السبت، 4 أبريل 2009

تجارة الأعضاء..


مين قال ان تجارة الاعضاء حرااااااام؟؟؟؟

انا شايف ان تجارة الاعضاء مش حرام..

جملة اعتراضية - ايه العبيط ده؟ - انت هتألف؟؟

انا شايف كده طالما ان الواحد يقدر يستغنى عنهم او عن عضو منهم يبقى خلاص تاجر براحتك ويعلق يفط كمان..

يعنى انا مثلا عندى 4 اعضاء مستغنى عنهم اللى يدينى فيهم 20 جنية ما اكسفوش ابدا من غير اى كلام ولا فصال " بصراحة انا شايف انهم ملهمش لازمة "

ايوة ملهمش لازمة ... اتنين فئات واتنين عمال.. اتنين شعب واتنين شورى ..ملهمش اى لازمة.." تمثيل مشرف "

آآآآآآآآآآآآآآآآآه تقصد الاعضاء دول؟؟!!!!!! وقعت قلبنا يا راجل..

واحد هيقول بس دول مش ملكك يا حلو عشان تبيعهم!!

لااااااااااا عندك دول ملكى والكلام ده من لسانهم.. انت فاكر لما جم يترشحو لمجلس الشعب وقعدو يقولو : " انا ابن الدايرة انا ملككم ويقولو نحن ملك الشعب " وبما انى واحد من الشعب اذاً همه ملكى واتصرف فيهم زى مانا عايز .. طب انت فاكر لما جم وقعدو يقولو انه حمدى السفاح ابنكم وابن الدايرة هو " الرئة " التى تنقى الفساد وهو " القلب " النابض وهو " العقل " المفكر وهو" البنكرياس " الذى يفرز لكم الانسولين وهو " الدم " الذى يغلى فى عروقكم وهو" اللسان " الذى يتكلم باسمكم وهو " الشبكية " التى ترى ما ترونه؟؟؟ فاكرين الكلام ده؟؟!! ايون انا فاكر وانتم كمان فاكرين..فبما انه ملكى فأنا هبيعم واحد ورا التانى واللى عايز يشترى انا مستعد.. يجهز العشرين جنيه وييجى بس ميجيبش فيهم جنيهات معدن اصلها مبتمشيش عندنا..

..........................

الغريب فعلا ازاى يكون اعضاء مجلس الشعب نصهم معاهم شهادة محو الامية من أم 50 جنيه ونيجى نبص نلاقى دول همه اللى بيوافقو على تعديل الدستور مثلا وهمه اللى بينزلو التشريعات الجديدة وهما اللى بيسنو القوانين والسكاكين.. طب ده يبقى اسمه كلام؟!!!..

حد هيقوللى تشريعات ايه يا عم الحاج؟؟ همه دول اساساً ميعرفوش عنها حاجة هما بس جايين هنا عشان يثبتو حالة رفع الايد وبس " الا من رحم الله " .. طب دى تبقى كارثة اكبر يعنى لا يعرفو فى القوانين ولا كمان يعرضو عليهم
القوانين دى مجرد عرض؟؟!!

المفروض بجد يعملو كورسات من اساتذة جامعة ومستشارين ويدربو الناس دى كويس بعد ميعلموهم القراية والكتابة بجد ويعرفوهم يعنى ايه دستور وقوانين ومرسوم وتشريع والكلام ده كله..

انا مشفق عليهم ربنا يتولاهم بيتعبو فعلا العضو من دول فى ايه وللا فى ايه؟؟

هيعمل للدايرة بتاعته وللا هيعمل لنفسه وللا اولاده ؟؟ هو يعنى ملاحق؟؟

هناك 48 تعليقًا:

S H A H يقول...

انا فعلا كان نفسي حد يشاركني ف موضوع اعضاء مجلس الشعب بتوع محو الامية اللي بيشرعو القوانين ابو موافقون

عاشقه الرومانسيه يقول...

انا موافقه ابيع بخمسه جنيه
بس للاسف مش هنلاقى حد يشترى
البضاعه دى فيها كساد وركود
دى بضاعه بايظه اللى يشتريها خسران
بس تعرف؟
دماغك حلوه
ههههههههههههه

صمت المشاعر يقول...

