صور مقرفة واخرى مضحكة

انا هتكلم عن صورتين يقرفو بس مش هسيبكو مقروفين طبعا . دا انتو حبايبى لازم اضحكو قبل ما تمشو..


الصورة المقرفة الاولى فساد فى وزارة التعليم :


انا كنت بحب اللغة العربية اوى اوى اكتر منكو بكتير. المهم جه مدرس اللغة العربية وانا فى تانية اعدادى وسأل فى الفصل عن وزن كلمة فطبعا عشان انا كنت الواد اللى عامل نفسه سيبويه الفصل بيسيبنى للآخر ففيه ناس جاوبت قالها غلط وناس تانيه جاوبت رايح قايل برافو اجابة صحيحة.


رحت انا قايم وقلتله اللى انت بتقول عليها صحيحة دى مش صحيحة دى اجابة خاطئة " ايه رأيكو واد شاطر بقى بعدل على المدرسين "


المهم قاللى ازاى دى اجابة صح" كلمة استحالة على وزن استفالة" قلتله يا استاذى "كلمة استحالة على وزن استفعلة(1) " ومفيش حاجة اسمها استفالة . قاللى الكلام ده غلط طبعا انت يعنى ايش عرفك انا مدرس اللغة العربية.وجابلى مدرس عربى تانى اكد نفس الكلام .سكت وطنشت بعدها بحصتين كده بفتح الكتاب بالصدفة المحتة لقيت مكتوب " كلمة استحالة على وزن استفعلة(1) " اخدت الكتاب ورحتله ووريتهاله..


تصورو عمل ايه؟؟


من سكات كده اخد منى الكتاب وراح طالع على الفصل وقال للفصل افتحو الكتاب صفحة كذا.( فتحو الكتاب). قالهم فى نص الصفحة تقريبا مكتوب استحالة على وزن استفعلة اشطبو على استفعلة واكتبو بدل منها استفالة.. هههههههههههه


وتقولو التعليم متدهور ليه. ومش عارفين الفساد اللى فى التعليم جاى منين؟؟؟!!!!!

تحديث بسيط " ماما امولة بتقول ان استحالة ليها وزنين استفاله واستفعلة - على فكرة انا اقصد استفعلة والله - وعشان كده صححتها بس هو بردة غلطان كان لازم يقول ان الاتنين صح. هو بقى شطب استفعلة وكتبها استفالة.. دا تحت مسئولية ماما امولة... وجزاها الله خيرا


.....................


الصورة المقرفة التانية فساد فى وزارة الاوقاف :


المسجد اللى جنبنا فيه حتة شيخ تحفة لا بيعرف يقرا ولا حتى يكتب.ههههه فعلا ميستحقش يطلع المنبر ويق فى المكان العظيم ده اللى وقف فيه النبى صلى الله عليه وسلم وكبار الصحابة والعلماء..


الشيخ ده بيغلط كتير فى تشكيل ايات ومعندوش احكام بس عشانه امام راتب بنقول امرنا لله واما يكون الغلط فى التشكيل طالما لا يؤثر على المعنى بنعديها.


بس امبارح كان بيصلى بينا المغرب وبيقرا الاية اللى بتقول " يوم لا يُخزى اللهُ النبى َ والذين امنوا معه" راح قارى كلمة الله بهاء مفتوحة والنبى بياء مضمومة.. قلت الله يخزيك يا راجل . حاشا لله ان يُخزى ...


انتو فاهمين المعنى كده يبقى ايه ؟؟ المعنى كده يبقى ان النبى مش هيخزى ربنا قلب الاية تماما..وحاشا لله


وتقلو الفساد بييجى منين ؟؟؟!!!


......................


وعدتكو انى هقول صور مضحكة عشان متشيلوش الهم .ههههههه


الصورة الاولى من نوادر العرب :

واحد عربى كان ماشى مع ابنه وابنه ده اسمه حمزة. المهم وهما ماشيين فى السوق واحد بينادى بيقول يا عبد الله وعبد الله ده كان طفل صغير وماشى مع ابوه برده المهم التفت عبد الله للى بينادى وقاله : اى عبد الله تريد ؟؟ فكلنا عبيد الله..

