حكايات فرحات بعد ما ساب الكفر (5)

فرحات (1)
فرحات (2)
فرحات (3)
فرحات (4)

واليكم فرحات (5)

فرحات ..
تنهيدة عاقل على مجنون؟!!
لساك فاكر إن العمدة حداه تلفون؟؟

***
بكفاية يا بنت العم
بدل السلامات
بدءآها بعتاب؟؟
مخلاص مش فارقة
كله يهون
مانى هانت نفسى عليّه
وعذاب بعذاب
بيقطع قلبى وقلبك يا هنية
أنى اسف يا مراتى
إنى غادرت بلادكم ببلاد
وفضحتى فرقت عواد
ورفضت اسمع صوت القلب
وودانى كانت مسدودة
بس قوليلى كيف حموده؟؟؟
متردى يا بنت العم !!

***
راح ارد واقولك ايه؟
هو كلامك ده يترد عليه؟
أنى عايشة
وحميدة عايش
لكن فرحات ..
مش عارفة ان كان مات
وللا عايش؟؟

***

بقى كده يا هنية يا مرات فرحات؟
هحكيلك ..
بس أنى ليّه سؤال الاول
العمدة واقف جنبك ويّاه مناجيسه؟؟

***
فرحات ..
دانى جنبى الكفر بناسه ببلاليسه .

***
طب بصى يا هنية
اسمعى منى وقولى طيب
عارفة الشيطان؟؟
العمدة ده إبليسه
وكمان سيبانى الكفر!
هوه اللى مأسس تأسيسه
قاللى يا فرحات
عاوز تبقى بيه؟؟
روح مصر
واقعدلك سنة واتنين
ترجع فرحات بيه
وآنى كنت مفكر مصر
هيه الجنة
بس دى طلعت هم وجالنا
وبعتنى لمقاول تسريح
وكمان قاللى
انه مناسب حد كبير
يمكن ظابط أو حتى وزير
رحت عليه
ولقيته واد أشفه
بيمصمص ف صوابعه الناشفه
دانى نفسى
امسح من عيشتى اليوم ده
بس أنى قلت لنفسى
يعنى انت يا فرحات
انصح من العمدة؟؟!!
لكن مش دى المشكلة بردة
المشكلة على واحد ساب ارضه
وادّلى على مصر
وقالوله يا فرحات
علشان تضمن شغلك
تمضيلنا على حبة وصولات
ومضيت
وكأنى هحارب..
ولا واحد أهبل يعملها
ولا حتى واحد شارب
أم بعدين ..

***

بعدين ايه؟؟
فرحات
بكفاية كلام
اصل كلامك ده
ميساوى ف بالى ربع جنيه
وصولات ايه؟
سيبهم وتعالى
طول مانى جنبك
ورينى هيعملو ايه؟
لكن شكل القعدة عاجباك
نفسك تصبح بيه؟؟
فرحات بكفاية كلام
أحسن كل الكفر اتهوسو
واقفين على قلبى
راح اطمنهم انك حىّ
كلمنى ف يوم تانى
او حتى مفاجأة
القاك جىّ

*
*
*

حنين الماكينات

اتحركو يا عالم
اتحركى ايتها الحكومة النائمة فى العسل الاسود
اتحركو يا ناس وانقذو الشعب
الشعب خلاص لساله ابره ويضرب
فى ظل إحكام الغلق على كافة الفئات
من الناحية الاقتصادية
من لدن الحكومة الالكترونية .

تحرك الحديد وبكى وحن لهذا الشعب الغلبان
ماكينات الصراف الالى فى المهندسين فى الجيزة
بدأت فى رشق الناس بالفلوس نظرا للظروف المالية
التى يمر بها الشعب الغلبااااان
بس مش لاقيه غير المهندسين يعنى؟؟؟؟؟
بس مش عارف بردة مازل الشعب أمين أوى
الأمن فكرو ان دى غلطة من ماكينات الصرف
ورجّعو الفلوس وعملو محاضر بالوقائع
" اصلهم اكتر من ماكينة "
(شعب فقرى)
طب ده اسمه كلام؟؟
يا جماعة انتو مش فاهمين حاجة
دى خطة حكومية
بدأت بمحافظة الجيزة
وتتوالى المحافظات
(وكمان احنا فى العيد)
بس طبعا مينفعش يعلنو عنها عشان الزحام الرهيب
اللى ممكن يحصل خوفا على أرواح الغلابة
من أنفلونزا الخنازير

