا على انفسنا . حتى مثلا لو قالو انه حرام على الاقل علماء الاطباء العرب والمسلمين يلتزمو انهم يبعدو عن الموضوع ده مثلا .




العلماء المسلمين للاسف بيستنوا المصايب كلها تكتر وبعدين يتناقشوا فيها مش بيفكروا ابدا انهم يخدوا بالهم من الاول

بس فكرة الاستنساخ اللى اعرفها تقريبا يعنى هتكون مفيدة فى حالات استنساخ اعضاء بشرية زى كبد كلى وهكذا هتفيد البشر لكن يستنسخوا انسان كامل ويقطعوا ده مش مقبول

د. ياسر عمر عبد الفتاح يقول...

غنت فكرتني بحاجة غريبة أوي
فكرتني بأمل دنقل
أنا عارف نك أكيد تقصد ده من العنوان

بالنسبة للإستنساخ
همه عملوا النعجة دوللي
بس دع عن طريق تلقيح خارجي

لكن الإستنساخ من خلايا بشرية عادية مظنش إنه هينفع

لأنه مفيهوش نفخ روح

علي العموم ده تخصص الدكتورة ستيتة وهيه اللي تفتي فيه

بس برضه فكرتني بأمل دنقل
وهقعد أقرأ لا تصالح تاني دلوقت

nody يقول...

زمانت قرأت مقال عن الاستنساخ كان عن الهوجه الى حصلت بسس العالم الى قال انه استنسخ طفل
لو تفتكر

كان فى المقال ده عرض للفائد الطبيه لموضوع الاستنساخ وقالوا انه بيقضى على الامراض الوراثيه المزمنه طبعا بدون ما يذكروا اى تفاصيل والكل وقتها اجزم استحاله استنساخ كامل لانسان
اما بقى للناحيه الدينيه فا حتى لو عملناء المسلمين حرموه ده غير ملزم للعالم لانك اكيد تعرف ان فيه باره بنوك للحيوانات المنويه وتقدر اى واحده عاوزه تخلف من غير ماتتجوز انها تروح للبنوك دى وتختار الحيوانات الى تعجبها بناء على مواصفات المتبرع وملامحه
وتعمل تلقيح صناعى وتخلف عادى
فا احنا راى علماءنا غير ملزم ليهم اطلاقا

وردة يقول...

ايه الموضوعات الجامده ديه
انا شايفة اننا نستفيد من الموضوع ده في موضوع الاعضاء
يعني نعمل استنساخ للاعضاء اللي بحتاجها الانسان واللي ممكن تساعد في علاح امراض كتير
زي القلب والكلي والكبد
لكن استنساخ انسان لاء
اعوذ بالله
موضوعك فعلا مهم جداا ربنا يوفقك
بس هو محتاج تفكير ورأي وواضح من علمائنا
لان كل الاراء حتكون مجرد اجتهاد
سلام

تامر علي يقول...

أنا قرأت البوست عن نفس الموضوع عند د/ستيتة وأعتقد أنه رد على تساؤلاتك كلها وأكثر ...فعلاً لابد وأن يكون لنا اتجاه فكري موحد حيال القضايا المستحدثة حتى تتضح الرؤية

تحياتي للطرح المثمر

الشعب لابد له من حكومه تشكمه يقول...

عارف سبحان الله كنت لسه حاااااالا بتفرج على فيلم لبن افليك عباره عن انه اخترع اله للزمن وبدأ يجربها يعنى مثلا حط لنفسه احداث هتحصل وانه يكسب فى اليانصيب وهكذا وبعدين اكتشف انه بالاله اللى اخترعها دى اتسبب فى اكبر حرب ستؤدى الى نهايه العالم وشاف نهايه العالم..وبعدين رجع يعمل المستحيل علشان يدمر الاله دى..
تقولى ودا ايه علاقته بكلامى؟؟؟سؤال منطقى:)
اقولك انى شايفه ان العلم طالما هو نافع للبشريه هواى نوت؟؟؟
لكن لو احنا هناخد عمليات الاستنساخ كمجرد فرد عضلات من العلماء ولعب فى الجينات..يبأه كده ملوش لازمه ومحدش ضامن العواقب..
وبس كده:)

فشكووول يقول...

