29 مايو, 2009

لا تخالف وإن منحوك الذهب ..


بين يوم وليلة أصبحت أشهر نعجة فى تاريخ الغنم بل إن شهرتها فاقت شهرة الكثير من الحيوانات أقرانها بل والبشر فالكلبة لايكا برغم شهرتها وأنها اول حيوان يذهب فى رحلة إلى الفضاء إلا أن شهرة النعجة دوللى " بس مش شاهين" فاقت شهرة لايكا بسنوات ضوئية .. غنم .. كلاب .؟؟ ايه ده؟؟! ما علينا المهم . موضوع الاستنساخ موضوع مهم جدا عايزين نعرف عنه اكتر من ناحيتين الناحية الاولى الطبية والناحية التانية الدينية . ازاى؟؟ اقولكو ازاى . "الناحية الطبية" إن الاطباء يعرفونا بجد ايه الاستنساخ ده بالتفصيل وكمان يعرفونا مدى نفع الاستنساخ ده للبشر يعنى ميكونشى مجرد اكتشاف علمى وبس بيبهرو بيه الناس وبس وميكونشى مبدأ خالف تعرف يعنى لمجرد شهرة عالم او اتنين أو مجموعة هيه اللى أجرت تجارب لحد مظهر لعالم الواقع . انا طبعا مقدرش أتكلم عن الاستنساخ ده طبيا لأنى مش متخصص ولأنى بحب فكرة التخصص جدا . الحاجة الوحيدة اللى انا ممكن اتكلم فيها عن الاستنساخ إن لو واحد مستنسخ اتمسك تحرى اروح اطلعه أو اترافع عنه فى قضية سرقة النعجة دوللى . المهم اللى اقصده إن اى اكتشاف حتى يستمر فيه العلماء انه يكون فعلا هيفيد البشرية مش معنى كلامى ان الاستنساخ مش هيفيد البشرية . لا طبعا مقصدش كده انما مجرد شرح ده ووضع قول فصل فيه وميكونشى زى ما قلنا انه من مبدأ خالف تتعرف وتتشهر . اة مهو برج بيزا فى إيطاليا لولا أنه مائل ما عرفناه . فهو برج عادى جدا

- أما بقى "علماء الدين" . فيه تخبط جامد جدا حول ما اذا كان الاستنساخ حلال وللا حرام اللى يقول حلال واللى يقول حرام يا جماعة احنا عاوزين قول فصل فى الموضوع ده ويكون دالوقتى ميستنوش لحد منلاقى اول طفل مستنسخ وبعدين يصرخو ويقولو لأااااااااااااااااااااا الاستنساخ حرام يا جماعة ويهللو بقى .. طب هل لو علماء المسلمين قالو بالحجة إن الاستنساخ حرام خلاص كده البشرية هتسلم ويقولو خلاص مش هنستنسخ تانى طالما المسلمين قالو ..! لا الموضوع مش كده احنا لازم نقيم عليهم الحجة حتى لو سُئل المسلمين عن ذلك أمام الله أجابوا . وحتى لا ننفصل عن العالم ونكون أصحاب كلمة فى هذا العالم لأننا شعوب لا يستهان بها ولكن هونا على انفسنا . حتى مثلا لو قالو انه حرام على الاقل علماء الاطباء العرب والمسلمين يلتزمو انهم يبعدو عن الموضوع ده مثلا .

ده مجرد توضيح محتاجينه بس ومحتاجين نتواصل مع العالم شوية ولو كان موضوع الاستنساخ ده وغيره من الاكتشافات اللى هتفيد البشرية ليه منكونشى أصحاب سبق فيها؟!! المهم الخير للجميع وآسف على الاطالة

25 مايو, 2009

يا بدرية ..!


يا بدرية ..

وضحكك ليلة مش معدية

جمالك كله ف عنيكى

وانا ليكى

جفونك ليه؟؟

فوق العيون مغطية.

يا بدرية

يا قتّالة..

ومين راح يدفع الدية؟!!

يا بدرية ..

****

يا بدرية ..

