السبت، 28 مارس 2009

صور مقرفة واخرى مضحكة


انا هتكلم عن صورتين يقرفو بس مش هسيبكو مقروفين طبعا . دا انتو حبايبى لازم اضحكو قبل ما تمشو..


الصورة المقرفة الاولى فساد فى وزارة التعليم :


انا كنت بحب اللغة العربية اوى اوى اكتر منكو بكتير. المهم جه مدرس اللغة العربية وانا فى تانية اعدادى وسأل فى الفصل عن وزن كلمة فطبعا عشان انا كنت الواد اللى عامل نفسه سيبويه الفصل بيسيبنى للآخر ففيه ناس جاوبت قالها غلط وناس تانيه جاوبت رايح قايل برافو اجابة صحيحة.


رحت انا قايم وقلتله اللى انت بتقول عليها صحيحة دى مش صحيحة دى اجابة خاطئة " ايه رأيكو واد شاطر بقى بعدل على المدرسين "


المهم قاللى ازاى دى اجابة صح" كلمة استحالة على وزن استفالة" قلتله يا استاذى "كلمة استحالة على وزن استفعلة(1) " ومفيش حاجة اسمها استفالة . قاللى الكلام ده غلط طبعا انت يعنى ايش عرفك انا مدرس اللغة العربية.وجابلى مدرس عربى تانى اكد نفس الكلام .سكت وطنشت بعدها بحصتين كده بفتح الكتاب بالصدفة المحتة لقيت مكتوب " كلمة استحالة على وزن استفعلة(1) " اخدت الكتاب ورحتله ووريتهاله..


تصورو عمل ايه؟؟


من سكات كده اخد منى الكتاب وراح طالع على الفصل وقال للفصل افتحو الكتاب صفحة كذا.( فتحو الكتاب). قالهم فى نص الصفحة تقريبا مكتوب استحالة على وزن استفعلة اشطبو على استفعلة واكتبو بدل منها استفالة.. هههههههههههه


وتقولو التعليم متدهور ليه. ومش عارفين الفساد اللى فى التعليم جاى منين؟؟؟!!!!!
تحديث بسيط " ماما امولة بتقول ان استحالة ليها وزنين استفاله واستفعلة - على فكرة انا اقصد استفعلة والله - وعشان كده صححتها بس هو بردة غلطان كان لازم يقول ان الاتنين صح. هو بقى شطب استفعلة وكتبها استفالة.. دا تحت مسئولية ماما امولة... وجزاها الله خيرا


.....................


الصورة المقرفة التانية فساد فى وزارة الاوقاف :


المسجد اللى جنبنا فيه حتة شيخ تحفة لا بيعرف يقرا ولا حتى يكتب.ههههه فعلا ميستحقش يطلع المنبر ويق فى المكان العظيم ده اللى وقف فيه النبى صلى الله عليه وسلم وكبار الصحابة والعلماء..


الشيخ ده بيغلط كتير فى تشكيل ايات ومعندوش احكام بس عشانه امام راتب بنقول امرنا لله واما يكون الغلط فى التشكيل طالما لا يؤثر على المعنى بنعديها.


بس امبارح كان بيصلى بينا المغرب وبيقرا الاية اللى بتقول " يوم لا يُخزى اللهُ النبى َ والذين امنوا معه" راح قارى كلمة الله بهاء مفتوحة والنبى بياء مضمومة.. قلت الله يخزيك يا راجل . حاشا لله ان يُخزى ...


انتو فاهمين المعنى كده يبقى ايه ؟؟ المعنى كده يبقى ان النبى مش هيخزى ربنا قلب الاية تماما..وحاشا لله


وتقلو الفساد بييجى منين ؟؟؟!!!


......................


وعدتكو انى هقول صور مضحكة عشان متشيلوش الهم .ههههههه


الصورة الاولى من نوادر العرب :

واحد عربى كان ماشى مع ابنه وابنه ده اسمه حمزة. المهم وهما ماشيين فى السوق واحد بينادى بيقول يا عبد الله وعبد الله ده كان طفل صغير وماشى مع ابوه برده المهم التفت عبد الله للى بينادى وقاله : اى عبد الله تريد ؟؟ فكلنا عبيد الله..

فانبهر ابو حمزة بهذا الطفل وراح باصص لحمزة وقاله : شوف يابن الكلب العيال ناصحة ازاى.. شوف الواد اصغر منك وبيتكلم ازاى؟؟

شوية وهما ماشيين واحد بينادى بيقول : يا حمزة يا حمزة.. فالتفت له حمزة وقاله : اى حمزة تريد ؟؟ فكلنا حماميز الله..هههههههه

...................