والبقية تأتى

*
على الهامش

نسيت ابارك لمصر فاروق حسنى
قاعد على قلبكو
ونسيت ابارك للزملكاوية بردة فاروق
قاعد على قلبكو وعماد كمان

*

عساكم من عواده

مش عارف يعنى ايه عساكم من عواده بس اخوالنا العرب بيقولوها الخليجيين يعنى بس هيه اكيد معناها كل سنة وانتو طيبين وعيد سعيد عليكو

اللهم وكما بلغتنا رمضان هذا فبلغنا رمضان اعواما عديدة واعمارا مديدة واجعل عملنا يرضيك واغفر لنا ما قدمنا وما اخرنا وما أنت أعلم به منا افرحو فى العيد بقى وزقططو

والبسو اللبس الجديد وانتو رايحين تصلو انا مش بحب اشترى لبس فى العيد بس عادى وافطرو لو حتى على مية أو تمره قبل متنزلو الصلاة ولاااااازم تصلو دى سنة مؤكدة

وبصراحة انا مبشوفش فرحة العيد ومبحسهاش الا بالصلاة التكبير الصبح ده حاجة بصراحة بتعمل فرحة شديدة اوى اللى معملهاش قبل كده يجرب ولو مفرحتش يبقى بحساب يا سيدى

وكله كله يصلى رجال ونساء وع العموم كل سنة وانتو طيبين يا احلى مدونين وربنا يعيد عليكو الايام بخير

تصريحات السادة الوزراء

موضوع انفلونزا الخنازير ده مادة كويسة جدا ليظهر كل وزير مهما كان تخصصه
ويتكلم عن علاقة وزارته بالخنازير اقصد بانفلونزا الخنازير
يعنى مثلا وزير المالية يتكلم عن تكبد الدولة خسائر مالية فى الازمة دى
ووزير الصحة يتكلم عن صحة المواطنين
ووزير الزراعة يتكلم عن صحة الخنازير
ووزير الموارد المائية يتكلم عن امكانية نقل العدوى عن طريق مياه الشرب
ووزير التضامن الاجتماعى يتكلم عن تضامنه مع المصابين قلبا وقالبا
ووزير التعليم يتكلم عن الدراسة وتأجيلها وأمكانية الغائها كمان
ووزير الخارجية يتكلم عن المصريين العائدين من الخارج واللى ممكن يكونو مصابين بالانفلونزا
وشيخ الازهر والمفتى يتكلمو فى مشروعية الحج والعمرة من عدمه
ووزير السياحة يتكلم عن السياح اللى ممكن يكونو حاملين للفيرس
ووزير الاستثمار يتكلم عن تأثر الاستثمارات الاجنبية فى مصر بسبب ظهور انفلونزا الخنازير
ووزير النقل والمواصلات يتكلم عن نقل سريع للتاميفلو بس اول مييجى من امريكا فى منتصف اكتوبر
ووزير الداخلية يأمر رجال المرور بأنهم يساعدو على تفضية الطرق
وعدم الزحام فى الشوارع لعدم انتشار المرض
ووزير الاعلام يتكلم عن الممثلين اللى اصيبو بانفلونزا الخنازير وبيحذر الممثلين منهم وكده يعنى

انتو عارفين برغم كل التحذيرات من كل الوزارات المختلفة علاوة على المفتى وشيخ الازهر
الحاجة اللى مضايقانى حاجة وحدة بس وهى انهم بيقولو عايزين يلغو الحج السنادى وده انا مش معترض عليه
وعايزين يلغو الكتاتيب فى المساجد وفى دور التحفيظ وانا بردة مش معترض
وعايزين يشوفو حل فى خطبة الجمعة وبردة انا مش معترض
وعايزين يلغو الدراسة وبردة انا مش معترض و و و و و و و
انا مش معترض .
بس الادهى والأمر انهم يقولو كاس العالم للشباب لن يتأثر بانفلونزا الخنازير وعايزين الجماهير تملا الاستادات
كمان يقولو السينمات لن تتأثر بانفلونزا الخنازير خاصة فى فترة العيد وهى فترة ازدحام للسينمات
مش فاهم يعنى؟؟
ازاى ده؟؟
يعنى السينمات والاستادات معاها حصانة؟؟
طب لو الحكاية كده مندّى الحصانة دى للمساجد والكتاتيب والحرمين والشوارع والمدارس وخلافه ولو مفيش حصانة؟؟
يبقى ده تهريج
بس فيه سؤال بسيط؟؟
هيه الحصانة بتاعة السينمات والاستادات من أى نوع من الحصانات؟؟
حصانة برلمانية وللا قضائية وللا دبلوماسية وللا نوع خاص؟؟
ربنا يستر

