اولا كان يوم جميل اوى ولقاء ممتع
واليكم التفاصيل :-
فى تمام التاسعة و40 دقيقة كنت وصلت عند المستشفى ملقيتش
حد . قلت استنى شوية وبعدين اتصلت بصبرنى قالتلى احنا اساسا
جوه المستشفى دخلت لقيتها ولقيت سول ولقيت بنت خال سول
ودخلنا سول عند التبرع وقلتلها لا اله الا الله وسيبناها وخرجنا
نستقبل الناس وتوافد الجميع تباعا مش فاكر الترتيب بس طبعا كل
اللى ييجى اخده واروح اسلمه لحبل التبرع واهرب اقصد واخرج
تانى اجيب وفود جديدة. وبصراحة صبرنى يارب بذلت مجهود
خارق دا كفاية الكيك والرد على التليفونات .
الساعة 10 ونص كلنا دخلنا جوه بقى وقلت هتبرع وامرى لله
" ربنا يتقبل " وعملت التيست وهاتك يا حسد ما علينا "دى اول
مرة اتبرع"
وبدأت ألم فى العصير والميلك والبسكوت والشوكولاتة استعدادا
للتبرع وسيبتهم أمانة مع عاشقة "أماااانة" بس مين ضيعت
الامانة . المهم حطو رقبتى تحت المقصلة قصدى نمت ع السرير
بتاع التبرع ولقيتها حاجة سهلة خالص وشيما الله يكرمها جابتلى
العصير بس قالت كل متبرع وحدة بس . طب لييييه؟؟
بعدين بعد التبرع مخلص رحنا مسجد السلاب صلينا الجمعة
وكانت خطبة حلوة اوى وزى منا قلت" بضم الخاء " مش
بكسرها محدش يفهمنى صح .
بعدين خرجنا رحنا على كوك دور وجابو المنيو طبعا انا ومحمد الغرباوى وعاشقة وغلبانة وساسو كنا على ترابيزة وحدة وجبنا
الشنغهاى بناء على رغبة عاشقة اللى كانت بتحاول تنسينى الامانة
بس مستحيل انساها . ده عصير وميلك وبسكوت وشكولاتة
كمااان يا ناس . دى حاجة تتنسى؟؟!!
بصراحة كان سندويتش كبير اوى مكنتش قادر عليه بس الحمد لله
وبعد عناء خلصناه وروحنا على نادى الاطباء قعدنا على
ترابيزة المؤتمرات " اللى كان فى اولها ميشوفش اللى فى اخرها".
احمد حسن البنا " اتكلم فى موضوع مهم اوى عن المدونين
والموضوعات اللى بيناقشوها على مدوناتهم بس بردة عشان العدد
كبير ومش سامعين بعض مقدرناش نواصل ونسترسل فى الحوار
وكملناه نميمة .
وبعدين اقترحت خيخة وصبرنى وداليا قوس قزح انهم عايزين 2
شباب من المنصورة يروحو يجيبو مركب وأنا طبعا بما إنى شاب
من المنصورة قعدت ادور على 2 شباب من المنصورة يروحو
يجيبو مركب .
بس على مين؟ قالو انت واحد منهم . ماشى .
ورحت الحمد لله انا وابراهيم العدوى وجبنا المركب هيه مش
سياحية اوى يعنى بس يلا اهى حاجة تفرح عمر .
ودى المركب . طب دى وحشة؟!
وقضينا وقت ممتع اوى على المركب وخالد همس الاحباب اتبرع
بلم الفلوس وعينك متشوف الا النور .
وفيه ناس هربت ومكنتش عايزة تدفع المرة التانية مش هقول
عليهم.
والحمد لله تمت على خير ودفعنا الـ 100 جنيه من سكات من
غير اقسام شرطة ولا تنضيف مركب ولا حاجة .
وبعدين نزلنا وركبنا التكوسة ونورتو مصر ودفعت لشيما اجرة
التاكسى اللى مش هتنازل عنها ابدا .
اولا مدونين القاهرة :-
فاتيما :- الوردة الروز
خيخة :- قلب خساية
خالد همس الاحباب :- ابن بلد وحبيته اوى
داليا قوس قزح :- اى خدمة مركب عشان خطرك
ميرا :- فعلا امرأة بعقل رجل
ضياء :- بيوتيفل مايند
عسقول :- ابن حجر العسقلانى ياريت نشوفك دايما
كينج توت وبوبو :- نورتونا والله
ثانيا باقى المدونين :-
صبرها يارب :- التبرع حلو كنتى اتبرعى
ابراهيم العدوى :- على راى شيما فين السهوكة؟
شيما :- اقول؟؟ غير كده فين الفلوس اللى عليكى؟
محمد الغرباوى :- شخصية محترمة جدا وبشوشة اوى
عاشقة وغلبانة :- مش غلبانة خالص
ساسو :- حكم السن . داليا وانا لأ؟
سول :- اتبرعتى؟ محدش شافك
رحيل :- بنت بلد وجدعة وبشوشة اوى
ايناس :- عاشقة الاحزان
بنت المنصورة :- مستعجلة على ايه
اميرة على كوكب مهجور :- ولا مهجور ولا حاجة
قلب الاسطورة :- مجيتيش ليه ؟ مفروض انها جاية وراحت كوك دور لوحدها
احمد حسن البنا :- شخصية محترمة جدا
روح طفلة :- نورتينا
مجرد حلم :- صغنتوت ليه؟
حلم كان :- ولسه الحلم
ليساندرا :- مش ع الهامش ابدا
سما مصر :- حمد الله ع السلامة
مصطفى محمد :- فك زنقة متفهمهوش غلط
بلاد السحر والخيال :- ولا خيال ولا حاجة
وفى النهاية لو نسيت حد ميزعلش حكم السن بقى وال زهايمر
فكرتونى ..
بدراوى كلمنى فون وكان زعلان انه مجاش بس تتعوض ان شاء الله
بوست التفاصيل ده عملته بسبب البهدلة اللى اتبهدلتها فى البوست اللى فات
تعالو زورونا ونورتونا
*
كان نفسنا تكونى معانا يا دكتورة ستيته
بالغيظ فيك يا قلم رصاص