فانبهر ابو حمزة بهذا الطفل وراح باصص لحمزة وقاله : شوف يابن الكلب العيال ناصحة ازاى.. شوف الواد اصغر منك وبيتكلم ازاى؟؟

شوية وهما ماشيين واحد بينادى بيقول : يا حمزة يا حمزة.. فالتفت له حمزة وقاله : اى حمزة تريد ؟؟ فكلنا حماميز الله..هههههههه

...................

الصورة التانية بردة من نوادر العرب :

سأل ملك وزيره وقال له : ما خير ما يرزقه المرء؟؟

فقال الوزير : عقل يتحلى به.

فقال الملك : فإن عدمه؟؟

فقال الوزير :فمال يستره.

قال الملك : فإن عدمه؟؟

قال الوزير : فإبن يؤازره.

قال الملك : فإن عدمه؟؟

قال الوزير : فصاعقة تحرقه وتريح منه العباد والبلاد.. هههههههههه...

...................

كفاية عليكو كده النهاردة..

احنا وهمّا..

- همّا :

1- لغات كتيرة ومختلفة " انجليزى - اسبانى - فرنساوى - المانى - ايطالى - برتغالى - روسى " ولغات تانية كتييييييير

2- مساحة مترامية الاطراف

3- عمرهم مكانو واحد "همه دول مستقلة عن بعضها كده من زماااااان "

4- عملات مختلفة من زمااااان " فرنك ومارك وجنيه استرلينى " وعملات تانية كتييييير

5- اديان كتييير " مسيحية ويهودية واسلام وهندوس وكفرة خالص ملهمش دين اولاد كلب " وكده يعنى

6- عندهم جزر كتير"وده بيأدى فى كتير من الاحيان لعدم السيطرة عليها نظرا لحركات الاستقلال"

7-متطرفين كتييييير

8- انظمة تعليمية مختلفة عن بعضها كتيييييير

9- دول كتييير" وصلو لحد دالوقتى 27 دولة تقريبا ولسه فيه دول هتنضم قريب جدا "

10- عدد سكانها كتييير " 730 مليون نسمة

...........................

- احنا : ههههههههه

1- لغة واحدة.." اللغة العربية "

2- الدين الاسلامى هوه السائد وبعد كده الديانة المسيحية وسلامتك وتعيش

3- عدد السكان اقل منهم بكتيييييير احنا 300 مليون نسمة

4- اى نعم المساحة اكبر منهم بس مش مترامية الاطراف زيهم يعنى حتة وحدة.

5- كنا دولة وحدة منذ اقل من 100 سنة.

6- كانت العملة وحدة منذ اقل من 100 سنة.

7- معندناش جزر "بضم الجيم وضم الزاى يا ظريف."

8- نسبة التطرف عندنا بالمقارنة بيهم لا تذكر.

9- انظمة تعليمية متشابهة الى حد كبير " كلها متخلفة "

10- عدد الدول اقل منهم 22 دولة بس

............

حد فاهم حاجة؟؟؟

ولا انا.

..

انا بستغرب ازاى اوروبا قدرت تعمل اتحاد وسمته الاتحاد الاوروبى وتوحد العملة وتلغى تأشيرات الدخول برغم كل هذه الاختلافات وغيرها كتير اكيد انتو عارفين حاجات تانية اوروبا مخبياها عنى.

واحنا برغم كل المميزات اللى عندنا دى مش قادرين نعمل اتحاد ان شا الله يكون الاتحاد السكندرى وللا حتى اتحاد جده؟؟؟!!!!..

يا بنت الناس

يا بنت الناس

غريب حِسِك؟

ومن حِسِك

عرفت خلاص

عفريت الهوى مسّك

............

جنانك حبة يهديكى

ويشهد ان انا ليكى

وقلبى يقول : قلبك من مماليكى

ولا وصف البلَغا يكفيكى

ولا سكر مصر يحليكى

يا بنت الناس

..........

يا بنت الناس

الحب ميفرق ما بين

اهل الفالصو واهل الماس

ولا يفرق حبيب عشانه وحيد

ولا يفرق حبيب ونّاس

..........

يا بنت الناس

فقير الهوى يحكيلك

ولو ماتو مراسيلك

أنا آجيلك

ولو عيّبتى على سنى

حديث الهوى. احلفلك

واقول والله انا جيلك

ولو قلتى مشيتى خلاص

برده هناديلك

دانا شمعة

تنور فى ليل العشق قناديلك

........