ازيك يا صاحب المسدس
تحياتى
اولا عملت ايه فى امتحان الدبلوم
ثانيا بالنسبه للاستنساخ وانت بتقول عشان نبقى سباقين
يعنى ايه سباقين وسباقين فى ايه هو احنا سبقنا فى حاجه خالص الا فى الشحاته على الابواب من اللى يسوا واللى ما يسواش ومعونات ومساعدات من كل بلاد الله خلق الله
قال نبقى سباقين قال
يا مسدس نحن فى زيل الامم
تحاتى

فشكووول يقول...

اسف يا مسدس صغير
انا اقصد فى السؤال عن امتحان الدبلوم قلم رصاص بس الامور دخلت فى بعضها وانت عارف الزهايمر
تحياتى

أبو العريف يقول...

ازيك يا مسدس
اخبارك
الموضوع دا فكرني بمدرس الفيزيا في ثانويه عامه
كان مدرس مطلع وخاصة في العلوم ومره قعد يكلمنا عن الاستنساخ ده
بس هو كان مهرج
اللي فاكره انه قال
الاستنساخ دا انك تروح عندنا البيت تلاقي عشره فتحي
مش فتحي واحد
وقعد شرحلنا الموضوع بشي من التفصيل بس الزاكره مهنجه

بس كل اللي اعرفه ان لحد الان يعتبر
الاستنساخ هو تجربه باءت بالفشل
رغم ما يدعون من نجاحات
وطبعا اول فشل كان النعجه دولي
اللي عجزت
او شاخت ووهي في عمر صغير جداااا
دليل علي فشل التجربه
اما التجارب الحديثه
لسه ما ثبت نجاحها التمام


تحياتي ليك

مسدس صغير يقول...

قلب ارهقته الاحلام
طب بلاش ضرب نار
انا بس اللى اضرب نار

مسدس صغير يقول...

قلب ارهقته الاحلام
خدى فرصتك للآخر بس لو ضيعتيها هلاعبك احتياطى مدى الحياة

مسدس صغير يقول...

قلب ارهقته الاحلام
انا معاكى انه موضوع مهم جدا
بس بردة منقدرش نقول هوه حرام وللا حلال .
الا اذا كان فيه رأى دينى معتبر من جهات شرعية دينية مثل الازهر مثلا بتحريمه من عدمه
اشكرك على التعليق جدا
وماشى يا دوللى.
هههههههه
نورتى

مسدس صغير يقول...

ميمايا
احتلال؟؟؟
لأأأأأأأأ
الكلام ده فى اى مدونة تانية
دا انا اضرب بقى
ههههههههه

مسدس صغير يقول...

ميمايا
متحاصر متحاصر
انا هضرب بقى وعلى وعلى اعدائى
هههههههههه

مسدس صغير يقول...

مونى الشريف
اولا تعليقك حلو اوى
بس بردة محدش يقدر يجزم هل هوه حرام وللا حلال الا اذا تصدرت للفتوى جهة شرعية اسلامية رسمية
اشكرك على التعليق الجميل
نورتينى

مسدس صغير يقول...

ميمايا
فعلا والله الناس دى شغالة على ودنه

انا معاكى والله ان محدش هيعبرنا فى العالم
بس اهو يبقى عملنا اللى علينا
اشكرك على التعليق

نورتينى

مسدس صغير يقول...

ستيته حسب الله
والله مانا عارف اودى جمايلك فين؟؟
فعلا هوه ده التواصل المثمر اللى نستفيد منه كلنا
انا جايلك هوا
ميرسى خالص ليكى يا دكتورة
جزاكم الله خيرا
اشكرك على الاستجابة والتعليق
نورتينى

مسدس صغير يقول...

سارة
طبعا كلنا عاوزين نعرف عنه اكتر
اشكرك على التعليق
بجد نورتينى

مسدس صغير يقول...

