ليه نسامح بعض؟

ليه نسامح بعض؟؟

ليه؟؟

***

عشان رمضان؟؟

عشان شعبان؟؟

عشان مشمشية؟؟

عشان مسدس صغير؟؟

عشان النت؟؟

عشان المحامين ميشتغلوش؟؟

عشان المحاكم تقفل؟؟

عشان يلغو كلية الشرطة؟؟

*

*

*

*

*

لأ طبعا

نسامح بعض لسبب واحد بس

نسامح بعض

عشان ربنا

عشان خايفين من ناره

عشان طمعانين فى جنته

عشان النبى صلى الله عليه وسلم قال:-

" لا يحل لمسلم أن يهجر أخاه فوق ثلاث، يلتقيان فيعرض هذا ويعرض هذا،

وخيرهما الذي يبدأ بالسلام." حديث صحيح

نسامح بعض بالطريقة اللى تريحنا

بس المهم تكون متوافقة مع ديننا الحنيف

اقولكو على طريقة حلوة اوى نحب بيها بعض؟؟؟

بس تخليكو فاكرين الجمايل دى وتدعولى

النبى صلى الله عليه وسلم قال " والذي نفسي بيده لا تدخلوا الجنة حتى تؤمنوا،

ولا تؤمنوا حتى تحابوا، أفلا أدلكم على شئ إذا فعلتموه تحاببتم،

أفشوا السلام بينكم )) أخرجه مسلم في صحيحه .

صعبة دى؟؟؟

سلام عليكم؟؟ صعبة؟؟

اعتقد سهلة اوى

يلا ربنا يتقبل

سلام عليكو .. بجرب بس!

مسمعتش حد رد يعنى؟؟

يلا اقعدو بالعافية

***

القانون فوق الجميع والرشوة فوق القانون

القانون فوق الجميع

لا أحد فوق القانون

لا شئ فوق القانون

سيادة القانون

القانون قانون

شرف المهنة فوق كل اعتبار

ويا آآه يا آآه

كلها كلمات تطلق اذا كان الغلبان هو الغلطان

اما لو كان القوى والغنى هو الغلطان يُلغى القانون

اذا قَتل الغنى نرى الفتاوى تقول بأنه من قتل عمدا يجوز له ان يدفع الدية ويخرج منها زى الشعرة من العجينة

اما لو قتل الفقير فيعدم لأنه مجرم شديد الاجرام ويُخشى على الشعب منه

النبى صلى الله عليه وسلم كان بيقول " انما اهلك من كان قبلكم كان اذا سرق فيهم الشريف تركوه واذا سرق فيهم الضعيف اقاموا عليه الحد وأيم الله لو أن فاطمة بنت محمد سرقت " مش لدفع محمد الدية "( لا ) لقطع محمد يدها " أو كما قال. هذا هو النبى

اللى خللا القانون مش قانون هيه الرشوة وخراب الذمم وانعدام الضمير

زمان كنت كتبت بوست عن حالات دفع الرشوة فى الاوساط الرسمية المصرية خدوها اهى كلاكيت تانى مرة :-

1-فوت علينا بكرة يا سيد

2-مشكلتك دى ملهاش حل ويهرش فى دماغه

3-الموضوع ده هياخد وقت " ويبقى عارف انك مستعجل "

4-يفتح الدرج ويقفله

5-يقلع النضارة ويلبسها تلات اربع مرات قدامك

6-الموظف المختص مش موجود وهاييجى بعد(من يوم ل 3 سنين)

7-مشى حالك

8-شغل دماغك

9-عايزين نفطر

10-هات الشاى

11-هات الدمغه هو انا يعنى هدفعها من معايا

12-اخلص

13-ابجنى تجدنى

14-ورقك ده اصبح مسئوليتى تستلمه منى

15-يحاسب بتاع القهوه قدامك

16-يديلك ملف فاضى

17-يديلك رقم تليفونه ويقولك رن عليّه قبل ما تيجى

18-يصعب المسأله ويقولك والله موضوعك ده ولا الوزير يقدر يخلصه ويقول بعنيه بس انا أقدر

*******

فى الحالات دى انت بقى شغل دماغك واخلص واديله الدمغه عشان يفطر ويشرب شاى ومشى حالك بدل متفوت علينا بكره يا سيد..!!!

مش مشكلة خالص ..

بعد زيادة اعضاء قصدى عضوات مجلس الشعب دخل مجلس الشعب فى ازمة مكانتش ع البال ولا الخاطر.

المشكلة انهم مش عارفين الناس الجديدة دى هتقعد فين؟؟!!

اللى صمم المجلس زمان ايام الملك مكنش عامل حسابه ان الستات هيبقى ليهم كلمة جامدة اوى كده وهيخدو 64 كرسى فى المجلس الموقر.

انا رأيى انهم يقللو المجلس 64 كرسى مش يزودوه لأنهم من غير مؤاخذه مش شايف ليهم لازمة اوى الا من رحم ربى .