يا بنت الناس

ولو كنتى غريبة

والسنين غربت قلبى عن قلبك

سيوف الهوى تتسن وتتسم

واسرع من الهوا احاربك

اسيب الحرب شغالة

واطير فى عيونك

واعيش اللحظة والحالة

وتجرى بعيد.

لكن على مين؟؟

دا انا ماشى على دربك

........

يا بنت الناس

قوية وقوتك ضعفك

طاقية الاخفى تخفيكى

لكن على مين؟؟

أنا شايفك.

وحابسة الدمعة ف عنيكى

مانا عارفك..

فى لحظة وثانية بتغيِرى

ولا عمرك

تطيرى ف هوى غير

هوى طيرى.

........

يا بنت الناس

بحبك كلمة مش عارف

اجيبها منين؟؟

ولو حبك قاموس فدادين؟

هفُك كلامه جوه الطين

وأزرع حبه تحييكى

وتكتب كلمة وياها

وحبر الكلمة دمع العين

بعلو الصوت

" حبيبك نفسه يفدييكى "

ولو كانت حياتى فراق

وميجمعنا غير الموت

فأهلا بيه

أنا قاعد ومستنيه..

" ومستنيكى "

يا بنت الناس

دستور يا اسيادنا

اولا كل سنة وانتو طيبين وبخير بمناسبة اى حاجة..

بالنسبة للبوست انا عايزكو تفتّحو مخكو معايا شوية لأن الموضوع ده محتاج تفتيح مخ شويتين.

- بصفتى محامى ومبعرفش حاجة فى المحاماة عايز اطعن فى دستورية مواد فى القانون..ايه الهبل ده؟؟ الواد ده اتهبل وللا ايه؟؟

خليكو معايا وبلاش تمتمه..

- انا عايز اطعن فى المواد القانونية اللى بتجرم المخدرات..الواد ده يا أهبل يا بتاع مزاج؟؟.مش بقول بلاش تمتمه..

المهم ايوا المواد اللى بتجرم المخدرات انا عايز اطعن عليها بعدم الدستورية.من غير شتيمة حد يقوللى ليه؟؟

ايوا كده قولتولى ليه..

اقول على طول : دالوقتى المخدرات دى متحرمتش ايام النبى صلى الله عليه وسلم لأن مكنش فيه حاجه اسمها مخدرات..

يعنى هيه حلال؟؟!! لأ يا عم اصبر على رزقك .. هيه حرام بس مفيش نص مباشر بالتحريم لا فى القرآن ولا فى السنّة وانما الفقهاء حرموها بالقياس على الخمر لأن الخمر يذهب العقل وكل ما اذهب العقل فهو حرام وهذه المخدرات تذهب العقل والوعى فقياساً عليه حُرمت المخدرات بكل انواعها زى الحشيش والبانجو والهيروين والسجاير الفرط وخلافه..

ايه المتاهة دى انت عايز تقول ايه يا عم انت بالظبط؟؟

انا عايز اقول طالما ان المخدرات اساساً متحرمه فى الدين قياسا على الخمر وبما ان الخمر فى بلدنا غير مجرم فى القانون لا شربه ولا الاتجار فيه ولا تصنيعه ولا نقله ولا خلافه فلابد ان تكون المخدرات غير محرمة وذلك من باب اولى..

فإذا كان الكبير مش متحرم يبقى الصغير هو اللى يتحرم؟؟؟!!!!..او بمعنى اصح متجرم؟؟

حد هيقول الواد ده عايز البانجو يتوزع فى التموين والحشيش يتقسم ع العيال فى المدارس وللا ايه؟؟

لأ انا مش عايز كده. بس لَيجرمو الخمور ويمنعوها ويعاقبو اللى بيشربها ويعاقبو اللى بيتاجر فيها أو اللى بينقلها أو اى حد بيتدخل فى عمليات تصنيعها يا إما يسيبولنا المخدرات وتاخد حكم الخمور .. مش كده وللا ايييييييييييه؟؟؟

معلش شوية كلام فى الهجايس كده يمكن يكونو صح..

كروان

كروان وغنّا فى السما معروف غناه.

كل اللى يسمع ياليل وياها عين

يصرخ يقول الله .

يا سلام كمان لما يقول

بصوت مفتول الآه .