عاشقة الاحزان
فعلا موضوع مهم
متشكر ليكى جدا على الاهتمام والمتابعة
والتعليق
اما انهم بقى يعملو حد شبهك ؟؟
امممممممممم
ههههههههههه
يبقى حد جميل ويعمل مدونة كده بس يبعد عن الاحزان
ههههههه
اشكرك على التعليق
نورتينى

مسدس صغير يقول...

ايوشة
فعلا احنا عاوزين المتخصصين يقولولنا كل حاجة عن الاستنساخ
ويعرفونا هوه يعنى ايه
ويعرفونا كل الملابسات
حتى عشان علماء الدين بردة يقدرو يحددو هل هوه حرام وللا حلال؟
اشكرك على التعليق المثمر
نورتينى

مسدس صغير يقول...

د/ياسر
فعلا انا اقصد لا تصالح لعظيم من عظماء الشعر أمل دنقل.
اما بقى موضوع الاستنساخ
فالمفروض انتو بقى يا دكاترة تجمعو لنا اكبر قدر من المعلومات عنه
ودكتورة ستيته الله يعمر بيتها
نزلت اول بوست عن الاستنساخ
اشكرك على التعليق
نورتنى

مسدس صغير يقول...

نودى
احنا عايزين تفاصيل اكتر عن الاستنساخ
اما بقى بالنسبة لرأى علماء المسلمين
انا عارف انه والله غير ملزم
بس اهوه يبقى حذرنا البشرية منه على الاقل
اشكرك على التعليق المثمر
نورتينى

مسدس صغير يقول...

وردة
فعلا لو الموضوع كده وانه ممكن نستنسخ اعضاء يبقى حاجة جميلة
بس اللى يقول ده المتخصصين
بس ياريت سريعا
اشكرك على التعليق الجميل
بجد نورتينى

مسدس صغير يقول...

تامر على
طبعا التواصل الفكرى عبر المدونات ده شئ عظيم
هنفيد ونستفيد
ستيته الله يكرمها عملت اللازم وزيادة
اشكرك على التعليق
نورت البلوج

مسدس صغير يقول...

الشعب لابد له من حكومة
فعلا انا معاكى وفاهمك
لو الشئ ده هيفيد البشرية يبقى اهلا وسهلا بيه
اما غير كده فمع السلامة
رأيك جميل يهمنى طبعا
اشكرك عليه
نورتى البلوج

مسدس صغير يقول...

فشكول
انا معاك
بس دى مجرد محاولة لاظهار ولو عضلة واحدة ان وجدت امام قوة الغرب الطاحنة
اشكرك على التعليق
نورتنى يا عمى صلاح

مسدس صغير يقول...

فشكول
وقلم رصاص ليه يا عم
ما انا كمان معاه فى نفس الدبلومة
بس هوه هيدخل دور مايو وانا ان شاء الله هدخل اكتوبر
ربنا يسهل ان شاء الله
متشكر جدا لسؤالك
نورت يا عمو

مسدس صغير يقول...

ابو العريف
هههههههههه
اولا الله يسلمك
نورتنى
اما بقى بالنسبة ل 10 فتحى
ههههههههههههه
هوه ده فعلا الاستنساخ
هههههه
والله مدرس عسل
فعلا موضوع الاستنساخ ده محدش عارف نهايته ايه
بس انا من وجهة نظرى ان النعجة دوللى مجرد ولادتها فده نجاح عظيم حتى وان ماتت فى الحال
اشكرك على التعليق الجميل
بجد نورتنى

MaNoOoSh يقول...

أكيد الاستنساخ ليه فوائد علاجيه هتساعد مرضى كتير.. وما أظنش ان ممكن تتحرم.. لكن استنساخ البشر معتقدش انه هينجح من الاساس على الأقل في وقتنا الحالى

مسدس صغير يقول...

منوووش
اكيد طبعا له فوائد
بس ليه اضرار
نتمنى نعرف عنه اكتر
اشكرك على التعليق
نورتينى

تأثير الفراشة يقول...