معاكى مهما العمر هيعدى

ومش ممكن اسيبك

وحد الله عليكى

متمشى.

حسيبى ربنا

والله حسيبك .

****

يا فكرة طيش فى عقلى الباطن

يا حب غريب

هياجه ساكن

وموج البحر

جنونه ميفرّق . ولكن

يغطينى وميغرّق .

يا بدرية..

****

وحب الناس مع العشق

شويه عتاب

يا بدرية

وحبى وحبك

دا قصر كبير

ملوش ابواب

يا بدرية..

****

يا بدرية ..

ونورك ساطع

وجودك يكْفِى

وليه القمر طالع؟!!

مفيش داعى

ولو جابو رموشك وسطة؟!!

مفيش مانع ..

****

يا ورد الدنيا

مين قالك؟؟

بإن العطر ده منك؟!

اخدت العطر من بدرية

واهو كله عشان زنَّك..

يا بدرية...

22 مايو, 2009

سجل يا تاريخ !!


فى سابقة هى الاولى من نوعها فى تاريخ مصر سواء الحديث او القديم رجل تتوافر فيه السلطة والمال والنفوذ ليس فى مصر فقط وإنما فى منظقة الشرق الاوسط هذه السابقة هى صدور الحكم بإعدام هشام طلعت مصطفى.....

فمن منا سمع قبل ذلك عن إعدام رجل كهذا؟!!!

يوسف عبد الرحمن : رجل ارتشى وادخل مبيدات مسرطنة مصر ورغم ذلك حكم عليه بالسجن عشر سنوات

ولم يتم اعدامه ورغم ذلك هرب الى خارج البلاد او تم تهربيه. وكلاهما سواء " المهم انه هربان "

رندا الشامى : مساعدة يوسف عبد الرحمن وشريكته فى الجريمة كذلك الامر حكم

عليها بالسجن وهربت هى الاخرى أو تم تهريبها.

هانى سرور (هايدلينا) : فضيحة اكياس الدم الفاسدة ولم يعدم مثلا وانما حصل على البراءة.

نواب القروض : جميعهم هرب خارج البلاد.

ممدوح اسماعيل وابنه : قتلوا 1400 مصرى ومع ذلك لم يتم اعدامهم وهم الان يتنعمون خارج البلاد.

وغيرهم وغيرهم.

انا لا اشكك فى عدالة القضاء المصرى

لأنى وبكل ثقة استطيع أن اقولها "أن القضاء المصرى من أنزه

ما يكون القضاء إلا القليل النادر وهذا وارد ليس فى القضاء فقط وانما فى كل المجالات"

فعلا حكم تاريخى بكل المقاييس والقضاء المصرى لا يحتاج الى شكر من أحد لأن هذا هو واجبه وألا يخشى فى قضائه الا من الله.

حتى وإن لم يعدم وتم نقض الحكم فقد ظهر للجميع أن القضاء المصرى بخير.

ثانيا : من وجهة نظرى "لقد كان لقرار النائب العام بمنع النشر فى القضية أثر عظيم فى أن تسير التحقيقات والمحاكمة على الشكل المرجو حتى وإن شكك البعض فى هذا القرار"

19 مايو, 2009

أخبار خفيفة


- قرر وزير الفقر المدقع إلغاء الحديد المحلى حفاظا على الاسم التجارى للمواطن . وفى تعليق لأحد الجهات أنه برغم أن هذا الوزير ابن عز إلا انه معندوش عزيز ولا غالى.

- صرح وزير الروتين المنتشر أنه يضع كرامة المواطن فى أولوياته وقرر إلغاء " فوت علينا بكرة يا سيد " وخلّاها فوت علينا بكرة يا أستاذ سيد ".

- صرح خنزير مسئول فى وزارة الخنازير أنه بصدد إعدام جميع الخنازير سواء بالحرق أو الشنق أو حتى بالنفى إلى محافظات أخرى.

- قرر وزير العدل جمع الخردة من أنحاء البلاد ليتم عدلها وإعادة بيعها.