الصورة التانية بردة من نوادر العرب :

سأل ملك وزيره وقال له : ما خير ما يرزقه المرء؟؟

فقال الوزير : عقل يتحلى به.

فقال الملك : فإن عدمه؟؟

فقال الوزير :فمال يستره.

قال الملك : فإن عدمه؟؟

قال الوزير : فإبن يؤازره.

قال الملك : فإن عدمه؟؟

قال الوزير : فصاعقة تحرقه وتريح منه العباد والبلاد.. هههههههههه...

...................

كفاية عليكو كده النهاردة..

هناك 53 تعليقًا:

MǿиY El-Shreef يقول...

ياساتر يارب

انا اول مره اسمع عن استفاله دي

مش الوزن بيجي من فعل اصلا

فعل فعيل فعول فعِل كده يعني وانتماشي

لكن استفاله دي منين :D

يمكن انا بليده ف النحو

لا طبعا :D

والشيوخ الي كده ف كل حتة يا استاذ صلاح

ده حتى عندنا هنا ف السعوديه تعالىشوف المؤذن الي ف اكبر مساجد الرياض دايما يجي ع الراديو وصوته استغفر الله العظيم ماينفعش ابدا ابدا

وهنا عندنا واحد بيقراكأنه ماسك جورنال يعني ربنا يرزقنا ويخلصنا منهم

..

حماميز هههههههههههههههههههههه

تسلم ايدك :D

maha zein يقول...

امممممممممممممممممم
يكونش قصده ان استحالة علي نفس كلمة استفالة
وهنا مش هيبقه اخطأ لان كلمة استفاله بتعني الشىء الادني
يعني مثلا ذي ما في حروف مستفلة او حروف مرققة وفي حروف تانية مفخمة
فالاستفالة ان الشىء يكون متدني
واستفاله علي وزن افتعاله واستحالة علي وزن افتعاله بردو
فيبقه الاستاذ يقصد ان الاتنين وزنهم واحد

ولا ايه يا حاج
طمني وريح بالى


وبعدين عادي بردو لما نغلط
كلنا حماميز اوعادي بردو

maha zein يقول...

ولا الظاهر اني طلعت ذي استاذك ولا ايه

انا معرفش بقه يا خويا
انا مالى انا
انا شاطرة والله في النحو بس انت كده لخبطني
هم ايه ده

ساره يقول...

اما المدرس هذا طلع تحفة
فى النهايه يطلع الكتاب غلطان بس هو اللي صح ...
طيب انت سمعت عن المدرسه اللي كانت تدرس الاطفال قرأن .. هى طبعنا مش تخصص دين بس عشان نقص المدرسين حطوها تدرس الاطفال من صف اول الي ثالث ابتدائي قرأن .. لما جات عند صوره الكافرون عشان التكرار اللي في قو الله تعالى (ولا انتم عابدون ما اعبد) لغت الايه الثانيه المتكرره عشان كانت فاكره انها غلطه مطبعيه
يعني تخيل ابسط سور فى القرأن الكريم مش حافظتها وتدرس حصه دين

بس كلنا حماميز ربنا هذي ابداع :)
والنادره الثانيه بعد تموت من الضحك :)

*البت المشمشية *حلوة بس شقية * يقول...

هو انا مش قيلالك يا واد انتا
انك تحجزلى اول تعليق
انا كدة بقه منظرى وحش

*البت المشمشية *حلوة بس شقية * يقول...

اول تعليق
تن ترررام رم رم رم

*البت المشمشية *حلوة بس شقية * يقول...

والتانى
محدش له عندى حاجة

*البت المشمشية *حلوة بس شقية * يقول...

والتالت
المدونة مدونتنا
والعب فيها براحتى

*البت المشمشية *حلوة بس شقية * يقول...

استحالة على وزن استفاله الكلام مظبوط مليون المية
وانتا تلاقيك كنت شاطر فى العربى بتاع منيا القمح ولا حاجة
وتلاقيك اساسا كنت عيل خيبان بليد
يا بليد
الراجل ده مش عارف حاجة يا جدعان

*البت المشمشية *حلوة بس شقية * يقول...

وبلنسبة للمؤذن
بنشوف منهم كتير
حد كان قالى
انو واقف ورا الشيخ
الدغ
عندو حرف السين
بثم الله الرحمن الرحيم

*البت المشمشية *حلوة بس شقية * يقول...