الصوت يدوى وسايب بصمته

عمرى ف يوم مانساه.

...

كروان متحكى قصتك

على ناى ربابه وللا أنون .

اصل البكا ويّا السهاد لجلك يهون .

عقل الحكيم

لجل السماع اصبح جنون.

علشان عيونك

لقيت ف نفسى مجنون عيون.

...

متغنى يا كروان واطربنا .

صدقنى يا كروان

سكوت عيونك يتعبنا.

قبل الغنا انده

بصوتك قربنا .

طلبك على راس الامير

بنبيذ عيونك وشربنا.

...

كروان وغنى ...

دى هتبقى جنه.

من غير كلام .

اسقى العوام

يا تمر حنه.

دا الصوت ده منّه.

...

كروان متقعد عندنا وتقول آهات .

وهاتبقى واحد مننا

تطرب حارتنا والناس سكات .

وتغنى حته من حب سومه .

وتشد نجمه من ليل نجاة.

...

كروان كفايه علينا عذاب

بلاش تغيب.

دا يوم غيابك

بيغنى الغراب .

غراب ده ايه؟!!

وايش جاب لجاب؟!

غنيلنا حته لصلاح جاهين

أو حتى غنوة لسيد حجاب.

...

وغنّى يا كروان .

دا القمر وسط النجوم سهران

مليون سنه بيعد فيهم

باين عليه سكران .

غنيله كمل صدمته

وصدق فكرته

عمره ماشاف ألوان .

عايش فى بحر من السواد

ويّا نجوم بيضا

عمره ماشافله اخوات

باين عليه زعلان.

...

غنى بصوتك واملا الفضا

واطرب قمرنا

يمكن..

على ايدك يتهدى.

والطير عشانك

مستنى يسمع غنوتك يخشى القضا.

...

واطرب ملايين البشر .

هز الحجر

فجر عيون السما .

راح تبكى بدموع المطر

وغنّى...

الرسوم البلطجية

هيه دى الترابيس والمجانص

هما دول القضاه الجدد

قانون زيادة الرسوم القضائية الجديد اللى هيتناقش فى مجلس الشعب فى خلال أيام.

وهيتم زيادة الرسوم القضائية ما بين 5 الى 10 اضعاف الرسوم القديمة"كتيييييييييير جدا"..

دا هيأدى ان القضاء هيبقى للاغنياء فقط..

وبكده الفقرا اللى هيبقى ليهم حق ومش قادرين يخدوه عن طريق القضاء هيخدو حقهم ده بايديهم.. وان ما عملوش كده هيروح حقهم ادراج الرياح"حلوة ادراج الرياح دى؟؟"..

ولكن انا عندى اقتراح للفقرا عشان يقدرو ياخدو حقهم خاصة اذا كانو فقرا والفقر ماسكهم علاوة على كده ضعفا وبالبلا ياخدهم..

* الفكرة هيه:

1-اذا كان الحق محل الخلاف يزيد على 10 الاف جنيه فالقضية دى تتحل بـ 200 جنيه.طبعا رقم زهيد بالمقارنة مع الرسوم القضائية اللى هتندفع.

2-اذا كان الحق محل الخلاف يزيد على 50 الف جنيه فالقضيه دى تتحل بـ 1000 جنيه. طبعا رقم زهيد بالمقارنة بالرسوم اللى هتندفع.

3- اذا كان الحق محل الخلاف يزيد على 100 الف جنيه فالقضيه دى تتحل بـ 2000 جنيه وهكذا.

* حد هيسألنى اشمعنا 200 ؛1000 ؛2000 وهكذا؟؟

لو اعرف حاجة اقول علطول..

جـ: 200 جنيه =2 ترابيس ومجانص +1 ترابيس

1000 جنيه = 10 ترابيس ومجانص + 3 ترباس + 2 مجانص

2000 جنيه = 20 ترباس ومجانص +6 ترباس بس + 4 مجانص بس.

*بمعدل (الترباسين بالمجانص 75 جنيه للواحد والترباس بس 50 جنيه والمجانص بس 50 جنيه)

ملحوظة: الجميع تابع لشركة الحاج ابراهيم اجسام -لأن كمال كان قافل ساعتها - منظمة البلطجة العالمية ..

.................

ايه رأيكو فى الرسوم البلطجية قصدى القضائية الجديده؟؟!!!!!!!!!!