والله عندك حق في كلامك

بس هنعمل ايه


حكم القوووووووووووووووووووي

MǿиY El-Shreef يقول...

مش ابيع يا استاذ صلاح

انا اتبرع بيهم اصلااا

ماهو كل حاجه ف بلدنا كده

اي حد بيمسكوه حاجه المفروض انها مهمه بيبقى جاهل ومايعرفش اي حاجه ف اي حاجه

عشان يمشي ع هواهم

هنعمل ايه يعني

بس انا افتكرت قصدك ع الاعضاء بتاعتنا :D

ستيتة يقول...

نبيع مين بس

دول ولاد الداااااااااااايرة
فاهم يعني ايه ولاد الدااااااااااااايرة

يعني هم وامهم على اي صفيحة زبالة وأزئل

وبعدين اساتذة جامعة مين اللي يثقفوهم

يعني انا اجي مثلا واقول لك ها نختار جنود الأمن المركزي من حملة المؤهلات

اصحى معايا بدل ما اسحب منك ترخيص المسدس

ولاد الدايرة لازم يكونوا امية

زي ما عساكر الامن المركزي لازم يكونوا بيفهموا طشاش
اخر كلمة بيفهموها "اضرب يابن بهانة منك ليه"
يضرب ابن بهانة ويصوت ابن الدايرة

ونعتذر عن التجاوز في الألفاظ فاستفزازك لشخصي الضعيف اكبر من ان اقاوم الكلام براحتي

أمل حمدي يقول...

ههههههههههههههههه

يابني دا انت لو اتبرعت بيهم ببلاش محدش هايرضى ياخدهم لان الفساد غالب عليهم وهايلوثوا اي حد

ارميهم أحسن

سلام يا مسدس

إيمان يقول...

تبيع مين يا عم
دول يبيعوك ويبيعوا الدايره كلها اللى هى مامتهم .. وبأقل من عشرين جنيه كمان
وبعدين حتى لو ربنا وفقك وعرفت تبيع
مين اللى هيشترى الأعضاء دى يا عم
دى أعضاء عايزه قطعها
اللهم أرحمنا وعافينا وأعفوا عنا

e_emy يقول...

هههههههههه

طب 20 جنيه مش كتير

حتى لو بببلاش محدش هيشترى

بس حلو عنوان البوست D:



كده اتأخرت ع الكلية

سلالالالالالالالام)): )):

د/عرفه يقول...

انا موافق تاخد الراجل اللى عندنا مش بعشرين جنيه
ممكن أعملك خصم وابيعه بخمسة جنيه بس كمان

أحمد سعيد بسيوني يقول...

عشرين جنيه

لييييييه

كانوا أبو تريكة

لو حد دفع فيهم ربع جنيه مخروم يبقى كريم جداً

طبعاً
مع كامل احترامنا للنواب الحقيقيين ممن يحملون فكراً وقضية

mimi يقول...

أنا هايفة
أأقصد خايفة من مسدسك
بس مش سبت رصاصة فيه إلا وقريتها
هايل وبرافو هليك

ساره يقول...

اعذرني ما اقدر ابيع معاكم :)

العنوان يخوف :)

القدر و انا يقول...

مسدس صغير
تسلم طلقاتك ..... فى الصميم
يارب يبارك فيك وفى افكارك
والله هما مش عايزين البيع
هم عايزين طلقات سريعة من مسدسك
تحياتى

*** حور- نور*** يقول...

لو انت عندك اربعة انا عندى مية وأبيع العشرة منهم بقرش يا بلاش
واللى عايز عشرين اديلة عشرة هدية
تعرف كترت اوى حكاية شهادات محو الامية
المفروض ان فى مجلس الشعب العضو من دول يتكلم باللغة العربية الفصحى ويقول كلام معقول
لكن للأسف دى بتوصل لضرب الجزم

MaNoOoSh يقول...

انا مستعدة اتنازل عنهم للدول الأعداء
وببلاش كمان
بس دول عاملين زى القرش المنحوس
بيلف يلف ويرجع تانى لجيب صاحبة

Lady E يقول...

