علاقة الجمل بالخنازير

يسرى الجمل وزير التعليم هيزود المدارس بالاقنعة والكمامات وعمل غرف عزل
فى ( جميع ) المدارس تحسبا لأى اصابة فى المدارس بانفلونزا الخنازير.

ده جميل

بس يا ترى مدرسة عزبة ابو تشت الابتدائية المشتركة هتزودوها بالمواد الطبية اللازمة
والاطباء المتخصصين وغرف العزل والاقنعة الواقية والاهتمام بنظافة دورات المياة ونظافة المدرسة
وخفض الكثافة الطلابية فى الفصول (دول 80 يا عالم) ما علينا
وكمان هتوعو الاستاذ عليوة المبهدل ازاى يكتشف ان فيه تلميذ عنده انفلونزا خنازير
وتعرفو الاستاذ رمضان الصايم ازاى يتعامل مع التلاميذ وطرق الوقاية من المرض .
طب لو الاستاذ عليوة أو الاستاذ رمضان هوه اللى اتصاب بالانفلونزا
مش كان لازم بردة توعو العيال ازاى يتعاملو مع المدرسين فى الحالات دى
وازاى يتم عزل المدرس والمدير فى غرفة العزل .

وتعلقو يفط ادام المدرسة بجوار كومة قش الحاج منعم مكوك تعرف الناس بانفلونزا الخنازير
وممكن تخلو الدراسة على فترتين فى المدرسة أو تقلل ايام الدراسة
يعنى تخلى الدراسة فى مدرسة عزبة ابو تشت الابتدائية المشتركة
يومين بس وبقيت الاسبوع أجازة !!

وكمان هتخلو مدرسة عزبة ابو تشت عايمة فى بحر من التاميفلو
تحسبا لأى عطسة كده وللا كده ؟!!..


يمكن ..

الله اعلم ..

بكرة نقعد ع السور ونسمع الطابور

قادر على كل شئ

يا خبر النهاردة بفلوس ..

اطبخى يا جارية الانبوبة فاضية يا سيدى

يحيى العظام وهى رميم

اصبر يابن ادم صبر الجمل بكرة تنضم وزارة التعليم لوزارة العمل

وكل سنة وانتو طيبين وبتاكلو جوز ولوز وعين جمل

فيه أمل

*

*

إمتى أرتاح؟

أنا كل مقول ارتحت

الاقى الدنيا

ضحكتلى ضحكة استهزاء

والاقى نفسى نازل فوق

وافوق من وهمى

وانا طالع على تحت

وانا ملح ..

والاقى الدنيا بتدوبنى

وانا ف الدنيا دايب دوب

وكان الكره متغرب

ودالوقتى الاقى

الكره ده محبوب

لا انا عايش ولا ميت

حياه فى النص معرفهاش

حياتى مالية فكرى عيوب

اموت من خوفى من نفسى

وعمرى مخفت .. على نفسى

حكمت وحكمى مش عادل

بسجن طويل على نفسى

وحابس نفسى جوة ضلوعى

وراضى بقسمتى وحبسى

وواخد نجمتى ويايا

معلم أخرتى بحكاية

دا انا العايش ومش دارى

بإنّى الناسى اسرارى

ومش فاكرشوقة ع الفاضى

مخبى ولسه القلب بيدارى

وعجبى ..

على قلب فضاء ومش للبيع

وبيعه بسرعة

أوام ليضيع

مفيش شارى وانا الشارى

ومييين؟؟

ممكن يسيب قلبه

وياخد منى قلب حزين!

وقلت مزاد

والاقى مزادى بيقل

ومش بيزيد

قعدت ف حيرة وبفكر

واقول يا نفسى

هنا الناس عارفة

أروح وابيعه فى ارض بعيد!!

ولو بعته !

أجيب فى الرجعة قلب جديد

مفيش شارى

وكونى ابيعه صعب اكيد

مفيش شارى

مفيش شارى

*

*

إنت جيت؟؟

بعيدا عن اختلاف المطالع والمنازل واللى يقول رمضان جمعة واللى يقول رمضان سبت ويمكن يوصل للحد

(كل سنة وانتو طيبين)

بعيداً عن 50 ساعة مسلسلات تضيع صيام أتخنها صايم

(كل سنة وانتو طيبين)

بعيداً عن الحر الشديد واهو كله من أعمالنا

(كل سنة وانتو طيبين)

بعيداً عن بوجى وطمطم وبكار

(كل سنة وانتو طيبين)

بعيداً عن رمضان والعيد والمدارس فى شهر واحد تقريبا الله يكون فى عون الموظفين المخلفين

(كل سنة وانتو طيبين)