- وفى تصريح له للتليفزيون البرتقانى قرر الحاج رمضان منع استيراد البرتقان أبو صرة خاصة اذا كانت الصرة باينة.

- أصدر وزير الصحة قراراً بإلغاء مقولة " كل سنة وانت بالصحة والسلامة " واستعاض بدلا منها " كل سنة وانت بالصحة وخالى من أنفلونزا الطيور والخنازير وبالسلامة98"
...........

اما عن أخبار الرياضة :

- فى إطار الاستعداد لكأس الكرات كرر رئيس الاتحاد العصرى لكرة القدم السكرى تغيير الكرات الغبية وإستبدالها بالكرات الذكية " اللى بتصفر لنفسها " خاصة اذا كانت مجرجرة. فَجُل هذه الكرات ذكية.

.........

أما عن الأخبار الفنية :

- أجلت الفنانة فيفى وهبى عرض فيلمها الجديد " دكان حسن شحاتة " لبعد الإنتهاء من تصفيات كاس العالم حتى يرقص الخضرى على الاجازة العارضة نظراً لحملها كما يشاع دون أى واوا .

...................

14 مايو, 2009

صالح للإستخدام الآدمى..


هو ايه اللى صالح للإستخدام الادمى؟؟؟

حرام عليكوو

وزارة الصحة بتقول ع القمح اللى جاى من روسيا انه صالح للاستخدام الادمى

بيقولو انهم 65 الف طن قمح جايين من روسيا وفاسدين..

وناس بتقول انهم 300 الف طن.

وزارة الصحة اخدت عينه حللتها وقالت انهم صالحين للاستخدام الادمى.

"الادمى المصرى طبعا".. لا احنا عايزينكو تحللو العينات طبقا لاى ادمى بس يكون غير مصرى .

حللوه طبق للآدمى الهندى مثلا. مش هقول الامريكى ليفكرو ان احنا بندعى عليهم ياكلو من القمح ده. لا لسمح الله

ازاى امريكى وياكل من القمح ده؟؟!!!

"هيئة الرقابة على الصادرات والواردات قالت أن نتايج الفحص أثبتت أن الشحنة مطابقة للمواصفات.. إممممممممممم

إلا أن الحجر الزراعي أفاد بوجود حشرات ميتة وارتفاع نسبة البذور السامة بمعدل 56 بذرة في الكيلوجرام.."

يعنى الحجر الزراعى ماله ومال الحشرات الميته وماله ومال البذور السامه؟؟؟

طبعا كلام الرقابة هوه اللى يمشى ان القمح ده سليم وعال وميه الميه..

لان اساس 56 بذرة مسمومة فى الكيلو جرام نسبة قليلة ومتضرش الآدم المصرى.. ولو كانت تضر كنا قلنا على طووووول..

انتو عارفين؟؟ لا طبعا متعرفوش.. انا من سنتين كده فاكر اننا كنا مصدرين شحنة بطاطس للسعودية . واول ما نزلت عينه من الشحنة فى الموانى السعودية وحللوها لقو فيها نسبة عفن بسيطة راحو مرجعين الشحنة كلها لمصر عن بقرة ابيها وامها كمان وجميع الحيوانات المتاحة..

انا عايز اعرف اما يقولو جملة " طبقا للمواصفات القياسية المصرية " يعنى ايه؟؟؟؟ يعنى يكون المنتج خالى من الفران والقطط والكلاب الميته؟؟ ممكن..

ربنا يستر

06 مايو, 2009

جرايد


جرايد .. جرايد
والدم قايد

والفجر مليان هموم
والمصرى اليوم
معدوم
اخباره قديمه زى الاهرام
وصباحو نايم فى مساءو
ينتظر الفجر مع الاحرار
وصباح الخير. من غير
حتى نهار
***
جمهورية خوف
ولا عمره ف يوم هيشوف
واهو وفد وماشى فى صفوف
وان قلنا كواكب وللا نجوم
والشمس معاد ينفعها كسوف
***
يا شروق
باين محروق
والدستور فى ميدان - النور
مشنوق
***
والشرق الاوسط
هيموت من الجوع
فى خلال
اسبوع
أو يمكن على اكتوبر الجاى
وبلاش منك تانى دموع..