ابو شلن يكسب ..

على غرار الاستخدام العادل للانترنت قام السيد رئيس الشركة المصرية للاتصالات بالعويل والصراخ الحقونا يا عالم الحقونا ياهوو الحقنا يا طارق يا كامل يا وزير الاتصالات شركات الاتصالات فلستنا . بنطلب استخداماً عادلاً للتليفونات احنا كمان .
ليه يا عم الحاج؟؟
اصل مخليين الدقيقة بشلن طب وانت اللى مضايق سيادتك ايه؟ ( بيقول ان ده حرق اسعار)
يا سيدى الفاضل لو انتو مش أد المنافسة تنسحبو من السوق المصرى أحسن وكفانا اتصالات والا تفتحولكو شركة اتصالات زى فودافون او موبينيل او حتى تفتحو لكو محلين تلاته فى البلد تبيعو كروت .
دالوقتى بجد بجد بقى . الشركة المصرية للأتصالات بتفقد كل يوم مشتركين بسبب سياستها الفاشلة فى جلب مشتركين جدد والمحافظة على مشتركيها القدامى يعنى فى احصائية اخيرة بتقول ان الشركة المصرية للاتصالات خسرت مليون وخمسميت الف مشترك فى الاعوام القليلة الماضية
ده بسبب ان مفيش تخطيط سليم
شركات الاتصالات التانية بتتعامل بعقلية تجارية واعية تسعى للربح فى المقام الاول وبتربح وفى المقام التانى بتقدم عروض تناسب الجميع .
على الناحية التانية نلاقى الشركة المصرية للاتصالات اللى عنده تليفون ارضى بيدفع بس فى حدود 60 جنيه من غير ميجرى اى مكالمة (اشتراك زائد خدمات وضريبة واللاذى منه) ده زائد الفاتورة ده حتى فى مرة حصل شئ غريب جدا لقيت الفاتورة بتاعتنا جاى فيها 3 جنيه انترنت . طب ازاى وانا اساسا عندى النت اللى هوه بتاع الاستخدام بتاع عادل ده ؟؟
ما علينا . السوق المصرى او غيره مش هيستنى مساندة وزير الاتصالات للشركة المصرية للاتصالات ومش هيستنى تهديدات سيادة الوزير لشركات الاتصالات بالعودة للنظام القديم بعد شهر رمضان مباشرة حفاظا على الشركة الموقرة وده لان شركات الاتصالات كده بتحرق الاسعار"على حد قوله " وكلمة حرق الاسعار انهم بيقدمو الخدمة بأقل من تمن التكلفة " دا كلامهم " بس ده مش معقول لأن الشركات دى زى مقلنا هدفها الرئيسى الربح وده مش عيب ولا يمكن تخسر ابدا
وطالما ان الشركة المصرية للأتصالات مش قادرة تنافس الشركات دى؟
من وجهة نظرى المتواضعة جدا تنسحب من السوق المصرى
وترحل من على كاهل المواطن المعدوم وتتركنا لشركات الاتصالات المحمولة ام شلن . والشلن يكسب .. دا حتى المحمول صلاحية مدى الحياة انما انتو صلاحية شهر بعد معاد الفاتورة .
وفى النهاية ليّه تساؤل بسيط :-
يا سيادة الوزير ما سر هذه السرعة الفائقة فى الاستجابة لطلبات الشركة المصرية للاتصالات وتوجيه التهديدات لشركة فودافون وموبينيل واتصالات مصر بالعودة للنظم القديمة بعد رمضان مباشرة ؟؟
ماذا لو أن 30 مليون اسرة قدمو شكاوى اليك مثلا ضد الشركة المصرية للأتصالات " مثلا" هل سيكون الرد بنفس السرعة؟؟؟