يتعلموا انتا بتحلم يا مسدس !

مسدس صغير يقول...

shah
انا يا سيدى شاركتك اهوه
اما اشوف هتعمل ايه؟؟
هههههه
احييك على التعليق
نورتنى

مسدس صغير يقول...

عاشقة الرومانسية
بخمسة جنيه بس؟؟
والله كويس الواحد ييجى يشترى منك ان شا الله حتى اخليهم ينضفو الجنينة..
ههههههههههه
اشكرك على الكلمتين الحلوين دول
نورتينى بجد

مسدس صغير يقول...

صمت المشاعر
اشكرك على التعليق الجميل
احييكى
نورتينى
حكم القوى

مسدس صغير يقول...

مونى الشريف
طبعا يا امينة هانم كلامك صح
انتى عارفه جالنا عضو منهم وقال انتو فى ايد امينة
قلتله ابوس ايدك كله الا امينه..
ههههههههه
يا عم خلينا فى ايد زينب فى ايد هدى فى ايد اى حد الا امينه .
دى مفترية وانا عارفها.
ههههههههه
الناس دى بتتفاخر بالجهل.
دا ميزة من مميزاتهم.
ههههههههه
ربنا يهدى
بجد شاكر لتعليقك الجميل
نورتينى كعادتك

مسدس صغير يقول...

ستيتة حسبو
لا كله الا ترخيص المسدس
دا اغلى ما املك.
ههههه
يا ستى انا معاكى هما اما بيخدو عساكر الامن المركزى لازم يعملولهم كشف هيئة. وانتى عارفه كشف الهيئه ده بيقيس نسبة الذكاء فى العساكر دول اذا كانت تتعدى 1. % مبيخدوهمش..
اما بالنسبة انهم ولااااااااااااد الدايرة فهمه فعلا ولااااااااااد الدايرة وخده بالك
ههههههههههه
انا معاكى فى كل كلمة مستفزة انتى قلتيها
هههه
اشكرك على التعليق
نورتينى

مسدس صغير يقول...

ماما امولة
ههههههههههههه
ارميهم ؟؟
فيييييين؟؟
انتى عارفه احنا بنتحايل على الاعضاء يجيبولنا صناديق زبالة فى الشارع ومحدش سائل فينا..
يبقى هنرميهم فين بس.
ههههههههه
اشكرك
نورتينى يا ماما

مسدس صغير يقول...

ايمان
هههههههه
فعلا عايزين قطعهم
تصدقى ان البتر ليهم اسهل بدل منتاجر فيهم لانهم هيجيبو للواحد الخسارة.
ههههههههه
احييكى على تعليقك
نورتينى يا ايمان هانم

مسدس صغير يقول...

e-emy
عشرين جنيه كتير؟؟
خلاص يا ستى هاتى 3 جنيه ونص وخديهم وهعملك كادو على كل واحد كمان.
اشكرك على التعليق
وبسرعة بقى احسن المحاضرة بدأت..
سلالم

مسدس صغير يقول...

د/عرفة
خمسة جنيه فى الواحد؟؟
ليييييييييييييه؟؟
الواحد من اللى عندكو يدوب ب2 جنيه ونص كفايه عليه..
هههههه
اشكرك يا دكتور على التعليق
نورتنى

مسدس صغير يقول...

احمد سعيد بسيونى
انا عارف ان فيه اعضاء حقيقيين
بس اللى مش حقيقيين اكتر
بصراحة الربع جنيه المخروم ميجيبش عضو لان العضو من الاخر من غير فصال ب 2 جنيه ونص وابقى كارمك كمان..
اشكرك على التعليق
نورتنى يا احمد باشا

مسدس صغير يقول...

mimi
انتى هايفه من الهصان؟؟
هههههههههه
اشكرك على الزيارة الكريمة
بجد سعيد جدا بزيارتك ويارب متبقاش اخر زيارة
وسعيد بقراءة الرصاصات السابقة
احييكى
نورتينى بجد

مسدس صغير يقول...