بعيداً عن فانوس رمضان وورق رمضان واللاذى منه

(كل سنة وانتو طيبين)

بعيداً عن 20 ست كوم فى رمضان

(كل سنة وانتو طيبين)

بعيداً عن رمضان جانا وحالو يا حالو والراجل ده هيجننى

(كل سنة وانتو طيبين)

بعيداً عن عمرة رمضان وأنفلونزا الخنازير

(كل سنة وانتو طيبين)

بعيداً عن فجر الاسلام والرسالة عربى وانجليزى ورابعة العدوية ويمكن عنترة بن شداد

(كل سنة وانتو طيبين)

بعيداً عن المكسرات والياميش والبلح والبط والفراخ واللحمة

(كل سنة وانتو طيبين)

بعيداً عن احمد ادم وبرنامجه بنى ادم شو اللى يخلى الدم يفور بصراحة

(كل سنة وانتو طيبين)

بعيداً عن مدفع الافطار ومدفع الامساك

(كل سنة وانتو طيبين)

(ع العموم وأنا بعيداً عنكم حياتى عذاب)

(كل سنة وانتو كلكو طيبين)

(رمضان كريم)

أعاده الله عليكم بالخير واليمن والبركات

مش هوصيكو ع الصيام بقى

والتراويح

وختم القرآن على الأقل مرة فى الشهر كل يوم جزء

والأستغفار

وتحرى ليلة القدر

نفعنا الله وإياكم بما نقول

الفلاح يدعم محدودى الدخل فمن يدعم الفلاح؟؟

إن من أهم مهام أى حكومة " الدعم " سواء دعم المواد البترولية أو دعم المواد التموينية أو دعم العيش والمواد الغذائية خاصة إذا كانت من المواد الضرورية للمواطن المصرى محدود الدخل .

وكلما خرج علينا مسئول من " المسائيل " قال إن محدود الدخل من أولوياتنا وأن محدود الدخل داخل فى أهم أهتماماتنا و..و..و..

الى اخر قصائد الشعر التى تحكى وتغنى فى حق محدود الزفت .

ولكن الحكومة قد تخلت طواعية عن شغلتها بتولى مسألة دعم محدود الدخل والقت بالدعم خاصة فى المواد الغذائية على عاتق الفلاح الذى يستحق الصدقة فى الأونة الحديثة .

الفلاح شبه مرفوع الدعم الزراعى عن المواد الزراعية التى يشتريها .

الفلاح عندما يشترى مبيدات زراعية يدفع حقها " تالت ومتلت " إلا فى نسبة ضئيلة جدا فى محصول القطن حقير التيلة .

ورُفع الدعم عن الفلاح فى كل شئ .

ولكن ليست هذه هى المشكلة الحقيقية ولكن المشكلة الحقيقية تكمن فى أن الحكومة لتحافظ على أسعار المواد الغذائية المرتبطة بالفلاح من أجل عيون محدودى الدخل تقتل الفلاح ضرباً بجميع وسائل القتل المعروفة . فتأمر بحظر تصدير الأرز من أجل عيون محدود الدخل ليقل سعر طن الأرز ليصل الى 700 جنيه مثلا فى حين أن طن الأرز يتكلف على الفلاح أكثر من ذلك بكثير حتى يتم إنتاجه وحصاده . كذلك يتحكمون فى أسعار القطن ويتنازلون عن دعم القمح المصرى الجيد طواعية من أجل عيون بعض المستوردين الذين يتربحون من عملية إستيراد القمح المسرطن والقمح الفاسد من روسيا ورومانيا وغيرها من الدول الأوروأستهبالية وغير ذلك من المواد الغذائية والزراعية .

وحتى لا يظن القارئ أننا ضد مصلحة محدودى الدخل فإنى اتسائل لماذا تتخلى الحكومة عن دعمها لمحدود الدخل وتترك هذه المسئولية للفلاح؟؟

إن الفلاح الغلبان ليس من مسئولياته أن يدعم محدود الدخل وأن تُشَحَّت منتجاته من اجل عيون محدود الدخل .

ولكن طالما ان محدود الدخل "محطوط" فى أولويات الحكومة فتقوم هى بشراء منتجات الفلاح بأسعار مناسبة وتقوم ببيعها لمحدود الدخل بأسعار مدعومة وتقوم بتحرير السوق وأن تخضع أسعار هذه المواد للسعر العالمى كما يدّعون وذلك حتى ترتفع الاسعار بالقدر العادل للفلاح حتى يستمر فى زراعة ارضه وتشترى هى منتجات الفلاح بالسعر العالمى وتقوم هى بعملية الدعم .