وعلى فكرة انا مضحكتش على ولا موقف من المواقف اللى قولتها
ههههههههههههههههههههه



يلا يا بليد

مسدس صغير يقول...

mony Elshreef
ههههههههههه
اللى يعيش ياما يشوف.
والشيوخ دول اللى كارثة بجد
وعددهم كتير جدا ومنتشرين فى كل مكان..
ربنا يستر
منورانى كعادتك.
اشكرك على التعليق الجميل
مودتى

مسدس صغير يقول...

مها زين
كلنا حماميز
كلامك انا مش فاهم حضرتك بس بيتهيألى ممكن يكون صح.
ع العموم الاستاذ بشتى الطرق غلط.
وعلى رأيك مفيش مشكلة ما كلنا حماميز..
ههههههههه

مسدس صغير يقول...

مها زين
هو احنا فين؟
يمكن يكون هوه اللى صح واحنا الاتنين غلط؟؟
يمكن
ههههههههههه
ربنا يستر علينا.
بجد انا سعيد بتعليقك
نورتينى زى مانتى منورانى دايما..
سلام

فتــافيت (رحاب الخضري) يقول...

هع هع هعععععععععععععع
انا قولت ممكن تكون ال50 وتبقى برضو مدبس في التاج
يلا يا بابا خد التاج وجاوب عليه لانك من اول 5 اشخاص علقت وماكنش التاج متمرر لهم

يلاااااااااا

مسدس صغير يقول...

سارة
فعلا تحفة يشطب على الكتاب والله ويبقى هو اللى صح.
اما بالنسبة للمدرسة اللى بتشطب على ايه فى القرآن عشان مكررة وفاكرة انها غلطة مطبعية انا اعرف حكاية زيها مدرسة قرت الايه اللى بتقول " يا أيها الذين امنوا امنوا"
قالت اشطبو على التنية
وكده يعنى
هههههههههههه
يللا مش مشكلة مكلنا حماميز.

مسدس صغير يقول...

البت المشمشية
يا جماعة البت المشمشية حاجزة اول تعليق
محجووووووووووووووووووووز
هههههههههههههههه

مسدس صغير يقول...

البت المشمشية
تلعبى فى المدونة؟؟
العبى ادام بيتكو ياختى
هنرش مية
يللا انجرى يا بت
ههههههههههه

مسدس صغير يقول...

البت المشمشية
انتى يعنى حد يثق فى كلامك يا بت انتى.
يعنى عشان فى اداب لغة عربية خلاص
بقيتى شاطرة اذ فجأة كده.؟؟
هههههههه

مسدس صغير يقول...

البت المشمشية
لو الشيخ الدغ كان يبقى ارحم اما يغلط فى الاحكام والتشكيل.
اى والله

مسدس صغير يقول...

البت المشمشية
انا اساسا مش عامل البوست ده ليكى انا عايز كل الناس تضحك كده وتموت من الضحك وانتى متغاظة ومتضايقة كده.
يااااااااااااااه
لما اشوفك متضايقه؟
ببقى فرحان جدا...
هههههههههههه
هههههههههههههههههه
هههههههههههههههههههههههه
هههههههههههههههههههههههههههههه
ههههههههههههههههههههههههههههههههه

مسدس صغير يقول...

فتافيت
ههههههههههههههههههه
مليش دعوة انا رقم 12 مليش دعوة
انا ليه بالورق الرسمى
هههههههههه
نورتى
بس ماليش دعوة
هروح مدونتك واعد اهوه

simply me يقول...

هههههههههه
فكرتنى بالطالب اللى سأل استاذه هى كلمة الاربعاء همزه على سطر ولا على الاف

قاله خليها الخميس احسن

*** حور- نور*** يقول...

بصراحه المدرس ده اساء لكل مدرسين اللغه العربيه الحمد لله انى مش ناويه اكون مدرسه رغم انى بدرس لغه عربية
بس والله الحال بقى يصعب على الكافر وربنا يسترها على الجيل اللى جاى

*** حور- نور*** يقول...

بصراحه المدرس ده اساء لكل مدرسين اللغه العربيه الحمد لله انى مش ناويه اكون مدرسه رغم انى بدرس لغه عربية
بس والله الحال بقى يصعب على الكافر وربنا يسترها على الجيل اللى جاى

ستيتة يقول...