متقولِّنا انت عايز ايه بالظبط؟؟

انا مش عارف اللى اسمه سيد القمنى ده عايز ايه

مش مصر المحروسة اديتلك الجايزة خلاص

آل تقديرية آل

تقديرا لإيه يعنى؟؟

لجهوده المبذولة فى اصلاح مواسير الصرف الصحى فى عزبة نجع التفاح

هنقول ايه بس ؟؟

فى حواره الاخير لجريدة الوطنى اليوم أو جريدة الحزب الوطنى الديموقراطى

فى عددها الصادر فى 1 سبتمبر

قال كلام ميتلبسش عليه شرابات

خدو عندكو :-

أول حاجة :-

قال عن جبهة علماء الازهر بالحرف الواحد :-

"جبهة علماء الأزهر شيوخ منصر وقاتلين قتلة وكان يجب أن يكونوا وراء القضبان. " هذه واحدة

تانى حاجة :-

قال انه هيقاضى علماء مسلمين لأنهم طالبو بسحب الجايزه منه زى :-

"وأقاضي أيضاً كل من نصر فريد واصل مفتي مصر الأسبق وجماعة الإخوان المسلمين كما سأقاضي أيضاً يوسف البدري." ده كلامه

تالت حاجة :-

وفى حديثه عن دار الافتاء المصرية قال :-

" أنا أطالب بإلغاء دار الإفتاء لأن الدولة المدنية لا يوجد بها دار إفتاء، ومصر دولة مدنية يجب أن يكون هناك قانون واحد يسير علي الكل ووجود دار الإفتاء هو إهدار لقيمة الدولة المدنية،"

رابع حاجة :-

وقال عن ابى حنيفة بالحرف الواحد :-

" وأنا أحسن من أبو حنيفة لأن أبو حنيفة لم يكن عنده (نت) ولا معلومات يقرأها عن الفيزياء أو الكيمياء التي درسها ولا كان يعرف لغات مثل التي نعرفها ولا كان عنده تليفزيون أو قنوات فضائية."

ابو حنيفة؟؟

انت؟؟؟؟؟؟

انت احسن من ابو حنيفة؟؟؟

نت . فيزيا . كيميا . لغات . تليفزيون . ؟؟؟

ياما انت كريم يارب

طب ما انت بتعرف فى النت وبتعرف فى الفيزيا على حد قولك والكيميا والتليفزيون

وما نراك إلا أجهل الجهال .

والله لو عندك الفمتو ساكند وسفن الفضاء ولفيت حول المريخ 13 لفة لن تصل الى عشر عشر عشر ما وصل اليه ابو حنيفة .

ابو حنيفة اللى صلى الفجر بوضؤ العشاء اربعين سنة وغيره وغيره

خامس حاجة :-

كمان بيعدّل على ربنا .

أه والله بيعدّل على ربنا مش مصدقنّى ؟؟

طب خدو دى

" كما أطالب في هذا الكتاب " اللى هوه مألفه" بالمساواة بين الرجل والمرأة في الميراث، قبل أن يفرض علينا هذا الأمر من الخارج، وأنا أتمني أن أبني وأبنتي يرثا زي بعض» بالمساواة لأن الأبنه تعمل وتؤدي دورها، والأبن يؤدي عمله، وهذا يأخذ حقه، وهي تأخذ حقها «زي بعض» تماماً."

لله الامر

سادس حاجة :-

والادهى والامر بيقول عن نفسه :-

" أنا والجماعة العلمانيين نؤمن بإله مختلف شوية "

مختلف؟؟

هوه فيه كام إله؟؟

اصل احنا عندنا إله واحد ومنعرفش غيره

وفى النهاية أود أن اتقدم بخالص الشكر والتقدير للجنة التقدير اللى قدرت انها تدى

جايزة تقديرية لسيد القمنى تقديرا لجهوده فى اثراء الثقافة الكفرية

" بناء على فتوى المفتى "

وفى نهاية البرنامج اطلب سماع اغنية متشكرين وأغنية متزوقينى يا ماما