سارة
هههههههههه
بيعى وانا المسئول
العنوان ما يخوف ابدا..
ههههههههه
نورتينى يا سارة
وعلى فكرة انا بعتلك تاج ولازم تحليه..

مسدس صغير يقول...

القدر وانا
ان جت على طلقات سريعة من مسدسى فأنا مستعد من دالوقتى امسكوهملى اتنين اتنين وهتشوفو..
هههههههههه
نورتينى بجد
اشكرك على التعليق الجميل

مسدس صغير يقول...

حور نور
احنا مش عايزينة يتكلم باللغة العربية الفسحة ولا حتى الالعاب بس هوه يتكلم على اده بس يكون له دور فاعل ..
وبالنسبة للميه اللى عندك انا مستعد اشتريهم طالما السعر عنكو رخيص كده ان شا الله يجمعو قطن

مسدس صغير يقول...

manooosh
ههههههههههه
عاملين زى التعريفة الممسوحة
تلف تلف وترجع لصاحبها
جميل اوى يا منوش التشبيه ده
بيع بيع بيع..
اشكرك على التعليق
نورتينى

مسدس صغير يقول...

lady E
ان شا الله القراية والكتابة بس على الاقل احنا يعنى عايزينهم يتعلمو فيزيا وكيميا..
اشكرك على التعليق
ونورتينى

القمر الساهر يقول...

الناس دي مسئولة والله بشفق عليهم

لما كدا يتجمعوا قدام ربنا ويقولوا عملوا ايه في الشعب

ربنا يرحمهم

مسدس صغير يقول...

القمر الساهر
فعلا الناس دى بيتعبو اوى اوى
ربنا يشفيهم
شايلين هموم شعب طويل عريض.
ههههههههههههههه
اشكرك على التعليق يا قمر

dodda يقول...

دول يتباعوا ونص

وايه بالرخيص
ويار يت يجيبوا شوية عيال

يعملوا زفه ويقولوا من ده بكره بقرشين

مسدس صغير يقول...

dodda
اهو يمكن لو اتباعو يجيبو اى حاجة .
اهى تبقى افيد منهم والسلام.
اشكرك على التعليق والمرور
نورتينى

بحب الصراحة والوضوح أوي يا جدعان يقول...

السلام عليكم و رحمة الله و بركاته

ههههههههههههههههههههههه وربنا انا كنت داخله اقولك انت ياعم الحاج سلفني مسدسك اللي داخل تخوفني بيه اقتلك واجري هههههههههه
استغربت لما لقيت بتقول هتبيع اعضائك وكنت هبلغ عنك واقول ده زعيم العصابة بتاع خطف اعضاء الناس يا سعادة الباشا طلعت بريء بقى وكده هههههههه
يلا معلش خيرها في غيرها ليك نصيب تعيش شويه ههههههههههه

انا معاك بيعهم يا عم وريحنا والله البلد هتكون حلوة من غيرهم بيع بيع وانا انزل واقول زي هاني رمزي انا م ع ملكيه عامه هههههههههه

وهبيع هبيع لولولولولي

مبسوطة انك خطيت برجلك عندي بس ابقى ادخل باليمين عشان الشمال المسدس خضني هههههههههه

Unknown يقول...

اول زيارة
بوست رائع والله الفكرة جديدة اجبرتني اقرا البوست لاخر حرف فيه
حقيقى المفروض يكون نواب الشعب من الشعب يعني شعرين بالناس وبحالهم ويكون العمل دا تطوعي من غير فلوس ولا امتيازات علشان مش كل واحد يجري ورا كرسي في المجلس
الحقيقة التانية ان شعب يتحكم في مصير قرارته نصهم أُميين يبقى يستحمل اللى يجراله
تحياتي والى الامام

Beram ElMasry يقول...

الاخ العزيز . مسدس صغير
السلام عليكم ورحمة الله وبركاته
( بعد ميعلموهم القراية والكتابة بجد ويعرفوهم يعنى ايه دستور) ... ياراجل حرام عليك طبعا همه عارفين يعنى ايه دستور ، دى كلمة من غير مؤاخذة للدخول على الاسياد وحابس حابس وربنا يجعل كلامنا خفيف عليهم
يسعدنى مرورك فلا تبخل بالمعاودة
لك تحياتىوالسلام ، ولا سلام مع اليهود

مسدس صغير يقول...