هههههههههههههههههههههههههههههه

حلوة استفالة
تحفة
ربنا يخلي النحوي
شفت الكبر
بدل ما يقول للعيال انا غلطت معلش
قال لهم غيروا الكتاب
فكرني بنجيب الريحاني لما قال كان واصبح وما انفك وما انخلع علشان جنيه مهيه هههههههههههههههههه

الشيخ ده مطلوب دلوقتي في السوق
لأنه مش خطر
اصل اللي يعرف احكام الدين يبقى اورهابي دلواكيت

اجمل ما في البلوج كله كله كله صورتك اللي مش باين لي منها غير شمس ورا وودان قدام

تحياتي

القدر و انا يقول...

مسدس
المصيبة ان مدرس عربى يغلط
المصيبة الاكبر انه يكابر ويصر على الغلط
ودى اصبحت السمة العامة للاسف مع الغالبية
امال انت مسدس ليه
كنت اديله طلقتين فى نافوخه
اما شيوخ المنابر فحدث ولا حرج
من الاخطاء للفتاوى الخاطئة للتطويل والصراخ فى المكرفونات
لما كرهوا الناس فى صلاة الجمعة
استغفر الله وحسبى الله

e_emy يقول...

هههههههههه

ربنا يستر ....

الى يعيش يااما يشوف ....

صمت المشاعر يقول...

ههههههههههه والله مواقف المدرسين اللي
من النوع دا كتيييييييير اووووي
اما بقي الائمه والله كنت في رمضان في صلاة التراويح استني اشوف مين هيصلي الاول بينا لان كان في بعضهم بينيمونا من صوتهم في الصلاه المفروض الامام دا يكون محبوب للناس وحبين صوته ويكون علي درايه كامله باحكام القران


شكرا علي البوست

رحلتنا في الحياة يقول...

استحالة على وزن استفعالة اسمع كلام المدرس هوا يعرف اكترهههههههههه
انا المفروض مدرسة لغة عربية بس والله مش عايز اشتغل علشان خايفة اظلم العيال معايا وبقول بلاش التعليم مش ناقص

mohamed ghalia يقول...

هههههههههههههههه
حلو كلامك
وربنا يستر على باقى الحاجات
لو تحب تقرأ قصص كتير زى الى كتبتها
فى كتاب اسمه المستطرف من كل فن مستظرف فى قصص هايلة

مسدس صغير يقول...

Bondoka
ههههههههه
نخليها الخميس اسهل.
فعلا حاجة تكسف ربنا يهدينا.
اشكرك على التعليق
نورتينى

مسدس صغير يقول...

حور نور
لازم تكونى مدرسة لغة عربية
اشمعنى انتى يعنى؟؟
ههههههههههه

لا طبعا اللغة العربية تزداد اثراء بتدريسك ليها..
نورتى البلوج

مسدس صغير يقول...

ستيته حسبو
طبعا منورانى دايما وربنا ميقطع نورك. قولى امين.
بالنوسبة لنجيب الريحانى قصدى المدرس ده بدل ميقول للعيال الصح بيشخبط على اللى فى الكتاب.
ربنا يهديه.
بالنسبة للشيخ فعلا ده عز الطلب مش عز الدخيلة. وغير كده يبقى ارهابى ابن ارهابى..
احييكى على التعليق الجميل كالعادة.
نورتينى يا دكتور

مسدس صغير يقول...

القدر وانا
طبعا مش عيب ان الواحد يغلط بس العيب انه يستمر فى الغلط.
فعلا حاجة غريبة
والشيوخ حدث عليهم من غير حرج.
ربنا يهدينا ويهديهم.
اشكرك على التعليق
وبجد نورتينى

مسدس صغير يقول...

e-emy
هههههههه؟؟
عجبك يعنى؟؟
هههههههه
فعلا اللى يعيش ياما يشوف
اشكرك على التعليق
نورتينى يا ايمى هانم

مسدس صغير يقول...

صمت المشاعر
فعلا المدرسين بتوع اليومين دول تحفه الا من رحم الله
ربنا يستر.
والشيوخ المفروض يبقو متنقيين على الفرازة بس تقول لمين ومين يسمع؟
اشكرك على التعليق
نورتى البلوج

مسدس صغير يقول...

ايوشة
لا اشتغلى انا حاسس ان انتى مش هتظلمى حد.
هههههههه
انتى لازم تربى اجيال ورا اجيال.
ههههههه
اشكرك على التعليق والمرور الكريم
نورتينى بجد يا ايوشة

مسدس صغير يقول...

