السبت، 23 أغسطس، 2008

اهلا بالمعارك

لو بدينا يا حبيبى نبتدى منين المعارك؟

عند دارى؟

عند دارك؟

مش مهم

المهم ان انت دارك

ان قلبى استدارك

أوم عرف مين اللى حبه واللى حاربه

فى المدارك.

...

واللى عارف قلبى يعرف

انه مش راح يوم يخرف

أو يقول الكلمه مش زى اللى قالو.

أو يحرف.

...

هوه قلبى .جوه قلبى

معروف بناره

واسألو عن حبه جاره

قلوب كتير ويلفو وسط الناس

يرجعو على قلبى جرى

يندهو أوم واستجارو

عارفين ان قلبى . عمره ف يوم

ما بينسى تاره

...

ااه يا قلبى . هدى من نارك شويه

دى قلوب فى الحب طازه

يعنى بالعربى الفصيح

القلوب دى . هه طريه

مش قلوب .. مش مستويه

...

لازم تكون عارفهم أو دارسهم

مش أكيد بالعين شايفهم

بس لازم تكون حاسسهم

لأ بلاش.. تعمل راسك براسهم

...

بس ميين؟ الكلام ده ف قلب غيرى

أما قلبى جوه نار تحرق ف طيرى

..

قلبى . يابو الحروب

مرحبا بليل المعارك

فين زمان كلمة بحبك

كان يدوب

ويقول القصايد

كان رومانسى!

لكن انسى

القلب ده مش راح يعاود

...

قلبى نازل عامل حسابو

متفجرات وسلاح! قلبى اللى جابو

كان رومانسى ويا وده

كل ده . واهو راح وسابو

...

الكل ينتظر المعارك والحروب

والانتظار مخلوط بخوف

والاسير فى حروبه دايما

من غير مبادئ

يدبحو زى الخروف

وينادى على كل العساكر

دول أعادى مش ضيوف

وبعلو صوتو

جهزو كل السيوف

والمدافع والقنابل

بعدها دقو الدفوف

يا حبيبى انت مش أد قلبى وقسوته

وللا انت لا مؤاخذه اتهبلت؟

وللا انت ناسى حروبه اللى فاتت؟

أول اشاره ف حربه

راح يبدأ بقلبك

بعدها كل القلوب من الحسره ماتت

وانت ساكت.

....

انت عارف قلبى ده .

فى الحروب.

هوه صاحب كل طلقه فى البدايه

كله داخل حرب مش عارف اخرها

بس قلبى .

له هدف وكمان له غايه

والكلام ده يا حبيبى مش تسالى

أو حكايه

أو فى يوم تتسلى بيه

أو تكون حتى معايا؟

...

يا حبيبى ومش حبيبى اللى بحبه

دا حبيبى . تهديد شديد

وبعلو صوتو

قلبى راح ساعه يقولك

هيه دى بداية النهايه

...

هتكون حكاية بتتكتب على حيطه من معبد فى قلبى

كان زمااان . أيام صلاح

حرب من غير أى حد.

وقفت للبحر جزره

وكمان وقفتله كل مد.

على راس حبيبه القصر هد .

وانتهت بالنصر لكن!

كل اللى كان بيحب فى بلاده

بنى على قلبه سد.

وانتهى عصر الحبايب

"والرومانسى"

وانتهى فى بلاده ود

......

هناك تعليق واحد:

قلم رصاص يقول...

ايه الجمال ده كله يا بني الجمال ده كله
لالالالالالالالالالالالالالالالالالالا
أكيد فيه حاجة غلط..هههههههههههه
بجد بجد رائعة.. سير على نفس الطريق ..
ومتخافش وراك رجاله..ههههههه

بالتوفيق دايما يارب
مع السلامو عليكو