لأنه إن استمر الوضع على ما هو عليه فإن الفلاح سوف يجعل من أرضه ملاعب للكرة او مقالب زبالة او خلافه طالما أنه بزراعتها تنقلب عليه بالخسارة .

ولكن إذا أرادت الحكومة أن تجعل من الفلاح داعماً للفقراء ومحدودى الدخل إجباراً . فإن عليها أن تدعم الفلاح ان شاءت إختياراً أو إجباراً ..

كلام مدونين

بعد مقلنا ان اليوم كان حر جدا

وقلنا ان فيه ناس كانت جايبة مفكرة صغيرة بتاعة notes

وكل واحد كان يكتب اسم مدونته والرابط بتاعها

انا بقى قلت لا يا جماعة انا عارف مدوناتكو ومش عايز اعرفكو

كل واحد يكتب لى كلمة للذكرى احسن

هكتبلكو الكلام بالترتيب زى مهوه فى النوتس

ستيته :-

بسم الله الرحمن الرحيم

يارب تتجوز ياصاصا

حلوة الكلمة دى؟ طبعا

ستيته حسب الله الحمش

مش عارفة .. بس نفسى اعرف

فاتيما :-

الى صلاح العزيز المسدس الصغير مدونة

والكبير قلبا وروحا

معرفتى بيك شئ يسعدنى

ورؤيتى ليك النهاردة اسعدنى اكتر

لأن اخواتى الصغار الجمال زادو واحد

غالى وعزيز جدا

ربنا يوفقك فى كل حالاتك وحياتك

اختك فاتيما روح قلب ماما

رنيم :-

مبتسمة دائما

انا بنوته صغنونة

عندى مدونة صغنونة جدا

اهمها مبتسمة دائما

رنيم

رقة الاحساس :-

اسمى فى المدونة اينو

thank you

ايمى بيبى :-

كانت فرصة سعيدة جدا يا صلاح

وبجد علطول طلقاتك جامدة

منتظرة عمليات اغتيال اكتر

تحياتى ايمى بيبى

غلطة مطبعية

my heart is not 4 sale :-

ana bgd mabsouta awi

ani shof elnas elgomal dol

w ani hena

bgd it was anice day

ميمايا :-

ابوووو صلاااااح

فين مسدسك الصغير؟!

جيت من غيره؟ عاااااااا

مبسوطة اوى انى اتعرفت عليك

فرصة هابى جدا

ميمى

ميمايا

كيكى:-

عوووو

عرفتنى طبعا . اتخضيت بقى

وللا ايه؟!!

فين بهية

سلامو عليكو

keke

عووو

فتاة حالمة :-

هاى مسدس

ايون انا فتاة حالمة

كيكى نسيت وكتبت بهية وهيه هنية

بس بجد فرصة سعيدة جدا وجميلة

اننا شفنا مسدس النهاردة

وعايزين نشوفك تانى

مودتى

عادل :-

ابو صلاح

ايه بقى؟؟

ايه بقى؟؟

غير كده ..

الشوق الشوق

الحضن الحضن

مشتاق مشتاق

انت مبتجيش ليه؟

انا هبقى هناك

كل اتنين وخميس بعد صلاة الجمعة

عادل ( البلد دى فيها حكومة )

لقاء المدونين8/8/2009

الازهر جنينة

خالد فودة :-

سعيد جدا باللقاء والصداقة

اتمنى انها تدوم على طول

خالد

هانى نط فى الكوز :-

ازى الصحة؟

عامل ايه فى البرد ده؟

هانى

رامز عباس :-

طاخ طاخ

طاخ قتلتنى؟

يا مجرم

بس هوكلك تدافع عنى

تحب تاكل ايه؟

رامز

فشكول :-

يا مسدس

انا خايف منك

وخايف تطخنى

بس انا حاحبك

واضحك عليك

فشكول

المعتصم :-

مدونة مش عارف

فرصة جميلة للتعارف

على ناس وصداقتهم لله

من غير اى مصلحة

وعشان كده ان شاء الله

تكون العلاقة دى دايمة

محمد غالية :-

هل تبحث عن السعادة؟

فرصة سعيدة ولقاء رائع

سعيد بالتعارف على

اصدقائى واخواتى المدونين

دكتور ياسر بقى ملقيتلوش كلمة

اقوله انا بقى :-

انت شخصية تتحب

احبك فى الله .

متشكر جدا ليكو

انا كتبت البوست ده

عشان اللى مجاش يشوف

مدى الالفة

اللى كانت بيننا

كلنا اخوات

نتمنى ان تستمر

الاخوة فى الله

****

*

غلطة المدونين التى لا تغتفر ..