***
والكلام ده ملوش دليل
غير حكايتى مع
البديل
والعالم اليوم
بقى هوه العميل


كفاية كده..
اللى عارف جرايد تانية يقولى

04 مايو, 2009

اللى ملوش كبير يشتريله خنزير


الولايات المتحدة الامريكية كانت بتتفاخر - يعنى بتتباهى - انها من الدول اللى مدخلهاش فيروس انفلونزا الطيور.

وكانت تتباهى انها وضعت اسوار وقائية حصينة حول حدودها لحماية البلاد من دخول هذا الفيرس.

طبعا الكلام ده مش شطارة امريكا انما ده حكمة ربنا..

اتفاجئنا باللى ابشع من انفلونزا الطيور وهوه انفلونزا الخنازير اللى تعتبر امريكا والمكسيك هى الموطن الاصلى للفيروس ده .

الفيروس انتشر فى امريكا والمكسيك وفى اكتر من عشرين دولة فى العالم حتى الان برغم انه لم يتعدى اسبوعين على اكتشافه.

وانتشر فى ارجاء امريكا اسرع من الصوت بالمناسبة "اسرع من الصوت يعنى زى اسماعيل يس ما عرّفه . قال ان الطيارة اللى اسرع من الصوت لو رايحة اسوان مجرد انت متقول اصصصصصصص قبل متقول واااان كانت وصلت" ما علينا المهم امريكا مسجلة اكتر من 250 حالة اصابة لحد دالوقتى والمكسيك اكتر من 350 حالة تقريبا حاجة ترعب بجد .

يعنى انا عايز افهم هى الخنازير دى فرض على الناس اللى بياكلوها؟؟؟!! مش هقول الدين الاسلامى محرمها لكن هقول حتى الطب بيحذر منها جدا وبيقولو انها بتسبب امراض خطيرة..دا حتى الخنازير شكلها وحش جدا والله يمكن يكون الكلاب احسن منها.

خاصة ان الخبراء اللى ربنا يخليهم لينا بيقولو ان المرض ده هيدخل مصر فى غضون الشهر القادم " لا قدر الله ".. يعنى لازم السلطات المصرية تاخد حذر من نار للموضوع ده ولازم يعدمو كل الخنازير اللى فى البلد وما اكترها. واللى مش عاجبه يتعدم معاهم. ويبقو يعوضو اهله او حتى يعتبروه مات فى العبّارة وخلاص.واللى ييجى مصر من امريكا لازم يروح الحجر الصحى ان شالله اوباما نفسه ولازم يخدو بالهم جدا من نتنياهو اصله جاى مصر الشهر ده..

ومنظمة الصحة العالمية طالبت بتغيير اسم الفيروس من انفلونزا الخنازير الى h1 n1 والله مش فارقه لان لو واحد قال فيروس h1 n1 هنقوله مش تقصد انفلونزا الخنازير؟؟ اصل بعيد عنكو مستخفى.

الخوف بقى لينتشر الفيروس ده ويبقى وباء عالمى . انتو عارفين اخر وباء عالمى كان تقريبا فى التمانينات مات فيه 40 مليون فرد من شتى بلدان العالم " رقم مهوووول "

فلازم يحاصرو المرض ده بشتى السبل ويعدمو الخنازير اللى فى العالم كله لمنع انتشار الفيروس ده " ده مجرد اخد بالاسباب " قبل حتى ميطلع انفلونزا الكلاب وللا القطط وللا الفران .

يا إلا نسيب كوكب الارض ونروح مثلا نسكن على المريخ بس المشكلة لنلاقى هناك انفلونزا الكواكب.

يعنى بالعربى الفصيح مفيش حد كبير على الاوبئة والامراض لان ربنا يقول للشئ كن فيكون..

ربنا يستر على مصر والدول العربية والاسلامية..