الخميس، 24 يوليو 2008

انا والتليفزيون النصاب

التليفزيون ده ليه معاه حكايات ممكن تكون نكته حلوة .." اقصد المقابلات التليفزيونيه". 3 مرات تعرضت لمواقف التليفزيون طرف فيها :
اولا: كنت ماشى فى الحسين فى القاهرة قبل رمضان باسبوع من ييجى كام سنه . وبعدين فجأة لقيت برنامج مسابقات دينى فى الشارع عينى عينك زى مانا شايفكو كده بالظبط ولقيت المذيعه اللى بتسأل ملتزمه جداااااااااا (برنامج دينى بقى) سايبه شعرها ولابسه البودى والجينز ومقولوكوش بقى . المهم اتلمو الناس كالعاده . وبما انى كنت بتمشى وكنت فاضى ما وراييش حاجه وقفت اتفرج بس من غير ما اشارك . المهم الحاجه اختارت ييجى سبعه تمانيه كده من الناس اللى واقفه والمصور معاها طبعا والاسئله كانت سهله جدا مثلا من ضمن الاسئله من هو سيف الله المسلول ومن هو اسد الله وخلافه المهم الحاجه قالت لتلاته اربعه كده انتو بس اللى تجاوبو صح وقالت للباقى انتو تجاوبو غلط عشان البرنامج يكمل (على فكرة كان برنامج فى القناة التانيه المصريه) المهم اللى جاوبو صح جم على جنب واللى جاوبو غلط جم على الجنب التانى وراحت المذيعه موزعه الجوايز على اللى جاوبو صح . واللى جاوبو غلط قالتلهم هارد لكم جميعا . لقيتلك واحد من اللى جاوبو غلط طلع فى المذيعه والمصور والمخرج وقالهم : ايه ده فين جايزتى قالولو : انت جاوبت غلط . الراجل اتهبل وقال مش انتو اللى قايلينلى اجاوب غلط . مانا كنت عارف الاجابه الصحيحه والراجل كان هيقتلهم المهم اولاد الحلال اتلمو وخلصو الحكايه
ثانيا:كنت ماشى فى رمسيس رايح مشوار مهم ومستعجل جدا لقيت مذيع من قناة أو تى فى بيقولى ممكن نصور معاك ولقيت فى ايده جرنالين تلاته قلتله مستعجل قاللى دا لحظه واحدة هتقرا اى جرنان وتقولنا ايه الخبر اللى لفت انتباهك ؟ المهم مشيت ومصورتش معاه بس عرفت حاجه انهم بيجو فى القناه يعملو ان الشعب المصرى كله مثقف وكله بيبقى قارى الجرايد ع الصبح ويسألوه ايه الخبر اللى لفت انتباهك فى الجرايد واتارى هما اللى بيجيبولو الجرايد.
ثالثا: كنت ماشى انا واتنين اصحابى قابلنا مذيع من صباح الخير يا مصر وبيقول : الدورة البرلمانيه الجديده هتنعقد الاسبوع ده يا ترى ايه طلباتكم كشباب منها؟ المهم قعدنا نحكى وانا اقول واصحابى يقولو عشان صوتنا هيتسمع وسابنا براحتنا كل واحد يمكن يكون اتكلمله برنامج لوحده . المهم تانى يوم الصبح قعدت استنى اشوف نفسى فى التليفزيون ولقيت اصحابى دول صحو كل البيت والبيوت اللى جنبهم عشان يشوفوهم فى التليفزيوووووون وفجأه لقيت الفقرة بتاعتنا مجاش منها الا 3 كلمات ليه انا بس وهم" ان هما يبصو للفقرا شويه" وبقيت موضوعات التعابير اللى احنا عملناها وصحينا البلد كلها عشان تشوفنا مجتش . يعنى التليفزيون "نصب فى نصب" ..... مسدس جه فى التليفزيون

هناك تعليق واحد:

واحد متغاظ من مسدس يقول...

المره الجايه ان شاء الله ربنا يكرمك ونشوفك في spacstooooooooon او في برنامج خلف الاسوار