موضوع الاستنساخ و الجينات ده موضوع كبير ، و الحقيقة الجزء الخاص بالجينات ده كنت باحب دراسته جدا سواءا فى الثانوى أو الكليه أو القراءة الحرة

فأحب أوضح أكثر من نقطة

=أولا: صعب جداااا إننا نصدر حكم قاطع على علم جديد و نحكم إذا كان هينفع و له فايدة و اللا لأ، و بالرغم من إن موضوع الاستنساخ ده بقاله سنين، إلا إنه برضه يعتبر -نسبيا- جديد
و التاريخ العلمى بيؤكد مبدأ التمها فى الحكم،
أبسط مثال، دلوقتى شوف حضرتك استخدامات الليزر كتييييرة جدااااا ، و لكن أول ما أُعلن عنه فى الستينات ، الناس و كتير من العلماء سخروا منه و قالو عليه الجملة الشهيرة "الليزر ده حل يبحث عن مشكله" أو بمعنى آخر...هنعمل بيه إيه؟؟


فحتى لو ظهر لنا الاكتشاف العملى إنه ممكن يكون مش مفيد، فأكيد المستقبل هيثبت لنا إنه حاجة مهمة

= ثانيا: هو فعلا موضوع الجينات عموما و الاستنساخ خصوصا لهم فوايد كتيرة جدا، و فىه فوايد معروفة كتير لكن فيه فايده لفتت نظرى جدا، و هى إن اليابان كانت عايزة تسهل نقل البطيخ ، فاستنسخت بطيخ مكعب بدل الكور، يعنى هيكون أسهل فى النقل ، و النقل هيستوعب كمية أكبر من البطيخ و بالتالى هيوفروا وقت و فلوس و مجهود

يعنى موضوع الجينات ده هيجيبه له فوايد ما تخطرش على البال :)

=ثالثا: موضوع الحلال و الحرام، فالعلم ده بيكون سلاح ذو حدين، يعنى زى اللى فى إيده مشرط ، لو استخدمه كجراح علشان يعالج بنى آدم هيبقى حلال، إنما لو المشرط ده استُخدم علشان يتقتل بيه بنى آدم..فهيبقى حرام

و الاستنساخ كده برضه ، له استخدامات حلال و استخدامات حرام، فلازم نتعلمه و نستخدمه صح علشان نستفيد من فوايده و علشان كمان نقدر نواجه علوم الغرب بعلمنا إحنا كمان، علشان مانبقاش عاملين زى أيام الاحتلال الفرنسى لما جيش بونابرت جاى بالبنادق، و الشعب بيواجهم بالسيوف

فلازم يكون معانا بنادق...قصدى يعنى علم علشان نقدر ننهض و نتعايش و نواجه العلم بالعلم
......

أنا اتكلمت كتير قوى
!!!!!!!!!

جزاك الله خيرا و بالتوفيق لحضرتك ، و المزيد من التميز إن شاء الله

هندسة وصفية يقول...

بغض النظر عن الراي الديني لاني مش مؤهل
انما كالعادة اي تغيير في ميكانيزم حياتنل بيجي علي دماغنا
يخرب بيتهم مش بيتعلموا

صمت المشاعر يقول...

للاسف الشديد ان العلماء مش مستقرين علي راي واحد ولا عارفين بقي ايه اللي حلال ولا ايه اللي حرام

وما اكثر الفتاوي

نعمل زياره للدكتوره ستيته نشوف ايه موضوع الاستنساخ

موضوع مهم كتير

شكرا ليك

مسدس صغير يقول...

تأثير الفراشة
يا دكتورة محدش قال ان الاستنساخ حلال او حرام او ليه فايدة من عدمه مثلا.
لأ
انا بطرح موضوع للنقاش عشان الناس تاخد بالها بس
بصراحة انتى قلتى معلومات غاية فى الروعة وجميلة جدا
اتمنى تعملى عنه بوست من وجهة نظر العلم ومن وجهة نظرك بردة
يهمنا الناس تعرف يعنى ايه استنساخ
شكرا ليكى على المعلومات القيمة جدا انا عن نفسى استفدت كتير والله
نورتى المدونة

مسدس صغير يقول...

هندسة وصفيةاحنا فعلا عايزين هندسة وصفية للاستنساخ.
اشكرك على التعليق الجميل
نورت المدونة ياباشا

مسدس صغير يقول...