بالترتيب من اليمين ( المعتصم - محمد غالية - عادل - مصطفى حسان - دكتور ياسر - انا ابو بنى ده - رامز اللى قاعد )

كان ممكن اغفر للمدونين اى غلطة

بس عمرى مكنت هغفرلهم غلطة ان ميبقاش فيه لقاء

وتحديدا يكون يوم 8/8 اللى هوه امبارح يعنى

مش عشان نشوف بعض

لأ وألف لأ

انما لأن النت بتاعى جه ووصل خلاص يا رجالة الى ارض الوطن

فى نفس يوم اللقاء بعد انقطاع دام لأكتر من شهرين

الهى لا يخسر ولا يكسب

يفضل كده فى الافسايد

المهم

نتكلم بقى فى اجمل يوم فى حياتى التدوينية

يوم بصراحة رائع جدا جدا

من اوله لأخره

ناس جميلة جدا

ناس لذيذة جدا

واعية جدا

مثقفة جدا

اتكلمنا فى حاجات كتير مش هقولكو عليها عشان اللى مجاش يفضل كده فى الافسايد

برغم ان الجو كان جميييل

كان هواااااااا ولذيييذ (امال لأا .. امال طبعاً)

الا انى بجد سعيد برؤية الناس كلها فى اللقاء

وكنت اتمنى يبقى العدد اكتر من كده بكتير زى مكنت متوقع

الا اننا بجد كنا سعداء جدا ومحسيناش بالوقت

عمنا فشكول رأس الحكمة

الدكتورة ستيته (امال لأا امال طبعا)

فاتيما الوردة الحمرا

دكتور ياسر ما اروعك

مصطفى حسان مفيش

ميمايا بوخارست

المعتصم بيقول عن نفسه سنترال

عادل الشوق الشوق

مايو فتاة حالمة

احمد ابو العلا المهندس

محمد غالية السعيد دائما يارب

كيكى فكك منها

خالد فودة المصوراتى

رامز عباس فاكهة

بدراوى هدؤ العاصفة

ايمى بيبى غلطة حلوة

هانى نط فى مارينا

رنيم ربنا يديم ابتسامتك

هند دموع الملايكة بالفرنساوى

اينو الهدؤ الجميل

**

حفل توقيع ديوان "حدوتة الشاطر .. ما فيش " للشاعر مصطفى حسان صاحب مدونة هرتلة ولازم كله ييجى مستنينكو كلكو واهو لقاء للى معرفش ييجى اللقاء اللى فات .. يوم الخميس القادم في مكتبة البلد بوسط البلد بجوار الجامعة الأمريكية الساعة السابعة مساءا

ولنا لقاء .. ان شاء الله

انا بقول اهوه وقد أزعر من انزر

اللقاء متوضح مية المية

والتليفونات واضحة بردة

وموجودة على مدونة ستيته هانم

وادعولنا بقى ..

على فكرة النت لسه فاصل عندى محدش يزعل

مشاكل بين الشركات واحنا الضحية

لنا الله

اجبارى لمدونين المنصورة والمحافظات القريبة ..

فرصة لمدونين المنصورة والدول المجاورة ان احنا نشوف بعض ونعتبره لقاء مدونين مصغر يوم الخميس الجاى الساعة 7 مساءً

ياريت كلنا نيجى ونجيب عشرة جنيه معانا عشان نشترى ديوان الراجل ده ونشجعه واللى معهوش العشرة جنيه . ديوانه على حسابى وموقع منى كمان..( واللى عنده اقتراحات نخلّيه يوم من أوله مثلا يقولنا ياريت ).. بس على فكرة الحفل ده اجبارى لكل مدونين المنصورة خاصة المنصورة والمدن القريبة منها .. ياريت كلنا نبقى متواجدين والغايب يقول للحاضر.واللى عايز ييجى من بعيد يبقى العشا على حسابنا كمان. ياريت. ويبقى صاحبى وحبيبى وكفاءة ..

التفاصيل :-

حفل توقيع ديوان: " حدوتة الشاطر .. مافيش ". للشاعر الجميل مصطفى حسان يوم الخميس القادم 6/8/2009 الساعة السابعة مساءً بمكتبة بوكس اند بينز، 7 ش جزيرة الورد - المشاية السفلية - أمام نادي الجزيرة - المنصورة.
.......................

أماكن التوزيع
القاهرة:-
البلد
دار ليلى
عمر بوك ستورز
الديوان - الزمالك
السندباد
الكتب خان - المعادي
سنابل
الإسكندرية:-
دار أكمل مصر
المنصورة:-

بوكس آند بينز