** فيه 3 أفكار بقترحهم لحل الازمة :-

الفكرة الاولى :- انا بقترح لحل المشكلة دى بدل ميجيبو مهندسين ومصممين وبتوع ديكور عشان يزودو كراسى فى المجلس ييجى الدكتور فتحى سرور فى اول جلسة بعد الزيادة ويقول يا جماعة يا جماعة انتو اخوات ومينفعش كده ساعو بعض اللى جنبو مكان يقعد اخته واخوه العضو فيه مينفعش كده البنات جنب البنات والولاد جنب الولاد عشان المكان ياخد اكبر عدد من الاعضاء والعضوات .

دى فكرة بقترحها ..

الفكرة التانية :- ان كل واحد ييجى يجيب كرسى صغير وهوه جاى من اللى هوه بتاع البحر المتنقل ده هيبقى حلو ومش بياخد مساحة .

الفكرة التالتة :- نعمل جدول للأعضاء والعضوات وكل جلسة نختار 64 عضو وعضوه "خليط يعنى "

ميجوش " يغيبو يعنى " وبكده نبقى حلينا المشكلة .. بطريقة سهلة وسريعة وغير مكلفة ..

*****

(حاجة تانية) عايز القى عليها الصوت والضؤ ومحمود ياسين يعلق عليها كمان .. اوكرانيا الله يعمر بيتها عارفه ان احنا شعب صاحب مزاج وكاس ودماغه عالية المهم جابتلنا صفقة قمح مخلوط بحبوب نبات الحشيش المخدر والافيون والمعسل والهيروين والجوزة ..

اة والله . ده بقى عشان كل اللى ياكل رغيف يتمزج ودماغه تعلى

والشعب يمشى يغنى ويقول :-

وشربت رغيفين ع الشيشااا ع الشيشاااا ع الشيشااا

مع بانجو والقرش وويشاااا .. ع الشيشاااا ع الشيشاا

حبيت ساعتها العيش والعيشاااا .. والعيشااااا والعيشااا

وعيالى ضاربين تحشيشااا .. تحشيشااااا تحشيشاااا

على عيشنا راحت تحويشااا .. تحويشااا تحويشااا

نازلين ف بعضنا تلطيشااا .. تلطيشااا تلطيشااا

*

*

**

العلبة دى فيها ايه؟؟ هيكون ايه غير تاج يعنى ..

تاج وجالى من زمان ومش ناسيه من بنت بلدى شيماء ( الشعب لابد له من حكومه تشكمه )

ولسه تاج تانى جايلى من غادة ( قلب ارهقته الاحلام ) بنت بلدى بردة هجاوبه ان شاء الله بس شويه كده اما التاج ده يبرد .

* من أنت؟

انا صلاح اللى هوه بتاع مسدس صغير ده عارفينه؟؟ بييجى هنا احيانا

* وما الذى تفعله هنا؟

ممممممممم مش عارف بدوّن وخلاص انتو اللى عارفين بقى ..

* إسرائيل تقصف كل جنوب ممكن بحثا عنك ، أى شمال تقصد؟

انا عملت ايه يا اسرائيل؟؟ انا مالى ده حتى المسدس ده مسدس صوت . فشنك يعنى

اما بقى لو صممو هروح شمال المسجد الاقصى . لالالا هروح مكان تانى احسن يفجروه ويعملو الحجة فيه هروح

اصلى فى الصحرا عشان اموت وانا بصلى وخلاص ومحدش يموت بسببى . بس هبقى اروح جنوب الصحرا اصلى

بحب المواجهة ..

* أنت مكلف بحذف حرف من حروف اللغة العربية .. أيها ستختار ولماذا ؟؟

انا اعمل كده ؟؟ كسر زنادى ان كنت اعمل كده .. امال نقرا شعر ازاى؟؟

* لو قدر لك أن تدخل السجن فما هي القضية التي تتمنى ان تدخل بها إليه؟

انا بالذات محدش يسألنى السؤال ده . لأن انا عارف اللى بيحصل للى بيدخل السجن .

* نحن لا نعيش حياتنا بل نتعلم فيها كيف نعيش ما تعليقك؟

فعلا الايام بتعلم .. لكن الحياة هي التى تمنحنا شهادات هذا التعليم وجوازت العبور..