صمت المشاعر
فعلا الموضوع فيه تخبط
نتمنى الاستقرار على رأى واحد
زورى ستيته اكيد هتستفيدى ان شاء الله
اشكرك على التعليق
نورتينى

تأثير الفراشة يقول...

مسدس صغير

سعيدة جدا و الله إن التعليق عجب حضرتك، و على فكرة أنا فاهمة قصد حضرتك إنك بتفتح باب المناقشة ،فكنت بأدلو بدلوى فى الحوار و المناقشة الثرية اللى حضرتك بتديرها، ربنا يكرم حضرتك

و فكرة البوست دى ثقة من حضرتك أشكرك عليها، و بإذن الله أشوف موضوع د.ستيتة، و إذا فى جديد ممكن أضيفه ، فأضيفه بإذن الله

أشكر حضرتك على رأيك و على موضوعاتك
جزاك الله خيرا

مسدس صغير يقول...

تأثير الفراشة
الكلام ده كتير علينا اوى
ربنا يخليكى
ده من زوقك
بجد سعيد بتعليقك الاول والتانى
اثرى الموضوع فعلا
اتمنى تعملى بوست

اشكرك على التعليق
وجزاكم الله خيرا

Soul.o0o.Whisper يقول...

السلام عليكم و رحمة الله و بركاته

طبعا رغم ان المواضيع دى بتستهوينى
لكن أنا بردوا من هواة التخصص

و للحق انا مقدرش أقول رأيى
لأنى ماشفتش هما بيستنسخوا ازاى

اقصد ان لو مثلا بيجيبوا خلية بشرية و يستنسخوها
فالخلية البشرية أصلا حية
يعنى هما مش هينفخوا فيها الروح

زى مثلا كان عندنا فى العقاقير
بطريقة ما بتاخد خلية من النبات
و تصنع منه نبات كامل
دا ما تقدرش تقول انهم خلقوا نبات

لأن أولا و أخيرا النواة اللى بدؤوا بيها مش من صنعهم
و كذلك بالنسبة لدوللى
و كذلك لو هيعملوها فى الانسان
او لو عملوها فعلا


الموضوع اعتقد محتاج دراسة متعمقة اكتر من كدا كتير
و اروح أقرأ الموضوع عند د.ستيته



دمت بود

مسدس صغير يقول...

سول
فعلا انا مؤمن بفكرة التخصص جدا
بس انتى اعتقد هيكون عندك فكرة كويسه بردة
احسن مننا
وفعلا ستيته القت الضؤ على نقاط هامة فى الموضوع
نتمنى انها تكمل
اشكرك على التعليق الجميل اوى
نورتينى بجد

maha zein يقول...

والله انا ما اعرف هو حرام ولا حلال
وبيني وبينك مقرتش في الموضوع ده
ومش مهمة حتي بالاستنساخ

بس عموما هو حاجة مش مريحة في اعتقادي
وحاجة تخوف

بس بخصوص عنوان البوست لا تخالف ولو منحوك الذهب
فأد ايه جميل جدا
وجواه بقه بتكمن كل المعاني

لا تخالف
لا تخالف
لا تخالف

و إن وضعت الشمس و القمر في كفيك
فلا تخالف

اعتر عن غيابي واحتاج دعواك بظهر الغيب

صبرني يارب يقول...

شوف

انا رايي المتواضع جدا


ان اي حاجه تعمل خلل فى الانساب حرام طبعا

يعنى زي بالظبط التلقيح بحيوان منوي غير حيوان الزوج وما الى ذلك


انا عرفت ان المفروض الاستنساخ فى الاصل
فكروا فيه عشان استنساخ الاعضاء البشريه
مش البنى ادمين الكاملين

لو على كده
ماشي اوك هايبقى لنا قطع غيار ياعم

ههههههههههههه

وطبعا الموضوع محتاج بحث اكتر من علماءنا بس هما مش فاضيين

اه فى مواضيع اهم
زي مثلا الست وهى بتنشر صوابعها تبان ولا لا

وحلة المحشي فى الحلم حلوه ولا وحشه ؟؟؟


كلام مهم يا ابنى استنساخ ايه

اقصوصه يقول...