محمد غالية
اشكرك على الكلام الحلو ده.
وان شاء الله هدور على الكتاب ده واشتريه.
ربنا يكرمك
دمت فى سعادة دائمة.

MaNoOoSh يقول...

لذيذة قوى حتى الصور المقرفة كانت بشكل كوميدى
بس حلوة استفالة وحماميز عجبونى قوى

مسدس صغير يقول...

manooosh
اشكرك على التعليق الجميل ده
انا سعيد بتعليقك
نورتينى

أمل حمدي يقول...

يا مسدس

المدرس صح والكتاب هو اللي غلط

استحالة لها وزنين استفالة أو استفعلة

وياريت تحذف التهزيء لمدرسك

وجزاك الله كل الخير

مسدس صغير يقول...

ماما امولة
اشكرك على التعليق
بس معقول الكتاب يغلط فى حاجة زى دى؟؟
ممكن
خلاص انا هتأكد بنفسى من الكتاب تانى .
هدور عليه واتأكد من الكلمة فعلا ..
ولو لقيت كده هنزل تحديث بالتصحيح.
اشكرك على التعليق.
انا طبعا معنديش اى مانع انى انزل التصحيح طالما هوه الصح احنا طبعا عايزين الصح وبس
وربنا يخليك لينا يا ماما امولة

mahasen saber يقول...

اعدل التسميه الصورتين اليى فوق دول اليى من نوادر العرب مش اليى تحت

ربنا يلطف بينا وانا بقول احنا بنرجع لورا ليه بنرجع لورا ليه

بعد الصورتين الرائعتين الواضحتين دول عرفت احنا بنرجع ورا بسرعة البرق ليه

mahasen saber يقول...

اكيد طبعا جمعى للصورتين جمع تكسير

وشكلك انتا وماما اموله لو شفتوا الجمع ده هتمنعونى من دخول المدونه

ماما أمولة يقول...

شكرا يا مسدس على تقبلك للمعلومة

وعلى فكرة انا متأكدة منها لاني بدرسها بنفسي في الازهر وها تلاقيها في صرف الصف الاول الثانوي وصرف الصف الثالث الاعدادي طبعا الازهري

وشكرا للتنويه

قال رسول الله صلى الله عله وسلم(من كتم علماً ألجمه الله بلجام من نار )

ربنا يبارك فيك وينفع بك اللهم امين

Unknown يقول...

الشيخ ده بيغلط كتير فى تشكيل ايات ومعندوش احكام بس عشانه امام راتب بنقول امرنا لله واما يكون الغلط فى التشكيل طالما لا يؤثر على المعنى بنعديها.


ههههههههههههههههههههه هاااااااايلة
تسلم ايدك

مسدس صغير يقول...

ahasen saber
ههههههههههههه
فعلا الصورتين دول من نوادر العرب.
هو ده اللى هيرجعنا ورا بسرعة البرق.

مسدس صغير يقول...

mahasen saber
جمع تكسير
جمع تقطيع
اى حاجة
محدش يقدر يمنعك من دخول المدونة..
هههههههههه
ربنا يبارك فيكى ويخليكى
شكرا على التعليق.

مسدس صغير يقول...

ماما امولة
والله انا سعيد جدا بالمناقشة دى.
وفعلا كلامك صح مية فى المية
هيه ليها وزنين استفالة واستفعلة بتسكين العين..
وانا طبعا اتقبل المعلومة طالما من استاذه محترمة زى حضرتك لان انتى ماما امولة ام المدونين بس مش عايزين نكبرك اوى كده فانتى اختى الكبيرة.
ايه رأيك كده ؟؟
كده كويس؟؟
احييكى ونورتينى بجد.

مسدس صغير يقول...

اصحى يا مصر اسلام ديو
اشكرك على التعليق والمرور اللى بيسعدنى جدا.
فعلا عشانه امام راتب بنقول امرنا لله بس المفروض فى عملية الاختيار يبقى فيه اختبارات للناس دى لان دول هما القدوة والملاذ فى اى فتوى الشخص العادى ممكن يروحلهم.
نتمنى من الله ان يكون الشخص الناسب فى المكان المناسب
اشكرك مرة تنية
نورتنى

تامر علي يقول...

ياريت الفساد جاي من الجهل كانت بقت هينة .... الفساد جاي من انعدام الاخلاق على كافة المستويات ومعها غاب الدين

بوست جميل

تحياتي

مسدس صغير يقول...

تامر على
اشكرك على التعليق والمرور الكريم
نورتنى