* على مفترق طريق لافتتان ، اليمنى تقول ( إلى حلمك ) واليسرى تقول : (إلى مالم يحلم به البشر ) ، أي الطرق ستسلك؟

علمتنى أمى " أن تكون عاديا فالعاديّون كثير . أما أن تكون متميزا فتصبح ذو تأثير "

* بجملة واحدة فقط أكتب تعريفاً لكل كلمة من الكلمات التاليه :-

- الوطن

كلمة بتدارى الحقيقة

- الأم

انا هى وهى انا

- الليل

حبيبى وابن حبيبى

- الحب

كلمة لها معنى واحد

- أمريكا

تمثال العبودية

- المرأة

حياة كل رجل

- الراجل

مش بس بكلمته

- الصمت

افضل قصيده قرأتها

* أخترمنصباً واتخذ قرارا؟

رئيس الجمهورية والغى مجلس الشعب

* قيس، عنترة، جميل.... الذين يقولون شعرا..... وليلى وعبلة وعزة"تسمعن" لماذا هذا التغييب للمرأه؟

بل هذا مطلق التحضير عندما يتكلم كبار الشعراء امثال قيس وعنترة وجميل عن عبلة وليلى وغيرها فيكون هذا فخر لأى

مرأة وحضور ما بعده حضور ..

* إلى أين تمضي كلمات الحب .. بعد أن نقولها؟

قد تمضى الى الآذان وقد لا تجاوزهن وقد تمضى الى القلوب وحينها تصبح ذات قيمة بالغة

* هل تجد علاقة بشكل أو بآخر بين المرأة وقطاع الطرق ؟

انا ليه سؤال هيه قطّاع الطرق اللى همه الحرامية يعنى وللا قطاع الطرق اللى هيه هيئة الطرق؟؟ لو كانت هيئة الطرق والكبارى الطرق ذهاب وعودة اما المرأة ذهاب فقط أما بقى لو قطّاع الطرق فكلاهما يحمل سلاح رادع .

* هذا فراق بيني وبينك .. متى ولمن تقولها ؟

لذنوبى حين اطلّقها

* غداً ؟

لو كان فى يد البشر لمت خوفا منه . أما وأنه فى يد الله فأنا على يقين بالله

* تمرر التاج لمين؟

بصراحة التاج مش عارف هل هو نوع من التدبيس أو نوع من التكريم

انا بعتقد انه نوع من التدبيس وعشان كده

قلم رصاص

ستيته

فتاة حالمة

قلب ارهقته الاحلام

سفروتة

وكيلة نيابة مع ايقاف التنفيذ

فيه ناس كتير انا كنت عايز اهديلهم قصدى ادبسهم فى التاج بس عارف انه راحلهم

(واللى راحلو التاج من دول يبقى براءة)

وعلى فكرة يا جماعة النت لسه فاصل عندى والله

*

*

***

حكايات فرحات بعد ما ساب الكفر(4)

قبل منقول الحكايات مش عايز حد يزعل منى عشان مبعلقش عند الناس الا بسيط جدا لأن النت فاصل عندى بقاله ييجى 20 يوم ومش عارف اخرتها ايه؟ الظاهر هولع فى الشبكة بعناكبها " جمع عنكبوت "..

******

تنهيده

بتخرج من جوفى

بتولّع كل اللى أبالى

بتقول يا هنية ويا حميدة..

والله . ما فارقتو ف يوم بالى

كان عقلك فين يابن حميده؟!!

دا شباب الكفر يا فرحات

يتمنى يكون حاله كيف حالى !

دالوقتى قلوب سودة وشمتانة

مبسوطة بترحالى ..

*****

يا هنيه يا روح قلبى ويا مراتى

فرحات مش عاد فرحاتى

ولا أملك شعره من راسى

هحكيلك بس ف يوم تانى

حكاياتى

*****

ساتره علّيه من يومك

وفضحتك يا هنيه . وآه يانى

مش ناسى يوم ما قالولى الحكما

بعد حميده !

مش هتخلف تانى ..

والله مانى ناسى يا محبوبة

واشعتى ف كل الكفر

إن انتى المعيوبة

*****

ستّارة يا بنت العم

من يومك شايلة معايا الهم ..

معايا؟؟

والله شايلاه وحديكى

من غير ما احادِيه واحاديكى

دانى نفسى ارجع اراضيكى

بس خلاص ..

أصل آنى عينى اتكسرت

خوفى عليكى انتى وحموده

مش م الجوع

آنى عارف إن الارض تكفّيكى

لكن خوفى من الايام

ومخلّانى اسيبكو غير الاحلام

أنا بس بجرب حظى ف أم الدنيا

*****

أصلى كرهت الكفر وناسه

وكرهت كمان الغيط مع فاسه

وكرهت العمدة ..

آآه بمناسبة زفت الطين

كلمتكو عند العمدة

بدل المرة اتنين

ومحد يعبرنى ويرد

وأنا اسب العمدة واللى جابوه

وأقول متردو يا ملاعين

كان نفسى تكونى سمعانى يا هنيه

كنتى تروحى دار العمدة

لجل يردو علّيه .

وأكلمك انتى وحموده

لو حتى دقايق معدوده

كنتى تبردى نارى ف قلبى

أو حتى للدنيا

تفتحى نفسى المسدوده

*****

بس آنى لازم احكيلك

كيف بيعيش فرحات

بس ف يوم تانى

وكيف بتشق عنيّه العبرات

بس آنى خوفى ...

لتقولى لحميدة

أبوك الهاجج

مات .....

*

*

*

*****