الاستنساخ موضوعه وايد كبير

ومتشعب جدا لابعد الحدود

تدوينه ممتعه

تقبل مروري:)

مسدس صغير يقول...

مها زين
لا بس لازم تقرى عنه
دا موضوع مهم
فعلا اى حاجة تعمل خلل فى الحياة الطبيعية للبشر بيبقى فيها خلاف
العنوان ده بقى جاى من قصيدة لأمل دنقل اسمها لا تصالح ولو منحوك الذهب
اشكرك على التعليق
وجزاكم الله خيرا
عود احمد
نورتينى

مسدس صغير يقول...

صبرها يارب
فعلا موضوع مهم جدا
انا معاك لو الموضوع اعضاء بشرية بس عشان يبقى لينا قطع غيار اهلا وسهلا
هههههه
اما بنى ادم بغلاسته وبشحمه ولحمه فده اللى مش ممكن ادما
طبعا فيه علماء مش فاضيين وراهم اشغال الا من رحم ربى
نسأل الله لهم الهداية ولنا
اشكرك على التعليق
نورتينى

مسدس صغير يقول...

اقصوصة
فعلا موضوع مهم
اشكرك على التعليق
نورتينى

mahasen saber يقول...

اممممممممممممم كده هتزعل منك دوللى يا ابو صلاح

موضوع الاستنساخ مهم طبعا بس اعتقد انه لو هيفيد ممكن فايدته فى استنساخ خلايا بديله او اعضاء بديله يعنى بدل ما الناس تسرق كلى بعضها تستنسخها
اما غير كده فبصراحه معتقدش انه ليه لازمه

انا خرفت علميا جايز بس ده رايى اليى على قد عقلى

غير معرف يقول...

بص انا هعلق بس ابعد المسدس عني
انا بخاااااااااااف :))

----------

بص
كل محاولات الاستنساخ البشري فشلت ومش هتكمل لانهم مش هيقدروا ينفخوا الروح فيها يعني!
بخصوص دوللي فأنا مش شايفه ان استنساخها كان منه اي فايده

وطبعا الموضوع دا حرام
اذا كانت التماثيل حرام يبقي الروح مش حرام!

AhMeD RaDy يقول...

بسم الله

رغم ان فكرة الاستنساخ ما اترسختيش جوة دماغى ومش قادر اكون فكرة كمل عنها

لكن الملاحظ ان الغرب بيسعى بكل قوة جدا لاتمام عملي الاستنساخ دى بشتى الطرق ..

واظاهر ان المحاولة مش كانت النعج دوللى فقط لا دى محاولات كتيرة

ودا فى حد ذاته شئ يخلينا نعجل باللىانت قولته

وهو نسمع راى الدين ونعرف بجد يعنى ايه استنساخ عشان مش نبقى بنتكلم عن مجهول وخلاص

واشطاط على الموضوع جامد

مسدس صغير يقول...

محاسن صابر
انتى بالذات تاخدى راحتك علميا
محدش له دعوة بكلامنا
قولى اللى انتى عايزاه
ههههههههه
فعلا موضوع مهم
اشكرك على التعليق المثمر
نورتى المدونة

مسدس صغير يقول...

هاجر زعبل
لا خدى راحتك
ده طلع مسدس صوت وانا معرفش
ههههههههه
فعلا كل المحاولات لاستنساخ بشر بتفشل
بس نجاحها غير مستبعد
بردة هرجع واقولك منقدرش نحرم على الطلاق ومنقدرش نحلل على الطلاق
اشكرك على التعليق
نورتينى

مسدس صغير يقول...

احمد راضى
فعلا المحاولات كتيرة جدا
بس النعجة دوللى هيه اول محاولة ناجحة
وده الى خلد دوللى بنت المحظوظة
اشكرك على التعليق
نورتنى

اللى موش عارف يتغير يقول...

صلى عالنبى فى قلبك
وشوفلى عروسة

مسدس صغير يقول...

عليه الصلاة والسلام
شوفلى انت.
هههههههه