اما انتى بقى ياللى بتحبى الصراحة والوضوح

فأنا فعلا بخوفك بالمسدس ولو شفتك هنا تانى هضربك بالنار.
هههههههههههه
لا طبعا انتى تنورى
ابيع اعضائى طالما مش عايزها
حد له عندى حاجة؟؟
تشترى؟؟
هههه
اشكرك على الزيارة
ونورتى المدونة
سلاموز بالرجل اليمين

مسدس صغير يقول...

medus
اشكرك على التعليق والزيارة الجميلة ومتكونش اخر مرة
تعليقك اسعدنى
تقبل تحيتى
نورتنى

مسدس صغير يقول...

بيرم المصرى
طبعا يا عم بيرم الناس دى عارفه هيه بتعمل ايه
ربنا يقويهم
ويكون كلامنا خفيف عليهم
اشكرك على الزيارة الجميلة والتعليق الاجمل.

تامر علي يقول...

إن كان على الأعضاء دول فعلاجهم مش التبرع بهم ...علاجهم البتر :)

وبدون بنج ... وبدون استخدام ادوات جراحيه كمان .

موااااافقه :)

تحياتي

مسدس صغير يقول...

تامر على
فعلا ده علاج فعال جدا
منافقون منافقة
ههههههه
اشكرك على التعليق يا تامر
نورتنى

موناليزا يقول...

وانا كمان هبيع:)

قلم رصاص يقول...

ههههههههههههههه

صحصحوا يامدونين .. مسدس بيضحك عليكم
دا بيبع ليكم التروماي..اه والله زي كده

لأني انا متبرع بالأعضاء دول السنة اللي فاتت .. يعني ببلاش يعني

والدليل على كلامي ان انا ومسدس من منطقة واحدة .. يعني في نطاق نفس الدايرة
وبما اني اتبرعت بالأعضاء قبل كده.. يبقى تصرفه غير قانوني .. وهيبيع العتبة الخضرااااااااااا
ههههههههههههههههههههههه

ايه ياعم مسدس ، ماتهدي الضرب شوية
هي قوة يعني .. مكانوش دول شوية رصاص مستلفهم مني ..ههههههههههه

البوست رااااااااائع ياصديقي العزيز
مزيد من التوفيق

وبخصوص اقتراحك بانهم يجب ان يأخذوا دورات .. فهذا معمول به بالفعل ، ولكن ليس في مصر المحروسة ، وانما في معظم دول العالم المتحضر وعلى رأسهم فرنسا.. وهو بشكل شبيه بذلك ، حيث يوجد مجموعات استشارية مكونة من أساتذة الجامعات في العلوم السياسية والفقه الدستوري لكل نائب ليكونوا عونا له فيما يقف أمامه حجر عثره

والله اعلم

وعلى فكرة انت اوحش
ههههههههههههه

واشوفك على خير

سلام ياصاحبي

مسدس صغير يقول...

موناليزا
بيعى يبقى احسن وشوفيلنا حد يشترى منى ومنك.
هههه
اشكرك على التعليق
نورتينى كعادتك

مسدس صغير يقول...

يااااااااااااااااااه قلم بيه رصاص

فينك يابنى منذ قرن من الزمان.
محدش شافك يعنى .
تعرف انت اوحش اد ايه؟؟
كتييييييير
بقى انت بعت الاعضاء؟؟
ده كداب يا جماعة لو باعهم بجد امال همه لسه قارفينا فى الدايرة ليه؟؟
عرفتو بقى انه بيهيس.
....
انا عارف فعلا ان نظام التدريب ده موجود فى دول العالم الا فى مصر.
ربنا يهدينا ويهديك ويهديهم..
بجد انا فرحان جدا جدا بعودتك الكريمة يا قلم افندى يا رصاص.
نورت المدونة بتاعتى من اول الكوبرى لحد الترب.. ههههههههه