الثلاثاء، 14 أكتوبر 2008

90 دقيقه مغص

فى برنامج 90 دقيقه مغص استضافت الاخت ريهام سفيرة مصريه ورائده
فى مجالها السيده امينه اباظه وليّه حلوة كده وشايفه نفسها شويتين وفاضيه.
المهم الحاجه امينه شفتها متشنجه وكان هيغم عليها من الزعل قلت لازم اشوف
الحاجه دى زعلانه ليه؟ لقيتها زعلانه على الكلاب والحمير.. اة والله كلاب وحمير ..
الست امينه هيه اول سفيرة مصريه لحقوق الحيوان تبع شوية جمعيات حقوق حيوان
عالميه وعندها جمعيه فى مصر لحقوق الحيوان كلام جميل . تشوف الست امينه
وهيه بتتكلم عن الحمير والقسوة اللى الحمير بتشوفها ساعة ما بتبقى شايله حاجه
مثلاً والعربجيه وهما بيضربو الحمير دى حاجه تقطع القلب كان هاين عليها ترقع
بالصوت وكأن الحمير دول قرايبها وللا الكلاب دول كانو صعبانيين عليها اوى اوى
وتستشهد بالقرآن والسنه حاجه تقطع الشرابات المهم البرنامج عمل تقرير من الشارع
التقرير ده كان روعه الحاج دعبس ابو الروس ييجى يقولك " آآنى ما بضُرُبش الحمير
واصل اصل الحمير دى حبايببنا " وييجى ميدو الشنكوتى شايل كلبه الكنيش ويقولك "
الكلب ده لازم ياخد الشاور بتاعه كل يوم 3 مرات بعد الاكل دا غير الاكل وهوه بيعتبر
قطعة ديكور جميله فى البيت "
حاجه تفرح . وتيجى سوسو شايله عصفور فى قفص كده وتقولك "
العصفور ده هوه حياتى لازم أأكله بس ما بعملوش شاور احسن يغرق ويموت "
وييجى المعلم ميمى يقولك " الحيوان ده زى الطفل الصغير لازم نعامله بكل حنيه "
بعد التقرير وبعد ما شفنا حنية الشعب المصرى المتناهيه وبعد ما الحاجه امينه الدنيا
ما كانتش سيعاها من الفرحه قالت ان اللى عندو كلب لازم يجمله وينضفه ويحميه كل
يوم خاصة اذا كان كلب اجنبى واستدركت وقالت مع احترامى للبلدى لأن انا بحترمه
جدا وطالبت الحكومه انها تعمل فنادق للكلاب وشرطه للكلاب والحمير والحاجات دى .
روحى يا شيخه الهى يعمر بيتك وانا اللى كنت خايف اموت واسيب الكلاب كده الحمد لله
اللى ربنا بعتلى امثالك عشان يا خدو بالهم من القطط والكلاب والحمير بعد ما اموت...
بقى بالذمه يبقى فين المشاكل فى المجتمع ده؟؟؟!!!!!

هناك تعليقان (2):

قلم رصاص يقول...

مش عارف أقول لك ايه بس

يابني معدتش تتفرج على حاجة في التليفزيون .. هيبوظك صدقني
ههههههههههههههه

حقوق الحيوان .. طب يدوروا الأول على حقوق البني آدمين


تقبل مروري ياباشا

mahaclio يقول...

" الفقر و الجهل و المرض " دا التعليق الوحيد على ال حضرتك كاتبة فعلا

القسوة لا تقتصر على الحيوان " انسان و حيوان "